Ekkewe Feioch Seni Ewe Kapas Allim
“Jiowa a fen epitiei pwe upwe aronga kapas allim ngeni chokkewe mi mosonoson. A tiinieilo ai upwe achipa chokkewe mi letipeta, . . . me auruuru chokkewe mi chupun meinisin.”—AISEA 61:1, 2, New World Translation.
1, 2. (a) Jises a pwisin pwaralo ika pwe i met, me ifa ussun? (b) Ikkefa ekkewe feioch an Jises kapas allim a wato?
LON eu ranin asoso me le poputaan an angangen afalafal, Jises a nom lon ewe sinakok lon Nasaret. Me ren ewe poraus, “ra ngeni ewe taropwe mi nnum, noun ewe soufos Aisea, me a suukaalo ewe taropwe mi nnum me a kuna ewe leeni ikewe a makketiu me ie: ‘Ngunun Jiowa a nom woi, pun a epitiei pwe upwe aronga ewe kapas allim.’ ” Jises a sopweilo le alleani ewe oesini. Mwirin a mottiu me a apasa: “Ikenai ewe wokisin oua keran rongorong a fen pwonueta.”—Luk 4:16-21, NW.
2 Iei ussun, Jises a pwaralo pwe i ewe sou esilei kapas allim mi pwonetiu lon ewe oesini, ewe chon apasawu poraus mi murinno, ewe chon uwei auruur. (Mattu 4:23) Mwa met ren ewe kapas allim Jises a esilefeili! A aporausa ekkewe chon rongorong: “Ngang saramen fonufan. Are emon epwe feito mwiri, esap mo fetal lon rochopwak, pun epwe wor ewe saramen manau ren.” (Jon 8:12) A pwal apasa: “Are ami oupwe nonnom lon ai kapas, enlet, oupwe nei chon kaeo. Iwe, oupwe sinei minne mi enlet, o minne mi enlet epwe angasalo ami.” (Jon 8:31, 32) Ewer, a nom ren Jises “kapasen manau esemuch.” (Jon 6:68, 69) Saram, manau, ngaselo—pwungun pwe ir feioch mi auchea!
3 Mwirin Pentekos 33 C.E., ekkewe chon kaeo ra sopweilo an Jises angangen esilefeili kapas allim. Ra afalafala ewe “kapas allim ussun ewe muu” ngeni Chon Israel me chon ekis. (Mattu 24:14; Fofor 15:7; Rom 1:16) Chokkewe mi auseling mi tongeni silei Jiowa Kot. Ra ngaselo seni fotek lon pekin lamalam me ra wiliiti kinikinin eu minefoon muu lon pekin ngun, “ewe Israelin Kot,” me chon ena muu repwe tongeni nemenem lon lang ren ar we Samol, Jises Kraist tori feilfeilo chok. (Kalesia 5:1; 6:16; Efisus 3:5-7; Kolose 1:4, 5; Pwarata 22:5) A ifa me aucheaan ekkena feioch!
Ewe Angangen Esilei Kapas Allim Ikenai
4 Ikenai, Chon Kraist mi kepit, fengen me eu mwich mi lallapelo, ewe “mwich mi lapalap,” are, “ekkewe ekkoch siip,” ra sopweilo le apwonueta wiiser mi pwalo me lon ei oesini, ewe wiis Jises a akkom wiiseni. (Pwarata 7:9; Jon 10:16) Pokiten ar angang, ewe afalafal ussun ewe kapas allim a fokkun watteelo lap seni a fen fis me loom. Lon 235 fonu, Chon Pwarata Jiowa ra feilo “aronga kapas allim ngeni ekkewe mi mosonoson . . . , achipa ekkewe mi letipeta, me esilei ngaseloon chon oolo me suukuloon mesen chon fotek; le esilei ierin an Jiowa chen me ranin an Kot kapwung; le auruuru chokkewe mi chupun.” (Aisea 61:1, 2, NW) Iwe, an Chon Kraist esilei kapas allim a chuen wato feioch ngeni chommong, me auruur mi enlet ngeniir mi nonnom fan “sokkun . . . riaffou meinisin.”—2 Korint 1:3, 4.
