Eani Lukuluk Won Jiowa
“En mi ai apilukuluk, O Jiowa Sapaot, ai lukuluk seni le aluwoli.”—KOL FEL 71:5, NW.
1. Ifa ewe sossot a tori ewe chon masen siip itan Tafit le aluwolun?
EWE mwan a lap seni tiu fiit tekian. Esap eu minen amairu pwe meinisin ekkewe sounfiuun Israel ra niuokkusiiti! Ren fitu wiik, iteiten lesosor me iteiten lekuniol, ewe re Filistia mi wachemuk itan Koliat a turunufasei ekkewe sounfiuun Israel, iwe, a ereniir ar repwe tinalo emon atepwora seni meinisin leir pwe epwe fiu ngeni. Iwe, mwirin och fansoun, emon a appolua nge esap i emon sounfiu, pwe emon chok sarafo. Ewe emon chon masen siip itan Tafit a fokkun mwochomwoch seni atewe epwe fiu ngeni. Iwe, eni kiloon atewe a kukkun seni an Koliat kewe pisekin maun! Iwe nge, ewe sarafo a fiu ngeni ewe mwan watte me a wiliti eu liosun ewe lapalap itan pwora.—1 Samuel 17:1-51.
2 Ifa ussun Tafit a angei pwora? Nengeni alon Tafit kewe a makkei atun an a chinnap, a era: “En mi ai apilukuluk, O Jiowa Sapaot, ai lukuluk seni le aluwoli.” (Kol Fel 71:5, NW) Ewer, atewe Tafit a eani lukuluk won Jiowa. A u ngeni Koliat, iwe, a apasa: “En ka feito rei fan efoch ketilas, efoch fisika me efoch siles. Nge ngang ua feila reom fan iten ewe Samol mi Unusen Manaman, ewe Kot an ewe mwichen sounfiun Israel en ka apalua.” (1 Samuel 17:45) Inaamwo ika Koliat a eani lukuluk won pwisin an pochokkul me an kewe pisekin maun, nge Tafit a eani lukuluk won Jiowa. Ika ewe Samol mi Unusen Tekia epwe alisi i, pwata Tafit epwe niueiti emon mwan, nge meit ika a wor an kewe pisekin maun?
3 Lupwen ka alleani porausen Tafit, kese aneanei pwe epwe watteta pochokkulen om lukuluk won Jiowa? Eni a ina ussun chommong leich. Ina minne, sipwe kaeo ruu mettoch sipwe tongeni fori pwe sipwe eani lukuluk won Jiowa. Aewin, a lamot ach sipwe nennemeni ewe minen eppet ngeni ach sipwe eani ena sokkun lukuluk. Oruuan, a lamot ach sipwe kaeo met epwe kapachelong lon ach sipwe eani lukuluk won Jiowa.
Pworacho ngeni eu Minen Eppet ngeni Lukuluk Won Jiowa
4 Met a eppeti aramas seni ar repwe eani lukuluk won Kot? Fan chommong, ekkoch ra osukosuk ussun ewe popun an a fis ekkewe mettoch mi ngau. Chommong ra rongorong pwe Kot a efisata ekkewe riaffou. Lupwen a fis och kiteter, ekkewe nouwisen lamalam ra kan apasa pwe Kot a “angei” ekkewe mi ma pwe repwe nonnom ren lon lang. Pwal eu, chommong nouwisen lamalam ra aiti ngeni aramas pwe seni chok me lom, Kot a fen filata minne epwe fisita lon ei otot—pachelong maloon iteiten aramas me fofforingau meinisin. Epwe weires ach sipwe eani lukuluk won ena sokkun Kot mi nafangau an umoumoch. Satan, ewe mi achunalo letipen ekkewe mi lukulukummang, a fokkun apochokkula meinisin ena sokkun “afalafalen ekkewe timon.”—1 Timoti 4:1, NW; 2 Korint 4:4.
