Nimuttittimihe Yehova

1. Attu enjene anzuzumela eni masaka abano?

OHIZINDDIYELA wi attu enjene masaka abano anivizuzumela anyene? Motagiha, attu ena anolabihedha redes sociais wi avigwarule vina asibiwe na dhilobo dhinwodhani okosa. Mbwenyi ang’onovi banimuttittimiha Yehova. Mu nsunzoni ntti ninele wona txini entapulela omuttittimiha Yehova vina txini ennittukulela okosa ejuwene. Ninele osunza vina mukalelo onawodhihu onvaha Yehova nttittimiho nininfwanyelela vina iyene onattittimihe dhavi nzina naye musogorho.

TXINI ENTAPULELA OMUTTITTIMIHA YEHOVA?

2. Yehova olagihile dhavi nttittimiho naye o Mwangoni Sinai? (Koona vina ya kapa.)

² Bibilia onolagiha wi Yehova Mulugu wottittimiheya. Mudhidhi mung’onovi mmaliliye wafurula ana Izrayel mutxedhiwani mw’Ejipitu, Yehova ohikosa elobo yotikiniha wi àlagihe ottittimiheya waye. Katanalela eji: Matxikwi menjene a ana Izrayel ahitugumana mutxiddo wa Mwango Sinai wi avuruwane yafunani waddeliwa na Mulugu. Murabo woriba onokunela mwangoya, mohijedheleya-mwene mburo walani wahiroma ottekenyeya wa mattaka, ehooneya ozerimela na oruma wa jahi vina yahiweya oruma wa parhaza. (Obu. 19:​16-18; 24:17; Ms. 68:8) Katanalela otikina wa ana Izrayel mudhidhi olagihile Yehova nttittimiho naye ninddimuwa.

3. Txini entapulela omuttittimiha Yehova?

³ Kito attu anowodha omuttittimiha Yehova? Ndde. Mukalelo mmodha wa omuttittimiha Yehova bwa wasunziha ena mwaha wa owodha waye onddimuwa vina mikalelo dhaye. Enowodheya vina omuttittimiha Yehova modhela onvaha nttittimiho notene sabwa ya dhilobo dhinwodhihu okosa na nikamihedho naye. (Iza. 26:12) Mwene Davidi yotagiha yapama ya muttu omuttittimihile Yehova. Mu nlobelo nikosiliye vari va nlogo na Izrayel, Davidi ohiloga dhahi mwaha wa Mulugu: “Nyuwo Nabuya muli munddimuwa, wowodha, wovuwa, mwinya wa dhetedhene, wothithima. Dhetene dhili odhulu na vati, senyu.” Mmaleli Davidi ogomiha nlobelo naye, “otene agumanilevo, amuthithimiha Nabuya [Yehova].”—1 Ma. 29:​11, 20.

4. Yezu onvahile dhavi nttittimiho Yehova?

⁴ Yezu valiye velaboni ya vati ohimuttittimiha Babe modhela olagiha wi ddi Yehova wanvaha guru ya okosa matikiniho. (Mk. 5:​18-20) Yezu vina ohakamihedha ena wona opama wa Yehova modhela mukalelo walogiye mwaha wa Babe vina mukalelo waweddihiye attu ena. Mudhidhi dhahi Yezu wela osunziha mu sinagoga. Vari va attu anvuruwana wahikalavo muyana wavolowiwe muya wabure mwari mwa vyaka 18. Muya obu wabure wahikosiha maningo aye okoromana ahiwodhaga winuwa. Yezu ohinonelamo wi iyene wali wokubanyene vina wanfuna omukamihedha. Nona iyene wahimwaddamela vina wahiloga na muyanaya n’opama. Iyene ohimwaddela: “Muyana wé eredda yawo evira.” Osogorhowa iyene ohimutapulela nlada, momaguva-mwene muyanaya ohinuwa vina “oroma omuttittimiha Mulugu,” iyene wahitamalela venjene sabwa ya Yehova onvulumutxa! (Lk. 13:​10-13) Muyana oddu wahikana mwaha dhapama dha omuttittimiha Yehova, iyo vina nihikana.

TXINI ENNITTUKULELA OMUTTITTIMIHA YEHOVA?