5 Pwungun pwe ekkewe lamalamen Kirisentom ra efisata sokkopaten angangen esilei kapas allim. Chommong lamalam ra tiinalo misineri ren ar repwe asoulangalo aramas lon ekkewe ekkoch fonu. Ren chok awewe, The Orthodox Christian Mission Center Magazine a repotei porausen ekkewe misineri seni ewe lamalam Orthodox lon Madagascar, oorun Afrika, Tanzania, me Zimbabwe. Iwe nge, lape ngeni chokkewe mi choni ekkewe lamalamen Kirisentom rese angolong lon ena angang. Mi sokkolo Chon Pwarata Jiowa pun ir meinisin ra achocho le esilei kapas allim. Ra silei pwe ar esilefeili ewe kapas allim a pwaralo enletin ar luku. Paul a apasa: “Sia luku ren letipach, o sia kuna pung; sia pwarata ren auach, o sia kuna manau.” Ika luku ese amwokutu emon ngeni fofforoch, ewe luku a malo.—Rom 10:10; Jemes 2:17.
Kapas Allim Mi Wato Feioch Mi Nomofochelo
6 Chon Pwarata Jiowa ra afalafala ewe kapas allim mi murinno seni meinisin. Ra suuki nour kewe Paipel ren ar repwe aiti ngeni aramas mi mochen rongorong pwe Jises a fangolo manauan ren an epwe ngeni aramas ewe tufichin pacheri Kot, musolon tipis, me ewe apilukulukun manau esemuch. (Jon 3:16; 2 Korint 5:18, 19) Ra esilei pwe Muun Kot a fen fisita lon lang fan ewe King mi kepit, Jises Kraist, me arapakkan chok ena muu epwe angei fofforingau seni fonufan me emmweni fforsefallin ewe paratis. (Pwarata 11:15; 21:3, 4) An Aisea we oesini a pwonuta ren ar aporausa ngeni chon orur pwe iei “ierin an Jiowa chen” lupwen aramas mi chuen tongeni etiwa ewe kapas allim. Ra pwal ouroura aramas pwe sia arap ngeni “ranin an Kot kapwung” lupwen Jiowa epwe apwungu chon fofforingau rese mochen aier.—Kol Fel 37:9-11.
7 Lon ei fonufan mi ur ren riaffou me osukosuk, iei ewe eu chok kapas allim mei wor feioch mi nomofochelo. Chokkewe mi etiwa ei kapas allim ra chooni eu mwichen pwipwi mi tipeeufengen. Rese mut ngeni sokkofesennin fonuer, einanger, are wouochur are woungauer ar repwe aimufesennir. Ra fen ‘pwilitalong wor ewe riri itan tong, ewe mi ririfengeni o aunusochuolo mettoch meinisin.’ (Kolose 3:14; Jon 15:12) Pwungun ei poraus a fen pwalo lon ewe ier lon eu fonuen Afrika. Lon eu soren aramas lon iolapen ewe fonu ra pokuta ren pungun nikasuk. Ekkoch sounfiu ra mochen siwili ewe muu. Ewe maun a sopwosopwolo me a wiliiti maun lefilen ekkoch einang. Aramas ra songeiti eu famili, ir Chon Pwarata, pokiten ra etiwa aramas seni pwal eu einang lon imwer. Ewe famili a polueni: “Chon Pwarata Jiowa chok ra nonnom lon imwach.” Ngeniir, sokkofesennin an aramas einang esor lamotan; an Chon Kraist tong—kaworen alillis ngeni chokkewe mi osupwang—a lamot. Emon aramaser, esap i Chon Pwarata, a apasa: “Aramasen ekkewe lamalam meinisin ra afangema chiener chon luku. Chon Pwarata Jiowa chok rese fori.” Chommong poraus mi wewe chok me ena a katowu seni ekkewe ekkoch fonu mi tatakkis pokiten ekkeei sokkun maun ra pwarata pwe Chon Pwarata Jiowa ra “tongei unusen ewe mwichen pwipwi.”—1 Piter 2:17, NW.
