Ifa Ussun Sipwe Tongeni Amaarata Tong mi Wesewesen Enlet
“Tong, iei ewe minen amanaua aramas; tong a wewe chok me manau.”—Living to Purpose, makkeien Joseph Johnson, 1871.
IFA ussun aramas repwe tongeni kaeo pwe repwe pwarata tong? Repwe ita kaeo lon pekin ekiekin me fofforun aramas? Repwe ita alleani ekkan puk mi awora emmwen ren ifa ussun aramas repwe amurinnolo manauer? Repwe ita katol ekkan kachito ussun tong lefilen mwan me fefin? Aapwi. Aramas ra kan akkaewin kaeo ifa ussun repwe pwarata tong seni fofforun me aitien semer kewe me iner. Ekkan semirit repwe silei weween tong ika repwe kuna an semer me iner akkawora aner me ar tuttumunuur, ar foffos ngeniir, me ar ekkekieki met a lamot ngeniir, nge epwe fiffis ena fan ewe sokkun ririfengen mi pochokkul. Repwe pwal kaeo ussun tong ika semer me iner repwe aiti ngeniir ar repwe emmweni manauer ren ekkewe kapasen alongolongun alluk mi nukuchar fan iten minne mi pwung me mwaal.
Ewe sokkun tong mi wesewesen enlet a lap seni an aramas efich are saani aramas. Fansoun meinisin ena sokkun tong a foffori minne epwe ochiiti aramas, inaamwo ika rese unusen aucheani ena tong lupwen repwe keran kuna, nge fan chommong a ina ussun ekkan semirit ika emon epwe apwunguur are fonour fan tong. Ewe Chon Forikich a isetiu eu leenien appiru mi unusoch fan iten pwarataan ewe sokkun tong mi longolong won kichioch. Iei makkeien ewe aposel Paul: “Nei, kosap turunufasei kapasen amirit me ren ewe Samol, o kosap pwal apwangapwangelo lon ngunum ren om kuna ninni me ren i. Pun ewe Samol epwe amiriti atewe a tongei.” —Ipru 12:5, 6.
Ami kana sam me in, ifa ussun oupwe tongeni akkappiru Jiowa le pwarata tong ngeni ami kana famili? Iwe, ifa ukuukun lamoten ewe leenien appiru oua kan isetiu lon ami ririfengen lon ewe ririin pupulu?
Aiti ngeni Aramas Ussun Tong ren Foffor
Ika en emon mwan mi pupulu, ka kan aucheani me sufoliiti puluwom we? Ika en emon fefin mi pupulu, ka kan tongei me alillisoch ngeni chon imwom? Ewe Paipel a apasa pwe chon pupulu repwe pwarata tong me sufol lefiler. (Efisus 5:28; Taitos 2:4) Ika repwe fori ena mettoch, nour kewe repwe kuna ika mei fet an chon Kraist tong. A ifa me watteen me aucheaan ena sokkun lesen!
Ekkan sam me in repwe pwal awattei tong lon imwer ika repwe kamwochunnuk won ekkan alluk mi weneiti minen apwapwa, foffor mi limoch me wenechar, me ekkewe mettoch repwe achocho ngeni me akkomwa lon manauer. Won unusen fonufan, aramas ra kuna pwe ewe Paipel a awora watte alillis fan iten forutiuen ekkena alluk lon famili, iwe, a awora pisekin annet pwe ewe Paipel a enletin “popu seni Ngunun Kot, a pwal lamot ngeni afalafal, ngeni fonou, ngeni amurinnolo, o pwal ngeni angangochun ewe manau mi pung.” (2 Timoti 3:16) Mi enlet pwe chommong aramas ekis meinisin ra meefi nge ekkewe alluk fan iten foffor mi wenechar are limoch me ewe emmwen fan iten manauen aramas lon chok ewe Afalafal won ewe Chuuk ra tekia seni sokkun alluk me emmwen meinisin.—Mattu, sopwun 5 to 7.