5. Mwaha gani dhinihu dhinnittukulela omuriha Yehova?

⁵ Iyo ninomuttittimiha Yehova sabwani ninomuriha venjene. Iyo nihikana mwaha dhinjidhene dhinnittukulela omuriha Yehova. Yehova ddi namawodha-wodha; ewodhelo yaye kingoma. (Ms. 96:​4-7) Eziwelo yaye enowoneya-wene mu dhilobo dhipaddutxileye. Iyene ddi Niparha na egumi yehu vina ddinnivaha dhetene dhinfunihu wi nikalewo. (Ovu. 4:11) Iyene ddoweddeyana. (Ovu. 15:4) Dhetene dhinkosiye dhinosogorha vina dila dhotene iyene onowakwaniha dhipikirheliye. (Joz. 23:14) Jijuwene emuttukulele namavuhulela Jeremiya ologa dhahi mwaha wa Yehova: “Mwari mwa amwene otene a mwilaboni na aziwetxiyá, kawo oli ninga nyuwo”! (Jer. 10:​6, 7) Kavali waganyedha, iyo nihikana mwaha dhapama dhinnittukulela omuriha Babi wehu wa wirimu. Mbwenyi iyo kaninfwanyela bahi omuriha Yehova—ninofwanyela vina omukwela.

6. Txini ennittukulela omukwela Yehova?

⁶ Ninomuttittimiha Yehova sabwani ninomukwela venjene. Katanalela mikalelo dhinjidhene dha Yehova dhinnittukulela omukwela. Iyene ddattagaraga vina ddanttebwa. (Ms. 103:13; Iza. 49:15) Ononitanala vina onokubanya aganonaga nitabuwaga. (Zak. 2:8) Iyene ononikamihedha omuziwa vina okala Amarho aye. (Ms. 25:14; Mer. 17:27) Yehova ddoviyeviha; “iyene onoworamela wona elabo y’odhulu na ya vati. . . . onomvenyiha vambwebweni muhawi.” (Ms. 113:​6, 7) Mwaha esi dhotene kadhinnittukulela omuttittimiha Mulugu wehu?—Ms. 86:12.

7. Gari gani yavawoka ena iyo?

⁷ Ninomuttittimiha Yehova sabwani ninofuna wi attu ena amuziwe. Attu enjene kanziwa ebaribari mwaha wa Yehova. Sabwaya jani? Sabwani Satana onowapiba omentoni alogaga dhottambi sabwa ya Yehova vina alabeli aye. (2 Ko. 4:4) Satana onowanyengetta attu alogaga wi Yehova Mulugu wa owali, kannitanala vina ddi iyene onatotela attu makattamiho menjene. Mbwenyi iyo ninoziwa ebaribariya sabwa ya Mulugu wehu! Nihikana gari ya olagiha ebaribariya vina wakamihedha ena wona wi Yehova Mulugu wapama. (Iza. 43:10) Masalmo 96 onologa venjene sabwa ya omuttittimiha Yehova. Ninele wona maversu mang’onovi a Masalmo oddu vina osunza mukalelo onawodhihu onvaha Yehova nttittimiho nininfwanyelela.

NINAWODHE DHAVI ONVAHA YEHOVA NTTITTIMIHO NININFWANYELELA?

8. Mukalelo mmodha wa omuttittimiha Yehova buvi? (Masalmo 96:​1-3)

⁸ Kengesa Masalmo 96:​1-3. Ninowodha omuttittimiha Yehova modhela dhilobo dhinlogihu mwaha wa iyene. Maversu aba anologa wi ninofwanyela, omwibela jibo Yehova, otamala nzina naye, ovuwiha miselu dhapama dha ovulumutxa waye vina waddela malogo nttittimiho naye. Esi dhetene mikalelo dhinwodhihu omuttittimihana Babi wehu wa wirimu. Masaka a mundduni, adhari a Yehova koova wawaddela ena dhilobo dhapama dhakosela Yehova vina wamelela nzina naye. (Da. 3:​16-18; Mer. 4:29) Ninawodhe dhavi okosa yakakene?

9-10. Txini esunziliwe na yotagiha ya Angelina? (Koona vina foto.)

⁹ Koona epadduwile na murogora dhahi onkala o Estados Unidos onkuweliwa Angelina.a Na oliba murima iyene ohibarela nzina na Yehova mu emprezani enlabiye. Varomiliye olaba mwenemo Angelina wahobiwa wi akose matugumano na anamalaba ena, mwenemo mugakanilani gari ya ologa dhipadduwile mwigumini mwawa. Angelina ohisasanyedha dhafuniye ologa dhalagiha wagalala wanna iyene sabwa ya okala Munamoona wa Yehova. Mbwenyi mudhidhi mung’onovi ahinatti ologa, namalaba mwina waviziwihile ninga muttu waleliwe ninga Munamoona wa Yehova wahiroma waloga bure Anamoona a Yehova vina esile dhinrumelani. Angelina ohiloga: “Miyo ddali wozuzumene, mbwenyi ddahubuwela: ‘Ddinele omuttiya muttu omuloga bure Yehova? Miyo kaddinfwanyela omala, ddinofwanyela wawaddela ejile eli Yehova.’”

