Kopwe Pwapwaesini Om Pwisin Kaeo An Kot We Kapas

“Upwe ekkekieki ussun om angang meinisin, o ekieki ussun om kkewe foffor.”—KOL FEL 77:​12, NW.

1, 2. (a) Pwata a lamot ach sipwe isetiu och fansoun pwe sipwe ekkekiek? (b) Met weween “ekkekiek”?

POKITEN kich noun Jises kkewe chon kaeo, sipwe ekkekieki ussun ach ririoch ngeni Kot me ekkewe popun sipwe angang ngeni. Iwe nge, pokiten lap ngeni aramas meinisin ikenai ra kon osukosuk iteiten ran, rese kkan awora fansoun ar repwe ekkekiek. Ra chok chechchei pisek me pwapwaan fonufan. Epwe ifa ussun sipwe tongeni tumunukich seni ena sokkun manau mi chok poon? Ussun chok ach isetiu fansoun iteiten ran fan iten ekkewe foffor mi lamot ngeni manauach, awewe chok, ren ach sipwe mongo me annut, epwe pwal lamot ach sipwe pwal awora fansoun iteiten ran fan iten ach sipwe ekkekieki ussun fofforun Jiowa kkewe.​—Tuteronomi 8:3; Mattu 4:4.

² En mi kkan awora fansoun fan iten om kopwe ekkekiek? Ewe kapas ekkekiek a wewe ngeni an emon unusen ekiek won nge esap rikirik. Iwe, ewe kapas afanniochu a wewe ngeni an emon epwe eani ekiek mi alollol. Iwe, epwe met weween ngenikich ena mettoch?

³ Iei eu, epwe achema ngenikich ussun minne ewe aposel Paul a mak ngeni chienan we chon angang Timoti: “Kopwe achocho ngeni alleani Paipel, o fonou, o afalafal. . . . Kopwe tumunuochu o achocho ngeni ekkeei mettoch, pwe om fefeita epwe pwapwalo ngeni aramas meinisin.” Ewer, aramas repwe kukkutta seni emon an epwe feffeita, iwe, alon Paul a pwarata pwe an emon ekkekieki won ekkewe mettochun luku a riri ngeni an feffeita. Iwe, a pwal enlet ikenai. Ika sipwe feffeita lon pekin luku, a chuen lamot ach sipwe “tumunuochu” me “achocho ngeni” ekkewe mettoch lon an Kot we Kapas.​—1 Timoti 4:​13-​15.

⁴ Ewe fansoun murinno om kopwe ekkekiek epwe alongolong won fofforun pwisin en me om famili. Chommong ra kakkaeo ewe lesenin ran seni Paipel kulokun lesossor lupwen repwe alleani seni ewe puk Examining the Scriptures Daily. Iwe, orun 20,000 chon angang lon ekkewe imwen Bethel won unusen fonufan ra poputa ar kkewe ranin angang ren ar kaeo ewe lesenin ran seni ewe Paipel ukukun 15 minich. Inaamwo ika fitemon chok me lein ewe familien Bethel ra apasau poraus won iteiten lesossor, nge ekkewe ekkoch chon Bethel ra ekieki won minne ra rong me alleani. Pwal ekkoch chon Pwarata ra ekieki won an Jiowa we Kapas atun repwe sai ngeni ar leenien angang. Ra auseling ngeni ekkewe kasetin allean ewe Paipel me ewe Watchtower me Awake! mi kawor lon ekkoch fosun fonufan. Chommong fefin ra akkauseling ngeni ekkena kaset atun ra foffori ar kkewe angang. Weween, ra appiru ewe sou makkei kol itan Asaf, iwe, a makkei: “Upwe chechemeni fofforun Jiowa; upwe chechemeni om kkewe fofforun lom mi amwarar. Upwe ekieki ussun om angang meinisin, o ekieki ussun om kkewe foffor.”​—Kol Fel 77:11, 12.

