Yehova “Onowavulumutxa Anna Mirima Dhosuveya”

1. Yehova oniviwamo dhavi agawang’anaga adhari aye?

YEHOVA onowona dhotedhene dhingumanana adhari aye. Yehova onowona akala ninowagalala obe ninokubanya. (Masal. 37:18) Iyene agoona wi ninovilibihedha omulabela masiki nigumanagana makattamiho onowagalala vaddiddi. Ottiya ejo, iyene ohikana efunelo ya onikamihedha vina onipangarhaza.

2. Txini enakosela Yehova abale anna murima wosuveya, vina ninawodhe dhavi opurelamo nikamihedho naye?

² Masalmo 147:3 onologa wi Yehova onopotta makwadda a attu anna mirima dhosuveya. Nlebo ntti ninologa mukalelo onazuzumela Yehova abale angumanana odhugudheya. Mbwenyi txini enfwanyelihu okosa wi nipurelemo nikamihedho ntti na Yehova? Kobuwela eji: Mediku wapama onowodha omukamihedha muttu oporeyihile, mbwenyi wila muttuya oporeyihile avulumuwe onofwanyela ofwara malago otene a medikuya. Mu nsunzoni ntti, ninele wona enloga Yehova mBibiliani awaddagana attu abale angumanana odhugudheya vina ninele wona mukalelo onawodhihu ofwara malago okwela a Yehova.

IYO NIHIKANA TTIMA VAMENTONI VA YEHOVA

3. Sabwaya jani attu ena kanivyonana ttima?

³ Iyo ninkala mwilaboni murameyile okwela, attuya kankwelana, anowatabutxa akwawa vina anowattukulela ohiviwonana ttima. Murogora onkuweliwa Helena ohiloga: “Miyo ddunuwile na anamudhi ahalagiha okwela. Papayaga wali muwali vina mudhidhi wetene wakala ologavi wi iyo kanali elobwene.” Txino dhahene ninga Helen, weyo vina ohitabutxiwa, dila dhinjene ohiruwaniwa ofiyedha ohiviwonana ttima, akala ejo ehupadduwela enodhaga okala yorutxa orumela wi okalawo muttu onuzuzumela.

4. Mowiwanana na Masalmo 34:​18, nikuluvelo gani ninnivaha Yehova?

⁴ Masiki akala ohitabutxiwa na attu enna, kakana nikuluvelo nawi Yehova onowukwela vaddiddi vina onowuvaha ttima. Iyene “[onowawaddamela] ansuveya murima.” (Kengesa Masal. 34:​19, [Masal. 34:18 NM].) Akala weyo kuniviwonana ttima, kobuwela wi Yehova ohona mikalelo dhawo dhapama vina ohukukusela vali iyene. (Jo. 6:44) Yehova oli womala-nawale wi awukamihedhe sabwani mwa iyene weyo ohikana ttima enddimuwa.

5. Txini ensunzihu nigang’ana mukalelo waweddiha Yezu attu atabutxiwa?

⁵ Enowodheya osunza venjene mwaha wa mukalelo oniviwamo Yehova nigonaga yotagiha ya Yezu. Valiye velaboni ya vati, Yezu ohazuzumela attu ahaviwonana ttima sabwa ya mukalelo weddihiwani na ena. (Mt. 9:​9-12) Motagiha, vaddiginyile muyana dhahi guwo ya Yezu na njedhelo novulumutxiwa mwa eredda yowopiha, iyene wahimpangarhaza vina wahimutamalela sabwa ya nroromelo nilagihiliye. (Mk. 5:​25-34) Iyo ninoziwa wi Yezu otagiha mowakwana-mwene mikalelo dha Yehova. (Jo. 14:9) Kakuluvela wi weyo ohikana ttima vaddiddi vamentoni va Yehova vina iyene onottittimiha mikalelo dhawo otaganyiha na nroromelo vina okwela wawo.

6. Txini enfwanyelela okosa muttu akala kanvyonana ttima?

⁶ Txini enfwanyeliwe okosa akala kunrumela wi ohikana ttima vamentoni va Yehova? Kengesa Malebo a mBibiliani anlagiha wi Yehova onouvaha ttima vina katamela mudhidhi wotanalela Malebo aba.b (Masal. 94:19) Akala kunwodha okosa ninga munkosela ena, kuviladdanihe na awene vina kuzuzume na dhilobo dhihinwodhiwe okosa. Yehova kanjedhela wi okose ehinwodhiwe. (Masal. 103:​13, 14) Akala ohitabutxiwa mpaddi womaningoni, wa muyubuweloni obe ohipujiwa na orarutxiwa, kuvipwattelihe muladdu sabwa ya dhukoseli muttu mwina. Se waganyedha weyo kuwafwanyela weddihiwa na mukalelo obu! Kobuwela wi mwa Yehova ona muladdu ddi muttuya opujile ottiya ole opujiwe. (1 Ped. 3:12) Sandra, opujiwe bali mwana, ohiloga, “Dila dhotene ddinomukumbirha Yehova wi addikamihedhe ovoona dhahene ninga munddoneliye.”

