Mi Fichitiir Pwe Epwe Emmweniir Ngeni Ekkewe Chanüttuun Konikin Manau
“Ewe Lam . . . epwe pwisin tumunur, o epwe emmwenir ngeni ekkewe chanutuun konikin manau.”—PWAR. 7:17.
ÄN KOT WE KAPAS a pwäratä pwe ekkewe mi kepit, iir “ewe chon angang mi tuppwel o tipatchem,” ekkewe ra wisen tümünü ekkewe mettochun Kraist woon fönüfan. Lupwen Kraist a etittina ewe “chon angang” lon 1918, a küna pwe ekkewe mi kepit woon fönüfan ra tuppwöl lon wiser we, wisen awora “mongo [lon pekin ngün] fansoun meinisin.” Ina minne, Jises, ewe Masta, a pwapwaitiir, iwe a seikiiretä “won pisekin meinisin.” (Älleäni Mattu 24:45-47.) A ina ussun ekkewe chon kepit ra angang fän iten chiechier kewe chon fel ngeni Jiowa woon fönüfan me mwen ar repwe angei alemwirier lon läng.
2 Emön masta a wor an nemenem woon pisekin kewe, iwe, epwe pwisin filian äeän. Pisekin Jises Kraist, ewe King, a wewe ngeni mettoch meinisin mi weneiti ewe Mwu woon fönüfan. A kapachelong ewe “mwich mi fakkun lapalap” ewe aposel Jon a küna lon eü längipwi. Jon a aweweei ussun ewe mwich mi lapalap ren an erä: “Mwirin, ua nennengeni, o nengeni, eu mwich mi fakkun lapalap, esor emon mi tongeni alleani iteiter, seni ekkewe mu meinisin, o ekkewe einang meinisin, o sokkun aramas meinisin, o sokkun kapas meinisin, ra ukkuta mwen ewe leenien motun king, o mwen mesen ewe Lam, ra ufouf mangaku pwechepwech mi langattam, o a wor pan ira pam le pour.”—Pwar. 7:9.
3 Jises a apasa pwe chon ewe mwich mi lapalap ra nonnom lein nöün kewe pwal “ekkoch siip.” (Jon 10:16) Ra eäni äpilükülükün manau esemuch lon paratis woon fönüfan. Ra lükülük pwe Jises “epwe emmwenir ngeni ekkewe chanutuun konikin manau o Kot epwe tolu seni meser kewe chönun meser meinisin.” Ina popun, “ra fen sopuni o apwechepwechalo ufer mi langattam ren chaan ewe Lam.” (Pwar. 7:14, 17) Pokiten ra anganga ar lükü än Jises we asor, ‘ufer mi pwechepwech’ fän mesen Kot. Ra küna pwüng pun iir chiechien Kot, ussun chök Eperiam.
4 Pwal och, pokiten ewe mwich mi lapalap, eü kinikinin ewe mwichen pwal ekkoch siip, ra küna pwüng me ren Kot, ra tongeni lükü pwe repwe manauewu seni kataloon ei otot atun ewe riaffou mi lapalap. (Jem. 2:23-26) Iir mi tongeni arap ngeni Jiowa, ussun eü kümi, iwe, ra tongeni eäni ewe äpilükülük mi amwarar pwe repwe manauewu seni Armaketon. (Jem. 4:8; Pwar. 7:15) Rese nemeni pwisin iir nge ra tipemecheres le angang fän emmwenien ewe King lon läng me pwiin kewe mi kepit woon fönüfan.
5 Aramasen än Setan otot ra fen ü ngeni Chon Kraist mi kepit, me repwe pwal sopwosopwolo le ü ngeniir. Iwe nge, iir mi kepit repwe tongeni lükülük woon älillisin chiechier kewe, chon ewe mwich mi lapalap. Iei, a chokisikisilo ekkewe mi kepit, nge a chochchommongolo chochoon ewe mwich mi lapalap ren fite fite ngeröü iteiten ier. Ekkewe mi kepit rese tufichin tümünü iteiten ekkewe 100,000 som mwichefel woon unusen fönüfan. Ina popun, ekkewe mi kepit ra angei älillis seni ekkoch mwän me lein chon ewe mwich mi lapalap, ra tufich ngeni ewe wis elter lon ekkewe mwichefel. Ra älisiir le tümünü ekkewe fite milion Chon Kraist Jises a fen alükülükü ngeni “ewe chon angang mi tuppwel o tipatchem.”