Ekiek Pwung a Atoto Feioch

⁵ Lon ach ei fansoun, pokiten chommong aramas ra nouni TV, fitio, me computer, lap ngeni aramas meinisin rese chuen akkalleani puk. Nge ita esap ina ussun lein Chon Pwarata Jiowa. Pwungun pwe ach alleani Paipel a ussun chok efoch sal mi aririkich ngeni Jiowa. Fite ngerou ier lom, Josua a wii Moses le emmweni ekkewe chon Israel. Ren an epwe kuna feioch seni Jiowa, a lamot ngeni Josua an epwe pwisin alleani an Kot we Kapas. (Josua 1:8; Kol Fel 1:​1, 2) Iwe, a chuen lamot ikenai. Iwe nge, pokiten a nafangau ar fiffiti sukul, a weires ngeni ekkoch ar repwe allea. Iwe, met epwe tongeni alisikich pwe sipwe mochen alleani me kaeo an Kot we Kapas? Sipwe tongeni kuna poluen ena kapas eis lon alon King Salomon mi mak lon An Salomon Fos 2:​1-6. Kese mochen kopwe suuki noum we Paipel me alleani ekkeei wokisin. Mwirin, sipwe kaeofengenniir.

⁶ Iwe, me le poputaan, sia kuna ei kapasen pesepes: “Nei, ika kopwe etiwa ai kkewe kapas o iseis ekkewe alluk lon lelukom, iwe, au selingom ngeni tipachem o suuki lekukom pwe kopwe wewe ren; . . .” (An Salomon Fos 2:​1, 2, NW) Met sipwe kaeo seni ekkeei kapas? Iwe, a aiti ngenikich pwe wisen emon me emon leich ach sipwe kaeo an Kot we Kapas. Nengeni ewe poraus, “ika kopwe etiwa ai kkewe kapas.” Ena kapas “ika” a lamot pun lap ngeni aramas meinisin rese kkan alleani an Kot we Kapas. Ika sipwe pwapwaesini ach kaeo an Kot we Kapas, epwe lamot ach sipwe mochen etiwa me aucheani alon Jiowa kkewe ussun chok eu pisek auchea, eu mettoch sisap mochen likitalo. Sisap mut ngeni nonnomun manauach ran me ran an epwe kon aosukosukakich are arikikich pwe sipwe meefi pwe a lamot kisikis an Kot we Kapas, are pwal mwo nge tipemwaramwareiti.​—Rom 3:​3, 4.

⁷ Kich mi wesewesen “tuttumunu” me auselingoch lupwen emon a awewei an Kot we Kapas lon an chon Kraist kkewe mwich? (Efisus 4:​20, 21) Kich mi ‘etiwa ren letipach’ pwe sipwe mirit? Eni ewe chon afalafal ese kon lien lipwakoch, nge atun a nounou an Kot we Kapas, a fich ngenikich ach sipwe auselingoch. Pwungun pwe ika sipwe eani tipatchem seni Jiowa, a lamot ngenikich ach sipwe fiffiti ekkewe mwich. (An Salomon Fos 18:⁠1) Ekieki mwo ussun an emon lichipung ika a etiwalo ewe mwich lon ewe ruum asan lon Jerusalem lon Pentekos 33 C.E.! Inaamwo ika ena mwich a fokkun amwarar lap seni ach kkewe mwich, nge sia chuen kakkaeo ewe Paipel, ewe puk ach kkewe luku a alongolong won. Ina minne, iteiten mwich meinisin repwe tongeni alisikich ika sipwe auselingoch me alleani seni lon pwisin nouch kkewe Paipel.​—Foffor 2:​1-4; Ipru 10:24, 25.

