Áwewe fán Iten Manawach me Ach Angangen Afalafal Mwich
February 6-12
PWÓRÓUS AÚCHEA SENI KAPASEN KOT | AISEA 47-51
“Álleasochis Ngeni Jiowa A Emmwen Ngeni Chómmóng Feiéch”
ip-2-E 131 ¶18
Jiowa A Asukulakich pwe Sipwe Feiéch
“Kopwe Aúselinga Ai Kewe Allúk!”
18 Án Jiowa manaman mi fel a apéchékkúla ewe soufós le apasa: “Iei alon ewe Samol mi Lapalap om Chon Amanau, Ewe mi Pin lon Israel, ‘Ngang ewe Samol mi Lapalap om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won.’” (Aisea 48:16b, 17) Ena itiitin kapas mi pwáraatá án Jiowa chen epwe anúkúnúkú einangen Israel pwe Kot epwe angasereló seni Papilon. I ewe Chón Amanawer. (Aisea 54:5) Jiowa a enletin mochen pwe chón Israel repwe ririéchsefál ngeni me álleasochisi an kewe allúk. Ewe fel mi enlet a lóngólóng wóón álleasochisi án Kot kewe allúk. Ika resap káé usun ‘ewe al repwe fetál wóón’ resap tongeni fetál wóón ewe alen pwúng.
ip-2-E 131 ¶19
Jiowa A Asukulakich pwe Sipwe Feiéch
19 Mochenin Jiowa pwe néún kewe aramas repwe tti seniir feiengaw me pwapwaiti manaw, a ffat lón ei itiitin: “Amwo kopwe aüselinga ai kewe allük! Mürin om kinamwe epwe wewe ngeni eu chanpupu, nge om pwüng epwe wewe ngeni nomongun lematau.” (Aisea 48:18) A ifan me múrinnéén kapasen fénér seni ewe Chón Fériir! (Tuteronomi 5:29; Kölfel 81:13) Ika rese eoló, chón Israel repwe tongeni pwapwaiti kinamwe usun watteen konik lón ewe chénúpupu. (Kölfel 119:165) Féfféréchúr kewe repwe chómmóng usun lóólóón le mataw. (Amos 5:24) Pokiten a mmen átenekiir, Jiowa a pesei chón Israel fán tong le áiti ngeniir ewe al repwe fetál wóón. A ifan me échún ika repwe aúseling!
ip-2-E 132 ¶20-21
Jiowa A Asukulakich pwe Sipwe Feiéch
20 Ifa ewe feiéch epwe tori chón Israel ika repwe aier? Jiowa a erá “Iwe, noum kewe repwe wewe ngeni pien aroset, nge mwirimwirum kana repwe chomong usun chomongun föün pi. Iwe, iter esap fokun mola ika talüla seni fän mesei.” (Aisea 48:19) Jiowa a áchema ngeni aramas usun an pwon pwe mwirimwirin Apraham epwe chómmóngóló, “usun chök chomongun ekewe fün läng, pwal usun pien aroset.” (Keneses 22:17; 32:12) Iwe nge, mwirimwirin Apraham kewe ra eáni féfférún ú ngeni iwe ese wor ar pwúúng le pwapwaiti pwénúetáán ewe oesini. Fán allúkún Jiowa, a fich ngeni mwúún Israel an epwe rosoló pokiten féfféringawer a kon lapalap. (Tuteronomi 28:45) Iwe nge, Jiowa ese mochen néún kewe aramas repwe ninniiló, me ese mochen unusen likitiireló.
21 Ewe kapasen emmwen mi nóm lón ei pwóróus mi aúchea a weneiti ekkewe chón fel ngeni Jiowa lón ei fansoun. Jiowa i popun manawach, a kon sile lap seni ekkewe ekkóch ren ifa usun manawach epwe múrinné. (Kölfel 36:9) A ngenikich emmwen pwe sipwe kúna feiéch, nge esap fán iten an epwe pinei ach pwapwa. Chón Kraist mi enlet ra mochen pwe Jiowa epwe asukuler. (Mika 4:2) An kewe allúk ra túmúnú ach riri ngeni me ach fel ngeni. Me ra túmúnúkich seni án Satan kewe etipetip mi ngaw. Atun sia aúcheani ekkewe emmwen mi nóm lón án Kot kewe allúk, sia weweiti pwe Jiowa a asukulakich fán iten feiéchúch. Iwe, sia silei pwe “an kewe allük resap weires ngenikich.” Iwe ika ina, sisap rosoló.—1 Johannes 2:17; 5:3.