6 Ewe soufos Aisea a fen oesini ussun ewe älillis ewe mwichen pwal ekkoch siip epwe awora ngeni chiener kewe Chon Kraist mi kepit. A makkei: “Iei alon ewe Samol mi Lapalap ngeni Israel, ‘Wöün Isip me pisekin Itiopia repwe om, nge ekewe chon Sepa mi mwänöch repwe feito reöm pwe kopwe nöüniir amanau. Iwe, repwe tapwela murum.’” (Ais. 45:14) Lon kapas awewe, ekkewe Chon Kraist mi äpilükülükün manau woon fönüfan ra tapwelo mwirin me nom fän emmwenien ewe mwichen chon angang me an we mwichen Sou Pwüngüpwüng. Ussun “chon angang rese kamö,” ekkewe pwal ekkoch siip ra tipemecheres me letip-unus le äeä ar pöchökkül me tufich fän iten kalisitään ewe angangen afalafal, ewe angang Jises a awisa ngeni nöün kewe mi kepit woon fönüfan.—Fofor 1:8; Pwar. 12:17.
7 Atun ra älisi pwiir kewe mi kepit, chon ewe mwich mi lapalap ra kan käkkäeö pwe repwe wiliti longolongun ewe mineföön mwichen aramas repwe manau mwirin Armaketon. Mi lamot pwe ena longolong epwe pöchökkül me lüküchar, me chon ena mwich repwe tipemecheres me tufich le apwönüetä emmwen seni ewe Masta. Emön me emön Chon Kraist epwe tongeni pwäratä pwe ewe King, Kraist Jises, a tongeni nöünöü i. Ren an anganga an lükü me an tuppwöl iei, a pwäratä pwe epwe pwal tipemecheresin älleäsochisi alon ewe King lon ewe fönüfan sefö.
Chon Ewe Mwich Mi Lapalap Ra Ännetatä Ar Lükü
8 Ewe mwichen pwal ekkoch siip, chienen ewe mwichefelin Chon Kraist mi kepit, ra ännetatä ar lükü lon sokkopaten napanap. Äeüin, ra älisi ekkewe mi kepit ren ar esilefeili ewe kapas allim ussun Mwuun Kot. (Mat. 24:14; 28:19, 20) Oruuan, ra tipemecheres le anomuur fän emmwenien ewe Mwichen Sou Pwüngüpwüng.—Ipru 13:17; älleäni Sekaraia 8:23.
9 Aülüngätin, chon ewe mwich mi lapalap ra älisi pwiir kewe mi kepit ren ar atipeeüfengenni manauer ngeni än Jiowa kewe kapasen alongolongun allük mi pwüng. Ra achocho le ämääri “tong, pwapwa, kinamwe, mosonoson, kirokiroch, lipwakoch, luku, tipefesir, forfichi.” (Kal. 5:22, 23) Ikenäi, lape ngeni aramas ra fen efich ar repwe föfföri “ekkewe angangen fituk” lap seni ar napanapeni ekkena napanap mi öch. Iwe nge, chon ewe mwich mi lapalap ra tipeppos le sü seni “lisou, fofor-ingau, angolsa, fel ngeni anu, angangen rong, oput, anini, aweires, song, apangau, tatafengen, ekinikinfesen, lolowo, torongki, akurang, o pwal ekkeei sokkun mettoch.”—Kal. 5:19-21.
10 Pokiten kich sise unusöch, a weires ach sipwe uwaani uwaan ewe ngün mi fel, sü seni ekkewe angangen fituk, me ü ngeni ekkewe sossot seni än Setan ei fönüfan. Iwe nge, sipwe tipeppos pwe sisap mut ngeni letipechou pokiten pwisin ach kewe apwangapwang, ach kewe mwääl, are apwangapwangen inisich ar repwe ekisalo ach tong ngeni Jiowa me apwangapwangaalo pöchökkülen ach lükü. Sia silei pwe Jiowa epwe apwönüetä an we pwon pwe epwe amanaua ewe mwich mi lapalap lon ewe riäfföü mi lapalap.
11 Iwe nge, sia kan mammasa iteitan pun sia silei pwe wesewesen ewe chon oputakich, ewe Tefil, ese mwittir fangetä. (Älleäni 1 Piter 5:8.) A sotun nöünöü ekkewe chon rikilo me pwal ekkoch pwe repwe etipetipakich pwe ach lükü mi chofona. Nge lap ngeni ese pwönütä. A pwal chök ina ussun ren riäfföü-mwääl, inaamwo ika fän ekkoch a fen ammanga ewe angangen afalafal, nge fän chommong a fen apöchökkülatä lüküen chokkewe ra küna riäfföü-mwääl. Ina minne, Setan a alapalo an äeä eü minen etipetip mi manaman le apwangapwangaalo ach lükü. A angang woon ach meefi letipechou. A wor ei kapasen öüröür ngeni Chon Kraist lon fansoun ekkewe aposel ussun ena minen efeiengaü, a erä: “Oupwe ekieki usun atewe [Kraist] mi likiitu lupwen ekkewe chon tipis ra u ngeni i iei usun.” Pwata? “Pwe ousap chipwangelo, are apwangapwangelo, lon ngunumi.”—Ipru 12:3.
