Mi Wor Manaw Mwirin Máló?

A SÓKKOPAT án aramas ekiek usun manaw me máló. Ekkóch ra ekieki pwe mwirin ar máló, epwe sópwósópwóló manawer, neman lón pwal eú leeni are eú sókkun inis. Nge pwal ekkóch aramas ra ekieki pwe repwe upsefál lón pwal eú inis. Ekkóch ra pwal ekieki pwe lupwen ra máló, manawer a unusen wes.

Neman a pwal wor pwisin meefiom usun ena mettóch alóngólóng wóón lúkúen me eérenien fénúom are minne ka káé seni lekúkkúnum. Pokiten a kon sókkopat án aramas ekiek usun met a kan fis ngenikich lupwen sia máló, iwe mi wor ia sia tongeni kúna enletin pélúwen ach kapas eis usun máló?

Ren fitepúkú ier, ekkewe néúwisin lamalam ra afalafala pwe a wor ngúnún ekkewe mi máló mi chúen sópwósópwóló le manaw. Chón fiti arapakkan meinisin ekkewe lamalam mi terú, ren choweán Chón Kraist, Hindu, Jus, Muslim, me pwal ekkóch, ra lúkú pwe a wor ngúnún aramas, nge ra erá pwe a sópweló le manaw mwirin málóón ewe inis me a nónnóm lón leenien ngún. Nge chón ewe lamalamen Buddha ra lúkú pwe mwirin ar ukkupsefál fán fite, repwe tongeni ngase seni riáfféú. Ra eita ngeni Nirvana ena esin manaw mi unusen apwapwa.

Pokiten ekkena esin afalafal, iwe lap ngeni aramas wóón fénúfan ra lúkú pwe máló a emmwen ngeni pwal eú sókkun manaw. Me ren chómmóng pwe máló ina eú kinikin mi lamot lón manawach, me ra meefi pwe ina letipen Kot. Nge met Paipel a erá usun ena? Kese mochen álleani ewe lesen mwirin ei. Neman kopwe máirú ren pélúwan.