Iei Weween Ach Tongei Kot

1, 2. Met a amwékútuk le tongei Jiowa Kot?

EN MI tongei Kot? Ika pwe ka fen fangóló manawom ngeni Jiowa Kot, iwe kopwe pélúweni pwe fókkun ewer. Ren enletin, sia pwúkún mochen tongei Jiowa. Sia tongei Kot pokiten a tongekich. Iei met Paipel a apasa: “Sia sinei tong, pokiten God [Jiowa] a akkom tongei kich.”​—1 Johannes 4:19, KG.

² Jiowa a akkomw pwáraatá an tongekich. A ngenikich ewe fénúfan mi lingéch pwe leeniach. A awora ngenikich met sia osupwang ren lón pekin aion. (Mateus 5:45) Nge lap seni ekkena mettóch, Jiowa a awora minne mi lamot ngenikich lón pekin lúkú. A ngenikich an we Kapas, ewe Paipel. Pwal eú, a etiwakich le iótek ngeni. A anúkúnúkúkich pwe epwe aúselingakich me fangoto an we manaman mi fel pwe epwe álisikich. (Kölfel 65:2; Lukas 11:13) Nge lap seni meinisin, Jiowa a tiinaato Néún we mi áchengicheng pwe epwe Chón Amanawakich seni tipis me máló. A ifa me watteen án Jiowa tong a fen pwári ngenikich!​—Johannes 3:16; Rom 5:8.

3. (a) Met mi lamot ach sipwe féri pwe sipwe onómukich lón án Kot tong? (b) Ifa ewe kapas eis mi lamot ach sipwe ekieki me ia sipwe kúna me ie pélúwan?

³ Jiowa a mochen ach sipwe kúna feiéch seni an tong tori feilfeiló chék. Iwe nge, pwisin filiach ika sipwe kúna feiéch are sisap. Án Kot we Kapas a pesekich: “Oupwe chok nom non ewe tongen God” me ápilúkúlúkún kúna manaw esemuch. (Jutas 21, KG) Ei kapas “oupwe chok nom” a tongeni wewe ngeni pwe ika sipwe onómukich lón án Kot tong, iwe mi wor mettóch mi lamot sipwe féri. Sipwe pwáraatá lón féfférúch pwe sia tongei i. Iei eú kapas eis mi lamot sipwe ekieki, ‘Ifa usun upwe pwári ai tongei Kot?’ Sipwe kúna pélúwan seni alon ewe aposel Johannes ei fán emmwenien Kot: “Pun ach tongei God wewen pwe sia anneasosichi an kewe annuk. Iwe, an kewe annuk rese fakkun weires ngeni kich.” (1 Johannes 5:3, KG) A mmen éch ach sipwe etittinafichi weween ekkena kapas pokiten sia mochen pwár ngeni ach we Kot pwe sia fókkun tongei i.

IEI WEWEEN “ACH TONGEI GOD”

4, 5. Áweweei mwo ifa usun a poputá le mááritá lón letipom óm tongei Jiowa.

⁴ Met ewe aposel Johannes a ekieki atun a makkeei ei kapas, “ach tongei God?” A kapas usun alóllóólun meefien emén me emén fán iten Kot. En mi chechchemeni ineet atun a poputá le mááritá lón letipom óm tongei Jiowa?

⁵ Ekieki mwo ewe atun ka kerán káé ewe enlet usun Jiowa, minne a fen aotaló me ewe atun a poputá le wor óm lúkú. Ka weweiti pwe inaamwo ika en emén chón tipis mi imu seni Kot, nge Jiowa a suuki ewe al fán itom ren Kraist pwe kopwe angei ewe manaw mi unuséch a fen péút seni Atam me álemwiri manaw esemuch. (Mateus 20:28; Rom 5:12, 18) Ka poputá le aúcheani úkúkún watteen met Jiowa a pennúkúóló ren an tiinatiw Néún we mi fókkun áchengicheng pwe epwe máló fán itom. A chúng letipom me ka poputá le meefi óm tongei Kot, ewe mi pwári watteen an tongeok.​—1 Johannes 4:9, 10.

