Nzina na Yehova Nintapulela Eni Mwa Iyo?

1-2. Ninziwa dhavi wi nzina na Yehova ttamakamaka mwa Yezu?

NZINA na Yehova nikana ttima vaddiddi mwa Yezu. Iyene ddi muttu wamakamaka ombarela nzina na Babe. Ninga monelihu nsunzo nivirile Yezu wali womala-nawale wi akwe sabwa ya nzina na Yehova vina ejile entapulelani. (Mk. 14:36; Ahe. 10:​7-9) Vyaka Txikwi Dholamulela dha Yezu dhigavira, iyene onele okala womala-nawale wi amwiyihedhe Yehova ettomo yana iyene wila akoddelihe nzina na Yehova. (1 Ko. 15:​26-28) Dhetene dhimukoseli Yezu Yehova dhinolagiha wi iyene onomukwela venjene.

² Yezu ohidha velaboni ya vati na nzina na Babe. (Jo. 5:43; 12:13) Iyene ohaziwiha anamafwara aye nzina na Babe. (Jo. 17:​6, 26) Vasunzihiye attu vina vakosiye matikiniho, iyene wanlagiha wi ddi Yehova wanvahile eziwelo vina ewodhelo ya okosa dhilobo esi. (Jo. 10:25) Yezu ohimukumbirha Yehova wi awang’anele anamafwara aye “mwaha wa nzina [Naye].” (Jo. 17:11) Kavali waganyedha wi nzina na Yehova nali namakamaka mwa Yezu opitta elobo-elobovi, kito enwodheya dhavi muttu ologa wi ddinonfwara Yezu oku ahiziwaga vina ahilabihedhaga nzina na Yehova?

3. Txini enasekeserhe iyo mu nsunzoni ntti?

³ Ninga Akristu antamela ofwara ttarho dha Yezu, ninottittimiha nzina na Babe. (1 Pe. 2:21) Mu nsunzoni ntti ninele wona emuttukulele Yehova wavaha nzina ntti abale anlaleya “miselu dhapama dha Omwene.” (Mt. 24:14) Vina ninele osekeserha ejile entapulela nzina na Yehova mwa muttu-muttu wa iyo.

NLOGO NINKUWELIWA NA NZINA NAYE

4. (a) Txini yawaddele Yezu anamafwara aye ahinatti wiyelela wirimu? (b) Nivuzo gani ninasekeserhe iyo?

⁴ Mudhidhi mung’onovi ahinatti wiyelela wirimu, Yezu ohawaddela anamafwara aye: “Muya wokoddela ogautitelani munele wakela owodha vina munele okala anamoona aga o Jeruzalemi, mu Judeya mwetemwene, o Samariya ofiyedha okomoni wa elabo.” (Mer. 1:8) Nona anamafwara a Yezu anlaleya miselu dhapama dhipaddi dhotedhene ottiya o Jeruzalemi bahi. Na mudhidhiya attu a dhilabo dhotene agahikaana gari ya okala anamafwara a Yezu. (Mt. 28:​19, 20) Mbwenyi Yezu ohiloga: “Munele okala anamoona aga.” Anamafwara aba aswa anfwanyela oziwa nzina na Yehova obe agakalile anamoona a Yezu bahi? Mapadduwo anfwanyeya va Merelo kapitulu 15 anonikamihedha wakula nivuzo ntti.

5. Arumiwi vina anddimuwa a mmulogoni o Jeruzalemi alagihile dhavi wi attu otene anofwanyela oziwa nzina na Yehova? (Koona vina foto.)

