Porausen Ewe Manausefal —Eu Afalafal Mi Kku Manauom
“Mi wor ai apilukuluk allim lon Kot . . . pwe epwe fis ewe manausefal ren ekkewe mi pung pwal ekkewe rese pung.”—FOFOR 24:15.
LE SOPWOLOON an we aulungatin sai fan iten ewe angangen misineri lon 56 C.E., ewe aposel Paul a nom lon Jerusalem. Mwirin an ares ren chon Rom, a mumuta ngeni an epwe uta mwen ewe kapwung tekia an chon Jus itan Sanhetrin. (Fofor 22:29, 30) Lupwen Paul a nengeni ekkewe sou kapwung, a kuna pwe a wor ekkoch Satusi leir, iwe, ekkewe lusun, ir Farisi. A mmen watte sokkofesenin ekkena ruu mwich won eu mettoch. Ekkewe Satusi rese luku porausen ewe manausefal, nge ekkewe Farisi ra luku. Ren an epwe affata minne a luku ussun ena afalafal, iei alon Paul: “Pwii ami, ngang emon Farisi, pwal noun Farisi. Iwe, iei upwele kuna apung ren ai apilukuluk allim, pwal ren ewe manausefal seni malo.” Ren an apasa ena, a afitikokoi chon ena mwich!—Fofor 23:6-9.
2 Fitu ier mwan, lupwen Paul a fetal won ewe al ngeni Tamaskos, a kuna eu langepwi, iwe, a rong leuwen Jises. Paul a eisini Jises: “Meeta upwele fori, Maing?” Jises a polueni: “Kopwele uta o tolong lon Tamaskos. Iwe, emon epwe eronuk mettoch meinisin minne ua filata pwe kopwe fori.” Lupwen Paul a wareiti Tamaskos, emon noun Kraist chon kaeo itan Ananaias a chuuri Paul, iwe, a awewei ngeni pwe “Koten semach kewe a pwisin filiukata pwe kopwe sinei letipan, o kuna ewe Emon mi Pung [atewe Jises mi fen manaueta], o rong och mongungu seni lon auan.” (Fofor 22:6-16) Iwe, esap och minen amairu pwe Paul a mmonleta pwe epwe anneta ewe popun an luku porausen ewe manausefal.—1 Piter 3:15.
Arongafetalin Apilukulukuun Ewe Manausefal
3 Mwirin, Paul a uta mwen mesen Kepina Filiks. Lon ena fansoun, Tertullus, “emon chon afalafal” mi wiisen uwawu an chon Jus apwung ngeni Paul, a tipi ngeni pwe i ewe sou emmwen lon eu keangen lamalam me a u ngeni ewe muu. Paul a muttir polueni ren an apasa pwe “Ua affata ngonuk pwe me ren minne ra eita ngeni eu ‘keangen lamalam,’ a iei ussun ngang mi foffori angang mi fel ngeni Koten semelapei kewe.” Iwe mwirin, an kapas a weneiti ewe popun alongolongun kapwung: “Mi wor ai apilukuluk allim lon Kot, ewe chok apilukuluk atekkeei ra pwal etiwa, pwe epwe fis ewe manausefal ren ekkewe mi pung pwal ekkewe rese pung.”—Fofor 23:23, 24; 24:1-8, 14, 15.