⁸ Iei sopwosopwolon alon ewe king mi tipatchem: “Ika kopwe sio ngeni Kot pwe epwe fang ngonuk om silelap, . . . ” (An Salomon Fos 2:⁠3, NW) Ifa ewe sokkun ekiek are ngun ekkena kapas ra aiti ngenikich? Iwe, a fokkun mochen an epwe weweiti alon Jiowa! A pwarata an mochen kaeo pwe epwe kuna mirit me wewefichiti letipen Jiowa. Pwungun pwe epwe lamot angang weires, ina minne, sipwele sopweilo le kaeo alon Salomon me an we kapas awewe.​—Efisus 5:​15-17.

⁹ Iwe, a sopweilo le apasa: “Ika kopwe kutta tipachem usun om kutta silifer, ika ussun om kutta pisek auchea mi monomon, . . . ” (An Salomon Fos 2:⁠4, NW) Ei poraus a achema ngenikich ussun ekkewe chon tu pwul seni lom lom feffeito mi kukkutta silifer me kolt. Ekkoch mwan ra fen nielo aramas fan iten kolt. Pwal ekkoch ra chok kukkutta ukukun ttamen manauer. Iwe nge, ifa wesewesen aucheaan kolt? Awewe chok, ika ka fetalfeil lon eu fonupoon me lukunma seni om kaka, met kopwe filata: efoch fochun kolt are eu kapen konik? Iwe nge, a fokkun watte an aramas tinikken le kukkutta kolt, inaamwo ika a chok sissiwil aucheaan!a Iwe, epwe ita watte seni ena ach tinikken le kukkutta tipatchem, mirit, me weweoch ussun Kot me letipan! Nge epwe ifa feiochuch seni ena sokkun achocho?​—Kol Fel 19:​7-​10; An Salomon Fos 3:​13-​18.

¹⁰ A sopweilo an Salomon afalafal, a era: “Are kopwe fori iei ussun, mwirin kopwe weweiti aucheaan om niuokusiti Jiowa o eani sileien Kot.” (An Salomon Fos 2:​5, NW) Met ren amwararen ena ekiek pwe kich chon tipis sipwe tongeni “eani sileien Kot,” Jiowa, ewe Samol mi Unusen Tekia! (Kol Fel 73:​28; Foffor 4:24) Ren fitepuku ier, ekkewe sou ekiek me sou tipatchem ra resin weweiti ekkewe monomon ussun manau me ekkewe mettochun lang. Iwe nge, rese fen eani “sileien Kot.” Pwata? Inaamwo ika an Kot we Kapas, ewe Paipel, a nom ren aramas fite ngerou ier, nge ra likitalo pun ra meefi pwe a kon mecheres, ina minne, rese nguuri me weweiti.​—1 Korint 1:​18-​21.

¹¹ Iei pwal eu minen amwokut Salomon a apochokkula: “Jiowa a pwisin fangalo tipachem; seni auan a tou silelap me weweoch.” (An Salomon Fos 2:⁠6) Jiowa a kisaseu lon an fangefatelo tipatchem, sile, me mirit ngeni iteiten aramas meinisin mi chechchei ekkena mettoch. Enlet, mei wor popun ach sipwe aucheani ach pwisin kakkaeo an Kot we Kapas, inaamwo ika epwe wewe ngeni ach achocho, ach pwisin nemeni minne sipwe fori, me ach pennukuolo pwisin ach kkewe mochen. Sia pwapwa pwe a nom rech ewe Paipel, nge ese lamot ach sipwe pwisin fori kapiin ewe Paipel, ussun chok ekkoch me lom!​—Tuteronomi 17:18, 19.