5 Satan a mochen pwe epwe pout seni aramas ar lukuluk won Jiowa. Ena chon u ngeni Kot ese mochen ach sipwe silei wesewesen ewe popun an a fis an aramas riaffou. Iwe, ika sia fen kaeo seni Paipel ewe popun an a fis an aramas riaffou, Satan a mochen ach sipwe monukalo. Ina minne, fan ekkoch, epwe murinno ngenikich ach sipwe enniwili ekkewe ulungat popun an a fiffis riaffou won fonufan. Ren ach sipwe fori ena, sipwe alukuluku ngeni letipach pwe Jiowa ese wisen efisata ekkewe fitikoko mi tottori manauach.—Filipai 1:9, 10.
6 Iei eu popun an a fis riaffou ngeni aramas, pun pokiten Satan a mochen atai tuppwolun noun Jiowa kewe aramas. A sotun atai an Hiop we tuppwol. Ese tufich ena, nge Satan ese fangeta. Pokiten i ewe sou nemenemen ei fonufan, a achocho le “oromalo” noun Jiowa kewe chon angang. (1 Piter 5:8) A kapachelong emon me emon leich! Satan a mochen ach sipwe ukkutiu seni ach angang ngeni Jiowa. Iwe, fan chommong a efisata an aramas eriaffou noun Kot kewe aramas. Inaamwo ika a fokkun weires ena, nge a wor popun ach sipwe likiitu. Ren ach likiitu, sipwe annetata pwe Satan i emon chon kapas chofona, iwe, sipwe pwal apwapwai Jiowa. (Hiop 2:4; An Salomon Fos 27:11) Lupwen Jiowa epwe apochokkulakich pwe sipwe likiitu fan riaffou, epwe mammarita ach lukuluk won i.—Kol Fel 9:9, 10.
7 Ewe oruuan popun an a fis osukosuk a nom lon ei poraus mi enlet, a era: “Minne emon epwe fotukatiu, iei chok epwe pwal kini.” (Kalesia 6:7) Fan ekkoch, aramas ra ffot ren ar filingau, iwe mwirin, ra kini osukosuk. Awewe chok, ika ra filata ar repwe wawangau war we, iwe, mwiriloon a fis eu aksiten. Chommong ra filata ar repwe ukkunumi suppwa, iwe, epwe efisi semmwenin foun ngasangas are kansarin ewe ammat. Ekkewe mi filata ar repwe lisou-mwaal repwe tongeni kuna tatiuen ririin chon ewe famili, sau, semmwenin sikepwach, me pwopwongau. Eni aramas repwe tipimwaal ngeni Kot ren ewe riaffou, nge ra wesewesen kuna osukosuk pokiten chok pwisin ar filingau.—An Salomon Fos 19:3.
8 Ewe aulungatin popun an a fis osukosuk a mak lon An Salomon Afalafal 9:11: “Iwe, ua pwal kuna och lapalap won fanufan: Eman mi muttir le kitir esap tongeni win fansoun meinisin, nge eman mi pwora esap pwal wiwin chok lon maun. Iwe, eman mi mirit a tongeni osupwang ren anan mongo, nge eman mi tipachem esap pwal pisekisek chok. Iwe, sap meinisin mi silelap repwe tolong lon wis tekia, pun fansoun me serengau a sereni ir meinisin.” Fan ekkoch, aramas ra chok nonnom ikkewe a fis feiengau ie, iwe, ra serengaua ewe feiengau. Osukosuk me malo epwe tongeni torikich meinisin, ese lifilifil ika kich mi pochokkul are apwangapwang. Awewe chok, lon fansoun Jises, a turutiu eu imw tekia lon Jerusalem me a nielo 18 aramas. Jises a pwarata pwe ese fis pokiten Kot a apwungur ren tipisiir me lom. (Luk 13:4) Aapwi, mei mwaal ach sipwe tipi ngeni Jiowa ena sokkun riaffou.
9 A lamot ach sipwe weweiti ekkewe popun an a fis ekkewe fitikoko me osukosuk. Iwe nge, a wor eu mettoch a weires ngeni chommong aramas ar repwe weweiti. Iei i: Pwata Jiowa Kot a mutata riaffou?