¹⁰ Mmaleli mulobwanaya ologa, Angelina momaguva-mwene ohikosa nlobelo na mwari-mwari. Venevo noderetu ohimwaddela: “Yupadduwele enoligana na eddipaduweli. Miyo vina ddileliwe ninga Munamoona wa Yehova vina napanovi dili Munamoona wa Yehova.” Masiki mudhidhiya okalaga worutxa, Angelina wahifwaseya, iyene ohalagiha anamalaba akwaye mafoto aye vina a akwaye amulabelaga Yehova nowagalala vina na nriho ohitapulelamo esile dhinrumeliye. (1 Pe. 3:15) Txini epadduwile vasogorhova? Mmalile Angelina ologa, mulobwanaya wahitxinja mubuwelo waye. Iyene ohiloga wi wannubuwela dhilobo dhapama dhipadduwile mudhidhi wamuttukulela amambali aye omatugumanoni valiye muzombwe. Angelina ohiloga: “Gari enddimuwa vaddiddi wamelela nzina na Yehova. Txibarene ejo enonfwanyelela.” Masiki ena ahirihaga nzina na Yehova iyo nihikana gari ya omuttittimiha iyene.

11. Adhari a Yehova anvirihamo dhavi gano ninfwanyeya va Masalmo 96:8?

¹¹ Kengesa Masalmo 96:8. Ninomuttittimiha Yehova na dhilobo dhehu dhattima. Oromana wale nlogo na Yehova ninomuttittimiha iyene na mukalelo obu. (Gan. 3:9) Motagiha, ana Izrayel ankosa mivaho wi dhimagiwena mparha vina dhilabihedhiwe mwenemo. (2 Am. 12:​4, 5; 1 Ma. 29:​3-9) Anamafwara ena a Kristu ankosa mivaho na esile dhakanani wi Yezu na arumiwi aye akaane dhajombela. (Lk. 8:​1-3) Vina Akristu ena a nsaka zana noroma ankosa mivaho wi akamihedhe abalawa na arogora. (Mer. 11:​27-29) Masaka abano, iyo vina ninowodha omuttittimiha Yehova modhela mivaho dhinkosihu na murima wehu wotene.

12. Mivaho dhehu dhinimuttittimiha dhavi Yehova? (Koona vina foto.)

¹² Koona yotagiha modha enlagiha mukalelo onimuttittimiha iyo Yehova na mivaho dhehu. Relatoriyu ya yaka ya 2020 ehiloga makattamiho atoteyile na yumwi egonelile mudhidhi mwinjene o Zimbabwe. Attu matxikwi menjene agahikwa sabwa ya ohikana yoja otaganyiha na murogora onkuweliwa Prisca. Masiki dhawene Prisca keyeleli mundduni vina wahidhowavi alaleyaga na Matxittattu vina Mahishano otene, masiki mudhidhi wa omanyula. Anamwanddamani aye annimbedda sabwa ya iyene odhowa mmalaleyoni ottiya olaba. Awene anloga: “Weyo onele okwa na dala.” Prisca wannonelamo wi Yehova agahimuzuzumela, nona iyene wannakula, “Yehova txipo kananyanyala adhari aye.” Mudhidhi mung’onovi musogorhomwa, Prisca wahakela dhoja vina dhilobo dhina dhafuniye sabwa ya mivaho dhinkosihu. Anamwanddamani a Prisca ahitikina venjene vina ahiloga, “Mulugu txipo kawunyanyalile, iyo ninofuna vina osunza sabwa ya iyene.” Anamwanddamani aye owakwana atanu na eli ahiroma woona matugumano.