Manaueni ewe Sokkun Manau mi Fich ngeni Jiowa

¹² Met epwe amwokutukich pwe sipwe pwisin kaeo? Ren ach sipwe ita sikasini pwe kich mi murinno lap seni ekkewe ekkoch? Ren ach sipwe pwarata ach tipatchem? Ren ach sipwe fokkun silelap ussun ewe Paipel? Aap. Sia mochen ach sipwe lapalapeni lapalapen Chon Kraist me alisi ekkewe ekkoch ren ach sipwe akkappiru Kraist. (Mattu 11:​28-30) Ewe aposel Paul a ouroura: “Sileilap a efisata ach lamalam tekia, nge tong a aufichi-kich-eta.” (1 Korint 8:⁠1) Ina pwata, sipwe mochen eani an Moses ekiek lupwen a apasa ngeni Jiowa: “Kopwe aiti ngeniei om akot pwe upwe sileek o kukuna umoumoch me reom.” (Ekistos 33:13) Ewer, sia mochen angei sile pwe sipwe apwapwai Kot, nge esap fan iten ach sipwe itoch mwen mesen aramas. Sia mochen ach sipwe noun Kot kkewe chon angang mi tipetekison me foffori minne mi fich ngeni Kot. Ifa ussun sipwe tongeni fori ena mettoch?

¹³ Paul a fonou Timoti ren ifa ussun an epwe apwapwai Kot, iwe, a apasa: “Kopwe achocho ngeni om kopwe achengicheng me ren Kot, usun chok emon chon angang esap saueiti och mettoch, emon mi forfichi lon an anganga ewe kapas mi enlet.” (2 Timoti 2:15) Ewe sokkun fos “forfichi . . . anganga” a popu seni ewe kapasen Krik mi wewe ngeni “fichifich mi wenewen.” (Kingdom Interlinear) Me ren ekkoch sou kaeo, a tongeni wewe ngeni emon sou tete mi aea echo kauk pwe epwe fichi mangaku, are emon chon atake mi tu pwul, me met kkan. Weween, sopwoloon ewe angang epwe enlet are wenewen. Iei ewe lesen pwe ren an epwe wiliti emon chon angang ngeni Kot mi fich ngeni, Timoti epwe ‘achocho ukukun an tufich’ pwe an afalafal me an kkewe foffor epwe tipeeu ngeni ewe kapas mi enlet.​—1 Timoti 4:​16.

¹⁴ Paul a pwal kapas ussun ena mettoch lupwen a pesei chienan kkewe Chon Kraist pwe repwe “manaueni ewe sokun manau mi fich ngeni Jiowa pwe epwe pwapwa ren” ren ar repwe “uwa lon sokkun angang mi murinno meinisin, o pwal alapalo (ar) silei ussun Kot.” (Kolose 1:​10, NW) Iwe, Paul a aririfengenni an emon apwapwai Jiowa me an “uwa lon sokkun angang mi murinno meinisin” me pwal an “alapalo (an) silei ussun Kot.” Weween, ese chok lamot ngeni Jiowa ifa ukukun watten ach aucheani silelap, nge pwal ifa ukukun watten ach atipeeufengenni manauach ngeni an Kot we Kapas lon ach kapas me foffor. (Rom 2:​21, 22) Weween, minne sipwe pwisin kakkaeo epwe nemeni ach kkewe ekiek me foffor ika sipwe apwapwai Kot.

¹⁵ Ikenai, Setan a tinikken le sotun atai ach pochokkul lon pekin luku ren an epwe efisata eu maun lon tupuach. (Rom 7:​14-25) Ina pwata, a lamot ach sipwe tumunu me nemeni ach kkewe ekiek pwe sipwe manaueni ewe sokkun manau mi fich ngeni ach Kot, Jiowa. Ewe pisekin maun sia eani, ina “ewe sile ussun Kot,” ewe a tongeni “fotekini sokkun ekiek meinisin pwe repwe alleasochisi Kraist.” Iei ewe popun sia mochen likiitu lon ach kaeo Paipel iteiten ran meinisin, pwe sipwe toluelo seni tupuach ach ekieki chok pwisin kich me ekiekin futuk.​—2 Korint 10:5.