⁵ Yaka ya 49 nsaka na Kristu, arumiwi vina anddimuwa a mmulogoni o Jeruzalemi ahittugumana wi asekeserhe yafwanyela okosa Amalabo ahitxetteliwe wi arumeeliwe ninga Akristu. Agomihaga diskursu yaye Tiago mbali wa Yezu ohiloga: “[Pedro] otapulelamo dhotedhene dhikosile Mulugu, wi ovano ohawubuwela attu a malogo meena, vina ohasakulamo ena wi akuweliwege na nzina naye.” Tiago waddana nzina gani? Amuromolaga namavuhulela Amós iyene ohenjedhedha: “Wila abale anhalavo amwiwelelege Yehova, vamodha na attu a malogo otene abuwene anakuweliwege na nzina naga, onloga ddi miyo Yehova.” (Mer. 15:​14-18) Anamafwara aba aswa kagasunzile bahi mwaha wa Yehova mbwenyi ‘agahikuweliwa na nzina naye.’ Eji entapulela wi awene agahaziwiha ena nzina na Mulugu vina attuya agahazinddiyela ninga attu anttukula nzina naye.

6-7. (a) Yezu wadhele nni velaboni ya vati? (b) Mwaha gani wamakamaka omukosihile Yezu odha velaboni ya vati?

⁶ Nzina na Yezu nintapulela “Yehova Nvuni,” Yehova ohimulabihedha Yezu wi àvune attu otene animuroromela iyene vina mwanaye. Yezu ohidha velaboni ya vati wi aperheke egumi yaye wila àvune attu. (Mt. 20:28) Modhela opitxa yobolo, iyene ohavaha attu gari yovuneya vina okana egumi yohimala.—Jo. 3:16.

⁷ Attu afunela nni yobolo? Sabwa ya epadduwile mmunddani mwa Edeni. Ninga monelihu nsunzo nivirile amambali ehu oroma, Adamu na Eva, ahimusadduwela Yehova dhahene ayelela gari yokalawo namukalakala. (Wi. 3:​6, 24) Mbwenyi Yezu ohidha velaboni ya vati wi akose elobo yamakamaka vaddiddi opitta wavuna attu. Satana ohiloga dhottambi dhinji mwaha wa Yehova. (Wi. 3:​4, 5) Nona attu anfwanyela oziwa wi Yehova kakosile elobo yabure vina nzina naye ttokoddela. Yezu wali muttu wofwanyelela agalagihile ejuwene sabwani iyene wamwimelela Yehova vina wankosa mowakwana-mwene dhotedhene dhanfunana Yehova.

8. Anamafwara otene a Yezu anfwanyela ononelamo eni?

⁸ Otene amuroromela Yezu, Ayuda vina Amalabo anfwanyela oziwa Nipara na ovuneya wawa, kuloga, omuziwa Babi wa Yezu, Yehova Mulugu. (Jo. 17:3) Dhahene ninga Yezu awene agankuweliwa na nzina na Yehova. Awene vina anfwanyela ononelamo ttima ya okoddeliha nzina ntti. Ovuneya wawa wewanana na ejuwene. (Mer. 2:​21, 22) Nona anamafwara otene ororomeleya a Yezu anfwanyela osunza mwaha wa Yehova vina Yezu. Kanintikina Yezu ogomiha nlobelo naye ninfwanyeya va Joau kapitulu 17 na mazu aba: “Miyo ddihaziwiha nzina nenyu vina ddinele waziwihavi, wi okwela oddikwelilena nyuwo okale mwa awene, miyo ddikale mumodhani na awene.”—Jo. 17:26.

NYUWO MULI ANAMOONA AGA

9. Ninawodhe dhavi olagiha wi nzina na Yehova ttamakamaka mwa iyo?

⁹ Anamafwara otene ebaribari a Yezu anofwanyela ozuzumela okoddelihiwa wa nzina na Yehova. (Mt. 6:​9, 10) Ninofwanyela wona nzina na Yehova ninga elobo yamakamaka vaddiddi opitta mazina mena. Enofuneya otonyihedha ejuwene na merelo ehu. Txini enfwanyelihu okosa wila nikoddelihe nzina na Yehova vina nitonyihedhe wi ejile elogile Satana mwaha wa Yehova kiyali ebaribari?

10. Txini enengesihu va Izaiya kapitulu 42-44? (Izaiya 43:9; 44:​7-9) (Koona vina foto.)

¹⁰ Va Izaiya 42-44 ninosunzavo ejile enfwanyelihu okosa wila nikoddelihe nzina na Yehova. Kapitulu esi Yehova onowakumbirha abale ahinimulabela wila atonyihedhe wi amulugu awa ba ebaribari. Ninga makani anfwanyela ottongiwa, iyene onokumbirha akala okalawo munamoona onwodha olagiha wi amulugu aba ba ebaribari mbwenye kawo onwodha!—Kengesa Izaiya 43:9; 44:​7-9.