7. Dhilobo dhinipadduwele mwigumini mwehu dhindaga dhavi olabiwedhiwa mmabasani a Yehova?

⁷ Txipo kuwaganyedhe wi Yehova onodhaga wulabihedha wi wakamihedhe ena. Yehova ohuvaha gari ya olaba vamodha na iyene mmabasani a olaleya. (1 Kor. 3:9) Dhilobo dhupadduweli mwigumini mwawo dhinodhaga wukamihedha ovika vamburoni va attu ena, ononelamo pama makattamiho angumananina vina mukalelo oniviwamo awene. Mwa dhahene enowodheya weyo okosa venjene wi wakamihedhe. Helen, ologiwe mundduni, ohikamihedhiwa, ovano iyene onowodha wakamihedha ena. Iyene ohiloga: “Miyo kaddavyonana ‘ttima’ mbwenyi Yehova ohiddikosiha wona wi ddinokweliwa vina onoddilabihedha wi ddakamihedhe ena.” Ovano Helen onowagalala sabwa ya olaba ninga pionera wa mudhidhi wetene.

KARUMELA OLEVELELA WA YEHOVA

8. Txini ennaddela Yehova va Izaiya 1:18?

⁸ Alabeli ena a Yehova anokala okubanyene vina odhugudheyene sabwa ya dhovonya dhikosilani mundduni, ahinabatiziwa obe mmalelani obatiziwa. Mbwenyi ninofwanyela wubuwela wi Yehova ohiperheka mukutto wa yobolo sabwani ononikwela vaddiddi. Iyene onfuna wi nirumele nvaho obu. Yehova ononikuluveliha wi nigalogela dhottega dhehuc na iyene, onele onilevelela kakamwe. (Kengesa Izaiya 1:18.) Okwela onddimuwa vaddiddi ona Yehova sabwa ya odduwala dhottega dhehu dha mundduni! Mwa mpaddi mwina iyene onologa wi onele odhowavi obuwelaga dhilobo dhapama dhinkosihu.—Masal. 103:​9, 12; Aheb. 6:10.

9. Ottiya ofwaseyela dhilobo dha mundduni, ekalele nni yapama okosa mpaka munwodhelihu ovanene vina ofwaseyela dha musogorho?

⁹ Akala onokumuwa sabwa ya dhilobo dhikosiliwe mundduni, kavilibihedhe ozuzumela dhilobo dhinkosiwe ovanene vina dhinakosiwe musogorho. Koona yotagiha ya murumiwi Paulo. Iyene wahafwara-fwara Akristu vina se waganyedha kana efunelo eji, mbwenyi iyene wanziwa wi Yehova wahimala omulevelela. (1 Tim. 1:​12-15) Kito iyeneyá wandhowavi obuwelaga dhovonya dhikosiliye mundduni? Nne-wene, vina kobuwela dhilobo dhikosiliye valiye Mfarizi. (Fil. 3:​4-8, 13-15) Ottiya ejo, Paulo wandhowavi akosaga mpaka mwawodheliye mmabasani a olaleya vina afwaseyelaga dha musogorho. Dhahene ninga Paulo, iyo kaninwodha otxinja dhilobo dhikosilihu mundduni. Mbwenyi enowodheya omuttittimiha Yehova na dhilobo dhinkosihu ovanene vina ofwaseyela mapikirhelo otikiniha annikosela Yehova.

10. Txini enfwanyelihu okosa akala masaka a wale nihimunyimula muttu?

¹⁰ Txino onokumuwa sabwa ya dhilobo dhikosiliwe masaka a wale dhapattile obe dhanyimulile ena. Txini enawukamihedhe? Kakosa mpaka munwodheliwe wi wogolele dhilobodha, kaloga vina kalagiha wi onokubanya venjene sabwa ya esile dhikosiliwe. (2 Kor. 7:11) Ottiya ejuwenevi, kamukumbirhe Yehova wi akamihedhe attu antabuwa sabwa ya merelo awo. Kakana ebaribari wi Yehova onowodha wukamihedha vina wakamihedha abale anyimuliliwe odhowagavi muvilelaga vina mukanaga murenddele.