4 Ina epwe ruu ier mwirin, Porsius Festus, ewe mi wii Filiks, a ereni King Erot Akrippa pwe epwe eti i le atittina Paul, ewe chon kalapus. Festus a awewei pwe ekkewe chon tipi ngeni rese tipeeu ngeni an Paul apasa pwe “emon mi malo, atewe Jises, . . . a manau.” Ren an epwe anneta pwungun an kapas, Paul a eis: “Pwata ami oua pwisin ekieki pwe emon ese tongeni luku pwe Kot epwe amanauasefalli ekkewe mi malo?” Mwirin, a apasa pwe “Pokiten ua angei alillis seni Kot, tori ikenai ua chuen chok akkafalafal ngeni aramas mi kisikis me aramas mi lapalap, nge use apasa och, chilon chok minne ekkewe Soufos me Moses ra apasa epwe fis, pwe ewe Kraist epwe kuna riaffou, me pokiten i akkaemonun chon manausefal seni malo, epwe uwei saram ngeni noun kewe aramas pwal ngeni ekkewe muu.” (Fofor 24:27; 25:13-22; 26:8, 22, 23, NW) A enlet pwe Paul a uppos le peni porausen ewe manausefal! Ussun chok Paul, kich sipwe pwal tongeni akkafalafal fan lukuluk mi pochokkul pwe epwe wor eu fansoun manausefal. Nge met sokkun memmeef sipwe ekiekin kuna seni aramas? Neman epwe ussun chok minne Paul a kuna.
5 Ekieki mwo minne a fis me mwan atun an Paul we oruuen sai lon an angangen misineri (ina epwe 49-52 C.E.) lupwen a tori Atens. A kapasfengen me aramas mi luku chommong kot, iwe, a peseer pwe repwe ekieki an Kot we kokkot, kokkotun an epwe apwungu chon fonufan lon minne mi pwung ren an nounou emon mwan pwisin i a seikata. Jises ena emon. Paul a awewei pwe Kot a awora och kapasen anukunuk ussun ena ren an amanauasefalli Jises. Mei fet meefien ekkewe aramas? A mak pwe “Iwe, lupwen ra rong ussun manausefallin chon malo, ekkoch ra poputa le esiita i, nge pwal fitemon ra apasa pwe ‘Am aupwap rong ena poraus sonuk fan eu.’ ”—Fofor 17:29-32, NW.
6 Meefien ekkena aramas a ussun chok minne Piter me Jon ra kuna ekiselo mwirin Pentecos 33 C.E. A pwal watte an ekkewe Satusi kapachelong lon ena fitikoko. Fofor 4:1-4 a awewei minne a fis: “Iwe, fansoun ar kakapas ngeni ekkewe aramas, ekkewe samol-fel, o ewe kapitinen imwen fel, o pwal ekkewe Satusi, ra feito rer. Ra mangaueitir ren ar afalafala ekkewe aramas o apasata usun ewe manausefal seni malo me ren Jises.” Iwe nge, fitemon ra efich minne ra rong. “Chommong lein ir mi rong ewe kapas ra luku. Iwe, iteiter ekkewe mwan arap ngeni limengerou.” Neman sipwe ekiekin kuna memmeef mi sokkopat ika sipwe kapas ussun porausen ewe manausefal. Pokiten ena, a mmen lamot ach sipwe apochokkula ach lukuluk ussun ena afalafal.
Luku Me Ewe Manausefal
7 Sap minne meinisin mi wiliiti chon Kraist lon ewe aewin senturi C.E. ra mecheresin luku ewe apilukuluk fan iten ewe manausefal. Ekkoch mi weiresin luku ena poraus ra nom lon ewe mwichefelin Korint. Iei makkeien Paul ngeniir: “Pun ua angei ewe poraus mi lamot chapur ngenikich, o ua fen ngenikemi, pwe Kraist a malo fan asengesin ach tipis, usun a makketiu lon ekkewe puk; o a peias, o a manaueta mwirin ulungat ran, usun a makketiu lon ekkewe puk.” Mwirin Paul a anneta pwungun ena poraus ren an makkei pwe ewe Kraist mi manausefallita a “pwa ngeni limupuku som pwiich kewe,” iwe, a lap me leir ra chuen manau. (1 Korint 15:3-8) A pwal makkei pwe “Iwe, are am aua arongafetalei pwe Kraist a manausefallita seni malo, pwata ekkoch leimi ra apasa pwe ir mi malo resap manausefallita? Nge are ir mi malo resap manausefallita, iwe, Kraist ese pwal manausefallita. Are Kraist ese mo manausefallita, iwe, ewe poraus am aua arongafetalei a chok lamot-mwal, o ami luku mi pwal chok lamot-mwal.”—1 Korint 15:12-14.