Kúkkútta Pwóróus Aúchea
Menlapen Pworaus Seni ewe Puken Aisea—II
49:6—Ifa ussun ewe Messaia “eu saram ngeni ekkewe mwu,” inaamwo ika an angangen afalafal woon fönüfan a weneiti chon Israel chök? A ina ussun pokiten minne a fis mwirin mäloon Jises. Ewe Paipel a nöünöü Aisea 49:6 fän iten nöün kewe chon käeö. (Fofor 13:46, 47) Lon ach ei fansoun, Chon Kraist mi kepit, fän älillisin eü mwich mi lapalap, ir “eü saram fän iten chon ekewe mwü,” pun ra asarama aramas “tori lesopolan fanüfan.”—Mattu 24:14; 28:19, 20.
it-1-E 643 ¶4-5
Mufesen
Mufesen lón Kapas Áwewe. Lón Paipel, ewe ririin pwúpwúlú a néúnéú lón kapas áwewe. (Ais 54:1, 5, 6; 62:1-6) A pwal néúnéú mufesen are án mwán pwúpwúlú tiinaaló pwúlúwan we.—Jer 3:8.
Mwúún Juta me Jerusalem ra taló lón ewe ier 607 me mwen Kraist, iwe ekkewe aramas ra eoló lón Papilon. Fitu ier me mwan, Jiowa a fen ereni ekkewe chón Jus repwap eoló: “Ifan ewe toropwen mwüfesen üa pöütala inemi ren?” (Ais 50:1) A fichiiti án Jiowa péútaaló ‘iner’ are mwicheichen fénúer pún a ú ngeni ewe pwonen etipeeú mi lóngólóng wóón ewe Allúk nge esap pokiten Jiowa a atai an we pwonen etipeeú ngeni me poputá le mu seni. Iwe nge, a wor ekkóch lusun chón Israel ra aier me iótek pwe Kot epwe enniwili an we riri ngeniir usun mwán pwúpwúlú me lón pwisin fénúer. Iwe, lemuchúlóón ekkewe 70 ier Jerusalem epwe péénnúló lón ewe ier 537 me mwan Kraist, Jiowa a eliwini néún kewe aramas lón fénúer usun minne a fen pwonei. Nge a féri ena fán ásengesin itan we.—Kf 137:1-9; ppii PWÚPWÚLÚ.
February 13-19
PWÓRÓUS AÚCHEA SENI KAPASEN KOT | AISEA 52-57
“Kraist A Riáfféú fán Itach”
Nöün Jiowa Chon Angang A “Kinas Pokiten Ach Pupungau”
“A Unusen Itengaü” me Ra Ekieki “Esap Wor Aüchean”
3 Älleani Aisea 53:3. Ekieki mwo meefien nöün Kot we äläemön lupwen a pennükü ewe pwapwa le angangfengen me Seman we, pwe epwe feitiu fönüfan, fangolo manauan, me angasalo aramas seni tipis me mälo! (Fil. 2:5-8) An we asor a kawor fän iten enletin omusomusen tipis, nge ekkewe asorun man fän ewe allükün Moses resap tongeni, pwe iir eü lios chök. (Ipru 10:1-4) Itä ürürün ekkewe chon Jus repwe etiwa me aitöchü i, pun ra fen witiwiti ewe Messaia mi pwonetiu. (Jon 6:14) Nge chon Jus ra fen ‘aitengaua’ me ra ekieki pwe “esap wor aücheaan,” ussun met Aisea a fen oesini. Ewe aposel Jon a erä: “A tori fanüan, nge aramasan resap etiwa.” (Jon 1:11) Ewe aposel Piter a ereni ekkewe chon Jus: “Än ach kewe lewo we Kot a alingala nöün Chon Angang Jesus. Nge ämi oua atolonga lepöün ekewe souemwenin chon Juta o amamäsini i me mwen Pilatus, oua fen mwo nge föri ei, lupwen Pilatus a ekiekin angasala i. Jesus a pin o pwüng, nge ämi oua amamäsini i.”—Fof. 3:13, 14.