11. Txini ensunzihu na yotagiha ya namavuhulela Jona? (Koona vina foto ya kapa.)

¹¹ Kasunza na dhovonya dhawo dhawale vina kavittiye wi Yehova awulabihedhe na mukalelo onfuniye. Koona empadduweli namavuhulela Jona. Yehova wahimukumbirha Jona wi adhowe o Nínive, mbwenyi iyene kakosile ejuwene, Jona wahidhowa elabo yina. Yehova wahimusisigula Jona vina iyene wahisunza na yovonya yaye. (Jon. 1:​1-4, 15-17; 2:​7-10) Yehova kattiyile omulabihedha Jona. Iyene wahinvaha gari ya odhowa wili o Nínive, nanda dila eji Jona wahiwelela. Ebaribari wi txino iyene wahitxinuwa sabwa ya ohiwelela dila yoroma, mbwenyi iyene kattiyile wi eji emuttukulele okodda mabasa maswa amuttomele Yehova.—Jon. 3:​1-3.

YEHOVA ONOLABIHEDHA MUYA WAYE WOKODDELA WI ANIPANGARHAZE

12. Ninawodhe dhavi okana murenddele wa Yehova egapadduwa elobo yabure? (Filipi 4:​6, 7)

¹² Modhela muya waye wokoddela, Yehova ononipangarhaza egapadduwa elobo yowopiha obe nigamuyelela muttu mukwani. Koona epadduwile na Ron vina Carol. Mokubanyiha-mwene mwanawa wahivipa. Awene anologa: “Iyo wale nahigumanana makattamiho orutxa, mbwenyi aba ahikwaranya makattamiho otene agumanilehuna. Iyo nahivira mattiyu menjene se ogona nimulobelelaga Yehova, mwebaribari nahiwodha okana murenddele onlogiwa va Filipi 4:​6, 7.” (Kengesa.) Akala weyo onogumanana makattamiho sabwa ya dhilobo dhabure dhupadduwele, kamwaddele Yehova modhela nlobelo mukalelo oniviwamo weyo, kakosa ejuwene dila vina mudhidhi onfuniwe. (Masal. 86:3; 88:1) Kakumbirha muya wokoddela wa Yehova dila dhinjene. Kakuluvela wi Yehova txipo kanapwaze dhokumbirha dhawo.—Lk. 11:​9-13.

13. Muya wokoddela onanikamihedhe dhavi odhowagavi nimwebedhaga Yehova? (Éfeso 3:16)

¹³ Weyo oniviwamo ninga kuna guru ya okosa elo sabwa ya ozuzuma na elobo enupadduwela? Akala jijuwene muya wokoddela onowodha wuvaha guru enfuniwe wi odhowegevi omulabelaga Yehova na murima wororomeleya. (Kengesa Éfeso 3:16.) Koona epadduwile na murogora onkuweliwa Flora. Iyene na mamunaye alaba ninga amisionario nomala mamunaye olupa matelo vina awene omwalana. Iyene onologa: “Miyo ddali wokumuwene sabwa ya mamunaga olupa matelo vina kaddawodha wubuwela elobo yina. Ddannimulobelela Yehova ddimukumbirhaga muya waye wokoddela wi ddiwodhe ovilela. Yehova wahiddivaha dhotedhene dhafunemi wi ddiwodhe ovilela vina owanana makattamiho aba akala ninga kaddigawodhile owanana omaromo.” Flora ohona wi Yehova ohimukamihedha omukuluvela venjene vina ohikana nikuluvelo wi Yehova onele odhowagavi amukamihedhaga mmakattamihoni-makathamihovi angumaniyena. Iyene onologa: “Mazu anfanyeya va Masalmo 119:32 anotapulelamo mowakwana-mwene mukalelo oddikamihedhile Yehova: ‘Ddinothamaga mudila ya magano enyu, vowi mupangaraza murimaga.’”

14. Txini enfwanyelihu okosa wi nakele muya wokoddela wa Mulugu?

¹⁴ Ogamala omulobelela Yehova okumbiraga muya wokoddela txini enfwanyeliwe okosa mowiwanana na nlobelo nawo? Egawodheya katamela okosa mabasa anawukamihedhe wakela muya wokoddela ninga, wona matugumano vina odhowa mmabasani olaleya. Kengesa Nzu na Mulugu malabo otene, ejo enele wukamihedha otanalela dhubuwelo dhaye. (Fil. 4:​8, 9) Ogamwengesaga Bibilia kafwaseyele attu anlogiwamo agumanilena makattamiho vina mukalelo wakamihedhile Yehova ovilela. Sandra, otabuwile venjene sabwa ya makattamiho agumaniliyena mwigumini mwaye, ohiloga: “Nipadduwo na Jozé nihiddiginya murimaga. Iyene ohigumanana makattamiho menjene orutxa vina weddihiwa na opujiwa, mbwenyi kattiyile wi ejo yobanihe mandano aye na Yehova.”—Wita 39:​21-23.