6. Ifa usun a pwáló tong enlet me met ewe tong fán iten Kot a amwékútuk le féri?

⁶ Iwe nge, ena memmeefin tong, ina poputáán enletin óm tongei Jiowa. Tong esap chék eú memmeef. Ach enletin tongei Kot a lap seni ach sipwe chék apasa, “Ua tongei Jiowa.” Tong enlet a usun lúkú, weween pwe a pwáló ren féffér. (James 2:17) Sia pwáraatá ach tong ren ach féri ekkewe mettóch mi apwapwaai ewe emén sia tongei. Ina popun atun a poputá lón letipom óm tongei Jiowa, ka mochen manaweni ewe sókkun manaw mi apwapwaai Semom we lón láng. En emén Chón Pwáraatá mi papatais? Ika ewer, iwe ena tong mi lapalap me óm tuppwél a amwékútuk le féri ewe kefil mi kon lamot seni meinisin lón manawom. Ka fangóló manawom ngeni Jiowa pwe kopwe féri letipan me ka pwári ena ren óm papatais. (Rom 14:7, 8) Ach apwénúetá ach pwon mi enlet ngeni Jiowa a wewe ngeni ach sipwe féri met ewe aposel Johannes a pwal apasa.

“SIA ANNEASOSICHI AN KEWE ANNUK”

7. Ikkefa ekkóch án Kot kewe allúk me met weween ach sipwe álleasochisiir?

⁷ Johannes a áweweei pwe iei weween ewe tongen Kot: “Sia anneasosichi an kewe annuk.” Ikkefa án Kot kewe allúk? Jiowa a ngenikich chómmóng allúk mi tichik lón an we Kapas, ewe Paipel. Áwewe chék, a allúkú ngenikich pwe sisap féri ekkeei féffér, choweán únnúpuch, lisowumwáál, fel ngeni ululun, solá me kapas chofona. (1 Korint 5:11; 6:18; 10:14; Efisos 4:28; Kolose 3:9) Ach álleasochisi án Kot kewe allúk a wewe ngeni ach etipeeúfengeni manawach ngeni met Paipel a affata usun met mi pwúng me met mi mwáál.

8, 9. Ifa usun sipwe silei met mi apwapwaai Jiowa inaamwo ika lón eú atun ese wor allúk mi tichik seni Paipel? Áweweei mwo.

⁸ Iwe nge, ren ach sipwe apwapwaai Jiowa, mi lamot sisap chék álleasochisi an kewe allúk mi tichik. Jiowa ese awora allúk mi nemeni eú me eú kinikinin manawach rán me rán. Ina minne, iteiten rán eli sia kan féri kefil nge ese wor allúk mi tichik lón Paipel. Iwe, epwe ifa usun sipwe silei met epwe apwapwaai Jiowa? A affatetiw lón ewe Paipel ika ifa ekiekin Kot. Atun sia káé ewe Paipel, sia silei met Jiowa a tongei me met a oput. (Kölfel 97:10; Än Salomon Fos 6:16-19) Sia mirititi ekkewe ekiek me féffér Kot a aúcheaniir. Atun a lallapóló ach káé usun napanapen me féfférún Jiowa kewe, a pwal lallapóló ach etipeeúfengeni ach kewe kefil me féffér ngeni án Kot ekiek. Ina minne, fán chómmóng sia tongeni esilla “met letipen ach Samol” inaamwo ika lón eú atun ese wor allúk mi tichik seni Paipel.​—Efisos 5:17.

⁹ Áwewe chék, ewe Paipel ese awora allúk mi tichik usun ach sisap katol kachito are prokram wóón TV usun féfférún mwááneson are lisowumwáál mi fókkun ngaw. Nge itá mi wesewesen lamot ngenikich an epwe wor eú allúk mi tichik pwe sisap katol ekkena mettóch? Sia silei ekiekin Jiowa usun ekkeei mettóch. An we Kapas a affata: “[Jiowa] a oputa ekkewe ir mi mochen mwanesol.” (Kölfel 11:5, TF, Testament Mi Fö) A pwal apasa: “Kot epwe apwüngü chokewe mi lisowu ngeni mi lipich, pwal chokewe mi lisowu ngeni mi pwüpwülü.” (Ipru 13:4) Ren ach sipwe ekilonei ekkena kapas mi mak fán emmwenien Kot, sia tongeni esillafichi usun met letipen Jiowa. Ina minne, sia filatá pwe sisap pwapwaiti le katol ekkewe féffér mi ánioput me ren Kot nge ra wesewesen pwápwáló ngeni mesach. Sia silei pwe Jiowa a pwapwa atun sia ttii senikich féffér mi annou, ekkewe féffér ese wor ngawan me ren chón fénúfan.a

10, 11. Pwata sia filatá le álleasochisi Jiowa, me met sókkun álleasochis sipwe ngeni?

