Sokkopaten Napanap fän iten Famili Fel me Pwisin Käeö

LE POPUTÄÄN ewe ier 2009 a siwil kokkotun än Chon Pwäratä Jiowa kewe mwich woon unusen fönüfan. Ekkewe ruu mwich iteiten wiik ra kochufengen me meinisin ra fen angei pesepes pwe repwe äeä ena fansoun le föri ar famili fel me pwisin käeö. Ka fen alamota ena mineföön kokkot? Ka unusen angei feiöch seni?

Ekkoch ra ekieki met sokkun puk repwe filatä le nöünöü lon ar famili fel. Esap weween pwe ewe mwichen Sou Pwüngüpwüng a tichikin anapanapa än eü me eü famili kokkotun fel. A sokkofesen nonnomun manauen eü me eü famili, ina popun, epwe mürinnö ika ewe sam are pwisin emön epwe ekiekiöchü ifa usun ewe famili fel iteiten wiik epwe fisöch.

Ekkoch ra ammolnatä met repwe käeö lon mwich atun ra föri ar famili fel, nge sanne ina chök met ra tongeni föri. Ekkoch ra älleani, pworausfengen me pwomweni ekkoch pworaus seni Paipel, äkkäeüin, fän iten ekkewe kükkün. Esap iteitan pwe napanapen ewe famili fel epwe usun napanapen ekkewe mwich, a wor kapas eis me pölüwan. Eü leeni mi kinamwe a mmen älillisöch me efisi pworausfengen mi apwapwa. Ena sokkun napanap a älisatä ach sipwe äeä ach ekiek me ena fansoun käeö epwe mürinnö me ämmeseik fän iten meinisin.

Iei makkeien emön sam mi wor ülümön nöün: “Fän chommong aua kan pworausfengen woon ewe älleaan Paipel. Emön me emön a kan älleani ekkewe sopwun me mwen äm fansoun käeö. Nei kewe ra filatä ekkoch pworaus repwe pwisin kütta, me mwirin apworausa. Fän chommong, nei we ät itan Michael, 7 ierin, a chüngaani och lios me makkeei eü pworaus. David, 13 ierin me Kaitlyn, 15 ierin, ra makkeei eü pworaus seni Paipel, nge usun itä ra küna met a fis lon na fansoun. Äwewe chök, lupwen aua älleani pworausen än Josef äweweei ekkewe ttan nöün Farao we chon umw pilawa me ewe chon tümünü an we kap ra ttana, Kaitlyn a makkeei ena pworaus, usun itä nge i emön chon kalapus mi katol met a kkan fis lon ena atun.”​—Keneses, sopwun 40.

Pwüngün, a sokkofesen nonnomun emön me emön pun eli met mi fichiiti eü famili ese pwal fichiiti ekkewe ekkoch. Ewe pworaus mwirin ei epwe awora fitu napanap sia tongeni äeä fän iten famili fel are pwisin käeö. Ese mwääl ka pwal tongeni ekieki ekkoch.

[Pwoor/Sasing lon pekin taropwe 22, 23]

Fän iten ekkewe famili mi wor nöür säräfö:

• Ewe famili epwe älleafengen ewe Paipel fän leüwommong. Emön leir, eli ewe sam epwe wisen älleani alon ewe chon apworaus, nge fitemön ra tongeni älleani alon ekkewe ekkoch me ngingini ngingiir.

• Pworaus woon ekkewe mettoch oupwe achocho ngeni, ekkewe oua tongeni mwittir tikeri me ekkewe epwe lamot watte fansoun mwen oupwe tikeri.

• Fän ekkoch, katol me pworausfengen woon ekkewe viteo mi longolong woon ewe Paipel.

• Käeö ewe kinikin lon ewe Leenien Mas itelapan “Fän Iten Ekkewe Kükkün me Säräfö.”

Fän iten ekkewe pwüpwülü esor nöür:

• Pworausfengen woon met oua käeö seni ämi älleani ewe Paipel.

• Ammolnatä fän iten ewe Käeöön Leenien Mas are Än ewe Mwichefel Käeöön Paipel.

• Pworausfengen woon ifa usun oua tongeni alapaalo ämi angang ngeni Jiowa.

Fän iten pwiich kewe mi lipich are chokkewe ar famili ese fiti ar lükü:

• Käeö ekkewe mineföön puk a katowu lon ekkewe mwichelap.

• Älleani ewe mineföön Yearbook are ekkewe minen lon ekkewe ier. (Esor lon fosun Chuuk.)

• Kütta pölüwen ekkewe kapas eis a kan piitä lon om leenien afalafal.

• Ammolnatä met kopwe eäni afalafal ngeni aramas.

Fän iten ekkewe famili mi wor nöür kükkün semirit:

• Pwomweni ekkoch pworaus lon Paipel.

• Käeö ewe kinikin lon ewe Leenien Mas itelapan “Asukula Noum Kewe Semirit,” are Ewe Leenien Mas minen December 1, 2007, pekin taropwe 8-12.