Pwata Jiowa a Mutata Riaffou?
10 Eu kinikin lon noun ewe aposel Paul we taropwe ngeni ekkewe chon Rom a kapas ussun ei poraus mi lamot. Paul a makkei: “Pun masouen lang me fonufan ra chok witiwiti pwapwalon noun Kot kewe, pun ra fakkun mochen kuner. Pun a likitalo masouen lang me fonufan meinisin pwe repwe lamotengauelo; sap ren pwisin letiper, nge ren letipen ewe emon a likitalo ir iei usun lon apilukuluk allim. Pun masouen lang me fonufan repwe fakkun ngaseseni fan nemenien limengau, o repwe eti noun Kot kewe lon ewe ngas mi ling. Sia meefi pwe masouen lang me fonufan meinisin ra chok ngungufengen tori ei fansoun, usun chok emon fefin lupwen an epwele nounou.”—Rom 8:19-22.
11 Ren ach sipwe weweiti ekkeei wokisin, a lamot ach sipwe akkom polueni eu kapas eis mi lamot watte. Awewe chok, Io a anomu masouen lang me fonufan fan apilukulungau? Ekkoch nouwisen lamalam ra apasa pwe Satan; pwal ekkoch ra era pwe Atam. Nge esap tufich ar repwe tongeni fori ena mettoch. Pwata? Popun, pun ewe emon mi anomu masouen lang me fonufan fan apilukulungau a fori ena won “longolongun ewe apilukuluk allim.” Ewer, a awora apilukuluk allim pwe ekkewe mi tuppwol repwe “ngaseseni fan nemenien limengau.” Ese tufich ngeni Atam ika Satan ar repwe awora ena sokkun apilukuluk allim. Jiowa chok a tongeni. A ffat pwe I a anomu aramas fan apilukulukungau.
12 Iwe nge, met weween “masouen lang me fonufan” lon ekkeei wokisin? Ekkoch ra apasa “masouen lang me fonufan” a wewe ngeni meinisin masouen fonufan, pachelong ekkewe man me ira meinisin. Nge ekkewe man macho me ira ra ekiekin “eti noun Kot kewe lon ewe ngas mi ling”? Aapwi. (2 Piter 2:12) Iwe, “masouen lang me fonufan,” epwe chok tongeni wewe ngeni aramas. Ina forien Kot kkewe mi kuna tipis me malo pokiten ewe fofforun u ngeni lon Ichen me a lamot ngeniir ewe apilukuluk allim.—Rom 5:12.
13 Met ewe fofforun u ngeni a wesewesen fori ngeni aramas? Paul a kapas ussun mwiriloon ren eu chok kapas: apilukulukungau.a Me ren eu puken awewe, ei kapas a awewei ussun “lamotengaualoon eu pisek mi ese apwonueta ewe popun an a for.” Kot a forata aramas pwe repwe manaufochelo, iwe, repwe ita angangfengen ussun eu famili mi unusoch me tipeeufengen lon ar tuttumunu eu paratisin fonufan. Iwe nge, manauer a chok mwochomwoch, weires, me ur ren chommong osukosuk. Ussun Hiop a apasa, “Eman aramas mi uputiu me ren eman fefin a chok manau lon fansoun mochomoch, nge manauan a ur ren weires.” (Hiop 14:1) Fokkun lamotengau!
14 Iei sia tori ewe kapas eis mi lamot seni meinisin: Pwata “ewe Souapwungun unusen fonufan” a anomu aramas fan ei sokkun mamanau mi ur ren osukosuk me fitikoko? (Keneses 18:25) A wesewesen pwung an fori ena? Iwe, chechemeni mwo minne popuch kkewe ra fori. Lon ar fofforun u ngeni Kot, ra peni Satan, ewe emon mi appolua an Jiowa we pwung le nemenem. Ren ar kewe foffor, ra apochokkula ewe ekiek pwe epwe murinnolo manauen aramas ika resap nom fan nemenien Jiowa, nge repwe pwisin nemenemeniir fan emmwenien emon chonlang mi u ngeni Kot. Lon an apwungu ekkena chon u ngeni, Jiowa a ussun ita ngeniir minne ra mochen. A mut ngeni aramas ar repwe pwisin nemenemeniir fan etipetipaen Satan. Fan ei sokkun lapalap, ifa ewe al epwe fokkun pwung seni an epwe anomu aramas fan ewe mettoch apilukulukungau nge won longolongun ewe apilukuluk allim?