12 Ka fen meefi fän eü pwe kopwe fangetä lon om fel ngeni Jiowa? Fän ekkoch, ka meefi pwe ka fokkun lamotongaü? Ika ina ussun meefiom, kosap mut ngeni Setan an epwe äeä om kana memmeef pwe epwe eppetuk seni om angang ngeni Jiowa. Om käeöfichi ewe Paipel, tinikken le ikkiotek, fiffiti mwich iteitan, me pwal chiechi ngeni chienom kewe chon lükü epwe apöchökkülok me tümünük seni om kopwe ‘apwangapwangelo lon ngünüm.’ Jiowa a fen pwonei pwe epwe älisi chon angang ngeni I pwe repwe pöchökkülsefäl, iwe, sipwe tongeni lükülük woon an na pwon. (Älleäni Aisea 40:30, 31.) Nefotofot ngeni angangen ewe Mwu. Sü seni ekkewe mettoch mi alusmwäälli om fansoun me erikalo om ekiek, iwe, kopwe ekilapei om äkkälisi aramas. Ekkeei mettoch repwe apöchökkülok pwe kopwe tongeni likiitü fän letipechou.—Kal. 6:1, 2.
Manauewu Seni ewe Riäfföü me Tolong lon ewe Fönüfan Sefö
13 Mwirin Armaketon, epwe lamot ngeni chommong rese pwüng ar repwe käeö än Jiowa kewe allük. (Fofor 24:15) A lamot repwe käeö ussun än Jises möön kepich me pwal ifa ussun repwe anganga ar lükü woon ena asor pwe repwe küna feiöch. Mi lamot repwe likitalo lüküen ar lamalam mi chofona me pöütalo napanapangaüen manauer me loom. Repwe käeö ar repwe pwilitalong ewe napanap mi fö mi esissillatä ekkewe Chon Kraist mi enlet. (Ef. 4:22-24; Kol. 3:9, 10) Epwe watte än ekkewe ekkoch siip angang ika repwe manauewu seni Armaketon. A ifa me watteen apwapwaan ach angang ngeni Jiowa lon ena atun esap chüen wor ekkewe sossot me mettoch mi erikikich seni ei otot mi ngaü!
14 Nöün Jiowa kewe chon angang mi tuppwöl mi fen mälo me mwen än Jises afalafal woon fönüfan repwe käeö chommong pworaus. Repwe käeö iön ewe Messaia mi pwonetiu, ewe ra witiwiti nge rese küna. Atun ra manau me loom, ra fen pwäratä tipemecheres pwe repwe käeö me ren Jiowa. Anchangei mwo apwapwaan me aüchean wisach le aweweei ngeni Taniel pwönüetään ekkewe oesini a makkei nge ese pwisin weweiti!—Tan. 12:8, 9.
15 Pwüngün, inaamwo ika chokkewe mi manausefäl repwe käeö chommong pworaus senikich, nge mi pwal wor chommong mettoch sipwe eisiniir. Repwe titchiki le apworausa pworaus ese kon lien titchik lon Paipel. A ifa me emmeseikan ach sileöchü napanapen Jises seni tettelin pwiin we Jon Papatais! Ese mwääl, ekkewe mettoch sipwe käeö seni ekkena chon pwäratä mi tuppwöl repwe alapalo ach weweiti ewe Kapasen Kot. Ekkewe chon angang ngeni Jiowa mi fen mälo, pachelong ekkoch me lein chon ewe mwich mi lapalap mi mälo lon ewe fansoun sopwoloon, “repwe manausefallita ngeni ewe sokkun manau mi murinno seni.” Ra poputä ar angang ngeni Jiowa lon ei otot mi nom fän nemenien Setan. Iwe nge, a ifa me apwapwaan ar repwe sopwelo ar angang lon ewe fönüfan sefö mi fokkun nonnomöch!—Ipru 11:35; 1 Jon 5:19.