8 Pwungun pwe porausen ewe manausefal eu afalafalen le popun, ina minne, ika ese enlet porausen ewe manausefal, iwe, a lamot mwaal ewe lamalamen Kraist. A enlet pwe ewe awewe mi pwung ussun ewe manausefal a asokkolo chon Kraist mi enlet seni chon Kraist mi chofona. (Keneses 3:4; Isikiel 18:4) Ina minne, Paul a apachalong porausen ewe manausefal lon “ekkewe afalafalen le popun” fan iten ewe lamalamen Kraist. Amwo epwe pposolo letipach fan iten ach sipwe “achocho ngeni ach sipwe asimau.” Iwe, Paul a makkei pwe ina “ewe mettoch sipwe fori ika Kot epwe wesewesen mutata.”—Ipru 6:1-3, NW.
Ewe Apilukulukuun Manausefal
9 Ren ach sipwe apochokkula ach luku fan iten porausen ewe manausefal, sipwe ekiekisefalli ekkeei sokkun kapas eis: Met weween alon Paipel lupwen a kapas ussun ewe manausefal? Ifa ussun ewe afalafal ussun ewe manausefal a kan atekiatai an Jiowa tong? Poluen ekkena kapas eis epwe apochokkula ach ririfengen me Kot, iwe, epwe pwal alisikich le aiti ngeni aramas ussun ewe manausefal.—2 Timoti 2:2; Jemes 4:8.
10 Ewe kapas “manausefal” a afou seni eu kapasen Kriik mi wesewesen wewe ngeni “utasefal.” Met sokkun mettoch a kapachelong lon ena kapas? Me ren ewe Paipel, ewe apilukulukuun manausefal a wewe ngeni ach luku pwe emon aramas mi malo epwe tongeni manau pwal eu. Ewe Paipel a pwal affata pwe ewe aramas epwe manausefal lon eu inisin aramas are inisin ngun, nge epwe longolong won an eani ewe apilukulukuun manau won fonufan are lon lang. Sia kan ingeiti an Jiowa tong, tipachchem, me manaman mi pwalo lon ena apilukuluk mi amwarar, apilukulukuun ewe manausefal.
11 Manausefallin Jises me pwiin kewe chon kepit a awora ngeniir eu inisin ngun mi fichiiti wiiser lon lang. (1 Korint 15:35-38, 42-53) Repwe angangfengen lon ewe wiis sou nemenem lon ewe Muun Messaia, nge ina ewe muu epwe forsefallieta ewe Paratis won fonufan. Ekkena chon kepit ra wewe ngeni eu mwichen samol fel mi nom fan nemenien Jises, ewe mi wiiseni wiisen Samol Fel mi Lapalap. Repwe wiisen atoura ngeni aramas feiochun an Kraist we asorun penmanau lon ewe fonufan sefo mi pwung. (Ipru 7:25, 26; 9:24; 1 Piter 2:9; Pwarata 22:1, 2) Nge lon ei fansoun, ekkan chon kepit mi chuen manau won fonufan ra tipeni ar repwe uoch mwen mesen Kot. Ika repwe malo, repwe angei “liwinir” ren ar manausefal ngeni manau lon lang lon ewe sokkun inisin ngun epwe manaufoch. (2 Korint 5:1-3, 6-8, 10; 1 Korint 15:51, 52; Pwarata 14:13) Paul a makkei pwe “Ika sia eufengen me atewe lon lapalapen an we malo, iwe, sipwe pwal wesewesen eufengen me i lon lapalapen an manausefal.” (Rom 6:5, NW)) Nge ifa ussun chokewe mi eani ewe manausefal ngeni manau won fonufan lon nikinikin aramas? Ifa ussun ewe apilukulukuun manausefal epwe tongeni alapalo ar riri ngeni Kot? Sia tongeni kaeo chommong mettoch seni porausen Eperiam.
