Lúkú​—Eú Napanap mi Apéchékkúlakich

LÚKÚ a apéchékkúlakich. Áwewe chék, inaamwo ika Satan a mochen atai ach ririéch ngeni Kot, nge lúkú a atufichikich le ‘kunu ekewe föün esefich mi pulopulen ekkei seni ewe Eman mi Ngau.’ (Ef. 6:16) Ren lúkú, sia tongeni pworacho ngeni ach kewe osukosuk mi chukuchukutá. Jesus a ereni néún kewe chón káé: “Are epwe wor ämi lükülük mi nönnö ngeni eföü pwükilin irä mi fokun kükün, oupwe tongeni üreni ei chuk, ‘Kopwe mwöküt seni ikei o mwökütüla ikenan,’ iwe, epwe mwöküt.” (Mat. 17:20) Pokiten lúkú a tongeni apéchékkúlakich le ririéch ngeni Jiowa, iwe mi éch ach sipwe ekieki ekkeei kapas eis: Met weween lúkú? Ifa usun napanapen letipach a tongeni álisatá are apwangapwangaaló ach lúkú? Ifa usun sipwe tongeni apéchékkúla ach lúkú? Ié sipwe lúkúlúk wóón?​—Rom. 4:3.

MET WEWEEN LÚKÚ?

Lúkú ese chék wewe ngeni án emén lúkú are silei ewe enlet pún pwal mwo nge “ekewe anün rochopwak ra pwal lükü [pwe mi wor Kot], nge ra chechech ren niuokus.” (Jas. 2:19) Iwe, met weween lúkú?

Ewe Paipel a áweweei pwe a wor ruu kinikinin ewe napanap lúkú. Áeúin, “iei wewen lükü: sia alletätä ekewe mettoch sia apilüküni.” (Ipru 11:1a) Ika a wor óm lúkú, kopwe fókkun lúkú pwe mettóch meinisin Jiowa a apasa ra enlet, me meinisin repwe pwénútá. Áwewe chék, Jiowa a ereni ekkewe chón Israel: “Are oupwe tongeni atai ai pwon fän iten rän me pwin, pwe rän me pwin resap chüen fis lon ar fansoun mi kefilitä, mürin ai pwon ngeni nei chon angang Tafit epwe pwal tongeni ta.” (Jer. 33:20, 21) Ka fen piin aúreki ika ewe akkar esap chúen tétá are tuputiw, iwe esap chúen wor rán me pwiin? Ika ka fókkun lúkúlúk wóón allúkún fán láng me fénúfan mi nemeni rokopwálin fénúfan wóón pwisin leenian me an pwelli ewe akkar, iwe itá kopwe pwal fókkun lúkú pwe ewe Chón Fératá ekkena allúk a tongeni apwénúetá minne a apasa.​—Ais. 55:10, 11; Mat. 5:18.

Oruuan, lúkú ina ewe “pisekin ánnet mi alúkúlúk ren ekkewe mettóch sise tongeni kúna.” (Ipru 11:1b, NW) Ifa usun? Áwewe chék, met kopwe apasa ika emén semirit a eisinuk, ‘Pwata ka silei pwe mi wor ásepwál?’ Inaamwo ika kese tongeni kúna ásepwál, nge ese mwáál kopwe álisi ena semirit le ekieki wóón ekkewe pisekin pwáraatá mi ánneta pwe mi wor ásepwál. Áwewe chék, sia tongeni ngasangas, sia tongeni kúna met enienin ewe ásepwál a tongeni efisi, me metakkan. Lupwen ewe semirit a poputá le lúkú ren an nengeni ewe pisekin ánnet, iwe epwe lúkú pwe mi wor ásepwál inaamwo ika ese tongeni kúna. Pwal ina chék usun, lúkú a lóngólóng wóón pisekin ánnet mi núkúchar.​—Rom 1:20.