16 Lon ewe Ränin Kapwüng, epwele suuk ekkoch puk. Ekkena puk, fengen me ewe Paipel repwe wiliti longolongun kapwüngün meinisin mi manau ika iön leir epwe fichitiir ewe manau esemuch. (Älleäni Pwarata 20:12, 13.) Le sopwoloon ewe Ränin Kapwüng, epwe naf fansoun fän iten emön me emön epwe affata menni pekin a peni ren ewe popun alongolongun kapwüng. Epwe nom fän nemenien ewe Mwu me mut ngeni ewe Lam an epwe emmweni ngeni ekkewe “konikin manau mi puwacheta”? Are epwe ü ngeni Mwuun Kot me esap anomu pwisin i fän nemenian? (Pwar. 7:17; Ais. 65:20) Lon ena atun, meinisin woon fönüfan repwe pwisin filatä met repwe föri, nge ewe tipis ra alemwiri are ei fönüfan mi ngaü esap chüen eppetir. Esap wor emön epwe tongeni appölüa pwüngün än Jiowa säingoon kapwüng. Iir kewe mi ngaü rese mochen siwil repwe mäfochofocholo.—Pwar. 20:14, 15.
17 Chon Kraist mi kepit ikenäi ra fen küna pwüng pwe repwe mwuuni ewe Mwu, me ra äpilükülükün nemenem atun ewe Ränin Kapwüng. A ifa me watteen aüchean ewe wis repwe wiseni! Ena äpilükülüköch a amwökütüür le älleäsochisi än Piter we fön ngeni pwiich kewe lon ewe äeüin senturi: “Oupwe alapalo ami achocho pwe oupwe anukuchara ami koko o fifilita, pun are oupwe fori iei usun, ousap chuen turutiu; iwe, iei usun epwe fakkun efisata ngenikemi eu leenien tolong lon ewe mu esemuch, muun ach Samol o Chon Amanau, Jises Kraist.”—2 Pit. 1:10, 11.
18 Ekkewe pwal ekkoch siip ra pwapwafengen me pwiir kewe mi kepit. Ra tipeppos le älisiir. Ussun chiechien Kot ikenäi, ra unusen achocho ükükün ar tufich lon ar angang ngeni Kot. Atun ewe Ränin Kapwüng, repwe pwapwa le apöchökkülatä än Kot kewe kokkot atun Jises epwe emmweniir ngeni ekkewe chanüttuun konikin manau. Iwe, lon na fansoun, epwe fich ngeniir ar repwe nöün Jiowa kewe chon angang woon fönüfan tori feilfeilo chök!—Rom 8:20, 21; Pwar. 21:1-7.
En mi Chechchemeni?
• Met a kapachelong lon pisekin Jises kewe?
• Ifa ussun chon ewe mwich mi lapalap ra älisi pwiir kewe mi kepit?
• Ikkefa ekkewe wis me äpilükülük chon ewe mwich mi lapalap ra pwapwaiti?
• Ifa om ekiek ussun ewe Ränin Kapwüng?
[Kapas Eis fán Iten ewe Lesen]
1. Ifa ussun än Kot we Kapas a pwäratä ika iö ekkewe Chon Kraist mi kepit, me ifa ewe wis Jises a ngeniir?
2. Aweweei ussun pisekin Jises kewe.
3, 4. Pwata chon ewe mwich mi lapalap ra fokkun feiöch?
5. Ifa ussun chon ewe mwich mi lapalap ra älisi pwiin Jises kewe mi kepit?
6. Ifa ussun a fen oesini pwe ekkewe pwal ekkoch siip repwe älisi Chon Kraist mi kepit?
7. Fän iten met än chon ewe mwich mi lapalap käkkäeö iei?
8, 9. Ifa ussun chon ewe mwich mi lapalap ra ännetatä ar lükü?
10. Chon ewe mwich mi lapalap ra tipeppos lon met?
11. Ifa ewe minen etipetip Setan a äeä ren an epwe apwangapwangaalo än Chon Kraist lükü?
12. Ifa ussun ekkewe fön lon Paipel a apöchökküla iir kewe ra riäfföü pokiten letipechou?
13. Ifa ewe angang chokkewe mi manauewu seni Armaketon repwe föri?
14, 15. Aweweei mwo ewe akkapworausfengen epwe fis lefilen chokkewe repwe manauewu seni ewe riäfföü mi lapalap me chokkewe mi pwüng repwe manausefäl.
16. Me ren ewe oesini, met epwe fis lon ewe Ränin Kapwüng?
17, 18. Met ekkewe mi kepit me ewe mwichen pwal ekkoch siip ra äpilükülüköch ngeni ussun ewe Ränin Kapwüng?
[Sasing lón pekin taropwe 25]
Chon ewe mwich mi lapalap ra fen sopwuni o äpwechepwechaalo üfer ren chchaan ewe Lam
[Sasing lón pekin taropwe 27]
Met ka ekiekin käeö seni ekkewe mi tuppwöl repwe manausefäl?