Ewe Kapas Allim A Siwili Lapalapen Aramas
8 Ewe kapas allim a weneiti met Paul a eiten ngeni ewe “manau lon ei fansoun, o pwal ren ewe manau epwe feito.” (1 Timoti 4:8) Ese chok awora eu apilukuluk mi lukuchar me amwarar fan iten mwach kkan nge, a pwal amurinnolo ewe “manau lon ei fansoun.” Emon me emon Chon Pwarata Jiowa a kuna emmwen lon an Kot we Kapas, ewe Paipel, fan iten an epwe atipeeufengenni manauan me letipen Kot. (Kol Fel 119:101) Lapalaper kewe ra sefosefallilo pokiten ar amaaraata pwung me tuppwol.—Efisus 4:24.
9 Ekieki mwo met a fis ngeni Franco. Manauan mi osukosuk pokiten an song. Lupwen mettoch rese fisoch, a mmen watte an song me a ataielo pisek. Puluwan we a kaeo ren Chon Pwarata Jiowa, me, ekis me ekis, lapalaper mi fich ngeni Chon Kraist a alisi Franco le miritiiti ewe lamoten an epwe siwili lapalapan. A kaeo ewe Paipel ren ekkewe Chon Pwarata me lo, lo, lo, a poputa le nemeni meefian kewe me pwaralo kinamwe, ekkewe uwaan ngun mi fel. (Kalesia 5:22,23) Atewe emon leiin ekkewe 492 ra papatais lon Belgium lon ewe 2001 service ier. Ekieki mwo pwal Alejandro. Ena anuwol a kon feiengau ren safeien opuchopuch pwe a nonnom chok lon ewe leenien champang ren an epwe kutta pisek a tongeni amomoolo me angei moni fan iten safeien opuchopuch. Lupwen Alejandro a 22 ierin, Chon Pwarata Jiowa ra etiwa le kaeo ewe Paipel, me a tipeeu ngeni. Atewe a alleani ewe Paipel iteiten ran me a fiffiti ekkewe mwich. A muttir limeti manauan me mwen a lu seni wonu maram, Alejandro a tongeni fiti ewe angangen afalafal—emon leiin ekkewe 10,115 chon afalafal lon ewe ier lon Panama.
Ewe Kapas Allim—Eu Feioch Ngeni Chokkewe Mi Mosonoson
10 Aisea a oesini pwe ewe kapas allim epwe esile ngeni ekkewe mi mosonoson. Iwe, io ekkewe mi mosonoson? Chokkana ekkewe aramas lon ewe puken Fofor, ekkewe mi “fil ngeni manau esemuch.” (Fofor 13:48) Ir aramas mi mosonoson seni ekkewe sokkopaten mwichen aramas meinisin. Ra suuki letiper ren ar repwe etiwa ewe porausen enlet. Ra kaeo pwe ar foffori letipen Kot a wato feioch mi lapalap ese lifilifil met ewe fonufan epwe awora. (1 Jon 2:15-17) Iwe, ifa ussun Chon Pwarata Jiowa mi tongeni achungu letipen aramas lon ar angangen esilei ewe kapas allim?
11 Iwe, ekieki mwo fofforun ewe aposel Paul, ewe a mak ngeni Chon Korint: “Iwe, ngang, pwii kena, fansoun ua feilo remi, use mo feilo pwe upwe aronga ngenikemi ewe pwarata usun Kot ren kapasen lamalam tekia are tipatchem. Pun ua chok ekieki pwe usap sinei och leimi, pwe Jises Kraist chok, atewe mi irapenges.” (1 Korint 2:1, 2) Paul ese sotun ainga aramas ren watteen an sile. A asukula aramas poraus mi enlet seni lang chok, ekkewe poraus mi makketiu lon ewe Paipel. Nengeni mwo pwal met Paul a pesei chienan we, ewe chon esilei kapas allim itan Timoti: “Kopwe esineifeili ewe kapas; kopwe achocho ngeni.” (2 Timoti 4:2) Timoti epwe afalafala “ewe kapas,” an Kot we poraus. Paul a pwal mak ngeni Timoti: “Kopwe achocho ngeni om kopwe achengicheng me ren Kot, usun chok emon chon angang esap saueiti och mettoch, emon mi forfichi lon an anganga ewe kapas mi enlet.”—2 Timoti 2:15.
