Äkkäiti Noum kewe pwe Repwe Wiliti Chon Afalafal
1. Met Kölfel 148:12, 13 a amwökütü Chon Kraist le föri?
1 Jiowa a etiwa ekkewe kükkün me säräfö le mwareiti i. (Kölf. 148:12, 13) Ina minne, ekkewe sam me in Chon Kraist rese chök äkkäiti nöür kewe allükün Kot me pworaus mi enlet seni Paipel. Ra pwal äkkäitiir le afalafala ewe kapas allim. Ifa usun ra älisiir le feffeitä?
2. Ifa usun än ekkewe sam me in leenien äppirü mi mürinnö epwe achchüngü nöür kewe?
2 Leenien Äppirü mi Mürinnö: Soukapwüng Kition a ereni nöün kewe 300 soufiu: “Oupwe nenengeniei o föri usun mine üa föri.” (Souk. 7:17) Ekkewe semirit ra kan nennengeni me äppirü iner kewe me semer. Emön sam mi angang lepwin, nge itä ürürün epwe annut atun a sär lesossor, nge ese, pwe a kan uwei nöün kewe ngeni ewe angangen afalafal, inaamwo ika a fokkun pekkus. Ese apasa och nge a chök äiti nöün kewe pwe ewe angangen afalafal a kon lamot seni meinisin. (Mt. 6:33) Noum kewe ra kan küna om pwapwa le föri än Jiowa kewe angang, usun choweän iotek, älleani ewe Paipel, uwawu meefiom lon mwich, me afalafal? Pwüngün pwe om leenien äppirü esap unusöch. Iwe nge, ika noum kewe ra küna om tinikken le angang ngeni Jiowa, iwe, repwe etiwa om asukuler le fel ngeni Jiowa.—Tut. 6:6, 7; Rom 2:21, 22.
3. Ikkefa ekkewe mettoch ekkewe sam me in repwe älisi nöür kewe le tikeri?
3 Feffeitä lon Minne Ka Achocho ngeni: Ekkewe sam me in ra kan akkachocho le äiti nöür kewe le fetäl, fos, pwisin üföüf, me met kkan. Atun ekkewe semirit ra mämmääritä me tikeri met ra achocho ngeni, a wor mineföön mettoch repwe achocho ngeni. Ika ekkewe sam me in, iir Chon Kraist, repwe pwal isetiw met nöür kewe repwe achocho ngeni lon pekin lükü, nge epwe alongolong woon ieriir me ar kewe tufich. (1 Kor. 9:26) Ka kan äkkäiti noum kewe ar repwe uwawu meefier lon pwisin ar kapas me pwisin ammolnatä ar kewe kinikin lon ewe Sukulen Afalafal? (Kölf. 35:18) Ka kan äkkäitiir ekkewe sokkopaten kinikinin afalafal? Ka kan peseer pwe repwe achocho le papatais me fiti ewe angangen pioneer? Ka kan peseer le chiechi ngeni ekkewe chon afalafal mi mwasangasang me pwapwa lon ar angang, chokkewe repwe apöchökküler?—SalF. 13:20.
4. Ifa usun ekkewe semirit repwe feiöch seni än semer kewe me iner äkkäitiir seni le kükkünür?
4 Ewe sou makken köl a erä: “Kot, seni chok le aluwoli ka fen afalafalaei, o u chuen arongafeili om kewe fofor mi amwarar.” (Kölf. 71:17, TF) Poputä le äkkäiti noum kewe seni le kükkünür le wiliti chon angang ngeni Jiowa. Minne ka fen äkkäiti ngeniir epwe wesewesen efeiöchüür atun ra wakkattetä!—SalF. 22:6.