¹⁰ Ifa ewe ákkáeúin popun sia álleasochisi án Kot kewe allúk? Pwata sia mochen etipeeúfengeni manawach iteiten rán ngeni met sia silei pwe ina ekiekin Kot? Sise mochen féri ena pokiten chék sise mochen kúna kapwúng are mochen sú seni ewe pwúnúngaw mi tori chókkewe mi tunaló letipen Kot. (Kalatia 6:7) Nge sia mirititi pwe ach álleasochisi Jiowa, ina ewe al mi aúchea sia tongeni pwáraatá pwe sia tongei i. Sia mochen angei án Jiowa chen usun chék án emén nau mwétéres le angei chen seni seman we. (Kölfel 5:12) Jiowa, i Semach we me sia tongei. Ese wor och mettóch mi atoto ngenikich pwapwa me menemenéch mi lap ren chék ach silei pwe sia eáni ewe manaw “ewe SAMOL a pwapwa ren.”​—Än Salomon Fos 12:2, KG.

¹¹ Iwe nge, ach álleasochis ese chék lóngólóng wóón och mettóch, are sia chék álleasochis fán asopwisek me fili chék met sipwe álleasochisi.b Sisap chék filatá menni allúk sipwe álleasochisi pokiten a fich ngenikich me a mecheres. Nge ren ‘unusen letipach sia aleasochis.’ (Rom 6:17) Sia meefi meefien ewe soumakken kél lón Paipel: “Üa fokun pwapwa le aleasochisi om kewe allük, pun üa aücheaniir.” (Kölfel 119:47) Ewer, sia aúcheani ach sipwe álleasochisi Jiowa. Sia silei pwe a fich ngeni Jiowa me ina met a kútta senikich, ach unusen álleasochis me álleasochis fansoun meinisin. (Tuteronomi 12:32) Sia mochen pwe Jiowa epwe aloni fán itach met an we Kapas a erá usun Noa. Iei met Paipel a erá usun ena mwán mi tuppwél mi pwári an tongei Kot ren an álleasochis ren fitu fitu ier: “Noa a föri meinisin mine Kot a allük ngeni.”​—Keneses 6:22.

12. Ineet atun ach álleasochis a apwapwaai letipen Jiowa?

¹² Met meefien Jiowa usun ach álleasochis fán tipemecheres? An we Kapas a erá pwe sia ‘apwapwai lelukan.’ (Än Salomon Fos 27:11) Itá ach álleasochis a wesewesen apwapwaai letipen ewe Samolun unuselapen láng me fénúfan? Fókkun ewer me mi wor popun án Jiowa epwe pwapwa! Atun Jiowa a férikich a awora ach tufichin pwúngún filatá. Weween sia tongeni filatá le álleasochisi Kot are álleasolapa. (Tuteronomi 30:15, 16, 19, 20) Atun sia tipemecheres le álleasochisi Jiowa me sia féri ena pokiten letipach a uren ach tongei Kot, sia efisi watteen pwapwaan Semach we lón láng. (Än Salomon Fos 11:20) Sia pwal filatá ewe manaw mi echipwér seni meinisin.

“AN KEWE ANNUK RESE FAKKUN WEIRES”

13, 14. Pwata sia tongeni erá pwe án Kot “kewe annuk rese fakkun weires”? Áweweei mwo.

¹³ Alon aposel Johannes ei a fókkun anúkúnúkúkich usun án Jiowa kewe allúk: “An kewe annuk rese fakkun weires.” Ewe kapas lón fósun Krik mi afféúni “fakkun weires” lón 1 Johannes 5:3 a wewe ngeni “chou.”c Pwal iei itiitin me lón eú Paipel: “An kewe alluk rese mo chourek.” (TF) Án Jiowa kewe allúk ra pwúng me rese áweiresikich. A ki ngeni ekkewe aramas rese unuséch ar repwe álleasochisi an kewe allúk.