11. Txini yalogile Yehova na nlogo naye enfwanyeya va Izaiya 43:​10-12?

¹¹ Kengesa Izaiya 43:​10-12. Yehova onologa na nlogo naye: “Nyuwo muli anamona aga, . . . Miyo ddili Mulugu.” Venevo Yehova onowakumbirha wi akule nivuzo ntti: “Okalawo Mulugu mwina ohili miyo?” (Iza. 44:8) Nikana gari yowakula nivuzo ntti modhela mazu vina merelo ehu. Nikana ebaribari wi Yehova, Mulugu mmodha webaribari. Nzina naye ninopitta mazina mena. Modhela esile dhinkosihu mwigumini mwehu ninotonyihedha txibarene wi ninomukwela Yehova vina nili oweddeyana na iyene masiki Satana atamelaga onitximiha, dhahene ninokana gari ya okoddeliha nzina na Yehova.

12. Nivuhulo na Izaiya 40:​3, 5 nakwanihedheyile dhavi?

¹² Nigakamihedha okoddeliha nzina na Yehova ninomutagiha Yezu Kristu. Izaiya vina ohiloga wi agahikalawo agasasanyedhile dila ya Yehova. (Iza. 40:3) Nivuhulo ntti nakwanihedheyile dhavi? Joau Mbatizi ohimusasanyedhela dila Yezu odhile na nzina na Yehova vina ologile modhela nzina na Yehova. (Mt. 3:3; Mk. 1:​2-4; Lk. 3:​3-6) Nivuhulo nakakene nanloga: Nttittimiho na Yehova ninere woneya. (Iza. 40:5) Esodha dhipadduwile dhavi? Mudhidhi odhile Yezu velaboni ya vati ohimwimelela Yehova mowakwana-mwene, eji yali ninga Yehova mwinyene wadhile velaboni ya vati.—Jo. 12:45.

13. Ninawodhe dhavi omutagiha Yezu?

¹³ Dhahene ninga Yezu nili anamoona a Yehova, ninottukula nzina na Yehova vina ninowawaddela attu otene anafwanyihu merelo aye okoddela. Mbwenye wi nikale anamoona a Yehova apama, ninofwanyela waziwiha attu otene dhotedhene dhikosile Yezu wi akoddelihe nzina na Yehova. (Mer. 1:8) Kawo mwina ovahile onamoona mwaha wa Yehova opitta Yezu nanda iyo ninfwara yotagiha yaye. (Ovu. 1:5) Marhe gani mena antonyihedha iyo wi nzina na Yehova ttokoddela?

NZINA NA YEHOVA NINTAPULELA ENI MWA IYO?

14. Mowiwanana na Masalmo 105:​3, niniviwamo dhavi mwaha wa nzina na Yehova?

¹⁴ Ninogayana nzina na Yehova. (Kengesa Masalmo 105:3.) Yehova onoziveliwa nigagayana nzina naye. (Jer. 9:​23, 24; 1 Ko. 1:31; 2 Ko. 10:17) Gari enddimuwa mwa iyo ottittimiha nzina naye vina okamihedha wamelela mweddelo waye. Kaninfwanyela okaana manyazo wawaddela akwihu omabasani, oskola, anamwaddamani vina attu ena wi nili Anamoona a Yehova! Ddiabo onfuna wila iyo nittiye wawaddela attu ena nzina na Yehova. (Jer. 11:21; Ovu. 12:17) Mwebaribari Satana vamodha na abale anvuwiha ottambi mwaha wa Yehova anfuna attukulele attu odduwala nzina na Yehova. (Jer. 23:​26, 27) Vowi iyo ninokwela nzina na Yehova ninfuna nimuttittimihe mudhidhi wotene.—Ms. 5:11; 89:16.