Ika meinisin chon eu famili repwe kukut emmwen seni Kot, iwe mwirin, repwe kamwochunnuk won an kewe alluk, epwe lapalo an emon me emon leir meefi nukunukoch me neman epwe maarita an ekkewe nau tongei me sufoliiti semer me iner. Nge mwaalfesen me ena, ika eu famili epwe eani ruu sokkun tettelin alluk, are mi mwaal ika pwach allukun, eli ekkewe nau repwe mangau, song, me lukumach.—Rom 2:21; Kolose 3:21.
Nge ifa ussun ekkan sam are in mi nipich? A ita kon watte ar osupwang pwe iwe resap tufichin aiti ngeni nour kewe ussun tong? Aapw. Inaamwo ika esor och mettoch mi murinno seni an emon sam me in angangfengen, nge a fen ffatolo pwe ika a murinno an eu famili ririfengen, epwe tongeni akukkunalo osupwangen ena famili, weween, an ese nom emon lein ewe sam are in. Ika a wor noum, nge en mi nipich, kopwe achocho ngeni om kopwe apwonueta ekkewe kapasen alongolongun alluk seni Paipel lon om famili. Ewer, iei alon eu mwiitun: “Kopwe luku ewe Samol mi Lapalap ren unusen lelukom, nge kosap lukuluku pusin om sile. Kopwe chechemeni i won meinisin mine ka fori, nge i epwe aiti ngonuk ewe al mi pwung”—nge mi kapachelong ewe al emon sam are in epwe feffetal won.—An Salomon Fos 3:5, 6; Jemes 1:5.
Chommong sarafo mi murinno ra fen maarita fan tumunuun me alillisin emon chok lein semer are iner, iwe iei, ra tuppwol le angang ngeni Kot lon ekkewe fite ngerou mwichefelin Kraist, mwichefelin Chon Pwarata Jiowa won unusen fonufan. Ina eu pisekin annet pwe ekkan sam are in mi nipich repwe pwal tongeni aiti ngeni nour kewe ussun tong me kuna uwaochun ar angang.
Ifa Ussun Meinisin Repwe Tongeni Amaarata Tong
Ewe Paipel a oesini pwe lon “ekkewe ranin le sopwoloon” epwe wor nafangauen “tong,” weween, nafangauen ewe sokkun pacheoch mi pukun fisita lein chon eu famili. (2 Timoti 3:1, 3) Iwe nge, pwal mwo nge ir kewe mi maarita lon eu famili mi nafangauen tong lon repwe tongeni kaeo pwe repwe amaarata tong. Ifa ussun? Repwe tongeni kaeo seni Jiowa, pun i ewe Popun tong me a pwarata tong ngeni meinisin mi kulliiti i ren unusen letiper. (1 Jon 4:7, 8) Emon sou makkei kol mi fel a makkei pwe “Inaamwo ika semei me inei repwe likitieilo, nge Jiowa epwe nouniei.”—Kol Fel 27:10, NW.
Jiowa a kan pwarata an tong ngenikich lon chommong sokkun lapalap. Mi kapachelong an akkawora emmwen ussun emon sam ren ewe Paipel, alillisin ewe ngun mi fel, me alillisin pwiich kewe chon Kraist. (Kol Fel 119:97-105; Luk 11:13; Ipru 10:24, 25) Nengeni mwo ifa ussun ekkena ulungat mettoch repwe tongeni alisuk le amaarata om tong ngeni Kot me chon orum.
Emmwen mi Fel seni Semach we
Ren ach sipwe tufichin forata ach pacheoch ngeni emon, epwe lamot ach sipwe silefichi emonna. Ren an pwarata lapalapan kewe lon ewe Paipel, Jiowa a kan etiwakich pwe sipwe ririoch ngeni. Iwe nge, esap naf ach sipwe chok akkalleani ewe Paipel. A lamot ach sipwe akkapwonueta minne a aiti ngenikich me kukkuna ekkewe feioch mi tottorikich mwirin. (Kol Fel 19:7-10) Iei alon Aisea 48:17: “Ngang ewe Samol mi Lapalap om we Kot. Ua aiti ngonuk mine kopwe feioch ren, ua pwal emweni ngonuk ewe al kopwe fetal won.” Ewer, Jiowa, ewe mi liosueta tong, a kan aiti ngenikich met kich sipwe feioch ren—nge esap pokiten an mochen pinei ach tufichin pwisin filata fofforuch ren an foratiu ekkewe sokkun alluk mi lamot mwaal.
