Kapas Eis 3: Pwata Kot A Mut Ngeniei Ai Upwe Riáfféú?

SEMEN Ian we, i emén sou sakaw. Inaamwo ika Ian ese osupwangen mettóchun aion, nge a letipengaw pún a osupwangen án seman we epwe pwári an tong ngeni. A erá, “Use kon lien meefi ai tongei semei we pokiten an sou sakaw me féfférún ngeni inei we.” Atun Ian a wattetá, a poputá le tipemwaramwar ika mi wor Kot. A ekieki ei kapas eis: “Ika pwe mi wesewesen wor Kot, pwata a mutatá án aramas repwe riáfféú?”

Pwata aramas ra kan eáni ena kapas eis? Ikaamwo esap kon wor osukosuk lón manawom, nge atun ka kúna riáfféún aramas mi múrinné, eli óm meefi pwúngúngawan epwe asongak. Iwe nge, ewe kapas eis usun riáfféú epwe wesewesen kkúú letipom ika ka usun Ian le pwisin kúna lón manawom ekkena osukosuk, are emén attongeom a semmwen ika máló.

Met ekkóch ra pélúwen ngeni ena kapas eis? Ekkóch aramas ra lúkú pwe Kot a mutatá riáfféú pwe epwe áiti ngenikich usun ach sipwe pwáraatá tipetekison me úméúméch. Pwal ekkóch mi lúkú pwe aramas ra manaw, máló me upsefál lón pwal eú inis, ra apasa pwe án aramas riáfféú a pop seni ekkewe tipis ra féri lón manawer mwen ar upsefál.

Ika mi pwúng pélúwan kana, iwe, itá met aramas repwe ekieki? Kot ese áfánni riáfféún aramas, iwe, a weires ach sipwe tongei. Kot a kirikiringaw.

Ifa pélúwan me ren Paipel? Ewe Paipel a affata pwe esap tipisin Kot án aramas kúna riáfféú, a apasa: “Are eman aramas a tolong lon sosot, esap fokun apasa, ‘Ei sosot a feito seni Kot.’ Pun Kot esap tongeni küna sosotingau, i esap pwal sotuningauei eman.” (James 1:13) Iwe, ewe ekiek pwe tipisin Kot án aramas kúna riáfféú, ese tipeeú ngeni met Paipel a áweweei usun napanapen Kot kewe. Ifa usun?

Tong eú me lein napanapen Kot kewe mi kkóló aúchear. (1 Johannes 4:8) Ren an epwe ffat, ewe Paipel a aléllééi meefien Kot ngeni meefien ekkewe inelap mi chúen oupwu néúr. Kot a apasa: “Ifa usun, eman fefin epwe tongeni manlükala nöün mönükol, pwe esap tongeäsini nöün won inisin? Nge are epwe fen manlükala, ngang üsap manlukuk.” (Aisea 49:15) Ka tongeni anchangei pwe emén inelap mi tong epwe efeiengawa néún we seni enletin letipan? Aapw, emén sam are in mi tongei néún, a achocho le túmúnú seni riáfféú. Pwal ina usun Kot, i ese efisi riáfféún aramas mi wenechar.​—Keneses 18:25.

Ikaamwo Kot a áfánni riáfféún aramas nge ra chúen riáfféú. Iwe, eli kopwe ekieki, ‘Ika pwe Kot a áfánnikich me a unusen manaman, pwata ese amóeló ekkewe mettóch mi efisi riáfféú?’

A wor popun mi múrinné Kot a mutatá riáfféú an epwe sópwósópwóto tori ach ei fansoun. Sipwe pwóróus wóón eú me leir: Fán chómmóng efisien aramas riáfféún ekkewe ekkóch. Chómmóng ra pwúnúchéú me kirikiringaw, rese mochen siwili napanapen manawer. Iwe ren án Kot epwe amóeló ei eú popun fisitáán riáfféú, epwe nieló ekkena sókkun aramas.

Ewe aposel Petrus a áweweei pwata Kot esaamwo nieló ekkewe aramas mi féri minne mi ngaw, a apasa: “Ewe Samol esap mang le apwönüetä an pwon usun ekoch ra ekieki, pwe a mosonotam ngenikemi, pun esap mochen pwe eman epwe pöütmwälila, nge a fen mochen pwe meinisin repwe ekieksefäl.” (2 Petrus 3:9) Án Jiowa mosonottam a affata úkúkún watteen an tong me úméúméch.

Iwe ekiseló chék, Jiowa Kot epwele mwékút. Epwe ‘liwini riaffou ngeni ir ekkewe mi eriaffou’ ekkewe aramas mi pwúng. Chókkewe mi efisi riáfféú “repwe kuna poutmwalilo esemuch.”​—2 Tesalonika 1:6-9, TF.

Ren pwal ekkóch pwóróus ika pwata Kot a mut ngeni riáfféú an epwe fis me met epwe fér ngeni riáfféú, ppii sópwun 11 lón ewe puk Met ewe Paipel A Wesewesen Apasa? Ka tongeni kapiinawu seni www.pr2711.com