Tuvumbi Waze Akwambujola Sango Lipema

YEHOVA hanatwehe Mwanenyi Yesu Kristu apwe chilweza chize twatamba kwimbulula. (1 Petu. 2:21) Muze mutu maputuka kukaula Yesu, mutu wacho mapwa kavumbi ka Zambi, chocho maputuka kwambujola sango lipema. Yesu kasolwele ngwenyi mulimo wacho uli upema chinji hakwamba ngwenyi: ‘Tweyenu kuli yami, yenu eswe nwakukilikita nikulemewa, ni yami kumungunuhwimisa. Lilemenu ku kanga yami, lilongesenu kuli yami; mumu nguli mukwa kushimbika, mukwa kulikehesa mu mbunge; mba kumunuwana uhwimino ku mbunge jenu.’ (Mateu 11:28, 29) Atu eswe akutayiza kukaula Yesu, kakumona umanunuko wa maliji wano.

² Kavumbi Munene wa Zambi, Yesu, kasanyikine atu amwe hanga amukaule. (Mateu 9:9; Yoa. 1:43) Yaalongesa chize atamba kukalakala ni kwatuma hanga aye ni kulinga mulimo uze neye te akulinga. (Mateu 10:1–11:1; 20:28; Luka 4:43) Hanyima, yatuma nawa tumbaji akwo 70 hanga aye ni kwambujola sango lipema lia Wanangana wa Zambi. (Luka 10:1, 8-11) Muze atumine tumbaji twenyi, Yesu yaalweza ngwenyi: “Yoze manwivwa, mangwivwa yami; yoze malituna yenu, malituna yami; yoze malituna yami, malituna yoze wangutumine.” (Luka 10:16) Hakwamba maliji jacho, Yesu yasolola ulemu wa mulimo uze tumbaji apwile nawo. O kapwile ni mulimo wa kumanyinako Yesu ni Zambi yoze wapwa Chitunda. Achi che chinalingiwa ni musono kuli waze akutayiza maliji a Yesu, akwamba ngwo: ‘Nwize nungukaule.’ (Luka 18:22; 2 Kori. 2:17) Eswe akutayiza mutambi wacho kakwaha mulimo kuli Zambi wa kuya ni kwambujola sango lipema lia Wanangana ni kutayisa tumbaji.—Mateu 24:14; 28:19, 20.

³ Twanyingika kanawa Yehova Zambi ni Yesu Kristu mumu lia kutayiza kukaula Yesu. (Yoa. 17:3) Twakulilongesa chize twatamba kulingila Yehova. Ni ukwaso wenyi, twakuhasa kwalumuna manyonga jetu, kupwa ni utu waha ni kukaula shimbi jenyi ja ululi mu mwono wetu. (Roma 12:1, 2; Efwe. 4:22-24; Kolo. 3:9, 10) Zango lietu lie liatukwasa hanga tulihane kuli Yehova ni kusolola kulihana chetu ha kutupapachisa mu meya. Muze mutu akumupapachisa, kakupwa kavumbi wakutongola kuli Zambi.

⁴ Mashimbu eswe twatamba kwiwuluka ngwetu ndo tupwe atu keshi luchisa, a mbunge yipema, mba tulingile Zambi. (Samu 24:3, 4; Iza. 52:11; 2 Kori. 6:14–7:1) Twakupwa ni mbunge yitoma mumu lia kufuliela muli Yesu Kristu. (Hepre. 10:19-23, 35, 36; Uso. 7:9, 10, 14) Postolo Paulu kakwashile akwa-Kristu apwe ni kulinga yuma ni mbunge yakufupa kuhalisa Zambi hanga ahone kuhukanyisa akwo. Postolo Petulu kasolwele chize mutuhasa kuzuka waze kanda achipwa mu umwenemwene kupalikila mu yitanga yetu yipema. (1 Kori. 10:31, 33; 1 Petu. 3:1) Kuchi munuhasa kukwasa mutu hanga neye apwe mukwa-kwambujola sango lipema?

