ÁN PAIPEL KEWE KAPAS EIS RA PÉLÚ

Pwata a weires an epwe wor kinamwe wóón unusen fénúfan?

Ewe Paipel a áiti ngenikich ruu popun. Áeúin, inaamwo ika aramas ra fen féri chómmóng mettóch mi amwarar, nge Kot ese fériir pwe epwe wor ar tufichin pwisin nemenemeniir. Oruuan, án aramas kókkót a sópwongaw pokiten “unusen fanüfan a nom fän nemenien Ewe mi Ngau,” Satan ewe Tefil. Ina minne, inaamwo ika aramas ra achocho le atoto kinamwe wóón unusen fénúfan nge resap tongeni sópwéch.​—Álleani Jeremaia 10:23; 1 Johannes 5:19.

Án aramas ekieki chék pwisin iir me kútta itetekiar, ina met a pwal eppeti an epwe wor kinamwe wóón fénúfan. Eú nemenem mi tongeni asukula aramas ar repwe tongefengeniir me tongei minne mi pwúng, ina chék ewe nemenem mi tongeni atoto kinamwe wóón unusen fénúfan.​—Álleani Aisea 32:17; 48:18, 22.

Ié epwe efisi kinamwe wóón fénúfan?

Ewe Kot mi unusen manaman a fen pwonei an epwe awora eú chék mwú epwe nemeni unusen fénúfan me siwili ekkewe mwúún aramas. (Taniel 2:44) Néún Kot we, Jesus, epwe nemenem usun emén Samolun Kinamwe. Epwe amóeló minne mi ngaw seni wóón unusen fénúfan me epwe asukula aramas usun ewe alen kinamwe.​—Álleani Aisea 9:6, 7; 11:4, 9.

Fán án Jesus emmwen fite million aramas wóón unusen fénúfan ra fen nénnéúnéú án Kot we kapas, ewe Paipel le asukula aramas ifa usun repwe kinamwefengen me ekkewe ekkóch. Ekiseló chék, epwe wor kinamwe wóón unusen fénúfan.​—Álleani Aisea 2:3, 4; 54:13.