ÁN PAIPEL KEWE KAPAS EIS RA PÉLÚ

Itá epwe wor eú chék mwú epwe nemeni unusen fénúfan?

Anchangei ifa usun eú mwú mi nemeni unusen fénúfan a tongeni awora feiéch ngeni aramas. Ikenái chómmóng aramas ra riáfféú pokiten ra fókkun osupwang, nge pwal ekkóch ra mmen pisekisek. Nge eú mwú mi tongei aramas mi nemeni unusen fénúfan a tongeni awora ngeni aramas meinisin met ra osupwangan. Ka ekieki pwe aramas repwe tongeni fératá eú mwú mi ina usun?​—Álleani Jeremaia 10:23.

Seni lóóm tori ikenái, fán chómmóng ekkewe mwúún aramas ra sópwongaw atun ra féri ar angang pwe repwe túmúnú néúr aramas, ákkáeúin ekkewe mi osupwang. Ekkóch mwú ra kirikiringaw. (Än Salomon Afalafal 4:1; 8:9) Nge ewe Kot mi Unusen Manaman a fen pwonei pwe epwe awora eú mwú epwe ekkesiwili meinisin ekkewe ekkóch mwú. Ewe Sou Nemenemen ena mwú epwe wesewesen túmúnú aramas.​—Álleani Aisea 11:4; Taniel 2:44.

Met án Kot we Mwú epwe apwénúetá?

Jiowa Kot a wisen filatá ewe emén mi múrinné seni meinisin epwe nemeni fénúfan, ina i Néún we Jesus. (Lukas 1:31-33) Lón ewe atun Jesus a manaw wóón fénúfan, a pwapwa le ákkálisi aramas. Usun emén King, i epwe etipeeúfengeni aramasen meinisin mwú me angasereló seni riáfféú meinisin.​—Álleani Kölfel 72:8, 12-14.

Itá aramas meinisin repwe tipeeú ngeni án Jesus epwe néúr Sou Nemenem? Aapw. Nge Jiowa a mosonottam. (2 Petrus 3:9) A suuki ngeni aramas ei fansoun ar repwe etiwa Jesus usun néúr Sou Nemenem. Ekiseló chék, Jesus epwe arosaló aramas mi ngaw seni ei fénúfan me epwe anúkúcharatiw kinamwe me núkúnúkéch wóón unusen fénúfan.​—Álleani Mika 4:3, 4.