12 Chon Pwarata Jiowa ra fori alon an Paul we leenien appiru, me ra pwal fori alon an kewe kapas ngeni Timoti. Ra esinna ewe manaman lon an Kot we Kapas me ra nounoufichi ewe Paipel atun ar aiti ngeni chon orur ekkewe kapasen apilukulukoch me auruur. (Kol Fel 119:52; 2 Timoti 3:16, 17; Ipru 4:12) Pwungun pwe ra nounoufichi puken aweween Paipel ren ar repwe alisi aramas le pwisin alapalo ar sile ussun ewe Paipel. Nge fansoun meinisin ra sotun aiti ngeni aramas ekkewe kapas lon ewe Paipel. Ra silei pwe ewe Kapas a pop seni ngunun Kot epwe achungu letipen chokkewe mi mosonoson. Me ar nounou ewe Paipel iei ussun a pwal apochokkula pwisin ar luku.
“Auruuru Chokkewe Mi Chupun”
13 Mei wor chommong osukosuk lon ewe ier 2001 me chommong aramas ra osupwangen auruur. Fan ewe September a fis an ekkewe aramas ingau maunei ewe World Trade Center lon New York me ewe Pentagon mi kan ngeni Washington, D.C. lon Merika. Ekkeei foffor ra aosukosuka unusen ewe fonu! Me ren wiiser, Chon Pwarata Jiowa ra achocho le awora ‘auruur ngeni chokkewe mi kechiu.’ Ekkoch porauser epwe pwarata ifa ussun ra foffori.
14 Emon Chon Pwarata mi aea lape ngeni an fansoun le esilei kapas allim a fos ngeni emon fefin ppen ewe aal me a kapas eis ngeni neminnewe ifa ekiekin ussun fofforun ekkewe aramas ingau. Ewe fefin a poputa le kechiu. A apasa pwe a meefi letipechou me a mochen awora alillis. Ewe Chon Pwarata a ereni ewe fefin pwe Kot a tongei aramas meinisin, me a alleani Aisea 61:1, 2. Ekkeei kapas mi pop seni ngunun Kot a fen murinno ngeni ewe fefin. A apasa pwe aramas meinisin ra chupun. A nouni echo tract me a tingor ika ewe Chon Pwarata epwe tongeni chuuri i lon imwan.
15 Ruuemon Chon Pwarata mi esilei kapas allim ra chuuri emon mwan mi angang lon an we sooko. Ra apasa pwe ra mochen aiti ngeni ekkoch kapas lon ewe Paipel mi tongeni awora auruur pokiten ewe feiengau lon ewe World Trade Center. Ewe mwan a tipeeu me ra allea ngeni seni 2 Korint 1:3-7, ikewe a mak ie ekkeei kapas: “Auruur . . . a fokkun watte lon Kraist.” Ewe mwan a aucheani pwe chon oruun kewe, ekkewe Chon Pwarata ra sotun le alisi aramas ren och mettoch mi auruuruur me a apasa: “Amwo pwe Kot epwe efeiochukemi pokiten ami angang mi murinno.”
16 Emon Chon Pwarata a chuurisefalli aramas mi mochen auseling me a fos ngeni noun emon fefin a fen piin fos ngeni me a awewei pwe a mochen silei ifa ussun chon oruun kewe mwirin ewe feiengau mi keran fisita. Ewe mwan a fokkun ingeiti pwe ewe Chon Pwarata epwe aea an we fansoun le chuuri aramas me ppii a ifa ussur. A apasa pwe an angang a kkan ngeni ewe World Trade Center lupwen a fis ewe osukosuk me a kuna mettoch meinisin. Lupwen ewe mwan a eani kapas eis ika pwata Kot a mutata riaffou, ewe Chon Pwarata a alleani ekkoch wokisin seni ewe Paipel, kapachelong Kol Fel 37:39: “Amanauen ekkewe aramas mi pung a nonnom ren ewe SAMOL; i mi ar leenien op lon fansoun riaffou.” Ewe mwan a eis ika ifa ussun ewe Chon Pwarata me an we famili, me a mochen pwe epwe liwinto sefal, me a apasawu watten an kilisou pwe ewe Chon Pwarata a feito.
