Merelo a Arumiwi
4 Pedro na Joau alogagavi na nlogo, afiyavo anamakutta, munddimuwa wa mumparhani na Asaduseu. 2 Awene ahisilidhiwa sabwani arumiwi ela osunziha nlogo vanamwinjini, alaleyaga mwaha wa ovenyihiwa mukwani wa Yezu. 3 Venevo, ahattidda vina ahafugela mukambura ofiyedha mmangwananimwá sabwani vati vahimala oriba. 4 Mbwenyi enjene ewale diskursuyá arumela, vina muttengo wa alobwanayá wafiya 5.000.
5 Mmangwananimwá, alamuleli na anddimuwa a ayuda vamodha na anamasunziha magano atugumana o Jeruzalemi, 6 vamodha na Anaz wali munddimuwa wa anamakutta, Kayifá, Joau, Alexandre na anamudhi otene a munddimuwa wa anamakutta. 7 Ahattiya Pedro na Joau vari vawa vina ahavuza: “Na owodha gani obe na nzina nani nikosilenyuna esidhá?” 8 Venevo Pedro wodhalene muya wokoddela, ohawakula dhahi:
“Nyuwo asogorheli a nlogo vina anddimuwa a ayuda, 9 akala ddabuno ninovuziwa mwaha wa omwirela opama mulobwana woragala, vina akala munfuna muziwe bani omukosihile mulobwana oddo okala mugumi, 10 muziwe nyuwo vina nlogo notene na Izrayel wi mulobwana oddo ovulumutxiwe vina oli vamentoni venyu, ovulumuwile na nzina na Yezu Kristu Munazareti, ompilenyu vapingirhizini vano Mulugu anvenyiha mukwani, ndde iyene ovulumuwile na nzina naye. 11 Yezu oddo ‘ddi nlugu nipwazile nyuwo anamamaga nyumba vina nidhile okala nlugu ninddimuwa na alsersi.’ 12 Ottiya ejo, kawo mwina onwodha onivuna, sabwani kaniwo nzina nina velaboni ya vati nisakulile Mulugu vari va attu ninnivuna.”
13 Monelani oliba murima wa Pedro vina wa Joau, azinddiyela wi àli attu ahasunzile* vina àli attu-attuvi, awene atikina; venevo anonelamo wi anedda na Yezu. 14 Awene kawodhile omwakula Pedro na Joau sabwani mulobwana ole wavulumutxiwe wali venevo. 15 Aharuma wi abudduwevo va Sinedriyuniva* vina aroma opambihana mwaha wa makaniyá mukalelani; 16 anloga dhahi: “Nàkosena eni alobwana aba? Sabwani ehoneya-wene ezinddiyelo ekosilani vina eziweyile mu Jeruzalemi mwetemwene, nanda ejoyá iyo kaninkodda. 17 Wi miselu esi dhinattabwe ovuwa vari va nlogo, ndhoweni natxutxeni vina nawaddele wi ahimulaleyele vina muttu ddi muttu mwaha wa nzina ntti.”
18 Nowidhawo, awene ahakuwela, ahakokomeza wi ahiloge elo na muttu nne vina ahisunzihe na nzina na Yezu. 19 Venevo Pedro na Joau ahawakula dhahi: “Mutanalele nyuwo mwanya, akala japama vamentoni va Mulugu ouwiwelelani nyuwo, ottiya omwiwelela Mulugu. 20 Mbwenyi iyo, kaninwodha omalana esile dhonilehu vina dhiwalehu.” 21 Mmalelani watxutxa wili ahattiya odhowa vowi kanna muladdu wowatxinutxana sabwani nlogo notene nannimuttittimiha Mulugu mwaha wa ejile yapadduwile. 22 Mulobwanayá wavulumutxiwe na ntikiniho ntto wanna okwaranya vyaka 40.
23 Mmalelani ofuruliwa, awene adhowa ogumana na anamasunza ena vina ahawaddelamo dhalogile anddimuwa a anamakutta na anddimuwa a Ayuda. 24 Mwiwalani eso, amulobelela Mulugu mumodhani na lizu noliba, alogaga:
“Nabuya, Namadhulu-dhulu ddi nyuwo ottanddile erimu, elabo, bara na dhotedhene dhilimo, 25 na muya wenyu wokoddela muhiloga na mulomo wa murumiwi wenyu Davidi, muzamani wehu: ‘Malogo akalele eni ozuzumene vina attu antanalelani dhotowa ttima? 26 Amwene a mwilaboni ahimala ovisasanyedhela wi awane na Yehova vina na muttikitteliwi waye.’ 27 Txibarene Herodi na Pónsio Pilato ahitugumana sidadi ejino vamodha na attu a malogo vina a nlogo na Izrayel wi awane na mukoddeli, mwimeleli wenyu Yezu, omuttikittelinyu. 28 Awene atugumana wila akose esile dhalogilenyu mutanene, eji epadduwile na owodha vina n’ofuna wenyu. 29 Ovano Yehova, konani onitxutxa wawa, nivahení iyo emeleli enyu owodha wa olaleyagavi nzu nenyu nihovaga elo, 30 mutapulaga nlada nenyu wila muvulumutxe, oku vizinddiyelo na matikiniho apadduwaga na nzina na mukoddeli, mwimeleli wenyu Yezu.”
31 Mmalelani omulobelela Mulugu na ntidi, mburo walani ottekenyeya vina otene adhala muya wokoddela, aroma olaleya nzu na Mulugu ahovaga elo.
32 Ottiya ejo, muttitti wa attu arumelile, edda na murima modha vina na efunelo modhene; kavo waloga wi dhinemina saga, mbwenyi angawelana dhotene dhakanani. 33 Arumiwi andhowavi alaleyaga na owodha mwaha wa ovenyihiwa mukwani wa Nabuya Yezu, vina oteneyá anrurihiwa venjene na mahala ohipimeya a Mulugu. 34 Txibarene, mwa awene kàmwali muttu wajombeliwa elo, sabwani otene akána maddabo obe nyumba anguliha, andhana kobiriyá, 35 vina yaperhekeliwa arumiwi. Ngamala bigawiwa mowiwanana na yojombeliwa ya muttu-muttu. 36 Yakakene jikosile Jozé wakuweliwa na arumiwi Barnabé (entapulela “Ole Onalibiha Ena”), Mulevita obaliwe o Xipre, 37 wanna munddaye, iyene oguliha, odhana kobiridhá vina ohaperhekela arumiwi.