AKWA-KWAMBUJOLA AHA

⁵ Kukatuka lume haze munuputuka kulongesa mutu Mbimbiliya, mukolwezenu aputuke kulwezako akwo yuma yize analilongesa. Mahasa kuhanjika ni asoko jenyi, masepa, akwa-milimo-ni-akwo ni atu eka nawa. Ayi yili jila yilemu yakukwashilamo alongi aha hanga akaule Yesu Kristu ni kuputuka kwambujola sango lipema. (Mateu 9:9; Luka 6:40) Muze longi manunga ni kujama ku ufulielo ni kwijilila kuhanjeka ni atu hakutwala ku sango lipema, mahasa kwita hanga aputuke kuya mu munda.

YIZE MUTU ATAMBA KULINGA

⁶ Kuli yuma yize mutu atamba kulinga shimbu kanda nuya nenyi chisuho chitangu ni kwambujola ku zuwo-ni-zuwo. Mutu mweswe maya ni yetu mu munda kakumumona ngwo kali Chela cha Yehova. Kashika, ndo mwono wenyi ulite ni shimbi ja Yehova ja ululi ni kumutayiza kupwa mukwa-kwambulula yoze kanda achipapachisa.

⁷ Muze nwakulongesa mutu ni kushimutwina nenyi shimbi ja Mbimbiliya, hanji nwakunyingika chinji mwono wa mutu wacho. Munuhasa kumona nyi kakukaula mu mwono wenyi yuma yize akulilongesa. Alioze kuli yimwe ku mwono wa longi yize makulwana a mu chikungulwila mafupa kushimutwina ni yena hamwe ni longi we.

⁸ Kasongo wa chizavu cha makulwana malweza makulwana aali (umwe wa ayo katamba kupwa wa mu komite ya mulimo) hanga ashimutwine ni yena hamwe ni longi we wa Mbimbiliya. Mu yikungulwila muze muli makulwana akehe, mukulwana umuwika mahasa kulinga mulimo wacho ni kavumbi yoze wajama chinji ku ufulielo. Makulwana waze atongola alinge mulimo wacho katambile kuchelewa kuulinga. Nyi longi meta muze ali ha kukunguluka cha chikungulwila, maahasa kuhanjika ni yenu hanyima lia kukunguluka. Hakuliwana, nulieswe ndo nupwe akukasunuka. Shimbu kanda nutayiza longi apwe mukwa-kwambujola yoze kanda apapachisa, longi wacho katamba:

1. (1) Kufuliela ngwenyi Mbimbiliya yili Liji lize ahwimine kuli Zambi.—2 Timo. 3:16.

2. (2) Kunyingika ni kutayiza malongeso atangu a mu Yisoneko hanga muze mamuhula, ahase kukumbulula kulita ni Mbimbiliya hi kulita ni malongeso a mu uwayilo wa mahuza hanji kulita ni manyonga jenyi ko.—Mateu 7:21-23; 2 Timo. 2:15.

3. (3) Kukaula shimbi ya Mbimbiliya ya kupwa ni kulikungulula ni atu ja Yehova mu chikungulwila kulita ni uhashi wenyi.—Samu 122:1; Hepre. 10:24, 25.

4. (4) Kunyingika yize Mbimbiliya yakwamba hakutwala ku yitanga ya utanji yili ngwe upangala, kuhalika, utumwa ni kukaula shimbi jacho ku mwono wenyi. Nyi katwama ku zuwo ni umwe lunga hanji ni pwo yoze hi usoko wenyi ko, atu jacho katamba kulimbata kulita ni shimbi.—Mateu 19:9; 1 Kori. 6:9, 10; 1 Timo. 3:2, 12; Hepre. 13:4.

