Met Wiisach Me Ren Jiowa?
“Ita met Jiowa a mochen kopwe fori me lukun om kopwe foffori minne mi pwung me tongei kirokiroch me eani tipetekison lupwen kopwe mwimwmwin me om we Kot?”—Mika 6:8, NW.
1, 2. Pwata ekkoch chon angang ngeni Jiowa repwe tongeni letipechoulo, nge met epwe tongeni alisiir?
VERA emon chon Kraist mi tuppwol nge ina epwe 75 ierin me a mmen apwangapwang inisin. Ena fefin a apasa pwe “Fan ekkoch ua newu me lon imwei, iwe, ua kuna pwii kewe chon Kraist mi afalafal imw me imw. Ua kan kechiu pun ua mochen fitiir, nge ai sassamau a eppeti ai angang ngeni Jiowa.”
2 A pwal ina ussun om memmeef fan ekkoch? Pwungun pwe meinisin mi tongei Jiowa ra mochen feffetal fan itan we me akkapwonueta minne a awiisa ngeniir. Iwe nge, epwe ifa ussun ika inisich a akkapwangapwangelo, are sia fen chinnap, are mei wor wiisach ngeni ach famili? Eli sipwe ekis letipechou pun eli ekkena mettoch repwe pineikich seni ach sipwe fori mettoch meinisin letipach a mochen fori lon an Kot angang. Ika a ina ussuch, neman ach nengeni Mika sopwun 6 me 7 epwe fokkun apochokkulakich. Ekkena sopwun ra affata pwe a pwung wiisach me ren Jiowa me a pwal ki rech.
Mei Fet Fofforun Kot ngeni Noun kewe Aramas
3. Mei fet fofforun Jiowa ngeni ekkewe chon Israel mi u ngeni i?
3 Sipwe akkom nengeni Mika 6:3-5 me pi ika mei fet fofforun Jiowa ngeni noun kewe aramas. Chechchemeni mwo pwe lon fansoun Mika we chon Israel ra u ngeni Kot. Meit mwo nge Jiowa a kapas ngeniir fan umoumoch pun a apasa, “O nei kana aramas.” Iei an tingor: “O nei kana aramas, ouse mochen oupwe chechchemeni mwo.” Sap minne a tuwenewen le pwarawu ar tipis, nge a sotuni le achungu letiper ren an eis, “Ita met ua fen fori ngenikemi?” A pwal mwo nge peseer pwe repwe “wiisen chon pwarata ngeni” i.
4. Ifa ussun an Kot pwarata umoumoch epwe kku manauach?
4 A fet ochchun ewe leenien appiru Kot a isetiu ren oukich meinisin! Fan umoumoch a apasa “nei kana aramas” me “ouse mochen” ngeni pwal mwo nge ekkewe chon u ngeni i seni Israel me Juta lon fansoun Mika we. Iwe, a fokkun pwung pwe sipwe pwarata umoumoch me kirokiroch lon ach kewe foffor ngeni chon ewe mwichefel. Pwungun pwe eli esap mecheres ach sipwe chiechi ngeni ekkoch, are eli repwe apwangapwang lon pekin ngun. Iwe nge, ika ra tongei Jiowa, sia mochen akkalisiir me pwarata umoumoch ngeniir.
5. Ifa ewe lesen Mika 6:6, 7 a affata?
5 Iei sipwe nengeni Mika 6:6, 7, NW. Mika a uwawu och tettelin kapas eis, nge iei alon: “Ita fan met upwe uta mwen mesen Jiowa? Ita fan met upwe chapetiu ngeni Kot mi tekia leenian we? Upwe uta mwen mesan fan asorun kek, fan nienifoon kowu ukuukun eu ierir? Jiowa epwe ita pwapwa ren ngeroun atemwanin siip, ren fitu kit pupuun apura? Upwe ita eani asor nei we mwanichi fan iten ai tipis, uwaan leupwei ren tipisin manauei?” Aapw, aramas resap tufichin apwapwai Jiowa “ren ngeroun atemwanin siip, ren fitu kit pupuun apura.” Nge a wor och mettoch epwe apwapwai i. Ifa ena mettoch?