4 Aisea a pwal oesini pwe Jises epwe “eman mwän mi örüni an nom lon cheuch me riaföü.” Pwüngün pwe Jises a meefi pekkus fän ekkoch lupwen a afalafal, nge esor pworaus a mak pwe a samau fän eü. (Jon 4:6) Nge a küna än aramas kewe sokkopaten semwen atun a afalafal ngeniir. A tonger me echikaratä chommong. (Mark 1:32-34) Ina popun, Jises a apwönüetä ewe oesini mi apasa: “Ellet, a uwei ach samau o mwärei ach cheuch.”—Ais. 53:4a; Mt. 8:16, 17.
Ussun Itä “Kot a Ariaföüü”
5 Älleani Aisea 53:4b. Ewe täppin aramas lon fansoun Jises rese weweiti ewe popun Jises a küna riäfföü me mälo. Ra ekieki Kot a apwüngü ren minne a föri, ina popun a ussun itä Kot a eriäfföü ren semwen mi chou. (Mt. 27:38-44) Ekkewe chon Jus ra etipisi Jises pwe i emön chon turunufasei Kot. (Mark 14:61-64; Jon 10:33) Pwüngün pwe Jises esap i emön chon tipis are chon esiita Kot. Nge a fen fokkun tongei Seman we, ina popun a chou letipan lupwen a küna kapwüngün mälo ren ar tipimwääl ngeni pwe i chon esiita Kot. Iwe nge, Jises a tipeeü le apwönüetä letipen Jiowa.—Mt. 26:39.
Nöün Jiowa Chon Angang A “Kinas Pokiten Ach Pupungau”
Ra Emmwenalo I Ussun Emön Lam Pwe Epwe Ninniilo
10 Älleani Aisea 53:7, 8. Lupwen Jon Papatais a küna Jises pwe a feffeito, a apasa: “Iei i ewe Lamen Kot a uweela tipisin chon fanüfan.” (Jon 1:29) Lupwen Jon a fos ussun Jises ewe lam, eli a chemeni met Aisea a erä: “Usun eman nienifön sip [lam] aramas ra emwenala pwe epwe ninnila.” (Ais. 53:7) Aisea a oesini: “Pun a fangala manauan o mäla.” (Ais. 53:12) Lon ewe pwinin a poputäni ewe Ächechchemenien an we mälo, a ngeni nöün kewe 11 aposel mi tuppwöl ewe kapen wain me a apasa: “Pun iei chai a allükülükü än Kot we pwon mi fö ngenikemi, a ninnila fänäsengesin chomong aramas, pwe amusamusen ar tipis kana.”—Mt. 26:28.
Nöün Jiowa Chon Angang A “Kinas Pokiten Ach Pupungau”
Ewe Chon Angang Epwe Efisatä “an Chomong Aramas Pwüng”
13 Älleani Aisea 53:11, 12. Jiowa a apasa ngeni nöün we Chon angang mi kefil: “Nei chon angang mi pwüng epwe afisätä an chomong aramas pwüng.” Ifa ussun? Le sopwoloon wokisin 12 a älisikich ren pölüwan. Ewe Chon Angang a “iotek fän iten chon pupungau.” Meinisin mwirimwirin Atam kewe ir chon tipis, “chon pupungau,” ina minne repwe angei “liwinin tipis,” weween mälo. (Rom. 5:12; 6:23) A lamot ngeni chon tipis ar repwe chäsefäl ngeni Jiowa. Sopwun 53 lon än Aisea oesini a aweweei ifa ussun Jises a “iotek fän iten’’ aramas mi tipis lupwen a erä: “Liwinin ach tipis a nonom won pwe sipwe küna kinamwe, nge ren an kinas kana a mola ach samau.”—Ais. 53:5.