5. (5) Kwononokena shimbi ya Mbimbiliya hakutwala ku uzengi. Mutu wacho nawa katambile kuzachisa yimwe yitumbo hanji yuma yisasu nyi kamuheleyo ku shipitali.—2 Kori. 7:1; Efwe. 5:18; 1 Petu. 4:3, 4.

6. (6) Kunyingika ulemu wa kwehuka masepa api.—1 Kori. 15:33.

7. (7) Kwecha kupwa umwe wa mu uwayilo weswawo wa mahuza apwile ni kuya chitangu. Katamba kwecha kulikungulula hanji kulichinga no hanga alinge yimwe milimo ya kukwasa uwayilo wacho.—2 Kori. 6:14-18; Uso. 18:4.

8. (8) Kwecha kulinjisa mu yuma ya mafwefwe.—Yo 6:15; 15:19; Tia 1:27.

9. (9) Kutayiza ni kukaula usongwelo twakuwana ha mukanda wa Izaia 2:4 wa kuhona kulinjisa mu yikokojola ya akwa-mavungu.

10. (10) Kuzanga mwene kupwa Chela cha Yehova.—Samu 110:3.

⁹ Nyi makulwana keshi ni shindakenyo ha yize longi akunyonga hakutwala ku yikuma yino, katamba kumuhula hanji kushimutwina nenyi ha kuzachisa yisoneko yize yiliho. Chili chilemu longi kunyingika ngwenyi, hita mutu katamba kukaula shimbi ja Mbimbiliya mu mwono wenyi mba ahase kwambujola hamwe ni Yela ja Yehova. Makumbululo jenyi makwasa makulwana hanga amone nyi kananyingika yize atamba kulinga ni kumona nawa nyi kanatela kuputuka kuya mu munda ni kwambujola.

¹⁰ Makulwana katamba kulweza longi, nyi kamutayiza hanga ambujole nyi ka. Kanji-kanji yino kakuyilinga muze mahwisa kushimutwina. Nyi mamona pundu ngwo kanatela kupwa mukwa-kwambujola, makulwana mahasa kumulweza ngwo kanawahilila chinji hakupwa nenyi mu chikungulwila ngwe mukwa-kwambujola. (Roma 15:7) Katamba kumukolweza hanga aputuke kwambujola ni kawashi nyi muchilita ni kuhana mulimo wenyi wa mu munda ha kuhwa cha kakweji. Makulwana mahasa kulumbununa ngwo, muze akutayiza longi hanga apwe mukwa-kwambujola yoze kanda apapachisa mba longi wacho mahana mulimo wenyi wa mu munda, kakumulingila Mukanda wa Sango ja Mukwa-Kwambujola mu Chikungulwila haze akusa jina lienyi ni kuusweka mu mikanda ya chikungulwila. Makulwana kakutambula sango jino kuli mukwa-kwambujola hanga ululikiso wa Yehova umone chize muuhasa kukwasa mulimo wa kwambujola uze analingi kuli Yela ja Yehova hashi heswe, nawa hanga mukwa-kwambujola ahase kulinga mulimo wenyi mu chikungulwila ni kutambula ukwaso uze mafupiwa. Chikwo nawa, makulwana mahasa kwiwulula akwa-kwambujola aha ngwo, sango jo jize akutambula kakujifunga kulita ni Shimbi ja Kufunga Sango ja Mutu jize jili ha site ya Yela ja Yehova jw.org.

¹¹ Kunyingika kanawa mukwa-kwambujola mwaha ni kulihulumba ha kutatuka chenyi ku ufulielo muchihasa kumukwasa. Chino muchihasa kumukwasa hanga apwe ni kuhana mulimo wa kwambujola ha hita kakweji ni kusa tachi hanga alingile Yehova.—Fwili. 2:4; Hepre. 13:2.

