Auruur ren ach Silei Poraus mi Enlet Ussun Kot
REN ekkoch aramas, minne ewe Paipel a apasa ussun an Kot tong me umoumoch a kan efisata kapas eis mi aosukosuker. Iei ar kapas eis: Ika Kot a mochen amoielo fofforingau, me a silei ifa ussun an epwe amoielo, me a nom ren ewe manaman fan iten an epwe amoielo, iwe, pwata a chuen wor chommong fofforingau? Ren chokana, ar osukosuk a weneiti ifa ussun repwe atipeeufengenni ekkeei ulungat mettoch: (1) Sokkun manaman meinisin a nom ren Kot; (2) Kot mi tong me a murinno; me (3) a chuen fiffis mettoch mi fokkun eriaffou. Ra kan ekieki pwe pokiten ena aulungatin poraus a wenewenen pwung, iwe, neman eu me lein ekkena ruu poraus mi akkom mwan esap tufich an epwe pwung. Ra meefi pwe eli Kot esap tufichin aukatiu fofforingau, are ese mochen aukatiu.
Ekkoch ran mwirin taloon ewe World Trade Center lon New York, emon sou emmwen mi itefoulo lon pekin lamalam a apasa pwe “Aramas ra fen eisiniei fan fitepuku ika met popun Kot a mutata mettoch mi ngau me riaffou. Upwe akkaffat pwe use wesewesen silei unusen poluen ena kapas eis, iwe, use pwal kinamwe ren ukuukun ai weweiti ena poraus.”
Emon professor lon pekin lamalam a uwawu meefian ussun alon ena emon, iwe, a makkei pwe a ingeiti “ewe sokkun poraus mi pwung” ena sou emmwen lon pekin lamalam a afalafal ussun. A pwal tipeeu ngeni ekiekin emon sou silelap, nge iei makkeian: “An aramas resap tufichin weweiti ewe popun mi tottorikich riaffou a pacheri ewe popun an aramas resap tufichin weweiti mettoch meinisin ussun Kot.” Nge achiou pwe esap fokkun tufich ach sipwe weweiti ewe popun Kot a mutata fofforingau?
Poputaan Fofforingau
Alon Paipel a mwaalfesen me alon ekkan sou emmwen lon pekin lamalam, pun sap minne a era pwe esap tufich ach sipwe weweiti ewe popun Kot a mutata fofforingau. Eu poraus mi wenewenen lamot fan iten ach sipwe tufichin weweiti ewe popun an a fiffis fofforingau, iei ach miritiiti pwe sap minne Kot a forata fonufan pwe epwe wor fofforingau won. Lupwen a forata ewe akkaewin pean aramas, ir mi unusoch, iwe, esor tipis rer. Jiowa a nengeni forian kewe, iwe, a era pwe a “fokun och.” (Keneses 1:26, 31) Letipan ngeni Atam me If ar repwe waasi ewe Paratisin Ichen pwe epwe choulo won unusen fonufan, epwe masou ren aramas mi pwapwa, nge repwe nom fan an nemenem mi longolong won tong.—Aisea 45:18.
Fofforingau a poputa ren emon ngun mi tuppwol ngeni Kot akkom, nge mwirin, a tipeni an aramas repwe fel ngeni i. (Jemes 1:14, 15) An u ngeni Kot a pwalo won fonufan lupwen a etipetipa ewe akkaewin pean aramas ar repwe fiti i le u ngeni Kot. Atam me If rese alleasochisi an Kot we alluk mi ffat, allukun ar resap ochei are attapa uwaan ewe iraan silei och me ngau, nge ra kini och uwaan, iwe, ra ochei. (Keneses 3:1-6) Ren ar na foffor, sap minne ra chok alleasolapa Kot, nge ra pwal pwarata pwe ra tipeni ar repwe uta lon pwisin ar nemenem.
A Fisita Eu Popun Alongolongun Kapwung
Ena fofforun u ngeni Kot lon Ichen a efisata eu popun alongolongun kapwung, iwe, a ussun ita eu kapas eis are minen emiisfengen mi kku meinisin mi manau lon lang me fonufan. Ekkena aramas mi u ngeni Kot ra efisata tipemwaramwar ussun an Jiowa nemenem, weween, a ussun ita ese pwung lapalapen an nemeni forian kewe. A ita wor an ewe Chon Forata aramas pwuung, pwuungun an epwe alluk ngeni aramas pwe repwe alleasochisi i lon mettoch meinisin? Epwe ita murinnolo nonnomun aramas ika repwe uta lon pwisin ar nemenem?
Lapalapen an Jiowa pwakini ena minen emiisfengen mi efisata tipemwaramwar ussun an nemenem a affata pwe a fokkun itepok me ruuepek le pwarata tong, pwung, tipachchem, me manaman. A tongeni aea an manaman le nnielo chokana mi u ngeni i. Pokiten a wor an pwuung le fori ena mettoch, eli epwe ussun ita esap wor mwaallin an epwe ina ussun. Nge ika epwe fori ena mettoch, esap pwalo pwungun ekkewe popun alongolongun kapwung mi fisita. Kot a pwal tongeni omusalo chok ewe tipis. Eli meefien ekkoch ikenai pwe ina eu foffor mi pwarata tong. Iwe nge, ena mettoch esap pwal awora poluen an Setan we poraus, porausen an epwe ita murinnolo nonnomun aramas ika repwe pwisin nemenemeniir. Pwal och, ena mettoch esap ita etipetipa pwal fitemon ar repwe rikilo seni alen Jiowa? Aramas repwe kukkuna riaffou tori feilfeilo chok ika ena mettoch epwe fis.