Porausen Ewe Manausefal Me Chiechifengen Me Jiowa
12 Eperiam, ewe mi iteni “chiechien Jiowa,” i emon mwan mi sokkolo watteen an lukuluk. (Jemes 2:23, NW) Paul a mak fan ulungat ussun an Eperiam lukuluk lupwen a eiteita ekkewe mwan me fefin mi tuppwol lon Ipru sopwun 11. (Ipru 11:8, 9, 17) Aulungatin makkeian we a menlapei ewe lukuluk Eperiam a pwarawu lupwen a mmonleta pwe epwe asoresini noun we aluwol Aisek. Eperiam a wesewesen luku pwe Jiowa a anukuchara ewe pwon fan iten an epwe wor emon mwirimwirin ren Aisek. Inaamwo ika Aisek epwe nninniilo fan iten eu asor, nge Eperiam a “ekieki pwe Kot a tufichin amanauata i seni pwal mwo nge malo.”
13 Ussun an a ffatolo lon ena poraus, lupwen Jiowa a kuna ukuukun watteen lukuen Eperiam, a awora emon man fan iten ewe asor. Nge, minne a fis ngeni Aisek eu kapas awewe ussun ewe manausefal pwe iei makkeien Paul: “Seni ikewe ie atewe [Eperiam] a angei i [Aisek] lon kapas awewe.” (Ipru 11:19, NW) Pwal och, a fen nom ren Eperiam eu longolong mi nukuchar fan iten an epwe luku porausen ewe manausefal. Esap pwe Jiowa a amanauasefalli an Eperiam tufichin nounou lupwen ir me puluwan we Sera ra chufengen le chinnaper, iwe, ra nounatiu Aisek?—Keneses 18:10-14; 21:1-3; Rom 4:19-21.
14 Paul a makkei pwe Eperiam emon chon siamu me a imweim tento, iwe, a “witiwiti ewe telinimw mi enlet longolongun kewe, nge Kot ewe sou aueta me sou forata ena telinimw.” (Ipru 11:9, 10, NW) Esap ina wesewesen eu telinimw ussun Jerusalem, leenien an Kot we imwen fel. Nge, ina eu telinimw lon kapas awewe. A wewe ngeni an Kot we Muu lon lang, weween, Kraist Jises me chienan kewe 144,000 sou nemenem. A pwal mak pwe ekkena 144,000 fan linger lon lang ra wewe ngeni “ewe telinimw mi fel, Jerusalem mi Fo,” “puluwen” Kraist. (Pwarata 21:2) Lon 1914, Jiowa a seikata Jises pwe epwe wiisen Messaia ewe King lon ewe Muun lang, me a ereni pwe epwe nemenem lein chon koputan. (Kol Fel 110:1, 2; Pwarata 11:15) Ren an epwe tufichin kuna ekkewe feioch seni nemenien ena Muu, Eperiam, “chiechien Jiowa,” epwe manau pwal eu. Pwal ussun chok, ren ach sipwe tufichin kuna ekkewe feioch fan ena Muu, sipwe manau lon an Kot we fonufan sefo ren ach nom lein ewe mwich mi lapalap, ewe mi manau mwirin Armaketon, are sipwe nom lein chokewe mi manaueta seni malo. (Pwarata 7:9, 14) Iwe nge, ewe apilukulukuun manausefal a longolong won met?
An Kot Tong—Iei Longolongun Ewe Apilukulukuun Manausefal
15 Ach pacheochfengen me Semach we lon lang, ewe mi ur ren tong, ach lukuluk mi pochokkul ussun chok Eperiam, me ach alleasochis ngeni an Kot kewe alluk ra atufichi an Jiowa eita ngenikich chon pwung me an ekieki pwe kich chiechian. Ena mettoch a suuki ngenikich ewe al mi emmwen ngeni ach sipwe kuna feioch fan nemenien ewe Muu. A enlet pwe ewe akkaewin oesini mi mak lon an Kot we Kapas lon Keneses 3:15 a awora longolongun ewe apilukulukuun manausefal me ach chiechifengen me Kot. Sap minne a chok oesini ussun chapapeloon mokuren Setan, nge a pwal oesini ussun an Setan afolu epinipinin pechen Mwirimwirin noun Kot we fefin. Maloon Jises won ewe iraan nninni eu fofforun afolu epinipinin pechen lon kapas awewe. An manausefallita lon ewe aulungatin ran a amoielo kinasan we me a atufichi apwungun “ewe emon mi tongeni efisata malo, weween, ewe Tefil.”—Ipru 2:14, NW.