Ach wesewesen silei masouen Paipel a pwal alisikich le amaarata tong ngeni aramas. Popun, pun ekkewe poraus mi enlet lon Paipel ra kan aiti ngenikich ekiekin Kot ussun aramas me ra affata ngenikich ekkewe kapasen alongolongun alluk repwe nemeni ach kewe foffor ngeni aramas. Ika sia silei ekkena mettoch, epwe nom rech eu longolong mi pochokkul fan iten ach sipwe amaarata tong ngeni chon oruch kewe. Iei alon ewe aposel Paul: “Iei ewe mettoch ua ikkiotek ren, pwe ami tong epwe chok lapalapelo ren ewe sokkun sile mi enlet me unusen miritoch.”—Filipai 1:9, NW.
Ren ach sipwe awewei ifa ussun tong epwe tongeni nom fan emmwenien “sile mi enlet,” ekieki mwo ewe poraus mi enlet a mak lon Fofor 10:34, 35: “Kot ese lifilifil aramas, nge lon ekkewe mu meinisin, eka e niuokusiti i o fori minne mi pung, iwe, Kot epwe etiwa i.” Ika Kot a kan atittina aramas me ren fofforur kewe me ar niuokkusiti i, nge esap ren ewe sokkun lewo are einang ra popu seni, sisap ita pwal eani ena sokkun ekiek ngeni aramas, weween, ach sisap lifilifil aramas?—Fofor 17:26, 27; 1 Jon 4:7-11, 20, 21.
Tong—Eu Uwaan An Kot Ngun mi Fel
Ussun pwungun ut won eu atake epwe tongeni efisata uwaoch, iwe, pwal ussun chok, an Kot ngun mi fel epwe tongeni efisata lon aramas mi murinno letiper ekkewe sokkun lapalap mi wewe ngeni “uwaan ewe ngun” me ren ewe Paipel. (Kalesia 5:22, 23) Tong akkaewin me lein ena uwa. (1 Korint 13:13) Nge ifa ussun sipwe tongeni angei an Kot we ngun mi fel? Iotek eu mettoch mi fokkun lamot fan iten ena. Ika sipwe iotek ren ewe ngun mi fel, Kot epwe ngenikich. (Luk 11:9-13) Ka kan “ikkiotek” ren ngun mi fel? Ika ina, iwe, uwaan, pachelong tong, epwe lapalapelo lon manauom.
Iwe nge, mei wor pwal eu sokkun ngun mi u ngeni an Kot we ngun mi fel. Ewe Paipel a eita ngeni “ngunun fonufan.” (1 Korint 2:12; Efisus 2:2) A ngau ena ngun, iwe, a popu seni Setan ewe Tefil, “samolun ei fonufan,” nge iei ewe fonufanen aramas mi imulo seni Kot. (Jon 12:31) Ussun och asapwal mi achangata susu me piipi, “ngunun fonufan” a kan efisata ekkewe sokkun mocheniangau mi akkatai tong me ra pwal apwapwai aramas mi apwangapwang pokiten nemeniengauen tipis.—Kalesia 5:19-21.
Epwe toki aramas ena ngun mi ngau lupwen repwe suuki letiper ngeni ewe sokkun ekiek mi akkomwa pisek me pwisin mochenir kewe, me ekiek mi mwanesol, me ewe sokkun ekiek mi mwaal ussun tong a kan choufetal won unusen fonufan. Ika ka mochen amaarata ewe sokkun tong mi wesewesen enlet, kopwe uppos le fiu ngeni ngunun fonufan. (Jemes 4:7) Iwe nge, kosap luku pwisin om pochokkul; nge kopwe kokkori Jiowa ren an alillis. An we ngun mi fel—nge iei ewe manaman mi lapalap seni meinisin lon unuselapen lang me fonufan—epwe tongeni apochokkulok me emmwenuk pwe kopwe sopwoch.—Kol Fel 121:2.