Ekkewe Pisekin Alilis fan iten Weweoch

¹⁶ Aitien Jiowa kkewe ra atoto feioch lon pekin ngun me aion. Esap ewe sokkun sile lon pekin lamalam mi lu woch are lamot kisikis. Ina minne, sia alleani: “Ngang, Jiowa, om we Kot. Ua aiti ngonuk minne kopwe feioch ren, ua pwal emweni ngonuk ewe al kopwe fetal won.” (Aisea 48:​17, NW) Ifa ussun Jiowa a efisi ach feffetal won ewe alen feioch? Akkom, mei nom rech an we Kapas, ewe Paipel mi Pin. Ina nouch we puken kaeo sipwe kkan kukkutta alillis seni iteitan. Ina pwata, epwe murinno ach sipwe auselingoch ngeni minne a katou lon an Chon Kraist kkewe mwich ren eu Paipel mi suuk. Sia tongeni kuna feiochun ena mettoch seni porausen ewe re Itiopia iunok mi mak lon Foffor sopwun 8.

¹⁷ Ewe re Itiopia iunok a siwili an lamalam ngeni ewe lamalamen Jus. A letipwenechar lon an luku Kot, me a kakkaeo ewe Paipel. Atun an a sai won waan we woken, a alleani seni ewe puken Aisea lupwen Filip a salo ren me eisini: “Ifa usun, ka wewe minne ka alleani?” Ifa poluen ewe re Itiopia? “ ‘Pwe ifa usun, mi tufich rei, are esor emon chon emmweniei?’ Iwe, a tingorei Filip pwe epwe tota o momot ren.” Iwe Filip, fan mwokutukutun ewe ngun mi fel, a alisi ewe re Itiopia pwe epwe weweiti ewe oesini lon ewe puken Aisea. (Foffor 8:​27-35) Met a aiti ngenikich? Iwe, ese naf ach sipwe chok pwisin alleani Paipel. Jiowa, ren an we ngun, a nounou ewe mwichen chon angang mi tuppwol me tipatchem pwe repwe alisikich le weweiti an we Kapas lon ewe fansoun mi fich. Ifa ussun an a fis?​—Mattu 24:45-​47; Luk 12:42.

¹⁸ Inaamwo ika ewe Paipel a era pwe ewe mwichen chon angang a “tuppwol o tipachem,” nge sap minne Jises a apasa pwe esap tongeni mwaalilo. Ena mwichen chon tuppwol mi kepit, ir mi chuen Chon Kraist rese unusoch. Inaamwo ika ra mochen fori minne mi pwung, nge ra tongeni mwaalilo, ussun chok ekkoch ena sokkun mwan ra mwaal fan ekkoch lon ewe aeuin senturi. (Foffor 10:​9-15; Kalesia 2:​8, 11-14) Iwe nge, minne ra foffori a popu seni eu letip mi limelimoch, me Jiowa a nounou ir pwe repwe awora ngenikich ekkewe puken alillis fan iten ach sipwe kaeo Paipel me apochokkula ach luku won An Kot we Kapas me an kkewe pwon. Ewe New World Translation of the Holy Scriptures, ina ewe akkaeuin minen alillis ewe chon angang a ngenikich pwe sipwe pwisin kaeo. Iei a katou, unusan are ekkoch kinikinin, lon 42 fosun fonufan, iwe, a fen peres 114 million kapi lon fitu fansoun peres. Ifa ussun sipwe tongeni nounouochu lon ach pwisin kaeo?​—2 Timoti 3:​14-​17.

¹⁹ Awewe chok, ewe New World Translation of the Holy Scriptures​—With References. A wor fitu kinikinin cross-references, footnotes, eu concordance mi mochomoch fan ekkewe itelap “Tettelin Kapasen Paipel” me “Footnote Words Indexed,” pwal eu Tettelin Itelap lon Paipel mi masou ren 43 itelap, pachelong ekkoch map me charts. Mei pwal wor ewe “Kapasen le Poputaan,” porausen awewe ussun ekkewe chommong puk ra nounou fan iten forun ewe Paipel. Ika a wor lon fosun fonuom, iwe, kopwe kaeofichi ekkewe minen alillis me aeafichi. Iwe, ewe Paipel, ina ewe puk sipwe mochen poputa ach kaeo lon, iwe, ren ewe New World Translation, a nom rech eu Paipel mi itelapei ewe it mi pin me pwal menlapei porausen nemenemen an Kot we Muu.​—Kol Fel 149:​1-9; Taniel 2:​44; Mattu 6:​9, 10.