16 Paul a achchema ngenikich pwe “Kot a fen pwarata an we tong ngenikich, pun, lupwen sia chuen tipis, Kraist a malo fan asengesich.” (Rom 5:8) Ach aucheani ena fofforun umoumoch a enletin apochokkula ach riri ngeni Jises me Semach we lon lang, ewe mi ur ren tong.—2 Korint 5:14, 15.
17 Jop, emon mwan mi tuppwol lon eu fansoun mwen warotoon Kraist, a pwal apilukuluku eu fansoun manausefal. A kuna riaffou watte seni Setan. Jop ese ussun chienan kewe mi chofona, pun esap fan eu ar kapas ussun ewe manausefal, nge ena apilukuluk a auruuru Jop, iwe, iei an kapas eis: “Are eman aramas a mala, ifa usun, epwe pwal manausefal?” Ren poluan, Jop a pwisin apasa pwe “Lon unusen ranin ai angang upwe witiwit tori fansoun ai ngasala epwe feito.” A affata ei mettoch lupwen a kapas ngeni an we Kot, Jiowa: “En kopwe koriei, nge ngang upwe paluenuk.” A iei ussun an Jop awewei meefien ewe Chon Forikich mi ur ren tong: “Ren angangen poum kopwe wenewenen mwotoresiiti.” Ewer, Jiowa a mwasangasangeiti ewe fansoun lupwen chon tuppwol repwe manausefallita. Ina eu mettoch mi apochokkula ach riri ngeni i ika sipwe ekilapei ewe tong me umoumoch a kan pwarata ngenikich inaamwo ika sise unusoch!—Rom 5:21; Jemes 4:8.
18 Ewe soufos Taniel a tuppwol le angang ngeni Kot lon manauan we mi ttam, nge me ren noun Kot we chonlang, i “emon mwan mi fokkun auchea.” (Taniel 10:11, 19) A unus an tuppwol ngeni Jiowa seni ewe fansoun an a choisa lon 617 B.C.E. tori an malo ekiselo mwirin an kuna eu langepwi lon 536 B.C.E., nge ina ewe aulungatin ierin nemenemen Sairos, ewe kingen Persia. (Taniel 1:1; 10:1) Le atun ena aulungatin ierin Sairos, a tori Taniel langepwiin ekkewe muun fonufan mi pochokkul seni meinisin, iwe, ra atettel tori ar ra muchulo lon ewe riaffou mi lapalap, ewe mi arapoto. (Taniel 11:1-12:13) Pokiten Taniel ese tongeni unusen weweiti ewe langepwi, iei an tingor ngeni ewe chonlang mi pwari ngeni: “Ai samol, epwe met sopolan ekei mettoch?” Ren poluan, ewe chonlang a kapas ussun ewe “fansoun sopolan,” iwe, ina ewe atun “chokewe mi mirit” repwe weweiti. Nge ren Taniel, met an apilukuluk? Iei alon ewe chonlang: “Murin kopwe mala o manausefalita, pwe kopwe angei wisom lesopolan fansoun.” (Taniel 12:8-10, 13) Taniel epwe utasefal “lon manausefallin ekkewe mi pwung,” atun an Kraist Engerou Ierin Nemenem.—Luk 14:14.