Wiisach Ach Sipwe Foffori Minne mi Pwung
6. Mika 6:8 a apasa pwe me ren Kot, ikkefa ekkewe ulungat mettoch aramas repwe wiisen apwonueta?
6 Lon Mika 6:8, sia silei ika met wiisach me ren Jiowa. Mika a eis: “Ita met Jiowa a mochen kopwe fori me lukun om kopwe foffori minne mi pwung me tongei kirokiroch me eani tipetekison lupwen kopwe mwimwmwin me om we Kot?” Ekkena ulungat mettoch sipwe wiisen apwonueta ra weneiti meefiach, ekiekich, me fofforuch. Sipwe tipeni ach sipwe pwarata ekkena lapalap, sipwe ekieki ifa ussun sipwe pwariireta, me repwe pwapwaalo ren fofforuch kewe. Sipwe kaeo ussun eu me eu leir.
7, 8. (a) Met weween “foffori minne mi pwung”? (b) Met sokkun foffor ese pwung a choufetal lon fansoun Mika we?
7 “Foffori minne mi pwung” a wewe ngeni ach sipwe aramas wenechar. Fofforun Kot kewe, iei ewe minen aukuuk ren minne mi pwung. Iwe nge, pilon Mika kewe rese eani pwung pwe pwungungau. Ifa ussun? Nengeni mwo Mika 6:10. Le sopwoloon ena wokisin, a apasa pwe chon amomo ra aea “minen kilo mi nnum,” weween, a kon kukkun. Wokisin 11 a apasa pwe ra aea “foun kilo mi otuputup.” Iwe, me ren wokisin 12, “chonmongoor a orukoruk.” Ina minne, minen kauk mi chofona, minen kilo mi chofona, me kapas chofona ra choufetal lein chon amomo lon fansoun Mika we.
8 Sap minne foffor ese pwung a chok fiffis lon leenien amomo. Ra pwal fiffis fan chommong lon fansoun kapwung. Mika 7:3 a affata pwe “ewe kisin samol a tingor och mettoch, me ewe emon mi eani kapwung a angang fan iten liwinin.” Ekkewe sou kapwung ra kan angei peiofuur le monomon pwe repwe apwungalo minne ese pwung fan iten ekkan aramas rese fori och mettoch mi mwaal. “Ewe emon mi tekia,” are aramas foummong, a kapachelong lon ekkewe foffor mi ngau. Mika a apasa pwe ewe kisin samol, ewe sou kapwung, me ewe aramas tekia ra “efitiaru,” are akkotafengenni, ar kewe fofforingau.
9. Mei fet Juta me Israel pokiten aramas mi ngau ra fori minne ese pwung?
9 Ekkewe foffor ese pwung seni ekkewe sou emmwen mi ngau ra kku unusen Juta me Israel. Mika 7:5 a apasa pwe choufetalin pwungungau a emmwen ngeni taloon lukulukfengen lefilen chiechi, ekkewe mi pwipwioch, me pwal mwo nge chon pupulu. Wokisin 6 a apasa pwe ena mettoch a efisata oput lefilen ekkewe marar, awewe chok, lefilen ekkewe sam me nour kewe aluwol me pwal lefilen ekkewe fopwul me iner kewe.
10 Ifa ussun ach ei fansoun? Sise pwal kukkuna ekkena sokkun lapalap? Ussun Mika, ekis meinisin a wor pwungungau, amoson, me taloon ekkan riri lefilen aramas me pwal lon pekin famili. Iwe nge, pokiten kich noun Kot chon angang mi nonnom lon ei otot mi ngau, sise kan mut ngeni ngunun ei otot mi ngau, ngunun foffor ese pwung, an epwe annifelong lon ewe mwichefelin Kraist. Nge, sia achocho le kamwochunnuk won ekkan kapasen alongolongun alluk fan iten foffor mi wenechar me pwung, iwe, sia kan pwarata ekkena lapalap lon fofforuch kewe iteiten ran meinisin. A enlet pwe sia kan “eani foffor mi wenechar lon mettoch meinisin.” (Ipru 13:18, NW) Kese kan tipeeu pwe ren ach foffori minne mi pwung sia pwapwaesini chommong feioch seni eu mwicheichen pwipwi mi pwarata enletin lukulukfengen?
