Unusen Ammolnatä fän iten ewe Ächechchem
A ifa me watteen pwapwaan me aüchean wisen Chon Kraist ar repwe ammolnatäöchü fän iten ewe pwinin Ächechchemen mäloon Jises Kraist! (Luk 22:19) Ikkefa ekkewe mettoch repwe tongeni föri ren ar repwe ammolnatä fän iten ewe Ächechchem?
◼ Kulok me Leeni: Mi lamot epwe ffat ngeni meinisin ewe kulok me leeni epwe fis ie ewe Ächechchem. Ika lap seni eü mwichefel repwe äeä ewe Kingdom Hall, a lamot pwe aramas repwe warekkäi. Iwe wesin, epwe kokkotöch ar feilo pokiten ewe fansoun mi chök aükük pun epwe pwal wor eü mwich epwe tapwoto mwirin. Repwe ppi pwe rete eppeti ekkewe leenien an aramas fetäl me ewe leenien chitosa.
◼ Taropween Etiwetiw: Mi naf ewe taropween etiwetiw ren chon afalafal meinisin, me ra silei masouan? Ka fen sotuni ifa ussun kopwe nöünöü ewe taropwe le etiwa aramas? Kopwe anöünöü ewe taropwe ngeni iö kewe? Achocho le anöünöü meinisin ekkewe taropwe ngeni aramas.
◼ Kokkotun Waa: Eli ekkoch kapachelong pwiich kewe repwe osupwangen waa me pwal och älillis. Ikkefa ekkewe kokkot ra fen akkota pwe repwe älisiir?
◼ Ekkewe Minen Lios: Tümünü pwe repwe chök passini ewe wain me pilawa mwirin tuputiuan ewe akkar. Akkota pwe repwe pwal ngeni ekkewe mi kepit ewe wain me pilawa, iir kewe rese chüen tufichin fiti ewe Ächechchem pokiten ar apwangapwang. Repwe ammolnatä ewe wain me pilawa mi fich ngeni ewe Ächechchem me walong ewe pilawa me wain lon ewe sepi me kap mi fich mwen poputään ewe mwich.—Nengeni Ewe Leenien Mas minen February 1, 2003, pekin taropwe 22 me 23, parakraf 14 me 17.
◼ Kingdom Hall: Repwe unusen limeti ewe leenien mwich me mwen ewe fansoun. Ekkewe sepi, kapen wain, chepel me chechen chepel epwe nom lon ewe leenien mwich mwen ewe mwich epwe poputä. Ika repwe äeä pwal eü leeni nge esap ewe Kingdom Hall, pii pwe a öch ewe microfon pwe aramas repwe rongorong ewe afalafal. Repwe filatä ekkewe chon älillis me chon uwei ewe wain me pilawa me äwewe ngeniir wiser pwe repwe fiti meinisin ekkewe kokkot me lamotan an epwe napanapöch inisiir me fouter.
Lon ei rän mi lamot seni meinisin, Ächechchemen än Jises Kraist mälo, sia mochen emön me emön leich me meinisin chon ewe mwichefel repwe unusen ammolnatä. Enlet, Jiowa epwe efeiöchü iir kewe ra pwäratä ar unusen aücheani minne Jiowa awora ngeni fönüfan ren an asoresini nöün we ächengicheng, Jises Kraist.