Pwata Pworoingawen Nemenem A Chék Sópwósópwóló?

“Eman aramas a nemeni aramas o ariaföüür.”​—ÄN SALOMON AFALAFAL 8:9.

ENA wokisin asan a fókkun weneiti án aramas nemenem seni lóóm tori ikenái. A fen efisi watteen riáfféú. Seni lóóm aramas mi letip wenechar ra kan sótun le fératá ótóten aramas mi pwúngiéch, nge ese kan pwénútá pokiten tipemmóng me pworoingawen nemenem. Met popun a ina usun? Pwata a chék sópwósópwóló pworoingawen nemenem? A fis pokiten ekkeei úlúngát etipetip mi ngaw.

1. Etipetipaen tipis.

Ewe Paipel a affata pwe kich ‘meinisin sia nonom fän nemenien tipis.’ (Rom 3:9) Tipis a usun eú semmwen “mi nonom” lón inisich sia álemwiri seni ach famili, nge esor sáfeian. Ren fite ngeréú ier, tipis a fen “nemenem” wóón aramas usun emén king. A usun eú “allük” mi ekketipetipakich. Fán etipetipaen tipis, chómmóng ra akkomwa pwisin mocheniir, achommongaaló pisekiir are áwattelói ar péchékkúlen nemenem inaamwo ika epwe tongeni aosukosuka ekkewe ekkóch.​—Rom 5:21; 7:17, 20, 23, 25.

2. Etipetipaen ei fénúfan mi ngaw sia nónnóm wóón.

Tipemmóng me án aramas ekieki chék pwisin iir a chéúfetál wóón ei fénúfan. Iwe, ekkóch ra meefi pwe a weires an epwe sókkóló napanaper seni ekkewe ekkóch. Pokiten ra kútta pwisin itetekiar, ra tipemmóng le áwattelói péchékkúlen ar nemenem. Ra pwal ámááraatá ar mochen áwattelói néúr moni me pisekiir lap seni minne mi wesewesen lamot ngeniir. A mmen elichippúng pún ekkena sókkun aramas ra fen eáni ewe esin manaw mi pworoingaw pwe repwe tikeri minne ra mochen. Rese ú ngeni ekkeei etipetip mi ngaw, nge ra fen “eti eu mwichemongun aramas le föri mine a ngau.”​—Ekistos 23:2.

3. Etipetipaen Satan ewe Tefil.

Satan emén chónláng mi ú ngeni Kot, “a atupu unusen chon fanüfan.” (Pwärätä 12:9) A sani an epwe nemeni me etipetipa aramas. A tipachem le sótun eingawa án emén mochen eáni manaw mi kinamwe me núkúnúkéch an epwe féri féfférún likótuputup pwe epwe apwénúetá mochenin.

A itá wewe ngeni pwe Satan a unusen nemenikich? Sipwe silei pélúwan lón ewe lesen mwirin ei.