Olabihedhe Mazu Ohirutxa

Elobo Gani Ekosile Yezu

VIDIYU: Musibo wa Yezu Ononiha Okwela wa Mulugu

1. Koona VIDIYU, obe wengese Mateu 6:​25-27. Ogamala otanalele mavuzo aba:

1. Yezu oladdanihile dhavi mukalelo onnikoya Yehova?

2. Masiki Yezu aziwaga dhilobo dhinji mwaha wa balame, iyene olabihedhile dhavi yotagiha yovevuwa? Obu okalele nni mukalelo wapama wosunziha?

Ejile Ekosile Yezu Ennisunziha Nni?

2. Nigasunziha na mazu ovevuwa attu anowodha wubuwela ejile ensunziyehu vina ninodddiginya mirima dhawa.

Omutagihe Yezu

3. Kulogetxe. Ottiya ologa dhotene dhinziwiwe mwaha wa makaniya, katamela ofwaseyela makaniya anlogiwa vaddimani. Ogamala okosa nivuzona, kamujedhe namasunza wi avahe yowakula. Namasunzaya agahiziwe wakula nivuzona obe agavaha yowakula ehiniwanana na ejile ensunziha Bibilia, omukose mavuzo owenjedhedha anamukamihedhe otanalela makaniya. Namasunzaya aganonelamo makaniya kalupela ddima yina.

4. Kamukamihedhe namasunza wiwananiha ejile esunziliye na ensunziye ovanene. Motagiha, ohinaroma nsunzo mwaha wa ovenyihiwa mukwani, kagwaddela momaguva-mwene esunziliye mwaha ejile enimpadduwela muttu agakwa.

5. Oziwe olabihedha maladdaniho. Ohinalabihedha nladdaniho ovivuze:

1. ‘Yoladdaniha eji jovevuwa ononelamo?’

2. ‘Namasunza waga onele ononelamo momaguva?’

3. ‘Nladdanihona ninele omukamihedha namasunzaga ononelamo mutoma wamakamaka—Obe agobuwela nladdaniho bahi?’