Älisiir le Achochosefäl
1. Iö me lon ewe mwichefel a osupwangen ach älillis?
1 Ewe aposel Paul a chchüngü chokkewe ra apwangapwangolo lon ar angang ngeni Jiowa. (Rom 13:11) Sipwe usun Paul le chchüngü pwiich kewe rese chüen achocho lon ach mwichefel. Ifa usun sipwe tongeni älisiir le achochosefäl?
2. Met ekkewe elter ra tongeni föri le älisi chokkewe rese chüen achocho?
2 Met Ekkewe Elter Ra Tongeni Föri: Lape ngeni chokkewe mi apwangapwangolo rese likitalo ewe enlet. Fän chommong, a kisikisilo achochoon pwiich pokiten ra letipengaw, osukosuk, chei pisek, are pwal ekkoch aürekin manauer. (Luk 21:34-36) Ika mi tufich, epwe fen kon mürinnö ika kopwe älisiir me mwan pwe rete apwangapwangolo. Akkota pwe ekkewe elter repwe chuuriir le sotun etittina ika met popun a fis ewe osukosuk me ifa usun ra tongeni älisiir.
3. Ifa usun sipwe tongeni älisi pwiich kewe ra apwangapwangolo?
3 Ifa Usun Ekkewe Ekkoch Ra Tongeni Älillis: Lape ngenikich sia silei emön mi fen apwangapwangolo. Eli sia piin chiechiöch ngeni me loom. Met sia tongeni föri le älisi? Pwata sise lo chuuri me ereni pwe sia pwositi. Sipwe wopwapwa me ekieköch. Ereni pwe sia chchüngü, nge sisap ämmeef ngeni pwe a samau lon pekin lükü. Apworausa ngeni ekkewe pworaus mi apöchökkül ika ekkoch mettoch chon ewe mwichefel ra fen apwönüretä. Etiwa an epwe fituk le lo mwich pun epwe äkkäeüin älisi ika epwe chiechisefäl ngeni chon ewe mwichefel. Ereni ekkewe elter pworausen om chuuri.
4. Met epwe apöchökküla chokkewe mi fitisefäli mwich?
4 Atun emön mi apwangapwangolo a poputä le mwichsefäl, eli epwe meefi säü atun epwe küna chokkewe a fen sissileer. Kosap eisini, “Mwa, pwata ke kerän pwäppwä?” Kosap fen ina nge kopwe ämmeef ngeni pwe ka pwapwaiti. Apachaalong lon om aasoos. Emmweni ngeni chokkewe ese sissileer pwe epwe kapong ngeniir. Mommot ren atun ewe mwich, ppii pwe epwe wor nöün puken köl me ekkewe puk sia käeö lon. Pesei pwe epwe fitisefäli ekkewe mwich, me ereni pwe ka tongei älisi ika a osupwangen älillis.
5. Met mwiriloon ach älisi chokkewe mi apwangapwangolo ar repwe angangsefäl ngeni Jiowa?
5 Pokiten Jiowa me Jises ra tongei chokkewe ra towauolo, ra pwapwa atun chokkana ra liwinsefäliti ewe mwichefel. (Mal. 3:7; Mt. 18:12-14) Sia pwal tongeni küna ena esin pwapwa ika sia tongeni älisi chokkewe le angangsefäl ngeni Jiowa.