Máló Esap Sópwólóón Mettóch Meinisin!

Petania ina eú kúkkún sóópw mi nóm ruu mwail seni Jerusalem. (Johannes 11:18) A fis eú mettóch mi fókkun eletipechou ikena ie fitu wiik mwen án Jesus máló. Lasarus, emén chiechien Jesus a úri eú semmwen mi chou me a máló.

Atun Jesus a kerán rong ena pwóróus, a ereni néún kewe chón káé pwe Lasarus a méúrúló nge epwe feiló pwe epwe féngúnatá. (Johannes 11:11) Nge néún kewe chón káé rese weweiti weween alon na, ina popun Jesus a affata ngeniir: “Lasarus a mäla.”​—Johannes 11:14.

Mwirin rúáánú rán án Lasarus a fen peias, nge Jesus a tori Petania me a mochen oururu Marta, fefinen ewe mi máló we. Marta a erá: “Ai Samol, are en kopwe nom ikei, mongeei we esap mäla.” (Johannes 11:17, 21) Jesus a pélúweni: “Ngang ewe manausefäl me ewe manau. Iö a lüküei epwe manau inamwo are epwe fen mäla.”​—Johannes 11:25.

Ren án Jesus epwe pwári pwúngún alon na, a arap ngeni ewe peias me leúwommóng le kékké: “Lasarus, kopwe towu!” (Johannes 11:43) Ewe mi má a towu nge ekkewe chón kúna ra rúké.

Me mwen ena, Jesus a fen amanawatá rúúemén. Lón eú atun, a amanawatá emén fépwúl, néún Jairus we nengngin. Me mwen án Jesus amanawatá ena nengngin, a pwal áweweei pwe ena nengngin a chék méúr.​—Lukas 8:52.

Nengeni pwe ren málóón Lasarus me néún Jairus we nengngin, Jesus a aléllééi máló ngeni “möür.” A fich ena kapas áwewe. Pwata? Pwe emén mi méúr ese tongeni meefi och mettóch me a pwal weweéch pwe a asésé seni metek me riáfféú. (Än Salomon Afalafal 9:5; ppii ewe pwóór “Máló A Usun Méúrúchou.”) Néún Jesus kewe chón káé ra fókkun weweiti napanapen ekkewe mi máló. Iei alon ewe Encyclopedia of Religion and Ethics: “Me ren néún Jesus kewe chón áppirú, máló a usun chék méúr nge peias a usun chék eú leenien asésé . . . fán iten chókkewe mi fen máló fán tuppwél.”a

A oururukich ach silei pwe ekkewe mi máló ra fen méúrúló lón peias nge rese riáfféú. Ina popun, sia silei met a fis ngenikich ika sia máló, iwe sise chúen niwokkus.

“ARE EMAN ARAMAS A MÄLA, IFA USUN, EPWE PWAL MANAUSEFÄL?”

Inaamwo ika sia sani ach sipwe méúr lepwin fán kinamwe, nge ié mi mochen an epwe méúrúffóch? Ifa ach ápilúkúlúk usun chókkewe mi máló mi méúrúló lón peias usun chék met a fis ngeni Lasarus me néún Jairus we nengngin?

Ewe semelap Hiop a eáni ena kapas eis atun a meefi pwe epwele máló. A eis: “Are eman aramas a mäla, ifa usun, epwe pwal manausefäl?”​—Hiop 14:14.

Atun Hiop a fós ngeni ewe Kot mi Lapalap, a pwisin pélúweni an we kapas eis me apasa: “En kopwe köriei, nge ngang üpwe pälüenuk. En kopwe positiei, ngang ätewe poum a föri.” (Hiop 14:15) Hiop a núkúnúk pwe Jiowa a fókkun mwétéresiti ena rán an epwe amanawatá néún kewe chón angang mi tuppwél. Iwe, itá ina chék án Hiop áneán? Aapw.

Ekkewe manawsefál Jesus a féri a awora pisekin ánnet mi ffat pwe Kot a fen ngeni Jesus ewe manaman le akkufu máló. Ren enletin, ewe Paipel a apasa pwe a nóm ren Jesus iei “ekkewe kien malo.” (Pwärätä 1:18, Testament Mi Fö.) Ina popun, Jesus epwe suuki ekkewe tittin peias, usun chék an allúkú ngeni ekkewe aramas ar repwe ámera ewe faú mesen peiasen Lasarus we.

Ewe Paipel a kan ekkenniwili ewe pwon usun manawsefál. Emén chónláng a alúkúlúkú ewe soufós Taniel, a erá: “Kopwe mäla o manausefälitä, pwe kopwe angei wisom lesopolan fansoun.” (Taniel 12:13) Iei alon Jesus ngeni ekkewe Satusi, iir néúwisin chón Jus rese lúkú ewe pwon usun manawsefál: “Ämi oua fokun mwäl, pun ousap silei makkeen ekewe Toropwe mi Pin me än Kot manaman.” (Mateus 22:23, 29) Aposel Paulus a erá: “Üa pwal apilükülük lon ewe Kot . . . pwe aramas meinisin, ekewe chon pwüng me ekewe aramas mi ngau, repwe manausefäl seni mäla.”​—Föför 24:15.

INEET EKKEWE MI MÁLÓ REPWE MANAWETÁ?

Ineet epwe fis ewe manawsefál ren ekkewe mi pwúng me ekkewe rese pwúng? Ewe chónláng a ereni ewe mi pwúng Taniel pwe epwe manawetá “lesopolan fansoun.” A pwal ina usun lúkúen Marta pwe mwongean we Lasarus epwe “manausefälitä lon ewe ränin manausefäl lesopolan fanüfan.”​—Johannes 11:24.

Ewe Paipel a eriri “lesopolan fanüfan” ngeni án Kraist nemenem. Paulus a makkeei: “Kraist epwe fokun nemenem tori Kot epwe akufu chon oputan meinisin o anomuur fän pechen. Iwe, ewe amüchülan chon oputan epwe mola, iei mäla.” (1 Korint 15:25, 26) Ina ewe popun mi fókkun múrinné ach sipwe ióteki pwe Mwúún Kot epwe war me letipan epwe pwénútá wóón fénúfan.b

Hiop a sileéchú pwe letipen Kot pwe epwe amanawatá ekkewe mi máló. Iwe atun epwe war ena fansoun, máló epwe unusen móróló. Esap chúen wor emén epwe ekieki: ‘Itá máló sópwólóón mettóch meinisin?’