15. Txini entapulela oromola nzina na Yehova?

¹⁵ Ninodhowavi niromolaga nzina na Yehova. (Jow. 2:32; Rom. 10:​13, 14) Oromola nzina na Yehova enopitta oziwa vina olabihedha nzina naye. Ninomuziwa Mulugu ninga Muttu, ninomukuluvela, ninotamela nikamihedho naye vina malago. (Ms. 20:7; 99:6; 116:4; 145:18) Ninowawaddela attu ena nzina na Yehova vina mikalelo dhaye, ninowakokomeza otxinuwa vina okosa elobo wi arumeliwe vamentoni va Yehova.—Iza. 12:4; Mer. 2:​21, 38.

16. Ninawodhe dhavi olagiha wi Satana muttambi?

¹⁶ Nili omala-nawale wi nitabuwe mwaha wa nzina na Yehova. (Tia. 5:​10, 11) Nigakala oweddeyana na Yehova mmidhidhini dhorutxa, ninomutonyihedha Satana wi iyene muttambi. Masaka a Job, Satana ohiloga dhahi mwaha wa abale animulabela Yehova: “Muthu agafuna ovivuna, kinimurutxa opereka dhaye dhotene [dhiniye].” (Job 2:4) Satana ohiloga wi attu agamulabele Yehova dhilobodha kuwaweddelaga pama vina wi agahimunyanyala Yehova kogumanana makattamiho. Job wali muttu wororomeleya, ohilagiha wi oku wali ottambi. Na mukalelo wakakene, nihikana gari yolagiha wi kintanala ejile ennikosela Satana, iyo txipo kaninamunyanyale Yehova. Ninofwanyela okuluvela kakamwe wi Yehova onelege onang’anelavi mwaha wa nzina naye.—Jo. 17:11.

17. Mowiwanana na 1 Pedro 2:12 mukalelo gani mwina onttittimiha iyo nzina na Yehova?

¹⁷ Ninoriha nzina na Yehova. (Gan. 30:9; Jer. 7:​8-11) Vowi attu anoziwa wi nili Anamoona a Yehova, ejile enkosihu enodhaga ottittimiha obe oveyiha nzina naye. (Kengesa 1 Pedro 2:12.) Nona, ninfuna nikose mpaka vanwodhelihu wi nimuttittimihe Yehova modhela esile dhinlogihu vina mweddelo wehu. Nigakosa ejuwene masiki nihikalaga attu oligana ninowodha ottittimiha nzina na Yehova.

18. Mukalelo gani mwina onawodhihu olagiha wi nzina na Yehova ttamakamaka mwa iyo? (Koona vina nota.)

¹⁸ Ninozuzumela vaddiddi nzina na Yehova ottiya ejile enubuwela attu ena mwaha wehu. (Ms. 138:2) Ejo ekalele nni yamakamaka? Sabwani nigakosa enimwagalaliha Yehova, dila dhinji attu kanziveliwa vina anologa dhilobo dhabure mwaha wehu.a Yezu wali womala-nawale wi apiwe na mukalelo wotota manyazo ninga timbwini wi attittimihe nzina na Yehova. Iyene ‘ohipwaza manyazo’ ahizuzumelaga ejile yobuwela attu ena mwaha wa iyene. (Ahe. 12:​2-4) Iyene wazuzumela okosa efunelo ya Mulugu.—Mt. 26:39.

19. Ononamo dhavi nzina ntti Yehova vina sabwaya?

¹⁹ Ninogayana nzina na Yehova vina gari enddimuwa vaddiddi okuweliwa Anamoona a Yehova. Vowi nzina na Yehova ttamakamaka vaddiddi mwa iyo, ninodhowavi nittittimihaga masiki ena aganipwaza. Nzina na Yehova ttamakamaka vaddiddi opitta ejile enubuwela attu mwaha wa iyo. Nona nihigana odhowavi nittittimihaga nzina na Yehova, kintanala ejile ennikosela Satana. Nigakosa ejuwene ninolagiha wi nzina na Yehova ttamakamaka vaddiddi mwa iyo dhahene ninga Yezu.