¹² Muze makulwana matayiza longi wa Mbimbiliya hanga aputuke kwambujola, mamwaha mukanda Ululikiso Uze Unalingi Upale wa Yehova. Muze mahana mulimo wenyi utangu wa kwambujola, matwa mutambi mu chikungulwila ngwo iye kapwa mukwa-kwambujola yoze kanda achipapachisa.

KUKWASA TWANUKE

¹³ Twanuke no mahasa kupwa akwa-kwambujola sango lipema. Yesu katambwile twanuke ni kwawahisa. (Mateu 19:13-15; 21:15, 16) Chipwe ngwe yisemi e akwete chiteli hali ana jo, mandumbu akwo mu chikungulwila no mahasa kukwasa twanuke waze anazange kwambujola sango lipema lia Wanangana. Nyi uli chisemi, chilweza che chipema muchihasa kukolweza ana je hanga alinge mulimo wa Zambi ni zango lieswe. Nyi kanuke yoze uli ni yitanga yipema, mazanga kulweza akwo hakutwala ku ufulielo wenyi, yika mutuhasa kulinga hanga tumukwase?

¹⁴ Muchilita chisemi wa lunga hanji wa pwo, kulweza mukulwana wa mu Komite ya Mulimo ya Chikungulwila, alitese tangwa lize maliwana hanga atale nyi kanuke wacho kanatela kupwa mukwa-kwambujola. Kasongo wa chizavu cha makulwana malinga katalilo hanga makulwana aali (umwe wa mu komite ya mulimo), aliwane ni kanuke wacho hamwe ni yisemi jenyi hanji mweswawo atwama nenyi nyi kali mukwa-Kristu. Nyi kanuke wacho kali ni yinyingi ya umwenemwene wa Mbimbiliya ni kusolola ngwenyi kanazange lume kwambujola, yino muyisolola ngwo kanakolo ku ufulielo. Hanyima lia kuhengwola yikuma yino ni yikwo yize yinatale hali waze hakola, makulwana wano aali a mu chikungulwila makwata chiyulo nyi kanuke wacho mapwa mukwa-kwambujola yoze kanda achipapachisa nyi ka. (Luka 6:45; Roma 10:10) Hakuliwana ni kanuke, katambile kushimutwina yikuma yimwe yize akushimutwina ni waze hakola, yize kanji-kanji kuyatalile hali twanuke.

¹⁵ Ha kukunguluka chacho, makulwana katamba kuchichimieka kanuke mumu lia chize anakolo ku ufulielo ni kumukolweza hanga apwe ni nyonga lia kumupapachisa. Amu yisemi anase tachi hanga alongese mwano umwenemwene, no katela kwachichimieka. Makulwana katamba kwita kuli yisemi atange chikuma “Sango Kuli Yisemi Akwa-Kristu” chize chili ha mafwo 179-181 mu mukanda uno hanga anunge ni kukwasa mwano.

KULIHANA NI UPAPACHISO

¹⁶ Nyi hiwanyingika Yehova ni kumuzanga nawa unakaula shimbi jenyi ni kwambujola sango lipema, nihindu watamba kukolesa usepa we ni iye. Kuchi muhasa kulinga chocho? Ha kuhana mwono we kuli iye ni kukupapachisa mu meya.—Mateu 28:19, 20.

¹⁷ Kulihana chinalumbunuka kulitulika hanga ulinge umwe mulimo usandu. Kulihana chinalumbunuka kulemba kuli Zambi ni kumulakenya ni mbunge yeswe ngwe muzachisa mwono we mu mulimo wenyi ni kwenda mu majila jenyi. Chinalumbunuka nawa kuwayila wika iye ndo ku miaka yeswe. (Shimbi 5:9) Achi katamba kuchilinga kuli mutu mwene. Kukushi niumwe yoze mahasa kumulingilacho.