YEHOVA ONOWALABIHEDHA ABALI WILA ANIPANGARHAZE

15. Bani onnipangarhaza vina attu ena ananikamihedhe dhavi? (Koona vina foto.)

¹⁵ Nigatabuwaga, abalihu anodhaga okala nipara na nipangarhazo. (Kol. 4:11) Mukalelo mmodha onnilagiha Yehova okwela waye bwa walabihedha abali na arogora. Awene anonipangarhaza aganivuruwanaga vina agatamela ononelamo mukalelo oniviwamo iyo, dila dhina okalavi na iyo masiki se ologa elo enokamihedha venjene. Awene anodhaga onilagiha nlebo na Bibilia obe olobela vamodha na iyo.d (Rom. 15:4) Dila dhina, abalihu anodhaga onikamihedha wubuwela monelo wa Yehova mwaha wa makaniya, mwa dhahene ninowodha okala owagalalene vina ovilela. Dila dhinji abalihu na arogora anonikamihedha na mikalelo dhina ninga onivaha dhoja wi niviwemo pama.

16. Txini enfwanyelihu okosa wi ena anikamihedhe?

¹⁶ Wi attu ena awodhe onikamihedha anofwanyela oziwa ejile enfunihu. Abalihu anonikwela vaddiddi vina anofuna onikamihedha. (Gano 17:17) Mbwenyi txino awene kanziwa mukalelo onoviwamo iyo obe ejile enfunihu. (Gano 14:10) Akala onotabuwa mpaddi wa muyubuweloni, katamela ologa mukalelo onoviwamo weyo na marho woliba mpaddi womuyani. Kamwaddele enfwanyeliye okosa wi awukamihedhe. Txino enowodheya omusakula munddimuwa mmodha obe eli a mmulogoni agakalile weyo wotapuwa wi ologe makani. Mbwenyi mwa mpaddi wa arogora, txino anokala otapuwa wi aloge makani na murogora mwina wowarala mpaddi womuyani.

17. Elobo gani egadhile onizuzumiha wakela nikamihedho na abalihu vina ninawodhe dhavi okwaranya ejoya?

¹⁷ Kukale mudhidhi minjene weka. Masaka mena weyo onodhaga okala wonyimuwene ohifunaga okala na attu ena. Ebaribari wi dila dhina abalihu anodhaga ohinonelamo dhinnipadduwela obe ologa dhilobo dhinanikubanyihe venjene. (Tia. 3:2) Mbwenyi kuttiye ejo wubarela okala vamodha na abali. Yehova onodhaga walabihedha wi awukamihedhe. Munddimuwa wa mulogo onkuweliwa Gavin, ontabuwa na odhugudheya wa muyubuweloni, ohiloga: “Dila dhinji okala na amarho elobo yomariha enubuwelimi.” Masiki dhawene, Gavin onodhowa avilibihedhagavi okala na abali vina dila dhinji enkosiye ejuwene onoviwamo pama. Murogora onkuweliwa Amy ohiloga: “Sabwa ya dhilobo dhiddipadduwele, miyo ddinorutxiwa wakuluvela attu. Mbwenyi ddinosunza wakwela vina wakuluvela abalaga dhahene ninga munkosa Yehova. Ddinoziwa wi okosa ejo enomwagalaliha Yehova nona miyo vina ddinowagalala.”

MAPIKIRHELO A YEHOVA A MUSOGORHO ANONIPANGARHAZA

18. Njedhelo gani ninfwanyelihu okana na musogorho vina txini enfwanyelihu okosa ovanene?

¹⁸ Enowodheya wang’ana musogorho na nikuluvelo, niziwaga wi Yehova mohigonela onele onivulumutxa mowakwana-mwene mmakattamihoni-makattamihovi annipatta mpaddi womaningoni obe wa muyubuweloni. (Ovuh. 21:​3, 4) Nsaka ntti nigafiya, dhilobo dhotene dhinitabutxile vaddiddi “kadhinobuweliwe vina, dhivirile dhinodduwaliwa mudduwalelo.” (Iza. 65:17) Ninga monilihu munsunzoni ntti, Yehova onopotta makwadda ehu oromana ovanene. Mwa dhawene kapurelamo mowakwana-mwene dhotedhene dhinkosa Yehova wi awupangarhaze vina awukamihedhe. Txipo kuwaganyedhe wi Yehova onowukoya.—1 Ped. 5:7.