MI LAMOT SIPWE AÚCHEANI EWE ENLET REN ACH SIPWE EÁNI LÚKÚ

Pokiten lúkú a lóngólóng wóón pisekin ánnet, iwe ren an epwe wor án emén lúkú, mi lamot epwe akkomw “silei ewe let.” (1 Tim. 2:4) Nge ese naf ena. Aposel Paulus a makkeei: “Sia lükü Jesus lon lelukach.” (Rom 10:10) Mi lamot án emén esap chék lúkú ewe pwóróus mi enlet nge itá epwe pwal aúcheani. Ika a féri ena, iwe epwe chúng letipan le anganga an lúkú, weween ren an manaweni ewe sókkun manaw Kot a pwapwa ren. (Jas. 2:20) Emén ese enletin aúcheani ewe enlet epwe tongeni an esap etiwa pwal mwo nge pisekin ánnet mi núkúchar pokiten ese mochen siwili minne a lúkú are a chék féri pwisin mochenin. (2 Pet. 3:3, 4; Jut. 18) Ina popun me lóóm, esap meinisin chókkewe mi kúna ekkewe manaman mi fis ren manamanen Kot ra ámááraatá ar lúkú. (Num. 14:11; Joh. 12:37) Ewe napanap lúkú, uwaan án Kot we ngún mi fel, a chék tongeni máár lón letipen aramas mi enletin aúcheani ewe enlet.​—Kal. 5:22; 2 Tes. 2:10, 11.

USUN ÁN TAFIT ÁMÁÁRAATÁ LÚKÚ MI PÉCHÉKKÚL

King Tafit i emén me lein ekkewe aramas mi eáni ewe sókkun lúkú mi péchékkúl. (Ipru 11:32, 33) Iwe nge, esap meinisin lón án Tafit we famili ra eáni ena esin lúkú. Áwewe chék, lón eú fansoun pwiin Tafit we mwánichi itan Eliap a pwári nafangawen an lúkú Jiowa lupwen a erá pwe Tafit a ekiekingaw lupwen a song ren án Koliat turunufasa chón Israel. (1 Sam. 17:26-28) Ena napanap lúkú, aramas rese eáni me leuputiwer, are álemwiri seni semer kewe me iner, ina popun án Tafit lúkú a feito seni pwisin an ririéch ngeni Kot.

Lón Kölfel 27 wokisin 1, Tafit a pwári ifa usun a eáni ewe esin lúkú mi péchékkúl. Lón wokisin 2 me 3, Tafit a ekilonei met a fis ngeni manawan me lóóm me met Jiowa a féri ngeni chón koputan kewe. Lón wokisin 4, a fókkun aúcheani án Jiowa kókkótun fel. Lón wokisin 6, Tafit a fel ngeni Kot lón ewe imwenfel mangaku fitifengen me chiechian kewe chón lúkú. Lón wokisin 7 me 8, a fókkun kútta án Jiowa álillis lón iótek. Lón wokisin 11, Tafit a pwal mochen an epwe angei káit lón alen Kot we. Lón wokisin 13, NW, me ren Tafit a mmen lamot ena napanap lúkú, ina popun a tongeni eis: “Epwe fet manawei ika ese wor ai lúkú?”

USUN ACH APÉCHÉKKÚLALÓ ACH LÚKÚ

Ka tongeni eáni ewe sókkun lúkú Tafit a eáni ika ka áppirú an ekiek me féffér mi pwá lón Kölfel 27. Pokiten lúkú a lóngólóng wóón ewe sile mi enlet, iwe lapólóón óm káé án Kot we Kapas me ekkewe puken álillisin Paipel, epwe pwal ina mecheresilóón óm uwaani ena napanap lúkú, uwaan án Kot we ngún mi fel. (Kölf. 1:2, 3) Awora fansoun le ekilon atun ka káé. Ika ka ekilonei met ka káé, iwe epwe lapóló óm aúcheani letipen Kot. Iwe ika a lapóló óm aúcheani Jiowa, iwe epwe pwal ina lapólóón óm mochen anganga óm lúkú ren óm fel ngeni lón ach kewe mwich me óm ereni aramas usun ach we ápilúkúlúk. (Ipru 10:23-25) Pwal och, sia pwáraatá ach lúkú lupwen sia akkachocho le ‘iotek fansoun meinisin, nge sisap achanü.’ (Luk. 18:1-8) Ina minne “iotek fansoun meinisin” ngeni Jiowa, lúkúlúk wóón pwe “a ekieki met oupwe feiöch ren.” (1 Tes. 5:17; 1 Pet. 5:7) Lúkú a amwékútúkich le féri minne mi pwúng, iwe lupwen sia féri ena, ach lúkú a péchékkúleló.​—Jas. 2:22.