Kúkkútta Pwóróus Aúchea
w06-E 3/15 11 ¶2
Eú Pwóróus mi Liosuetá Och Mettóch A Lamot Ngenikich
Iwe, ewe “fefin mi ngas,” Sara me néún we Isaak ra liosuetá ié? Paulus a apasa pwe Sara ewe “fefin mi rit,” a liosuetá pwúlúwen Kot, ewe kinikinin án Kot we mwicheich lón láng. Me mwen Jesus a feito, ei fefin mi nóm láng a riit, ese mwo wor “nöün” mi kepit wóón fénúfan. (Kalatia 4:27; Aisea 54:1-6) Iwe nge, lón ewe Pentikost ier 33, ewe manaman mi fel a ninitiw wóón eú pwiin aramas, chókkewe repwe upsefál pwe repwe néún ena fefin mi nóm láng. Ekkewe nau seni ena mwicheich iir néún Kot mi mwuuti, me repwe fiti Jesus Kraist lón eú mineféén pwonen etipeeú. (Rom 8:15-17) Emén me leir ina ewe aposel Paulus, ewe a makkeei: “Ewe Jerusalem lon läng mi ngas, iei i inach.”—Kalatia 4:26.
Amaaraata Tipetekison Mi Enlet
Ewe Emon Mi Tipetekison Lap Seni Meinisin
3 Jiowa ewe mi lapalap seni meinisin nge “a nenengeni unusen fanufan, pwe epwe apochokula chokewe mi fang ngeni unusen letiper.” (2 Kronika 16:9) Iwe, met Jiowa a fori lupwen a kuna emon mi chouchou pokiten an kewe osukosuk? Ren ngunun we Jiowa a ussun ita nonnom “ren eman mi luketatakis” pwe epwe “amanaua ngunun chon tipetekison o apochokula leluken chon liamam.” (Aisea 57:15) Pokiten ra pochokkuleta, ekkeei aramas repwe angang sefal ngeni Kot, fan pwapwa. A mmen watte an Kot tipetekison!
February 20-26
PWÓRÓUS AÚCHEA SENI KAPASEN KOT | AISEA 58-62
“Aronga ewe Ierin án Jiowa Chen”
ip-2-E 322 ¶4
Pwúng A Mááritá lón Sion
“Ierin án ewe Samol mi Lapalap Chen”
4 Aisea a makkeei: “Ngünün Kot ewe Samol mi Lapalap a nonom woi, pun a awisaei pwe üpwe aronga ngeni chon mwelele pworausen manau. A tinieito pwe üpwe achipa chon luketatakis, üpwe asile ngeni chon oola ar repwe ngasala, pwal ngeni chon fötek pwe epwe suk lenien ar fötek.” (Aisea 61:1) Ié na a kewis le esilei ewe pwóróus allim? Ese mwáál lón ewe áeúin atun, Kot a ewisa ngeni Aisea an epwe makkeei ewe pwóróus allim fán iten ekkewe mi eoló lón Papilon. Iwe nge, lupwen Jesus a áwena ngeni pwisin i alon Aisea we, iwe Jesus a kapas usun ewe pwénútáán mi fókkun lamot. (Lukas 4:16-21) Ewer, Jesus a titiiló ngeni ekkewe mi tipetekison pwe epwe aronga ewe pwóróus allim, iwe a kepit ren manaman mi fel atun a papatais.—Mateus 3:16, 17.
ip-2-E 326-327 ¶13-15
Pwúng A Mááritá lón Sion
13 Seni Pentikost ier 33 feiló, Kot a fótuki irá mi “föri mine a pwüng,” ekkewe Chón Kraist mi kepit iir mi pwora, lón ewe minefé fénú lón pekin lúkú, “ewe Israelin Kot.” (Kalatia 6:16, TF) Mwirin fitepúkú ier, ekkena “irä” ra tori 144,000, ra uwa ren féffér múrinné pwe repwe elinga are elingaaló Jiowa Kot. (Pwärätä 14:3) Ekkewe mwirifóchofóch lein ekkeei “irä” ra máár seni ewe ier 1919 atun Jiowa a amanawa lusun ewe Israelin Kot seni ewe fansoun ra patapateló. Ren án Jiowa awora watte konik lón pekin lúkú, a efisi eú wollapen pwúng lón kapas áwewe, mi uwaani féún irá.—Aisea 27:6.