²⁰ Iei, sia tongeni eis: ‘Ifa pwal ekkoch minen alillis repwe lamot pwe sipwe weweiti ewe Paipel? Ifa ussun sipwe tongeni akkota och fansoun fan iten ach sipwe pwisin kaeo? Ifa ussun sipwe forochu ach kaeo? Ifa ussun ach kaeo epwe kku manauen ekkewe ekkoch?’ Ewe lesen mwirin ei epwe kapas ussun ekkeei mettoch mi lamot lon ach feffeita lon pekin Chon Kraist.

[Footnotes]

En mi Chechemeni?

• Met weween ach sipwe “ekkekieki” are “ekiekifichi”?

• Epwe ita ifa ach ekiek ussun ach kakkaeo an Kot we Kapas?

• Met epwe amwokutukich pwe sipwe pwisin kaeo Paipel?

• Ikkefa ekkewe minen alillis a kawor pwe sipwe weweiti Paipel?

3. Feffeita lon pekin ngun a riri ngeni met?

4. Ikkefa ekkewe minen alillis epwe alisuk le ekkekiek won an Jiowa we Kapas iteitan?

5. Pwata epwe lamot ngenikich ach sipwe pwisin kaeo?

6. Epwe ita ifa ach ekiek ussun ach sileilo Kot?

7. Iteiten fansoun epwe tufich, pwata sipwe mochen fiffiti me auselingoch lon an Chon Kraist kkewe mwich?

8, 9. (a) Ach pwisin kaeo Paipel epwe wewe ngeni met? (b) Ifa ussun kopwe alollofengenni aucheaan kolt me ach weweiti ewe silein Kot?

10. Met sipwe kuna seni ach kakkaeo an Kot we Kapas?

11. Ikkefa ekkoch alillis epwe kawor seni ach pwisin kaeo ewe Paipel?

12. Epwe met popun ach sipwe chechchei silein Kot?

13. Ifa ewe mettoch epwe lamot fan iten an emon epwe wiliti emon chon angang mi fich ngeni Kot?

14. Ifa ussun ach pwisin kaeo Paipel epwe kku ach kkewe kapas me foffor?

15. Ifa ussun sipwe tongeni tumunu me nemeni ach kkewe ekiek?

16. Ifa ussun sipwe tongeni pwisin efeiochukich ren aitien Jiowa?

17. Met a fis lon porausen ewe re Itiopia, iwe, met a aiti ngenikich?

18. Ifa ussun ewe chon angang mi tuppwol me tipatchem a alisikich?

19. Ikkefa ekkoch minen alillis lon ewe New World Translation​—With References repwe tongeni alisikich lon ach pwisin kaeo Paipel?

20. Ikkefa ekkewe kapas eis ussun ach pwisin kaeo Paipel epwe lamot ach sipwe polueni?

[Picture on page 23]

Chon ewe familien Bethel ra kuna pwe a apochokkulereta lon pekin ngun ar repwe poputa iteiten ran meinisin ren ar kaeo eu wokisin seni Paipel

[Picture on page 23]

Sipwe tongeni aeafichi ach fansoun ren ach sipwe auseling ngeni allean ewe Paipel won kaset atun sia wawa wach we

[Picture on page 24]

Aramas ra angang weires me fansoun langattam pwe repwe angei kolt. Ifa ukukun watten om achocho le kaeo an Kot we Kapas?

[Credit Line]

Courtesy of California State Parks, 2002

[Pictures on page 25]

Ewe Paipel, ina eu pisek auchea mi tongeni emmwen ngeni manau esemuch