ANGANGA ACH LÚKÚ JESUS

Lón ewe pwinin mwen Jesus epwele máló, a ereni néún kewe chón káé: “Oupwe lükü Kot, nge oupwe pwal lüküei.” (Joh. 14:1) Ina minne, mi lamot sipwe anganga ach lúkú Jiowa me pwal ach lúkú Jesus. Ifa usun sipwe anganga ach lúkú Jesus? Sipwe ppii úlúngát alen ach sipwe féri ena.

Áeúin, kopwe ekieki pwe ewe méén kepich, ina án Kot liffang ngonuk. Aposel Paulus a erá: “Üa manau ren ai lükü ewe Nöün Kot mi echeniei o fangala manauan fän itei.” (Kal. 2:20) Lupwen ka anganga óm lúkú Jesus, ka fókkun lúkú pwe ewe méén kepich a weneituk, ina lóngólóngun omusomusen óm kewe tipis, me a awora ngonuk ewe ápilúkúlúkún manaw esemuch, me ina met a fókkun pwáraatá lap seni meinisin pwe Kot a tongeok. (Rom 8:32, 38, 39; Ef. 1:7) Ina met epwe apéchékkúlok óm kosap eáni ekiek ese pwúng usun pwisin en.​—2 Tes. 2:16, 17.

Oruuan, arap ngeni Jiowa lón iótek, ewe mi tufich pokiten án Jesus asor. Pokiten ewe méén kepich, sia tongeni iótek ngeni Jiowa “ia sia küna ümöümöch me ie. Ikenan sipwe angei tong o küna ümöümöch, pwe epwe alisikich lon fansoun ach osupwang.” (Ipru 4:15, 16; 10:19-22) Iótek a etipeppósakich le ú ngeni sóssótun tipis.​—Luk. 22:40.

Aúlúngátin, álleasochisi Jesus. Aposel Johannes a makkeei: “Iö a lükü ewe Nau a eäni manau esemüch. Iö a lükümach ngeni ewe Nau esap eäni ewe manau, pwe än Kot song a nonom won.” (Joh. 3:36) Nengeni pwe Johannes a affata sókkofesenin án emén anganga an lúkú me án emén álleasolap. Ina minne, lupwen ka álleasochisi Jesus, ka anganga óm lúkú i. Ka álleasochisi Jesus ren óm álleasochisi “än Kraist allük,” weween meinisin áitian kewe me an allúk. (Kal. 6:2) Ka pwal álleasochisi Jesus ren óm fiti ewe emmwen a awora me ren “ewe chon angang mi allükülük o tipachem.” (Mat. 24:45) Ren óm álleasochisi Jesus, kopwe kúna ewe esin péchékkúl mi tongeni elikiituk fán óm kewe osukosuk mi kon eniweniw me efeiengaw usun eú mélúmél.​—Luk. 6:47, 48.

“SOPWELA LE APÖCHÖKÜLA ÄMI LÜKÜLÜK MI UNUSEN PIN”

Emén mwán a kékké fan léúwommóng ngeni Jesus me apasa: “Üa lükülük! Kopwe alisiei, pwe üsap chüen lükülükümang.” (Mark. 9:24) A wor án ena mwán lúkú, nge a tipetekison le mirititi pwe a chúen lamot an epwe alapaaló an lúkú. Kich meinisin sia usun ena mwán, mi lamot ngenikich an epwe pwal lapóló ach lúkú. Iwe sia tongeni apéchékkúla ach lúkú lón ei fansoun. Sia fen káé lón ei lesen pwe epwe péchékkúleló ach lúkú ika sia káé án Kot we Kapas me ekilonei, ina met epwe alapaaló ach aúcheani Jiowa. Ach lúkú me pwal án chienach kewe Chón Kraist lúkú epwe pwal péchékkúleló lupwen sia fel ngeni Jiowa, ereni ekkewe ekkóch usun ach ápilúkúlúk, me ikkiótek fansoun meinisin. Pwal och, lupwen sia apéchékkúla ach lúkú, sia angei ewe feiéch mi lap seni meinisin. Iei met án Kot we Kapas a pese ngenikich: “Ämi chiechiei kana mi achengicheng, oupwe chök sopwela le apöchöküla ämi lükülük mi unusen pin . . . Iwe, oupwe püsin tümwünükemi lon än Kot chen.”​—Jut. 20, 21.