15 Pwungun pwe esap ina “letipen” aramas. Sia uputiu fan nemenien apwangapwangen inisich, nge esap filiach. Nge lon an umoumoch, Jiowa a mut ngeni Atam mi If ar repwe manau me nounou. Inaamwo ika kich, mwirimwirir kewe, nge sia nom fan nemenien tipis me malo, nge sipwe tongeni fori minne Atam me If rese fori. Sipwe tongeni auseling ngeni Jiowa me pii pwe a pwung me unusoch an nemenem, nge nemenemen aramas mi imulo seni Jiowa a chok atoto osukosuk, mangau me apilukulukungau. (Jeremaia 10:23; Pwarata 4:11) Pwal eu, etipetipaen Satan a chok aingaualo lapalapen fonufan. Uruwoon aramas a annetata enletin ekkeei poraus.—An Salomon Afalafal 8:9.
16 A ffat pwe a wor popun an Jiowa anomu aramas fan apilukulukungau. Nge, a ita wewe ngeni pwe Jiowa a efisata ewe apilukulukungau me osukosuk mi torikich meinisin ikenai? Iwe, ekieki mwo ussun emon soukapwung mi apwunguochu emon chon atai alluk. Eni ewe chon atai alluk epwe kuna watte riaffou watte atun a nonnom lon kalapus, nge epwe pwung an epwe tipi ngeni ewe soukapwung pwe i ewe chon efisata an riaffou? Aapwi! Pwal eu, Jiowa esap efisata minne mi ngau fan eu. Jemes 1:13 a apasa: “Esor emon mi tongeni oturukapa Kot, o Kot esap oturukapa emon.” Sipwe pwal chechemeni pwe Jiowa a isetiu ei kapwung “won longolongun ewe apilukuluk allim.” Fan tong a akkota pwe mwirimwirin Atam me If kewe mi tuppwol repwe kuna muchuloon lamotengauen manauen aramas me pwapwaesini ar “eti noun Kot kewe lon ewe ngas mi ling.” Tori feilfeilo chok, aramas mi tuppwol resap chuen aureki pwe epwe fissefal ngeni aramas meinisin ena esin apilukulukungau. An Jiowa we pwakini ena osukosuk ren pwung epwe alukuluku pwungun an nemenem tori feilfeilo chok.—Aisea 25:8.
17 Atun sia enniwili ekkeei popun an a fis riaffoun aramas, sia ita kuna eu popun ach sipwe tipi ngeni Jiowa fofforingau are popun ach sisap eani lukuluk won i? Aapwi, ei sokkun kaeo a awora popun ach sipwe aloni alon Moses, a era: “I ewe achau, an fofor ra unusen murina, pun an kewe al meinisin ra pwung. I eman Kot mi allukuluk, esap wor an mwal, a pwung o wenechar.” (Tuteronomi 32:4) Ren ach sipwe ekkekieki ussun ekkeei mettoch, sipwe enniwili ifa ussun sipwe tongeni pwisin polueni ekkena kapas eis. Ika epwe ina ussun, lupwen sipwe kuna sossot, sipwe u ngeni an Satan sotun amoretiu tipemwaramwar lon ach ekiek. Iwe nge, epwe ifa ussun ewe oruuen mettoch mi mak le poputaan ei lesen? Met epwe kapachelong lon ach sipwe eani lukuluk won Jiowa?