17Atun ar chuchchuuri chon oruur kewe lon ekkewe ran mwirin ewe feiengau, ekkewe Chon Pwarata ra auruuru emon fefin, emon leiin ekkewe fite ngerou mi chupun. Neminnewe a fokkun osukosuk pokiten met a fen fisita me a auseling lupwen ra alleani Kol Fel 72:12-14: “Pun a angasalo ekkewe aramas mi osupwang lupwen ra koko, ekkewe mi woungau, o pwal ekkewe esor ar chon alillis. A lolileniesini ekkewe aramas mi apwangapwang, o ekkewe mi osupwang. A penmanauer o angaserelo seni riaffou o mwanesol; o chaar a auchea mwen mesan.” A ifa me lamoten ekkena kapas! Ewe fefin a tingor pwe ekkewe Chon Pwarata repwe alleanisefalli ekkewe wokisin me a etiweer le tolong lon imwan we pwe epwe sopwowopwolo ar porausfengen. Ra poputa le kaeofengen lon ewe Paipel.
18 Emon Chon Pwarata a angang lon eu restaurant lon eu telinimw mi wouoch me chon ewe telinimw rese kan auselinga ewe kapas allim ussun ewe Muu. Mwirin ewe feiengau, chon ewe telinimw ra osukosuk. Pwinin alimu mwirin ewe feiengau, ewe restaurant manager a etiwa meinisin le towu lukun me amwochu candle ren ar repwe chechchemeni chokkewe mi nninniilo. Pokiten a sufoliiti meefier, ewe Chon Pwarata a chok towu lukun me a uta ppen ewe aal. Ewe manager a silei pwe atewe emon Chon Pwarata, me mwirin chechchemenien ekkewe mi malo, neminnewe a tingor pwe epwe emmweniir meinisin lon iotek. Ewe Chon Pwarata a tipeeu, me lon an iotek a fos ussun watteen ewe letipeta ekis meinisin nge a apasa pwe resap kechiu pokiten esor apilukuluk. A fos ussun ewe fansoun lupwen esap chuen fiffis ena esin feiengau me a apasa pwe meinisin mi tongeni arap ngeni ewe Koten auruur ren ar angei sile mi enlet seni ewe Paipel. Mwirin an apasa “Amen,” ewe manager—fengen me lap seni 60 aramas lukun ewe restaurant—ra kilissou ngeni ewe Chon Pwarata, foropachei, me ra apasa pwe ina ewe iotek mi murinno seni meinisin ra fen rongorong.
Eu Feioch Ngeni Aramas
19 Akkaewin lon ekkeei ran, ekkewe sopw me telinimw ra feioch pokiten angangen Chon Pwarata Jiowa—me chommong ra fen apasa ena. Ewer, ifa ussun eu mwichen aramas mi alisata kinamwe, wenechar, me manau mi limelimoch resap amurinnolo leenier? Lon eu fonuen Central Esia, ekkewe Chon Pwarata ra fos ngeni emon meilapen polis a fen retire. Atewe a apasa pwe me loom a wiisen atittina sokkopaten lamalam. Lupwen a atittina Chon Pwarata Jiowa, a fen ingeiti ar wenechar me foffor mi murinno. A pwal saani ar luku mi lukuchar me ar kewe afalafal mi alongolong won ewe Paipel. Ei mwan a poputa le kaeo ewe Paipel.