19 Iei sia manau mwirichikin ewe fansoun sopwoloon, iwe, a fen kon arapoto fansoun poputaan an Kraist we Engerou Ierin Nemenem lap seni ewe fansoun sia keran aewin poputa le lukuluk. Ina popun sipwe eisinikich, ‘Upwe nonnom lon ewe fonufan sefo fan iten ai upwe tufichin chuuri Eperiam, Jop, Taniel, me ekkewe lusun mwan me fefin mi tuppwol?’ Ewer, sipwe nonnom ikewe ie ika sipwe pacheoch ngeni Jiowa me akkalleasochisi an kewe alluk. Lon ena eu lesen mi tapwoto mwirin ei, sipwe kaeo pwal ekkoch poraus ussun ewe apilukulukuun manausefal ren ach sipwe tufichin silei io kkan repwe manaueta.
En Mi Chechchemeni?
• Mei fet meefien aramas lupwen Paul a kapas ussun an apilukuluku porausen ewe manausefal?
• Pwata ewe apilukulukuun manausefal a kan asokkolo chon Kraist mi enlet seni ir kewe mi chofona?
• Pwata sia silei pwe Eperiam, Jop, me Taniel ra luku porausen ewe manausefal?
[Ekkewe kapas eis fan iten ewe lesen]
1. Ifa ussun porausen ewe manausefal a efisata fitikoko ngeni chon ewe Sanhetrin?
2. Pwata Paul a mmonleta pwe epwe anneta minne a luku ussun ewe manausefal?
3, 4. Ifa ussun Paul a wiliiti emon mi uppos le peni porausen ewe manausefal, me met sia tongeni kaeo seni ewe leenien appiru a isetiu?
5, 6. (a) An ekkewe aposel afalafal fan iten porausen ewe manausefal a efisata met sokkun memmeef lein aramas? (b) A lamot ach sipwe fet lupwen sipwe kapas ussun ach apilukuluku porausen ewe manausefal?
7, 8. (a) Ussun an a mak lon echo taropwe ngeni ewe mwichefelin Korint lon ewe aewin senturi, ifa ussun ewe mettoch luku epwe tongeni an epwe lamot mwaal? (b) Ifa ussun ar silei enletin weween ewe apilukulukuun manausefal a kan asokkolo chon Kraist mi enlet seni ir kewe mi chofona?
9, 10. Met weween ewe kapas “manausefal” lon Paipel?
11. Met sokkun apilukuluk fan iten ewe manausefal a suuk ngeni noun Kot kewe chon angang mi kepit?
12, 13. Ifa ewe alongolong mi nukuchar fan iten ewe manausefal a nom ren Eperiam?
14. (a) Me ren Ipru 11:9, 10, ifa ewe mettoch Eperiam a witiwit ren? (b) Ren an epwe tufichin kuna ekkewe feioch seni ewe Muu lon ewe fonufan sefo, met epwe pwal fis ngeni Eperiam? (c) Ifa ussun sipwe tufichin kuna ekkewe feioch seni ewe Muu?
15, 16. (a) Ifa ussun ewe akkaewin oesini lon ewe Paipel a awora longolongun ach apilukuluk fan iten ewe manausefal? (b) Ifa ussun ach luku porausen ewe manausefal epwe tongeni apochokkula ach riri ngeni Jiowa?
17. (a) Ifa ewe apilukuluk Jop a kapas ussun? (b) Jop 14:15 a pwarata met ussun Jiowa, me met meefiom ussun ena?
18, 19. (a) Ifa ewe apilukuluk a nom ren Taniel fan iten an epwe manau pwal eu? (b) Met sipwe kaeo ussun lon ena lesen mi tapwoto mwirin ei?
[Lios lon pekin taropwe 7]
Paul a kapas ussun ewe apilukulukuun manausefal fan an lukuluk mi pochokkul lupwen a uta mwen mesen Kepina Filiks
[Lios lon pekin taropwe 8]
Pwata Eperiam a luku porausen ewe manausefal?
[Lios lon pekin taropwe 10]
Jop a kuna auruurun letipan seni ewe apilukulukuun manausefal
[Lios lon pekin taropwe 10]
Taniel epwe liwinsefal lon fansoun manausefallin chon pwung