Kesap Mönükalo Chokkewe Rese Chüen Akafalafal
1. Pwata sipwe achocho le älisi chokkewe rese chüen akafalafal?
1 En mi sissilei chokkewe rese chüen akafalafal? Neman rese chüen fiti ewe mwichefel me ra fen pase seni ewe lükü. Eli ka chuuri emönnewe atun om afalafal imw me imw. Sipwe chechchemeni pwe emönnewe ese chüen akafalafal (lap seni wonu maram), nge i mi chüen chök emön pwiich we. Ina minne, sia mochen ammeef ngeni pwe sia chüen tongei me älisi pwe epwe liwinsefäliti ewe mwichefel me ‘ach Chon Mas, ewe Sou Tutumunu ngunuch.’ (1 Pit. 2:25)
2. Ifa ussun sipwe apöchökkülatä emön ese chüen akafalafal?
2 Pwäratä Om Äfänniir: Lupwen sia köri lon fon are chuuri lon imwan ewe emön ese chüen akafalafal, sia ammeef ngeni pwe sia chüen chechchemeni i. Met sipwe tongeni apasa? Sia tongeni apöchökküla letipan ren ach apasa pwe sia kan ekkekieki i. Fos ussun ekkewe mettoch mi apöchökkül me mürinnö. (Fil. 4:8) Sia tongeni apworausa eü mettoch sia pwapwaiti lon ach mwich. Sia pwal tongeni etiwa i lon ach kewe mwich are mwichelap me älisi an epwe tikeri ewe leenien mwich.
3. Ifa ussun emön sister a pwal afalafal sefäl?
3 Emön chon afalafal a chuuri emön sister ese chüen akafalafal lon lap seni 20 ier me lon ewe territory. Inaamwo ika ese mochen etiwa eü Bible study, ewe chon afalafal a chüen chuchuurisefäli me a kan likiti ngeni ekkewe mineföön chassi. Lupwen a fis eü District Mwichelap, ewe chon afalafal a pwal apworausa och pworaus a pwapwaiti lon ewe mwichelap. Lo, lo, lo, ei sister a pwal afalafal sefäl.
4. Met sipwe föri lupwen emön a poputä le fiffitisefäli ekkewe mwich?
4 Lupwen Emön A Liwinsefäl: Lupwen emön pwiich a poputäsefäl le fiffiti mwich, met sipwe föri? Iwe, met Jises a föri lupwen nöün kewe chon käeö ra pwal likitalo i? Jises a kör ngeniir “pwii” fän kirekiröch me a pwäratä pwe a lükülük wor. A pwal mwo nge awisa ngeniir eü wis mi fokkun aüchea. (Mt. 28:10, 18, 19) Ekiselo mwirin, nöün kewe chon käeö ra fen pwal achochosefäl me “rese mo ukutiu” seni ar afalafala ewe kapas allim.—Fof. 5:42.
5. Ineet atun a lamot ach sipwe chuuri ekkewe elter woon emön ese chüen akafalafal.
5 Mwen ach sipwe käeö Paipel ngeni emön ese chüen akafalafal are mwen ach sipwe etiwa emönna an epwe fitikich le afalafal, sipwe mwo kütta emmwen seni ekkewe elter. Ika sia chuuri emön ese chüen akafalafal me lon ach territory, sipwe esile ngeni ekkewe elter pwe repwe tongeni awora älillis ngeni ena emön.
6. Met sokkun pwapwa sipwe tongeni küna seni ach älisi chokkewe rese chüen akafalafal?
6 Ussun ewe Paipel a affata ngenikich, ekkewe chök mi likiitü tori le sopwoloon repwe küna manau. (Mt. 24:13) Ina popun, kopwe äkäfänni chokkewe ra fen turukapelo are paselo lon ar lükü. Ika sipwe mosonottam le pwäratä än Jiowa we tong ngeniir ren ach etenikiir, sipwe pwapwaesini ach mwimwinfengen sefäl lon ach angang mi fel.—Luk 15:4-10.