Met Weween Ach Sipwe Lukuluk won Jiowa
18 An Kot we Kapas a peseikich: “Kopwe eani lukuluk won Jiowa ren unusen lelukom, nge kosap lukuluku pwisin om sile. Kopwe chechemeni won meinisin minne ka fori, nge i epwe aiti ngonuk ewe al mi pwung.” (An Salomon Fos 3:5, 6) Ekkena kapas ra fokkun apwapwa. Pwungun pwe esor pwal emon mi fich ngeni ach sipwe lukuluk won lap seni Semach we lon lang. Iwe nge, e fen mecheres ach sipwe alleani alon Salomon kana lap seni ach sipwe apwonueta lon manauach.
19 Mei mwaal ekiekin chommong aramas ussun weween ach sipwe lukuluk won Jiowa. Ekkoch ra ekieki pwe ena sokkun lukuluk, ina eu chok memmeef, och sokkun pwapwa epwe ita pukun mammarita lon ewe letip. Ussun ita pwal ekkoch ra achifoua pwe lukuluk won Kot a wewe ngeni ach sipwe kutta pwe I epwe tumunukich seni sokkun weires meinisin, pwakini ach kkewe osukosuk meinisin, fori pwe ach kkewe sossot meinisin repwe sopwoch—muttir chok! Nge ese fokkun pwung ekkena ekiek. Lukuluk a lu seni och chok sokkun memeef, iwe, ese pwal luku minne ese ese tongeni fis. Ren ekkewe watte, lukuluk a wewe ngeni ach sipwe pwisin ekiekifichi ussun minne sipwe filata.
20 Nengenisefalli minne An Salomon Fos 3:5 a apasa. A era pwe lukuluk won Jiowa a mwaalfesen me ach lukuluk won pwisin ach wewe, weween, a era pwe sisap tongeni fori ir me ruu. A ita wewe ngeni pwe esap mumu ngenikich ach sipwe aea ach tufichin wewe? Aapw, pun Jiowa a wisen awora ngenikich ena tufich, iwe, a mochen sipwe aeafichi ena tufich wewe lon ach angang ngeni. (Rom 12:1) Nge sipwe lukuluk won met? Ika ach ekiek ese tipeeu ngeni ekiekin Jiowa, sia luku pwe an tipatchem a fokkun lap seni ach? (Aisea 55:8, 9) Ach lukuluk won Jiowa a wewe ngeni ach sipwe mut ngeni an ekiek an epwe emmweni ach ekiek.
21 Awewe chok: Ekieki ussun emon kukkun semirit mi mommot lon ewe backseat efoch chitosa, seman kkewe me inan ra nonnom lefen. Seman we a wisen unteng. Lupwen a fisita och osukosuk atun ra sai—eni, tipefesen ren menni al repwe aleni, are ren raningau are lapalapengauen ewe al—met emon semirit mi lukuluk me alleasochis epwe fori? Epwe puchor seni leenian we me aiti ngeni seman ifa ussun epwe unteng? Epwe tipemwaramwareiti minne seman kkewe me inan we ra filata are u ngenir atun repwe achema ngeni an epwe penit? Aapw, nge a lukuluk won seman kkewe me ina ar repwe tumunu ekkena mettoch, nge meit ika ir rese unusoch. Iwe, Jiowa, I emon Sam mi unusoch. Pwata sisap unusen lukuluk won I, akkaewin lupwen epwe torikich fansoun weires?—Aisea 30:21.
22 Iwe nge, An Salomon Fos 3:6 a apasa pwe sipwe ‘chechemeni won meinisin minne sipwe fori’ nge sap lon chok ekkewe fansoun weires. Weween, ran me ran minne sipwe filata epwe pwarata ach lukuluk won Jiowa. Lupwen epwe fisita osukosuk, sisap letipechou, niuokkus, are u ngeni an Jiowa emmwen ren murinnoon an we alen pwakini osukosuk. A lamot sipwe eani ewe ekiek pwe ekkewe sossot a suuk ngenikich tufichin ach sipwe peppeni an Jiowa we pwungun nemenem, annetata pwe Satan i emon chon kapas chofona, me amarata alleasochis me pwal ekkoch lapalap mi apwapwai Jiowa.—Ipru 5:7, 8.