Kakkaeo Tong Seni ewe Mwicheichen Pwipwi lon Kraist
Ussun an semirit kakkaeo ifa ussun repwe pwarata tong ren ar kukkuna tong lon imwer, kich meinisin—kukkun me watte—sipwe tongeni akkamaarata ach tong ren ach fitipacheiti chienach kewe chon Kraist. (Jon 13:34,35) Enlet, eu populapen an a foruta ewe mwichefelin Kraist, pwe epwe awora eu leeni ikewe aramas repwe tongeni “peppeseifengeniir le amaarata tong me foffor murinno” ie.—Ipru 10:24, New International Version.
Ena tong a akkaewin auchea ngeni ir mi “riaffou me torotorongau” lon ei fonufan esor an tong. (Mattu 9:36) A fen ffatolo pwe an aramas kuna tong lupwen ra watteta epwe tongeni amoielo chommong me lein ekkewe mettoch mi ngau mi fis ngeniir pokiten ar rese kuna tong me le kukkunur. Ina minne, a mmen lamot pwe meinisin chon Kraist repwe etiwa seni wesewesen letiper ekkan minefoon chon fiti mwich.
“Tong Esap Muchulo”
Ewe Paipel a apasa pwe “tong esap muchulo.” (1 Korint 13:8) Ifa weween ena? Iei alon ewe aposel Paul ngenikich: “Tong a songomang o kirokiroch; tong ese lolowo are sikasini; ese pwal mwanesol, o ese fori minne mi asau. Tong esap kutta pwisin letipan; esap pwal muttir ngeni song; esap pwal chechemeni foforingauen ekkewe ekkoch.” A ffat pwe ena tong esap och anean are och memmeef mi muttir morolo. Nge, ekkewe mi pwarata ena sokkun tong ra kan miritiiti me weweiti pwe lichipung me riaffou ra tottori aramas, nge rese mut ngeni ekkena mettoch ar repwe atai ar tong ngeni chon orur. Ena sokkun tong enletin “eu riri mi unusoch, ririin atipeeu.”—Kolose 3:12-14, NW.
Ekieki mwo porausen emon chon Kraist fopwul lon Korea, a 17 ierin. Lupwen a poputa le angang ngeni Jiowa Kot, an famili a oput, iwe, ra ereni pwe epwe towu seni imwer. Neminnewe ese song, nge a iotek ussun an osukosuk me a mut ngeni an Kot we Kapas me an we ngun mi fel ar repwe emmweni an ekiek. Mwirin, a mak taropwe ngeni an we famili fan chommong, iwe, a pwarata an wesewesen tongeer meinisin. Mwirin, mongeian kewe ruuemon mi watte seni ra poputa le kaeo Paipel, iwe iei, ra papatais. Inan we me mongeian we mi kukkun seni ra pwal etiwa ewe kapasen Paipel mi enlet. Iwe saingo, a siwil letipen seman we, ewe mi fen pin wesewesen u ngeni me lom. Iei makkeian ena fopul: “Am meinisin aua puluweni chon Kraist, iwe iei, kapachelapen chon am famili mi tipeeufengen, familien chon fel ngeni Kot, a tori 23.” A ifa me watteen pworachoon tong!
Ka mochen amaarata ewe sokkun tong mi wesewesen enlet me alisi aramas pwe repwe pwal ina ussun? Iwe, kulliiti Jiowa, ewe emon ena lapalap mi auchea a popu seni. Ewer, lefareni an Kapas, iotek ren ewe ngun mi fel, me fiffiti ewe mwicheichen pwipwi lon Kraist iteitan. (Aisea 11:9; Mattu 5:5) A ifa me watteen ach pwapwa pokiten ach silei pwe ekiselo chok nge aramas mi ngau meinisin resap chuen nom, iwe, epwe nonnomutiu chok ir kewe mi eani ewe sokkun tong mi wesewesen enlet, tongen chon Kraist! Enlet, tong, iei ewe ki fan iten an aramas repwe kuna pwapwa me manau esemuch.—Kol Fel 37:10, 11; 1 Jon 3:14.
[Picture on page 6]
Iotek me kaeon an Kot we Kapas epwe alisikich le amaarata ewe sokkun tong mi wesewesen enlet