20 Seni ekkewe porausen afalafal lon ei lesen, ir ekkoch me leiin ekkewe fite ngerou epwe fen tongeni awewe won, a ffat pwe Chon Pwarata Jiowa ra fokkun achocho atun ewe 2001 service ier.a Ra fen fos ngeni fite milion aramas, ra auruuru chommong mi letipeta, me ar angangen esilei kapas allim a sopwoch. Mei wor 263,431 mi fangolo manauer ngeni Kot me mwirin ra papatais. Won unusen fonufan, choochoon ekkewe chon afalafal a lapelo won 1.7 percent. Me ekkewe 15,374,986 mi fiti Achechchemenien Maloon Jises ra pwarata pwe a chuen watte ewe angang. (1 Korint 11:23-26) Amwo sipwe kukkutta chon mosonoson mi mochen etiwa ewe kapas allim. Me atun ierin an Jiowa chen a sopwosopwolo, amwo sipwe auruuru “chokkewe mi letipeta.” A ifa me murinnoon ewe wiis mi auchea a nom rech! Sipwe enniwili kapasen an Aisea kewe kapas: “Upwe fokun pwapwa ren ewe Samol mi Lapalap, nguni epwe mwanek ren ai Kot.” (Aisea 61:10) Amwo pwe Kot epwe chuen nounikich atun an apwonueta ei oesini: “Pun usun ira ra pwukuta won fanufan, pwal usun ira mi fot lon tanipi ra marita, iei usun Kot ewe Samol mi Lapalap epwe apwuku pwung me kapasen ingemwar fan mesen chon ekewe mwu meinisin.”—Aisea 61:11.
[Footnotes]
a Ewe chart won pekin taropwe 17 ngeni 20 a affata repotun angangen Chon Pwarata Jiowa atun ewe 2001 service ier.
En Mi Chechchemeni?
• Ifa ussun chokkewe mi mosonoson ra feioch seni ewe kapas allim Jises a esilei ngeniir?
• Ikkefa ekkewe feioch a tori aramas mi etiwa ewe kapas allim noun Jises kewe chon kaeo ra esilei ngeniir lon ewe aewin senturi?
• Ifa ussun chon etiwa ewe kapas ra kuna feioch ikenai?
• Met meefiach ussun wiisach mi auchea le esilei kapas allim?
3. Ifa ewe kapas allim noun Jises kewe chon kaeo ra afalafala?
4. Ifa ussun ewe afalafal ussun ewe kapas allim a pwonueta ikenai?
5. Ifa ussun Chon Pwarata Jiowa ra sokko seni ekkewe lamalamen Kirisentom ren afalafalen ewe kapas allim?
6. Ifa ewe kapas allim mi esilefeil ikenai?
7. Menni poraus a pwaralo ewe tipeeu lefilen Chon Pwarata Jiowa, me met popun ena esin tipeeu a nom reer?
8, 9. (a) Ifa ussun chokkewe mi etiwa ewe kapas allim repwe siwili manauer? (b) Ikkefa ekkewe poraus mi awewei manamanen ewe kapas allim?
10. Io kewe ra etiwa ewe kapas allim, me ifa ussun ekiekir a siwil?
11. Me ren Paul, ifa ussun sipwe afalafala ewe kapas allim?
12. Ifa ussun Chon Pwarata Jiowa ikenai ra lefareni an Paul kewe kapas me an leenien appiru?
13. Lon ewe ier 2001, menni feiengau a fen efisi osupwangen auruur?
14, 15. Ifa ussun, fan ruu, Chon Pwarata ra tongeni nounoufichi ewe Paipel ren ar repwe auruuru aramas mi kechiu?
16, 17. Ikkefa ruu porausen afalafal mi pwaralo manamanen ewe Paipel fan iten kalisitaan chokkena mi letipechou are osukosuk pokiten feiengau watte?
18. Ifa ussun emon Chon Pwarata a alisi chon orun kewe lupwen ra mochen pwe epwe iotek fan iter?
19. Menni poraus a affata pwe ekkoch ra aucheani an Chon Pwarata Jiowa akkalleasochisi alluk?
20. (a) Met sia kaeo seni repotun an Chon Pwarata Jiowa kewe angang lon ewe ier? (b) Met popun sia luku pwe a chuen wor angang watte sipwe fori, me ifa ussun meefiach ussun wiisach mi auchea le esilei kapas allim?
[Chart on page 17-20]
2001 SERVICEYEAR REPORT OF JEHOVAH’S WITNESSES WORLDWIDE
(See bound volume)
[Pictures on page 13]
Chon Pwarata Jiowa ra chechchemeni wiiser le esilei ewe kapas allim
[Pictures on page 15]
Chokkewe mi etiwa ewe kapas allim ra fiti eu mwichen pwipwi mi tipeeu won unusen fonufan