Ach Pwisin Käeö me Än ewe Famili Käeöön Paipel Mi Fokkun Lamot!
1. Ifa ewe mettoch ewe Mwichen Sou Pwüngüpwüng a kon ekiekich ussun me pwata?
1 Lon fansoun ekkewe aposel, ewe Mwichen Sou Pwüngüpwüng a ekilonei nöün Jiowa kewe aramas. (Fof. 15:6, 28) Pokiten ewe riäfföü mi lapalap a arapakaneto, a lamot pwe ekkewe chon afalafal meinisin repwe anüküchara ar ririöch ngeni Jiowa. Ifa ussun sipwe äeä ewe fansoun sia fen pin äeä fän iten ewe Puk Study? Sia pesei meinisin ar repwe ota eü pwinin an ewe famili fel. Ach äeäöchü ei fansoun epwe atufichikich le käeöfichi alolloolun än Kot Kapas me küna feiöch seni.—Kölf. 1:1-3; Rom. 11:33, 34.
2. Ifa ussun sipwe ota eü pwinin än ewe famili fel ngeni Kot?
2 Pwinin än ewe Famili Fel: Sia pesei möküren famili meinisin ar repwe föri wiser me ren Jiowa le otaöchü eü kkotun famili käeöön Paipel epwe fis iteitan. (Tut. 6:6, 7) Pwich kewe mi lipich nge esor wiser lon famili repwe tongeni äeä ewe fansoun fän iten ar pwisin käeö me küttafichi pwal och pworaus lon Paipel. A mmen lamot pwe kich meinisin sipwe “alomota fansoun” ren ach käeö me ekiekifichi ekkewe mettoch pwe sipwe pöchökkül lon ach ririöch ngeni Jiowa lon ekkeei “rän ra ngau.”—Ef. 5:15, 16.
3, 4. Ikkefa ekkewe mettoch sia tongeni käeö nge met popun?
3 Mettoch Sipwe Käeö: Ewe Watchtower Publications Index are Watchtower Library lon computer a tongeni älisuk le kütta ekkewe pworaus om famili epwe pwapwaiti lon ämi fansoun käeö. Ekkewe famili ra tongeni käeö ekkewe pworaus lon Ewe Leenien Mas fän ekkewe itelap, “Kiien Pwapwaan ewe Famili,” “Asukula Noum Kewe,” me “Fän Iten Nöüch Kewe Säräfö.”
4 Ar älleafengen ewe Paipel nge rese atapwal epwe älisi emön me emön lon famili le chechchemeni me apwönüetä lon manauer ekkewe kapasen emmwen lon Paipel. (Ipru 4:12) Pwal och, oua tongeni katol ewe fitio seni ach mwicheich me pworausfengen woon. Oupwe tongeni pwisin ekieki met oupwe käeö me ifa napanapan ämi käeöfengen. Pwata kese eisini emön me emön lon om famili met ra mochen käeö me napanapen ewe käeö repwe pwapwaiti?
5. Met popun ach pwisin käeö me famili käeöön Paipel mi fokkun lamot lon manauach iei?
5 Pwata a Lamot Iei: Ach apöchökküla ach ririöch ngeni Jiowa epwe ammolnakich le ‘üppos o nengeni än Jiowa amanauakich.’ (Eks. 14:13) A lamot ngeni ekkewe sam me in än Kot emmwen le ämääraatä nöür kewe lon “ei fanüfan mi ur ren aramas mi kirikiringaü me tipis.” (Fil. 2:15) Ren ekkewe nau, mi lamot ngeniir emmwen pwe repwe tongeni likiitü fän ngangaüoloon manauen ekkewe säräfö lon sukul ikenäi. (SalF. 22:3, 6) Ekkewe pean pwüpwülü repwe apöchökküla ar “ülüfoch lül mi olafengen” ren Jiowa. (SalAf. 4:12) Ina minne, sipwe äeäöchü ach fansoun le apöchökküla pwisin ach “lükülük mi unusen pin”!—Juta 20.