14 Aisea a menlapei angangen ekkeei “irä” ren an apasa: “Repwe aüsefälietä ekewe tit mi tala me lomlom, repwe försefäli ekewe leni mi tatakis fansoun langatam, pwal telinimwen ekewe täppin aramasen lom.” (Aisea 61:4) Fán allúkún ewe kingen Persia Sirus, ekkewe chón Jus mi tuppwél mi liwin seni Papilon repwe férsefáli Jerusalem me ewe imwenfel. A langattam fansoun mi chék ta. Angangen férsefáli a pwal pwá lón ekkewe ier mwirin ewe ier 33 me ewe ier 1919.
15 Lón ewe ier 33, néún Jesus kewe chón káé ra fókkun letipechou pún Jesus a ares, kúna kapwúng, me máló. (Mateus 26:31) Iwe nge, ra pwapwa atun a pwá ngeniir mwirin an manawsefál. Me atun ra angei ewe manaman mi fel ra fókkun awatteeló ar fansoun lón ewe angangen afalafal “lon Jerusalem, lon unusen Jutea me Samaria tori lon unusen fanüfan.” (Föför 1:8) Ra poputá le apéchékkúlasefáli ewe fel mi enlet. Iwe pwal ina chék usun, seni 1919 feiló Jesus Kraist a efisi pwe pwiin kewe lusun mi kepit repwe aúetá “ekewe leni mi tatakis fansoun langatam.” Ren chómmóng ier ekkewe néúwisin tipitipin lamalamen Chón Kraist rese áiti aramas ewe sile usun Jiowa, nge ra fen áitiir usun eérenien aramas me afalafal ese alóngólóng wóón Paipel. Ekkewe Chón Kraist mi kepit ra limeti ekkewe mwichefel seni limengawen lamalam chofona pwe ewe angangen apéchékkúlasefáli ewe fel mi enlet epwe sópwósópwóló. Iwe ra poputá le féri ewe angangen afalafal mi kkóló seni meinisin mi fis wóón unusen fénúfan.—Markus 13:10.
Chón “Choisä” Ra Tipeeú lón Fel mi Enlet
5 Ekkóch aramas eli repwe máirú ren ewe oesini a mak lón Aisea sópwun 61 mi pwéppwénútá lón ewe mwichefelin Chón Kraist. Lón wokisin 6 lón ena sópwun, a kapas usun ekkóch repwe angang usun “nöün ewe Samol mi Lapalap souasor.” Nge lón wokisin 5 a kapas usun ekkewe “chon ekis” iir kewe repwe álisi me angangfengen me ekkewe “souasor.” Pwata a fós usun ekkewe “chon ekis”?
6 Néún Jiowa kana “souasor” iir ekkewe Chón Kraist mi kepit mi eáni “ewe aeuin manausefäl” me “repwe nöün Kot me nöün Kraist souasor, repwe pwal eti Jesus le nemenem lon ükükün engeröü ier.” (Pwär. 20:6) A pwal wor chómmóng Chón Kraist mi tuppwél mi eáni ápilúkúlúkún manaw lón Paratis wóón fénúfan. Chókkana ra angangfengen me chiechiéchfengen me chókkewe repwe eti Jesus lón láng. Nge pokiten rese kapachelong lein chón “ewe Israelin Kot,” iwe, ra usun chón ekis. Ra pwapwa le angangfengen me “nöün ewe Samol mi Lapalap souasor” usun iir “chon tuw pwül” me chón angang lón “tanipin wain” lón fansoun rás. Ra álisi ekkewe mi kepit le elingaaló iten Kot we ren ar afalafala me asukula aramas ewe enlet. Ekkewe mi kepit me ekkewe “ekkoch siip” ra asukula aramas ewe enlet me álisiir fán tong le etipeeúfengeni manawer ngeni minne ra káé.—Joh. 10:16, TF.
