Eáni Leenien Áppirú Ekkewe Soufós Usun Sefanaia
1. Ineet atun Sefanaia a wiliiti emén soufós? Ifa usun Sefanaia a wiliiti leenien áppirú mi múrinné fán itach?
1 Lón wonopúkú som ier mwen Kraist, a chéúló án Juta fel ngeni Paal. King Amon ewe mi ngaw a kerán ninniiló me ren chón koputan kewe me iei King Josia emén chék át a nemenem. (2 Kron. 33:21–34:1) Lón ena atun, Jiowa a néúnéú Sefanaia an epwe aronga pwóróusen an we kapwúng. Inaamwo ika neman Sefanaia emén me lein familien ekkewe king lón Juta, nge ese ekisikisaaló péchékkúlen án Jiowa we kapwúng ngeni ekkewe néúwisin Juta. (Sef. 1:1; 3:1-4) Pwal ina usun chék kich, sipwe achocho le áppirú án Sefanaia pwora me sisap mut ngeni ach riri lón ach famili epwe aosukosuka ach riri ngeni Jiowa. (Mat. 10:34-37) Ifa ewe pwóróus Sefanaia a wisen aronga me met mwirilóón?
2. Met mi lamot sipwe féri pwe esap kkúúkich ránin án Jiowa we lingeringer?
2 Kútta Jiowa: Jiowa chék a tongeni amanawa aramas lón ránin an lingeringer. Ina popun Sefanaia a pesei aramasen Juta ar repwe kútta Jiowa, kútta pwúng me kútta tipetekison atun a chúen wor lusun fansoun. (Sef. 2:2, 3) A pwal enlet ena lón ach ei fansoun. Sipwe usun Sefanaia ren ach pesei aramas pwe repwe kútta Jiowa nge kich sipwe pwal féri och mettóch, sipwe tipeppós pwe sisap fókkun ‘kul seni ach tapwela mürin’ Jiowa. (Sef. 1:6) Ach kútta Jiowa a wewe ngeni ach kákkáéfichi an we Kapas me ikkiótek fán iten an emmwen. Ach kútta pwúng a wewe ngeni ach eáni manaw mi liméch. Ach kútta tipetekison a wewe ngeni ach ámááraatá ewe napanap álleasochis nge sisap tipeférea me a pwal wewe ngeni ach mwittir apwénúetá ewe emmwen seni án Jiowa we mwicheich.
3. Pwata sipwe eáni ekiek mi pwúng atun sia fiti ewe angangen afalafal?
3 Uwaéch: Án Sefanaia pwóróus usun kapwúng a amwékútú mwaren fitemén lón Juta nge usun a fókkun achchúngú ewe kúkkún át Josia, ewe a poputááni le kútta Jiowa me chék leátin. Mwirin a péchékkúl án Josia féri an angangen limetawu fel ngeni ululun lón ewe fénú. (2 Kron. 34:2-5) Ikenái, ekkóch pwikilin ewe Mwú ra mworetiw wóón al, wóón achaw are lein irá félúfél, nge ekkóch ra mworetiw wóón pwúl múrinné me ra uwa. (Mat. 13:18-23) Sia lúkúlúk pwe Jiowa epwe sópweló le efeiéchú ach angang weires le akkamworafeili pwikilin ewe Mwú.—Kölf. 126:6.
4. Pwata sipwe chék ‘witiwiti’ Jiowa?
4 Ekkóch lón Juta ra ekieki pwe Jiowa esap fókkun féri och mettóch. Iwe nge, Jiowa a alúkúlúkú meinisin pwe an we rán mi lap a arapoto. (Sef. 1:12, 14) Amanaw fán iten chék chókkewe ra onómu ar ápilúkúlúk wóón Jiowa. (Sef. 3:12, 17) Atun sia kan ‘witiwiti’ Jiowa, amwo sia pwapwaiti ach angangfengen me chiechiach kewe fán tipeeú ngeni ach we Kot mi lapalap!—Sef. 3:8, 9.