23 Sipwe tongeni pwarata ach lukuluk won Jiowa ese lifilifil met sokkun minen eppet epwe torikich. Sipwe fori ena lon ach kkewe iotek me pwal ren ach kutta emmwen lon an Jiowa we Kapas me an we mwicheich. Iwe nge, ifa ussun sipwe tongeni pwarata ach lukuluk won Jiowa lupwen epwe torikich ekkewe osukosuken ei otot? Sipwe kaeo ena poraus lon ewe lesen mwirin.
[Footnotes]
a Ewe kapasen Krik Paul a nounou ren ewe kapas “apilukulukungau”, ina ewe chok kapas ewe Greek Septuagint a nounou ren minne Salomon a era lon ewe puken An Salomon Afalafal, mi affou ngeni “mettoch meinisin pon chok!”—An Salomon Afalafal 1:2, 14; 2:11, 17; 3:19; 12:8.
Ifa Ussun Kopwe Polueni?
• Ifa ussun Tafit a pwarata pwe a eani lukuluk won Jiowa?
• Ikkefa ekkewe ulungat popun a fis riaffou ngeni aramas ikenai, iwe, pwata epwe murinno ach sipwe enniwili fan ekkoch?
• Ifa an Jiowa kapwung won aramas, iwe, pwata a pwungoch?
• Met a kapachelong lon ach sipwe lukuluk won Jiowa?
2, 3. (a) Pwata Tafit a lukuluk pwe epwe tongeni fiu ngeni Koliat? (b) Ikkefa ekkewe ruu mettoch sipwe kaeo fan iten ach sipwe eani lukuluk won Jiowa?
4, 5. Met popun a weires ngeni chommong aramas ar repwe eani lukuluk won Kot?
6. Ifa ussun 1 Piter 5:8 a aiti ngenikich eu popun an a fis riaffoun aramas?
7. Ifa pwal eu popun an a fis riaffou me ren Kalesia 6:7?
8. Me ren An Salomon Afalafal 9:11, met popun aramas ra kuna riaffou?
9. Met chommong aramas rese weweiti ussun riaffou?
10, 11. (a) Me ren Rom 8:19-22, met a fis ngeni “masouen lang me fonufan meinisin”? (b) Ifa ussun sipwe tongeni silei io a anomu masouen lang me fonufan fan lamotongau?
12. Ifa ewe osukosuk a fisita ussun weween “masouen lang me fonufan meinisin,” iwe, ifa ussun epwe polu ena kapas eis?
13. Ifa ussun ewe fofforun lukumach lon Ichen a kku aramas?
14, 15. (a) Ifa ussun an Jiowa apwungu aramas a pwarata an we pwung? (b) Pwata Paul a apasa pwe “ese fis me ren pwisin letiper” an aramas kkewe riaffou me osukosuk?
16. (a) Pwata sipwe tongeni luku pwe Jiowa ese efisata riaffoun fonufan ikenai? (b) Ifa ewe apilukuluk allim Jiowa fan tong a awora ngeni aramas mi tuppwol?
17. Epwe ita ifa meefiach iei atun sia fen enniwili ekkewe popun an a fis riaffou won fonufan ikenai?
18, 19. Ifa alon Paipel mi peseikich ach sipwe lukuluk won Jiowa, nge ren ena, ikkefa ekkoch ekiek-mwaal aramas ra eani?
20, 21. Met epwe kapachelong lon ach lukuluk won Jiowa? Eani kapas awewe.
22, 23. (a) Pwata sipwe eani lukuluk won Jiowa lupwen epwe torikich osukosuk, iwe, ifa ussun sipwe fori ena mettoch? (b) Met sipe kaeo lon ewe lesen mwirin ei?
[Picture on page 22]
Tafit a eani lukuluk won Jiowa
[Picture on page 24]
Jises a awewei pwe lupwen eu imw tekia a turutiu lon Jerusalem, ese fis fan letipen Jiowa