A mmen tipachchem Jiowa, pun a mut ngeni aramas ar repwe pwisin uta lon ar nemenem ren och fansoun. Inaamwo ika ena mettoch epwe mutata fofforingau an epwe fiffis ren ekis fansoun, nge epwe kawor ngeni aramas och fansoun ren ar repwe tufichin anneta ika epwe murinno ar nemeni pwisin ir lukun an Kot nemenem, weween, repwe nom fan pwisin ar kewe alluk fan iten minne mi pwung me mwaal. Iwe, met mwiriloon? Uruwoon aramas a ur ren porausen maun, pwungungau, kirikiringau, me riaffou. Sopwongauen ewe fofforun u ngeni Jiowa epwe pwarifocheilo pwungun ekkewe popun alongolongun kapwung mi fisita lon Ichen.
Nge Kot a fen pwarata an tong ren an awora Noun we, Jises Kraist, ewe mi fangolo manauan, manauen aramas, pwe epwe eu asorun penmanauen aramas. Ina ewe mettoch mi atufichi aramas mi alleasochis ar repwe ngaselo seni ewe kapwungun tipis me malo mi fisita pokiten an Atam alleasolap. Ewe moon kepich a fen suuki ewe al mi ale ngeni manau esemuch fan iten meinisin mi pwarata ar lukuluk won Jises.—Jon 3:16.
Mi nom rech an Jiowa kapasen achip pwe riaffoun aramas esap nomofoch. Ewe sou makkei kol mi fel a makkei pwe “Ekiselo chok nge ewe emon mi ngau esap chuen nom. Kopwe wenewenen nengeni leenian, nge esap chuen nom. Nge ekkewe mi mosonoson repwe fonueni fonufan, iwe, repwe wesewesen mmeseik ren somoloon kinamwe.”—Kol Fel 37:10, 11, NW.
Nukunukoch me Pwapwa lon Mwach kkan
Pwonutaan an Paipel kewe oesini a pwarata pwe mi arapoto ewe fansoun Kot epwele aukatiu samau, letipechou, me malo. A tori ewe aposel Jon eu langepwi, iwe, nengeni mwo kunaan we mi amwarar ussun ekkewe mettoch epwe fis lon mwach kkan. Iei makkeian: “Iwe, ua kuna eu lang mi fo, pwal eu fonufan mi fo, pun ewe popun lang me ewe popun fonufan ra fen morelo, o ese chuen wor sat. . . . O Kot epwe pwisin nonnom rer [aramas]. I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.” Jon a rong ei kapas mi menlapei nukucharen ekkena pwon: “Kopwe makketiu ei mettoch, pun ekkeei kapas mi tuppwel o enlet.”—Pwarata 21:1-5.
Epwe fet ekkewe fite pilion aramas mi fen malo mwirin ewe fofforun u ngeni Kot lon Ichen? Jiowa a pwonei pwe epwe amanauasefalli ekkewe aramas mi okonnut lon malo iei. Iei alon ewe aposel Paul: “Mi wor ai apilukuluk allim lon Kot . . . pwe epwe fis ewe manausefal ren ekkewe mi pung pwal ekkewe rese pung.” (Fofor 24:15) Chokana repwe eani ewe apilukulukun ar repwe manau lon eu fonufan “ikewe pung epwe nonnom ie.”—2 Piter 3:13.
Ussun an emon sam mi tongei noun epwe mut ngeni an epwe reirei ika a silei pwe epwe ochulo manauan mwirin, inaamwo ika epwe cheuch inisin ren, iwe, pwal ussun chok, Jiowa a mutata an aramas kukkuna fofforingau won fonufan ren och fansoun. Nge, feioch esemuch epwe souni aramas meinisin mi achocho le foffori letipen Kot. Paul a awewei pwe “Ekkewe mettoch mi foruta ra nom fan lichipung, esap ren pwisin letiper nge ren letipen ewe emon mi akkota, won ewe apilukuluk pwe ekkewe mettoch mi foruta repwe ngaselo seni fotekin tipis, iwe, repwe kuna ewe fansoun mi lingemwarar, fansoun ngaselo seni fotek an noun Kot kewe.”—Rom 8:20, 21, NW.
Ina wesewesen poraus mi murinno—nge esap ewe esin sia kukkuna lon tv are alleani lon simpung. Ina ewe poraus mi murinno seni meinisin, nge a feito seni “ewe Koten sokkun aururu meinisin,” ewe mi enletin tongeikich.—2 Korint 1:3.
[Pictures on page 6]
Seni lom lom tori ikenai a pwalo pwe aramas resap tufichin pwisin nemenemeniir lukun Kot
[Credit lines]
Eu famili lon Somalia: SASING SENI UN 159849/M. GRANT; kensi pakutang: sasing seni USAF; leenien fotek: sasing seni U.S. National Archives