Ifa Ussun Aramas Ra kan Rong Wesewesen Leuwen Jiowa”?
11. Ifa ussun a kan pwopwonuta Mika 7:12?
11 Mika a oesini pwe inaamwo ika a wor foffor ese pwung, nge epwe tori sokkun aramas meinisin minne mi pwung. Ena soufos a oesini pwe aramas repwe ionfengen “seni matau tori matau, me seni chuuk tori ewe chuuk” pwe repwe chon fel ngeni Jiowa. (Mika 7:12) Lon ei fansoun, atun an epwe fis saingoon pwonutaan ena oesini, sap minne eu chok muu, nge aramas seni sokkun muu meinisin ra kan kuna feioch seni an Kot pwung mi apoch. (Aisea 42:1) Ifa ussun an a letelo ena mettoch?
12. Ifa ussun aramas ra rongorong “wesewesen leuwen Jiowa” lon ei fansoun?
12 Ren poluen ena kapas eis, nengeni mwo alon Mika mesemwan. Iei alon Mika 6:9, NW: “Wesewesen leuwen Jiowa a kokko ngeni ewe telinimw, me ewe aramas mi mirit epwe niuokkusiti itom we.” Ifa ussun chon ekkewe muu meinisin ra kan rong “wesewesen leuwen Jiowa,” me ifa ussun ena mettoch a weneiti ach foffori minne mi pwung? Pwungun pwe aramas lon ei fansoun rese wesewesen rongorong leuwen Kot. Iwe nge, ren ach angangen afalafal won unusen fonufan, chon ekkewe muu me einang meinisin ra rongorong leuwen Jiowa. Ina minne, ekkewe mi auseling ra ‘niuokkusiti iten Kot,’ weween, ra wiliiti aramas mi menniniti ena it. Iwe, a fokkun enlet pwe ren ach fiffiti ewe angangen afalafala porausen ewe Muu fan tinikken, sia kan eani foffor mi pwung me foffor mi pwarata tong. Ren ach ekkesilefeili iten Kot we fan apoch ngeni aramas meinisin, sia “foffori minne mi pwung.”
Sipwe Tongei Kirokiroch
13. Ifa sokkofesenin kirokiroch mi fiti tong me tong?
13 Iei sipwe popporaus ussun wiisach we nampa ruu me ren Mika 6:8. Jiowa a ekiekin kuna senikich ach sipwe “tongei kirokiroch.” Ewe kapasen Ipru mi afou ngeni “kirokiroch” a pwal afou ngeni “kirokiroch mi fiti tong,” are “tong mi tuppwol.” Kirokiroch mi fiti tong a wewe ngeni ach ekkekieki aramas, ach akkafanniir fan umoumoch. Kirokiroch mi fiti tong a sokko seni tong. Ifa ussun? Tong eu kapas mi waammong, iwe, a tongeni weneiti chommong sokkun mettoch me minne aramas repwe ekiekieta. Ren chok awewe, Paipel a kapas ussun an aramas “tongei fonufan, are ekkena mettoch mi nonnom lon fonufan.” (1 Jon 2:15) Iwe nge, fansoun meinisin kirokiroch mi fiti tong a weneiti aramas, akkaewin, ir kewe mi angang ngeni Kot. Ina minne, Mika 7:20 a kapas ussun “ewe kirokiroch mi fiti tong a tori Apraham”—nge i emon mwan mi angang ngeni Jiowa Kot.
14, 15. Ifa ussun aramas repwe pwarata kirokiroch mi fiti tong, me ifa eu poraus ussun an aramas pwarata ena lapalap?