¹⁸ Alioze, unafupiwa kulinga yuma yinji hi wika ko kulweza Yehova mu kulemba ngwe unazange kupwa sali lienyi. Unafupiwa kusolola kuli atu akwo ngwe walihana kuli Zambi. Musolola kulihana chacho, ha kukupapachisa mu meya ngwe chize alingile Yesu. (1 Petu. 2:21; 3:21) Nyi wakwata chiyulo cha kuwayila Yehova mba unazange hanga akupapachise, yika watamba kulinga? Watamba kuhanjika ni kasongo wa chizavu cha makulwana. Iye masakula makulwana aali, ashimutwine ne hanga apwe ni shindakenyo nyi unakaula shimbi ja Zambi hakutwala ku upapachiso. Nyi unazange unyingike sango jikwo nawa, tala chikuma “Sango Kuli Mukwa-kwambujola Yoze Kanda Achipapachisa,” chize chili ha mafwo 182-184 mu mukanda uno ni “Yihula ya Waze Anazange Hanga Apapachise” yize yili ha mafwo 185-207.

SANGO JIZE JINASOLOLA KUKOLA CHA MULIMO WA KWAMBUJOLA

¹⁹ Hakupalika cha miaka, lusango wa kukola cha mulimo wa kwambujola hashi heswe mu uwayilo wamwenemwene kakutakamisa atu ja Yehova. Kukatuka haze Yesu Kristu alwezele tumbaji twenyi ngwenyi, sango lipema te maliambujola hashi heswe, akwa-Kristu amwenemwene nihindu kakulihulumba ha chize mulimo wacho te muulingiwa.—Mateu 28:19, 20; Marku 13:10; Yili. 1:8.

²⁰ Tumbaji atangu a Yesu te kakuzanga kwivwa lusango wa kukola cha mulimo wa kwambujola. (Marku 6:30) Mukanda wa Yilinga unambe ngwo, tumbaji 120 katambwile spiritu yisandu ha Pentekoste ya mwaka 33 M.J. Ha kupalika cha mashimbu, tumbaji yapwa 3,000, mba hanyima yoka ni kuheta ha unji wa 5,000. Mbimbiliya yinambe ngwo, Yehova “tangwa ha tangwa wawezele ku chikungulwila waze atambwile ulamwino” nawa ngwo ni “mbunga yinene ya asasendote yononokene ku ufulielo.” (Yili. 1:15; 2:5-11, 41, 47; 4:4; 6:7) Sango jino ja kukola cha mulimo wa kwambujola kota jatakamishine chinji tumbaji! Sango jino kota jaakolwezele hanga anunge ni kulinga mulimo uze ahele kuli Zambi, chipwe ngwe kapwile ni kupalika mu yihungumiona ya mangana a uwayilo wa A-Yunda!

²¹ Kukatuka ha miaka 60-61 M.J., postolo Paulu yamba ha mukanda wenyi kuli A-Kolosu ngwenyi, sango lipema “hilineza hano hashi heswe nikwima mihuko.” Yamba nawa ngwenyi, ‘kaliambulwile kuli atu eswe mushi lia lilu.’ (Kolo. 1:5, 6, 23) Akwa-Kristu atangu kapwile ni kwononokena Liji lia Zambi, nawa spiritu yisandu ya Zambi te yakwaha ndundo hanga alinge mulimo wa kwambujola, shimbu unongeso wa yuma ha mashimbu ja A-Yunda te kanda uheta ha mwaka 70 M.J. Akwa-Kristu wano ashishika kapwile nikuwahilila chinji ha kwivwa lusango wa mulimo uze te akulinga!

²² Chizechene nawa, ni musono, ululikiso wa Yehova wakusa tachi hanga ufunge sango ja mulimo uze unalingiwa ha kumanunuka cha Mateu 24:14, unambe ngwo: “Sango lino lipema lia wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.” Etu tuvumbi twa Zambi, tuli ni umwe mulimo uze twatamba kulinga ni kawashi. Twatamba kusa tachi hanga tulinge chihanda chetu mu mulimo wa kwambujola shimbu songo kanda liza. Yehova makwasa ndo ni haze mulimo uno muuhwila. Kashika nyi twalinga mulimo wacho mutupwa ni utayizo wenyi.—Eze. 3:18-21.