Kúkkútta Pwóróus Aúchea
Álisatá Lingelóón ewe Paratis lón Pekin Lúkú
14 Chómmóng mi mwukóló lón ach kewe mwichefel ra fen kúna ekkewe siwil mi fen elingaaló án Jiowa we mwicheich wóón fénúfan. Ra chechchemeni ewe fansoun lón ekkewe mwichefel a wor emén chék mwán mi ásimaw mi wisen emmweni nge esap fen eú kúmi, lupwen lón ekkewe fénú a wor emén chék chón emmweni keangen ofesilap nge esap ewe Kúmiin Chón Túmúnú Keangen Ofesilap, are ewe fansoun presetenin ewe Watch Tower Society a wisen emmweni ewe mwicheich nge esap ewe Mwichen Soupwúngúpwúng án Chón Pwáraatá Jiowa. Inaamwo ika pwiich kana mi wor chón álisiir mi tuppwél, nge ren enletin a wor emén chék a wisen apwúngaló mettóch lón ekkewe mwichefel, keangen ofesilap, me lón ewe ofesilap. Mwirin ewe ier 1970, a fis ekkewe ekkesiwil an esap chúen emén chék epwe wisen apwúngaló mettóch nge fen ekkewe kúmiin mwán mi ásimaw.
15 Pwata ekkena siwil a atoto feiéch ngeni ach mwicheich? Pún ra lóngólóng wóón ach weweéchúti masouen án Kot we Kapas. Lap seni án emén chék aramas epwe wisen apwúngaló mettóch meinisin, ewe mwicheich a fen kon kúna feiéch seni lipwákéchún meinisin ekkewe mwán mi ásimaw, ekkewe mi usun ‘liffang,’ me ren Jiowa.—Ef. 4:8, 11; SalF. 24:6.
16 Ekieki usun ekkewe ekkóch siwil a fis kukkuto chék fán iten néúch kewe puk. Sia pwapwaiti le anéúnéú ekkewe puk mi álilliséch, napanapéch me ling lón ach angangen afalafal. Pwal ekieki ifa usun sia néúnéú ekkewe minen computer le afalafala ewe kapas allim. Áwewe chék, ewe Web site jw.org a chéúfetál ekis meinisin pwe aramas repwe kúna ewe álillis mi wesewesen lamot ngeniir. Ren ekkeei siwil, sia kúna úkúkún alóllóólun án Jiowa tongei me áfánni aramas.
17 Sia pwal kilisou ren ewe siwil mi fis fán iten ach kewe mwich pwe epwe wor ach fansoun famili fel are pwisin káé ewe Paipel. Me sia pwapwaiti ekkewe siwil lón ekkewe prokram lón ach kewe mwichelap. Usun iteiten ier a kan chék ékkéchúló! Sia pwal kilisou ren ewe káit sia angei seni ach kewe sókkópaten sukulen Paipel. Ren ekkeei siwil meinisin, a ffat pwe Jiowa a ekkemmweni an we mwicheich me a ekkelingaaló ewe paratis lón pekin lúkú!
Menlapen Pworaus Seni ewe Puken Aisea—II
Pölüen Kapas Eis Ussun Ekkeei Wokisin:
61:8, 9—Ifa ewe “pwon esemuch,” me iö “mwirimwirin” kewe? Ina ewe pwon sefö lefilen Jiowa me Chon Kraist mi kepit. “Mwirimwirin” kewe ra wewe ngeni “ekkewe pwal ekkoch siip”— weween, ekkewe fite milion ra etiwa ekkewe pworaus seni Chon Kraist mi kepit.—Jon 10:16.