14 Me ren Mika 7:18, ena soufos a apasa pwe Kot “a pwapwaiti kirokiroch mi fiti tong.” Lon Mika 6:8, a mak pwe sap minne sipwe chok pwarata kirokiroch mi fiti tong nge sipwe pwal aucheani ena lapalap. Met sia kaeo seni ekkena wokisin? Sipwe kan tipemecheres le pwarata kirokiroch mi fiti tong pokiten ach wesewesen tipeni ach sipwe ina ussun. Ussun Jiowa, sia kukkuna pwapwa, are chengel, ren ach pwappwarata kirokiroch mi fiti tong ngeni chon osupwang.
15 Lon ei fansoun, kirokiroch mi fiti tong eu esissinnen noun Kot kewe aramas. Iei eu poraus mi affata ena mettoch. Lon 2001, fan June, eu molumol a efisata watte pupuun konik lon Texas, U.S.A., iwe, a atai fite ngerou imw, pachelong fitepuku imwen Chon Pwarata Jiowa. Ren ar repwe alisi pwiir kewe chon Kraist mi osupwang, ina epwe 10,000 Chon Pwarata ra tipemecheresin awora ar fansoun me pochokkul nge sap minne ra angei liwinin ar angang. Ren lap seni esopw ier, chokana mi awora alillis ra tinikken le angang le ran, le pwin, pwal lon Ammon me Raninfel pwe repwe ausefalli 8 Kingdom Hall me lap seni 700 imw fan iten pwiir kewe chon Kraist. Ekkewe rese tufichin fori ena angang ra liffangoto mongo, pisek, me moni. Pwata ekkena fite ngerou Chon Pwarata ra alisi pwiir kewe chon luku? Popun, pun ra “tongei kirokiroch.” Iwe, a ifa me watteen apwapwaan ach silei pwe pwiich kewe won unusen fonufan ra kan akkeani ekkena fofforun kirokiroch mi fiti tong! Ewer, ach akkapwonueta wiisach, wiisen ach sipwe “tongei kirokiroch” esap eu mettoch mi chounikich, nge eu mettoch sia kan chengel ren!
Sipwe Tipetekison le Mwimwmwin me Kot
16. Menni kapas awewe a awora alillis le menlapei lamoten ach sipwe tipetekison atun ach sipwe mwimwmwin me Kot?
16 Ewe aulungatin mettoch sipwe wiisen apwonueta me ren Mika 6:8, iei ach sipwe ‘tipetekison le mwimwmwin me ach Kot.’ A wewe ngeni ach sipwe miritiiti met sia tufichingau lon me eani lukuluk won Kot. Ren chok awewe, ekieki mwo emon kukkun nengngin mi kamwochunnuk won poun seman we lupwen ra fetal lon eu molumol. Ena nengngin a wesewesen silei pwe ese lien watte an pochokkul, nge a luku pochokkulen seman we. Kich sipwe pwal silei pwe mi kauk ach pochokkul nge sipwe luku pochokkulen Semach we lon lang. Met sipwe fori pwe ete tiuelo senikich ena sokkun lukuluk? Sipwe chechchemeni ewe popun sipwe mirit ika sipwe fitipacheiti Kot. Mika a achchema ngenikich ulungat popun: Jiowa ewe Sou Angasakich, ewe Sou Emmwenikich, me ewe Sou Tumunukich.
17. Ifa ussun Jiowa a angasalo, emmweni, me tumunu noun kewe aramas lon ekkewe fansoun lom lom?
17 Me ren Mika 6:4, 5, iei alon Kot: “Ua uweikemiiwu me lon ewe fonu Isip.” Ewer, Jiowa ewe Sou Angasalo Israel. Pwal iei alon Jiowa: “Ua tinalo mwemi Moses, Aaron me Miriam.” Moses me Aaron ra wiisen sou emmwen fan iten ena muu, me Miriam a wiisen emmweni ekkewe fin Israel le pworuk fan iten pworachoon Jiowa. (Ekistos 7:1, 2; 15:1, 19-21; Tuteronomi 34:10) Jiowa a awora emmwen ren an nounou noun kewe chon angang. Lon wokisin 5, Jiowa a achchema ngeni ewe muun Israel pwe a tumunuur seni Palak me Palam me a tumunu chon Israel lon ewe saingoon kinikinin ar sai seni Sitim lon Moap ngeni Kilkal lon ewe Fonu mi Pwonetiu.