LUSANGO WA MULIMO WA KWAMBUJOLA

²³ Yika twatamba kusoneka? Lifwo Lize Twakusonekaho Mulimo Wetu wa Kwambujola, lize akutuhwisa mu ululikiso wetu, liakusolola chize twatamba kusoneka milimo yize twalinga mu munda. Yikuma yize muyihataho muyihasa kutukwasa.

²⁴ Ha mufunda “Mikanda (Yakufwambwisa ni ya ha Internet),” sonekaho unji wa mikanda yeswe yize wahananga ni yize watumanga kuli atu waze hi Yela ja Yehova akupapachisa ko. Ha mufunda “Yinema,” sonekaho yisuho yeswe yize wasolwelanga atu yinema yetu.

²⁵ Ha mufunda “Kufuna ni Kumeneka Atu,” sonekaho yisuho yize wafunanga ni kumeneka mutu yoze hi Chela cha Yehova ko wasololanga zango lia kulilongesa Mbimbiliya. Kufuna ni kumeneka mutu mutuhasa kuchilinga ha kuya ni kumumeneka, kumutumina mukanda ha internet, kumusanyika ha telefone, kumutumina mensagem hanji e-mail ni kumwaha mikanda. Hita shimbu musongwela longeso lia Mbimbiliya, muhasa kwalula kufuna ni kumeneka. Chisemi wa lunga hanji wa pwo yoze wakusongwela uwayilo wa mu usoko, mahasa kwalula kufuna ni kumeneka chisuho chimuwika ha hita poso nyi mu usoko muli mwana yoze kanda achimupapachisa.

²⁶ Chipwe ngwe mutulilongesa ni mutu yisuho yinji ha poso, nihindu kusongo lia kakweji twatamba kwalula longeso limuwika. Akwa-kwambujola katamba kwalula hita mutu yoze alilongesa nenyi ha kakweji. Malongeso a Mbimbiliya, kali waze mutusongwela kuli atu hi Yela ja Yehova ko ni waze hapwa Yela ja Yehova alioze kanda achihwisa mikanda Wahilila ku Mwono ku Miaka Yeswe!. Mutuhasa kwalula nawa longeso lia Mbimbiliya lize mutusongwela kuli ndumbu yoze hanazeye ku ufulielo, kulita ni usongwelo wa umwe ndumbu wa mu komite ya mulimo.

²⁷ Chili chilemu kwalula nawa “Maola” waze twakalakala mu mulimo wa kwambujola. Maola jacho kali mashimbu waze mutwambujola ku zuwo-ni-zuwo, kufuna ni kumeneka atu, kusongwela malongeso a Mbimbiliya, ni kwambujola ha mbunga hanji cha susumuku kuli atu waze hi Yela ja Yehova ko. Nyi akwa-kwambujola aali makalakala hamuwika, mu waali wo katamba kwalula mashimbu waze akalakala, alioze hita umwe wa kuli ayo katamba kusoneka wika kufuna ni kumeneka chize alinga ni malongeso jenyi waze asongwela. Chisemi wa lunga hanji wa pwo, mahasa kwalula ola yimuwika ha hita poso muze malongesa ana jenyi mu Uwayilo wa mu Usoko. Mandumbu waze akuhanjika pande ja mbunga, mahasa kwalula mashimbu waze akulinga. Muze ndumbu wa pwo hanji wa lunga malumbununa pande ja mbunga, neye mahasa kwalula mashimbu. Kuli milimo yikwo yilemu yize kutwatambile kwalula mashimbu, ngwe kulilulieka hanga tuye mu munda, kupwa ha kukunguluka cha kuya mu munda ni yuma yikwo nawa.