February 27–March 5
PWÓRÓUS AÚCHEA SENI KAPASEN KOT | AISEA 63-66
“Láng mi Fé me Fénúfan mi Fé Epwe Efisi Pwapwa Chapur”
ip-2-E 383 ¶23
“Oupwe Chék Pwapwa . . . Fóchófóch Ren Minne Upwe Féri”
23 Ewe puken Pwärätä a áweweei kúnaen aposel Johannes we lángipwi usun warotoon ránin Jiowa we atun ei ótót epwe móróló. Mwirin ena, Satan epwe kóturulong lón ewe pwang mi alóllóól. (Pwärätä 19:11–20:3) Mwirin ekkena kapas, Johannes a makkeei alon án Aisea we oesini: “Üa küna eu läng mi fö me eu fanüfan mi fö.” Ekkewe wokisin mwirin a fós usun ewe lángipwi mi amwarar lupwen Jiowa Kot epwe wesewesen ámúrinnééló napanapen fénúfan. (Pwärätä 21:1, 3-5) A ffat pwe án Aisea pwon usun “eu läng mi fö me eu fanüfan mi fö” epwe pwénúechútá lón án Kot ótót sefé! Eú mineféén ótót wóón fénúfan epwe pwapwaiti ewe paratis lón pekin lúkú me ewe wesewesen paratis fán ewe mineféén nemenem seni láng. A mmen oururukich ewe pwon pún “esap chüen wor eman epwe chechemeni ekewe mettochun lom [samau, riáfféú, me ekkewe ekkóch weires aramas ra kúkkúna] o ekieki usun.” Ese lifilifil met sipwe chechchemeni lón ena atun nge ese tongeni efisi metek are riáfféú usun minne a kan eletipechowu chómmóng ikenái.
ip-2-E 384 ¶25
“Oupwe Chék Pwapwa . . . Fóchófóch Ren Minne Upwe Féri”
25 Pwal lón ei fansoun, Jiowa a féri pwe Jerusalem epwe “eu leni mi apwapwa.” Ifa usun? Usun met sia fen káé, epwe kapachelong lón ewe láng mi fé ewe mi poputá an nemenem lón 1914 ekkewe 144,000 chón fiti le nemenem lón ewe mwú lón láng. Lón oesini ra eita ngeni “Jerusalem mi fö.” (Pwärätä 21:2) Kot a apasa ei fán iten ewe Jerusalem mi Fé: “Üpwe föri Jerusalem pwe epwe eu leni mi apwapwa, nge aramasen lon repwe meseik.” Kot epwe néúnéú ewe Jerusalem mi Fé pwe epwe atoto chómmóng feiéch fán iten ekkewe aramas mi álleasochis. Esap chúen wor kechiw are púchéringaw pún Jiowa epwe ‘ngenikich mochenin lelukach.’—Kölfel 37:3, 4.
Kinamwe Lón Úkúkún Engeréú Ier Me Feilfeiló!
REPWE AÚETÁ IMWER ME FÓTUKI IRÁÁN WAIN
4 Meinisin aramas ra tipeni an epwe pwisin wor imwer, ikewe ia iir me ar famili repwe tongeni meefi núkúnúkéch me ie. Nge lón ei fénúfan iei, a weires án aramas repwe kúnékún ia repwe nónnóm ie. Ekkewe telinimw ra ur ren chómmóngun aramas. Leenien chómmóng a limengaw, me eú chék imw a kan ákkáfite famili ra nóm lón. Ra tongeni chék ttana an epwe wor pwisin imwer.
5 Lupwen ewe Mwúún Kot epwe nemeni fénúfan, meinisin aramas epwe pwisin wor imwer. Iei met Aisea a oesini: “Repwe aüetä imwer o nonom lon, repwe pwal fotuki irän wain o ochei uan.” (Ais. 65:21) Iwe nge, lap seni an epwe wor pwisin leenier, ra pwal ápilúkúlúkú och mettóch. Pwúngún pwe lón ei fansoun a fen pwisin wor imwen ekkóch aramas, me ekkóch ra pwal mwo nge imweni imw watte, iwe nge ra lólilen ika epwe chúen naf néúr moni ren méén imwer, are ren chón solá repwe solááni pisekiir. Nge fán nemenien ewe Mwúún Kot, aramas resap chúen lólileniesini ekkeei mettóch. Ewe soufós Mika a makkeei: “Eman me eman epwe nom lon an tanipin wain me fän an irä fiik fän kinamwe, nge esap wor eman epwe eniuokusu.”—Mik. 4:4.