18. Ifa ussun Kot ewe Sou Angasakich, Sou Emmwenikich, me Sou Tumunukich lon ei fansoun?
18 Atun ach sipwe mwimwmwin me Kot, a kan akkangasakichelo seni an Setan we otot, a ekkemmwenikich ren an we Kapas me an we mwicheich, me a tuttumunu ach mwicheich ika aramas repwe u ngenikich. Ina minne, a wesewesen wor popun ach sipwe kamwochunnuk won poun Semach we lon lang atun ach sipwe mwimwmwin me i lon ei amuchuun kinikin mi fokkun weires, kinikinin ach sai ngeni och mettoch mi fokkun lap seni ewe Fonu mi Pwonetiu lom lom—weween, an Kot we otot mi pwung, ewe otot sefo.
19. Ifa ussun tipetekison a riri ngeni met sia tufichingau lon?
19 Ach pwarata tipetekison atun ach mwimwmwin me Kot a kan alisikich le eani ekiek mi pwung ussun nonnomuch. Mi enlet ena pun ach miritiiti met sia tufichingau lon a kapach ngeni ach pwarata tipetekison. Eli lapaloon ierich are akkapwangapwangeloon inisich epwe akukkunatiu minne sipwe tongeni fori lon an Jiowa angang. Iwe nge, sisap mut ngeni ena mettoch an epwe aletipechoukich, nge epwe murinno ach sipwe chechchemeni pwe Kot a kan etiwa ach angang me ach kewe fofforun pennuku pwisin mochenich ‘me ren minne mi nom rech, nge esap minne ese nom rech.’ (2 Korint 8:12) Pwungun pwe iei ekiekin Jiowa, ach sipwe angang ngeni ren unusen letipach, weween, sipwe foffori minne chok epwe pwak rech me ren minne nonnomuch epwe mutata. (Kolose 3:23) Ika sipwe tinikken le foffori minne sia tufich ngeni, epwe watte an Kot efeiochukich.—An Salomon Fos 10:22.
Ach Witiwit fan Mosonottam epwe Atoto Feioch
20. Ach weweiti met epwe alisikich le witiwit fan mosonottam ussun chok Mika?
20 Ach kukkuna feioch seni Jiowa epwe amwokutukich pwe sipwe appiru ekiekin Mika. Iei alon: “Upwe witiwit fan mosonottam ren Kot, ewe mi amanauaei.” (Mika 7:7) Ifa ussun ekkena kapas ra weneiti ach mwimwmwin me Kot fan tipetekison? Ach witiwit fan mosonottam a alisikich pwe sisap lichipung pokiten an esaamwo war ranin Jiowa we. (An Salomon Fos 13:12) Mi enlet pwe oukich meinisin sia tipeni pwe epwe sopwolo ei otot mi ngau. Iwe nge, iteiten wiik fite ngerou aramas ra keran poputa le mwimwmwin me Kot. Ach silei ena mettoch a awora eu popun ach sipwe witiwit fan mosonottam. Emon Chon Pwarata mi angang ngeni Kot fansoun langattam a uwawu meefian ussun ena mettoch, iwe, iei alon: “Lupwen ua nesokuriiti ekkewe lap seni 55 ierin ai fiti ewe angangen afalafal, ua wesewesen luku pwe ese lus rei och mettoch pokiten ai witiwiti Jiowa. Nge, ese fen toriei chommong mettoch upwe tongeni letipechou rer.” A pwal ina ussun kunaom?
21, 22. Ifa ussun Mika 7:14 a pwopwonuta lon ach ei fansoun?