13. Mweddelo wehu onwodha dhavi omuttittimiha Yehova? (Masalmo 96:9)

¹³ Kengesa Masalmo 96:9. Ninowodha omuttittimiha Yehova na mweddelo wehu. Wi awodhe olaba mumparhani mwa Yehova anamakutta anfwanyela ovisuwa vina okala okoddelene. (Obu. 40:​30-32) Iyo vina ninofwanyela okala okoddelene kahiye bahi otakuluvi ninofwanyela vina okana mweddelo wotxena vina orabela elobo-txilobo enidda Yehova. (Ms. 24:​3, 4; 1 Pe. 1:​15, 16) Ninofwanyela okosa guru eli yotene wi nirule “mweddelo wa wale”—oniwanana na dhilobo dhonyakuwa vina dhabure dhinimusilidha Yehova—vina nabale “omuttu oswa”—kuloga, osunza wubuwela vina okosa dhilobo na mukalelo onlagiha wila iyo ninomutagiha Yehova vina mikalelo dhaye dhokoddela. (Kol. 3:​9, 10) Na nikamihedho na Yehova masiki attu anna mweddelo wonyakuwa obe ali awali anowodha okosa matxinjo vina wabala omuttu oswa.

14. Txini esunziliwe na nipadduwo na Jack? (Koona vina foto.)

¹⁴ Koona epadduwile na Jack, mulobwana wali muwali vaddiddi vina wawopiha wakuweliwa na attu ninga Muya Wabure. Sabwa ya dhilobo dhabure dhikosiliye, Jack wahittongeliwa opiwa. Mbwenyi oku ajedhelaga siku naye na opiwa, Jack wahiroma omusunza Bibilia na mbali walaleya kambura ejile. Masiki vakosiliye dhilobo dhinjidhene dhotakala, Jack wahitxinja mweddelo waye vina na mudhidhiya wahibatiziwa ninga Munamoona wa Yehova. Jack wahitxinja venjene, sabwa ya ejuwene siku naye nopiwa, anamang’anela ena ahimpaganya onlaga vaddiddi. Musogorheli mmodha wa anamang’anela walaba kambura ejile ohiloga: “Jack wali munyaperhezu wawopiha vaddiddi. Mbwenyi ovano iyene onokosa mpaddi wa anyaperezu apama.” Mvireli sumana modha Jack bamalile opiwa abali adhowa okosa matugumano kambura ejile, ahimuziwa munyaperhezu mwina wadhile wona matugumano dila yoroma. Txini emuttukuleli ofuna wona matugumano? Iyene wahitikina vaddiddi sabwa ya wona mukalelo watxinjile Jack vina wanfuna oziwa txini yafwanyeliye okosa wi amwebedhe Yehova. Kavali waganyedha wi ninowodha omuttittimiha Babi wehu wa wirimu na mweddelo wehu!—1 Pe. 2:12.

YEHOVA ONATTITTIMIHE DHAVI NZINA NAYE MOHIGONELA?

15. Yehova onattittimihe dhavi nzina naye mohigonela? (Masalmo 96:​10-13)

¹⁵ Kengesa Masalmo 96:​10-13. Maversu omariha a Masalmo 96 anomuloga Yehova ninga Namattonga vina Mwene woligana. Yehova onattittimihe dhavi nzina naye mohigonela? Modhela odhana oligana. Mohigonela iyene onele omutolotxa Babilónia Munddimuwa sabwa ya okosa dhilobo dhabure vina osunziha dhilobo dhottambi mwaha wa iyene. (Ovu. 17:​5, 16; 19:​1, 2) Ejo egapadduwa ena txino anele ogana ovitaganyiha na iyo wi amwebedhe Yehova. Omamalelowa, mu Armagedón, Yehova onele otolotxa elabo eji ya Satana àtolotxaga otene animusadduwela vina anloga dhottambi mwaha wa nzina naye, mbwenyi iyene onele wavuna otene animukwela, animwiwelela vina anfuna venjene omuttittimiha. (Mk. 8:38; 2 Tes. 1:​6-10) Omamalelo wa olamulela wa Vyaka Txikwi dha Kristu, Yehova onele okoddeliha kakamwe nzina naye. (Ovu. 20:​7-10) Ejo egapadduwa, “ovuwa wa Nabuya oner’oziweya, odhale mwilaboni mwetemwene, ninga enira manje mbara.”—Hab. 2:14.

16. Txini eganiliwe okosa? (Koona vina foto.)

¹⁶ Enele okala yapama vaddiddi okala mwilaboni munadhale attu ananvahe Yehova nttittimiho nininfwanyelela! Mbwenyi nijedhelaga mudhidhi obo, enowodheya okosa mpaka munwodhelihu wi nimuttittimihe Yehova mudhidhi wotene. Wi anikamihedhe wubuwela ejuwene, Nikuru Nolamulela nihisakula nlebo na Masalmo 96:8 ninga nlebo na yaka ya 2025: Mvahení Yehova nriho ninfwanyelela nzina naye.