Riäfföü Woon Unusen Fönüfan Eü Chök Mettoch Epwe Pwäkini

SIA kükküna riäfföü ekis meinisin, iwe, chommong aramas mi ümöümöch ra kan älisi iir kewe mi riäfföü. Ren chök äwewe, chon angangen pioing ra akkangang langattam fansoun le älisi chon semwen are feiengaw. Chon kunukun ekkei, polis, sou fför allük, me chon uwou sein pioing ra kan achocho le asopwalo än aramas riäfföü. Ra tongeni älisi ekkoch aramas, nge iir are eü mwicheich rese tufichin asopwalo riäfföü woon unusen fönüfan. Iwe nge, Kot a tongeni pwäkini riäfföü ekis meinisin.

Ewe amuchüloon puken Paipel a alükülükükich pwe “[Kot] epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.” (Pwarata 21:4) Ena pwon a weneiti chommong aramas. Iei än Kot kokkot pwe epwe asopwalo riäfföü meinisin. Epwe föri ena ren an epwe amoielo maun, echik, samau, me pwüngüngaw, fengen me aramasangaw meinisin. Esor emön aramas a tongeni föri ei.

Met Mwuun Kot Epwe Föri

Kot epwe apwönüetä an kewe pwon ren ewe arüüemönün mi pöchökkül seni meinisin, ina i Jises Kraist, ewe mi fen manausefäl. Ekiselo chök nge esap chüen wor epwe ü ngeni än Jises nemenem woon unusen fönüfan. Sisap chüen nom fän nemenien aramas mi wisen king are pereseten. Iwe nge, sipwe nom fän nemenien emön chök King me eü chök mwu, Mwuun Kot we.

Ena Mwu epwe arosalo mwuun aramas meinisin. Ewe Paipel a oesini me loom pwe “Ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.” (Taniel 2:44) Aramas meinisin repwe tipeeüfengen fän eü chök mwu mi pwüng, Mwuun Kot we.

Atun Jises a nonnom woon fönüfan, a kapas usun ena Mwu fän chommong. A ereni nöün kewe chon käeö ar repwe iotek iei usun: “Mwum epwe war, letipom epwe fis won fanüfan usun chök lon läng.” (Mattu 6:10) Jises a erä pwe Mwuun Kot a ri ngeni pwönüetään letipen Kot woon fönüfan, iwe, letipan pwe epwe amoielo riäfföü woon unusen fönüfan.

Än Kot Mwu mi pwüng epwe atoto rech sokkun feiöch ese tufich ren mwuun aramas. Chechchemeni pwe Jiowa a awora eü möön kepich ren an fangolo Nöün we pwe aramas repwe tongeni küna manau esemuch. Fän nemenien ena mwu, aramas repwe unusöchülo. Met mwiriloon? Jiowa “epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas.”​—Aisea 25:8.

Eli ekkoch repwe eis: ‘Pwata Kot ese chök föri ei me iwe? Met a witiwiti?’ Jiowa a tongeni amoielo are eppeti riäfföü meinisin seni chök me loom. Iwe nge, a mut ngeni an epwe sopwosopwolo, sap ren pwisin feiöchün, nge fän iten än nöün kewe woon fönüfan repwe feiöchfochofoch. Äwewe chök, sam me in mi tongei nöür ra tongeni mutatä än nöür repwe küna riäfföü ika ra silei pwe repwe küna feiöch seni lon fansoun mwer. Pwal ina chök usun, mei wor popun Jiowa a mut ngeni aramas ar repwe küna riäfföü ren och fansoun mi kaük, iwe, ewe Paipel a äweweei met popun. A kapachelong pworausen tipis, ach tufichin pwisin filatä, me ewe kapas eis mi weneiti än Kot pwüüng le nemenem. Paipel a pwal äweweei pwe ren och fansoun mi kaük, a mut ngeni emön ngün mi ngaw an epwe nemeni ei fönüfan.a

Inaamwo ika sise tongeni titchiki pworausen ekkena popun lon fitu chök pekin taropwe, nge mei wor ruu pworaus mi ngenikich äpilükülüköch me apöchökkül. Iei ewe äeüin: Ekkewe feiöch Jiowa epwe ngenikich lon mwachkkan repwe fokkun chommong lap seni ekkewe riäfföü sia kükküna iei. Kot a alükülükükich pwe: “Esap chüen wor eman epwe chechemeni ekewe mettochun lom o ekieki usun.” (Aisea 65:17) Kot epwe unusen amoielo ewe riäfföü me letipechou sia kükküna seni an mutatä föfföringaw an epwe nom fansoun mwochomwoch.

Iei ewe oruuan: Kot a fen filatä ewe fansoun epwe asopwalo riäfföü. Chechchemeni pwe ewe soufos Apakuk a eisini Jiowa ika ifa ükükün ttamen an epwe mutatä föfförün mwänesol me fitikoko. Jiowa a pölüweni: “Epwap pwönüetä lon eu fansoun mi kefilitä. . . . Nge esap mang.” (Apakuk 2:3) Sipwe küna lon ewe lesen mwirin ei pwe ena “fansoun mi kefilitä” a chök arapoto.

[Pwóróus fan]

[Pwóór lón pekin taropwe 7]

Wokisin mi Oesini usun Pwapwa lon Mwachkkan

ESAP CHÜEN WOR MAUN:

“Oupwe feito o nengeni angangen ewe SAMOL, usun sokkun kiteter a fen fori won fonufan. A aukatiu ekkewe maun ekis meinisin won fonufan.”​—Kölfel 46:8, 9, TF.

ATTONGACH KEWE REPWE MANAUSEFÄL:

“Epwe fis ewe manausefal ren ekkewe mi pung pwal ekkewe rese pung.”​—Fofor 24:15, TF.

EPWE WOR MÖNGÖ FÄN ITEN MEINISIN:

“Sokkun mongo mi chommong epwe nonnom lon ewe fonu; epwe paepaefeil won ekkewe chukuchukuta.”​—Kölfel 72:16, TF.

ESAP CHÜEN WOR SAMAU:

“Iwe, esap wor eman chon ewe fanü epwe apasa pwe a samau.”​—Aisea 33:24.

ARAMASANGAW REPWE MOROLO:

“Nge ekewe aramasangau repwe kärila seni ewe fanü, pwal chokewe resap allükülük repwe üttütä seni me lon, usun irä ra üttütä seni pwül.”​—Än Salomon Fos 2:22.

EPWE WOR PWÜNGÜÖCH:

“Nengeni, eman king [Kraist Jises] epwe nemenem fän pwüng, nge ekewe samol repwe nemenem fän pwüngüöch.”​—Aisea 32:1.

[Ekkewe sasing lón pekin taropwe 7]

Mwuun Kot we epwe amoielo riäfföü meinisin sia fen kükküna