21 Esor tipemwaramwar pwe ach mwimwmwin me Jiowa a kan efeiochukich. Ussun sia alleani lon Mika 7:14, Mika a alollofengeni noun Kot kewe aramas me ekkan siip mi nonnom ren nour we chon mas fan nukunukoch. Lon lapen pwonutaan ena oesini lon ach ei fansoun, lusun ewe Israel lon pekin ngun fitifengen me ekkewe “pwal fitemon siip” ra kuna nukunukoch ren nour we Chon Mas mi tuppwol, Jiowa. Ra nonnom “lon eu wollap—lukalapen eu atakeen ira,” iwe, ra imulo lon pekin ngun seni ei fonufan mi ur ren osukosuk me mettoch mi efeiengau. —Jon 10:16; Tuteronomi 33:28; Jeremaia 49:31; Kalesia 6:16.
22 Noun Jiowa kewe aramas ra mmen feioch, ussun Mika 7:14 a pwal oesini. Iei alon Mika ussun noun Kot kewe siip, are aramas: “Repwe mongo lon Pasan me Kiliat.” Ekkewe siip lon Pasan me Kiliat ra mongo lon masies mi arauarau, me ra mmen aumanau ren, iwe, pwal ussun chok, noun Kot kewe aramas lon ei fansoun ra pwapwaesini chommong mettoch lon pekin ngun—nge ina pwal eu feioch fan iten ekkewe mi mwimwmwin me Kot fan tipetekison.—Numperis 32:1; Tuteronomi 32:14.
23. Menni lesen sipwe tongeni kaeo seni Mika 7:18, 19?
23 Lon Mika 7:18, 19, ena soufos a menlapei pwe Jiowa a mochen omusalo ekkewe mi aier. Wokisin 18 a apasa pwe Jiowa a “okkomusalo foffor mi mwaal” me “pwoluelo tipis.” Me ren wokisin 19, i epwe “oturalong le alollolun matau ar kewe tipis meinisin.” Ifa eu lesen sipwe tongeni kaeo seni ena poraus? Sipwe tongeni eisinikich ika sia kan akkappiru Jiowa lon ena mettoch. Sia kan okkomusalo ekkewe mettoch mi mwaal aramas ra fori ngenikich? Lupwen chokana ra aier me ra sotuni le awenechara ar foffor, sia mochen appiru tipemecheresin Jiowa le unusen omusalo me tolalo ar kewe tipis.
24 Ifa ussun sia fen kuna feioch seni ach kaeo an Mika we oesini? A fen achchema ngenikich pwe Jiowa a awora apilukuluk mi enlet ren chokewe mi arap ngeni i. (Mika 2:1-13. A peseikich pwe sipwe afeffeitai fel mi enlet ren unusen tufichich pwe sipwe tongeni feffetal fan iten Kot we tori feilfeilo chok. (Mika 4:1-4) Iwe, a affata pwe ese lifilifil ika mei fet nonnomuch, nge sipwe tufichin apwonueta wiisach kewe me ren Jiowa. Ewer, an Mika we oesini a enletin apochokkulakich pwe sipwe feffetal fan ewe it Jiowa .
Ifa Poluan me Reom?
• Me ren Mika 6:8, met wiisach me ren Jiowa?
• Sipwe fet ren ach sipwe “foffori minne mi pwung”?
• Ifa ussun sipwe tongeni pwarata pwe sia “tongei kirokiroch”?
• Met sokkun mettoch a kapachelong lon ach pwarata ‘tipetekison le mwimwmwin me Kot’?
10. Mei fet fofforun chon Kraist lon ei fansoun lupwen a fokkun choufetal foffor ese pwung?
24. Ifa ussun ka fen kuna feioch seni an Mika we oesini?
[Pictures on page 17]
Inaamwo ika a mmen choufetal fofforingau lon fansoun Mika we, nge Mika a apwonueta wiisan kewe me ren Jiowa. En mi pwal tongeni fori ena mettoch
[Picture on page 19]
Sipwe foffori minne mi pwung ren ach afalafal ngeni sokkun aramas meinisin
[Picture on page 19]
Kopwe pwarata pwe ka tongei kirokiroch ren om atufichi osupwangen aramas
[Picture on page 19]
Kopwe fori minne mi tufich reom, nge pwal miritiiti minne ka tufichingau lon fan tipetekison