Kúkkútta Pwóróus Aúchea
Menlapen Pworaus Seni ewe Puken Aisea—II
63:5—Ifa ussun än Kot song a eü minen älillis ngeni? Jiowa a nemenifichi an song—weween, an lingeringer mi pwüng. An song a älisi me amwökütü i pwe epwe apwönüetä an kewe kapwüng mi pwüng.
Mut Ngeni án Jiowa Angangen Emirit Epwe Anapanapók
JIOWA A ÁEÁ AN NEMENEM USUN CHÉK EMÉN CHÓN FFÉR SEPI
3 Ewe Paipel a erá pwe Jiowa a usun emén chón ffér sepi pokiten a wor an nemenem wóón aramas me ekkewe mwú. Aisea 64:8 a erá: “Äm Samol mi Lapalap, en Semelapem. Äm aia usun chök pwül, nge en ka usun chök ewe chon föri sepi. Äm meinisin förien poum.” Emén chón ffér sepi a tongeni féri met chék sókkun mettóch a mochen féri seni ewe pwúl. Nge ewe pwúl esap tongeni ereni ewe chón ffér sepi met epwe féri. A pwal ina usun ren Kot me aramas. Ese wor ach pwúúng le ereni Kot ifa usun epwe anapanapakich, usun chék ewe pwúl esap tongeni ereni ewe chón ffér sepi met sókkun sepi epwe féri.—Álleani Jeremaia 18:1-6.
4 Jiowa a anapanapa ewe mwúún Israel usun chék án ewe chón ffér sepi anapanapa ewe pwúl. Nge ifa usun Jiowa a sókko seni ewe chón ffér sepi? Jiowa a ngeni ekkewe aramas me ekkewe mwú eú liffang mi kkóló aúchean, ina ar tufichin pwisin filatá. Ese féri pwe ekkóch aramas repwe éch me ekkóch repwe ngaw. Ese pwal áeá an nemenem le eriáni aramas ar repwe álleasochisi. Nge ekkewe aramas repwe pwisin filatá ika ra mochen mut ngeni Jiowa, ewe Chón Fériir, an epwe anapanaper.—Álleani Jeremaia 18:7-10.
5 Met epwe fis ika emén a tipeférea me ese mochen mut ngeni Jiowa, ewe Chón Ffér Sepi, an epwe anapanapa? Ifa usun Jiowa epwe áeá an nemenem usun ewe chón ffér sepi pwúl? Ika a weires ngeni ewe chón ffér sepi le anapanapa ewe pwúl ngeni eú sókkun sepi a mochen féri, iwe a tongeni filatá le féri pwal eú sókkun, are a tongeni péútaaló ewe pwúl. Popun a kan fis ei mettóch pokiten án ewe chón ffér sepi mwáálliló le anapanapa ewe pwúl. Nge Jiowa esap tongeni mwáálliló lupwen a anapanapa aramas. (Tut. 32:4) Lupwen emén ese mut ngeni Jiowa an epwe anapanapa, iwe epwe tipisin chék ena emén. Jiowa a kan siwili napanapen an anapanapa aramas, a alóngólóng ika aramas repwe etiwa are resap. Lupwen aramas ra álleasochisi Jiowa, ra aúchea me ren. Áwewe chék, ekkewe Chón Kraist mi kepit, “chokewe [Kot] a ümöümöch” ngeniir, Kot a anapanaper pwe ra wiliti “sepi fän iten rän mi aüchea.” Nge iir kewe mi tunaló án Kot kapasen éúréúr repwe wiliti ewe sókkun sepi Kot “a song ngeniir,” iir mi chék lamotongaw.—Rom 9:19-23.