¹⁴ Sia tongeni eáni áwewe ren ei. Itá emén chiechiom a tingoreok pwe kopwe álisi le aúetá imwan we. A chómmóng irá oupwe uwei. Ekkóch ra ppán ngeni emén an epwe uwei, nge ekkóch ra chou me a lamot pwe rúúemén repwe ekiir. Chiechiom na a filatá menni irá a mochen kopwe ekii. Itá epwe erenuk pwe kopwe ekii ekkewe irá mi kon chou ngonuk? Aapw. Ese mochen kopwe feiengaw ren óm ákkáláemén le ekiir. Pwal ina usun ach we Kot mi tong me kirekiréch, saminne epwe erenikich ach sipwe álleasochisi ekkewe allúk mi kon weires ach sipwe apwénúretá. (Tuteronomi 30:11-14) Esap fókkun erenikich ach sipwe ekii eú sókkun mettóch mi chou. Jiowa a weweiti aúkúkún tufichich pokiten “a silei sokosokuch, a chemeni pwe kich pwül echök.”​—Kölfel 103:14.

15. Pwata sia tongeni lúkúlúk pwe án Jiowa kewe allúk ra kon échitikich?

¹⁵ Án Jiowa kewe allúk resap fókkun áweiresikich nge ra fen kawor pwe epwe kon échitikich. (Aisea 48:17) Ina popun Moses a tongeni ereni ekkewe chón Israel me lóóm: “Ewe Samol mi Lapalap a allük ngenikem pwe aipwe aleasochis ekei allük meinisin o meniniti ewe Samol mi Lapalap ach we Kot, pwe aipwe feiöch iteiten fansoun, nge i epwe amwöchü manauem, usun a fis ikenai.” (Tuteronomi 6:24) Sia pwal tongeni lúkúlúk pwe atun Jiowa a ngenikich an kewe allúk, a ekieki met sipwe kon feiéch ren, weween feiéchúch tori feilfeiló. Ren enletin, ese tongeni ngenikich eú allúk sipwe feiengaw ren. Jiowa i ewe Koten tipachem ese wor aúkúkún. (Rom 11:33) Ina popun a silei met mi kon múrinné fán itach. Jiowa pwal i ewe leenien áppirú mi unuséch usun tong. (1 Johannes 4:8) Tong ina napanapan we mi lap mi pwápwáló lón meinisin met a apasa me féri. Ina lóngólóngun an allúk meinisin ngeni néún kewe chón angang.

16. Pwata sia tongeni ákkálleasochis inaamwo ika a wor apwangapwangen futukach me ei fénúfan mi fókkun ngaw a etipetipakich?

¹⁶ Esap weween pwe a mecheres ach sipwe álleasochisi Kot. Mi lamot sipwe ú ngeni etipetipaen ei fénúfan mi fókkun ngaw, ewe mi “nom fän nemenien Ewe mi Ngau.” (1 Johannes 5:19) Sipwe pwal fiu ngeni futukach mi apwangapwang, ewe mi kan páe ngeni an epwe atai án Kot kewe allúk. (Rom 7:21-25) Nge ach tong ngeni Kot a tongeni sópwéch. Jiowa a efeiéchú chókkewe mi mochen pwári ar tong ngeni ren ar álleasochis. A fangóló an we manaman mi fel “ngeni chokewe mi aleasochis ngeni.” (Föför 5:32) Ena manaman mi fel a uwaani uwa mi fókkun múrinné lón kich, weween ekkewe napanap mi aúchea mi tongeni álisikich le ákkálleasochis.​—Kalatia 5:22, 23.

17, 18. (a) Met sipwe etittina lón ei puk me met sipwe chechchemeni atun sia féri ena? (b) Met sipwe káé lón en sópwun mwirin ei?

¹⁷ Lón ei puk, sipwe etittina met Jiowa a áitingenikich ika epwe ifa usun féfférúch me met meefian usun ekkewe kefil sia féri lón manawach iteiten rán. Ren ach féri ena, mi lamot sipwe ekieki fitu mettóch mi lamot. Sipwe chechchemeni pwe Jiowa ese echchimwakich le álleasochisi an kewe allúk me kapasen emmwen, nge a mochen sipwe tipemecheres le álleasochis seni letipach. Sisap ménúki pwe Jiowa a mochen pwe sipwe eáni ewe manaw epwe atoto ngenikich feiéch mi somwoló lón ei fansoun me emmwenikich ngeni manaw esemuch lón mwachkkan. Sipwe ekieki pwe ach álleasochis seni unusen letipach, ina ewe al mi aúchea ach sipwe pwár ngeni Jiowa úkúkún ach tongei i.

¹⁸ Fán tong, Jiowa a ngenikich ewe mwelien letip pwe ina met epwe álisikich le esilla lefilen met mi pwúng me met mi mwáál. Nge mi lamot pwe mwelien letipach epwe káit pwe epwe tongeni emmweniéchúkich. Ina met sipwe káé lón en sópwun mwirin ei.