²⁸ Hita mukwa-kwambujola katamba kukaula mbunge yenyi ya kufumba ni Mbimbiliya hanga alule maola waze alinga mu mulimo wa kwambujola. Mandumbu amwe kakwambujola ku yihela kuze kuli atu anji, alioze akwo kakwambujola ku yihela kuze kuli atu akehe nawa kakufupiwa kwenda tando jinji. Yihela ni yihela yalisa, nawa mandumbu kakwete manyonga alisa hakutwala ku kwalula maola waze akulinga mu mulimo wa kwambujola. Mandumbu a mu Chizavu cha Tusongo, keshi kushinjila mandumbu a mu yikungulwila ya hashi heswe hanga akaule manyonga jo ha chize atamba kwalula mashimbu waze akulinga mu mulimo wa kwambujola. Kashika, kukushi niumwe yoze uli ni chiteli cha kusa shimbi ha chikuma chacho.—Mateu 6:1; 7:1; 1 Timo. 1:5.

²⁹ Mashimbu waze twakulinga mu mulimo wa kwambujola twatamba kwalula mu maola amuundu wika. Kuchizako wika nyi ndumbu keshi ni uhashi wa kwambujola mumu lia ushinakaji, keshi kuhasa kukatuka ku zuwo, katwama ku zuwo lize akufungila tushinakaji hanji yikwiko yikwo. Ndumbu wacho mahasa kwalula minutu 15 mu mulimo wa kwambujola. Chipwe ngwe iye mambujola minutu 15 ha kakweji, nihindu katamba kutuma minutu yacho. Neye katamba kumumona ngwe mandumbu waze akwambujola mashimbu eswe. Yino yinatale ni hali mukwa-kwambujola yoze keshi ni uhashi wa kuya ni kwambujola ha kakweji umuwika hanji kuhiana hamukunda wa umwe musongo hanji ponde. Usongwelo uno anatale wika hali waze keshi ni uhashi wa kukalakala chinji. Komite ya mulimo ye yatamba kumona mukwa-kwambujola yoze mayuka ha ululikiso wacho.

MUKANDA WA SANGO JA MUKWA-KWAMBUJOLA MU CHIKUNGULWILA

³⁰ Mulimo wa kwambujola uze wakulinga ha hita kakweji, kakuusoneka ha mukanda we wa Sango ja Mukwa-Kwambulula mu Chikungulwila. Mukanda wacho uli wa chikungulwila. Nyi mufupa kwalukila ku chikungulwila cheka, watamba kulweza makulwana a mu chikungulwila chenu. Hachino, kalayi mukwa-kusoneka matuma mukanda we mu chikungulwila chize muoya. Chino muchikwasa makulwana hanga akutambule kanawa ni kukukwasa ku ufulielo. Nyi mutuhuka ha tukweji atatu, watamba kununga ni kutuma mulimo we wa mu munda ku chikungulwila chenu.

MUMU LIAKA TWATAMBA KUHANA MULIMO WETU WA KWAMBUJOLA?

³¹ Shina ha mashimbu amwe wakuvulama kuhana mulimo we wa kwambujola? Kwamba umwenemwene, mashimbu amwe tulieswe twakufupiwa kutwiwulula. Alioze, nyi mutunyingika ulemu wa kuhana mulimo wetu wa kwambujola, muchipwa chashi kwiwuluka kuhana mulimo wacho ni kawashi.

³² Amwe kakulihula ngwo: “Nyi Yehova kakumona yize nakulinga mu mulimo wenyi, mumu liaka natamba kuhana mulimo wami wa kwambujola mu chikungulwila?” Chochene, Yehova kananyingika yize twakumulingila, nawa kananyingika nyi twakulinga mulimo usandu ni mbunge yeswe nyi ka. Alioze, iwuluka ngwe, Yehova katumine kusoneka matangwa waze Noa alingile mu ulungu nawa ni miaka yize A-Izalele alingile mu puya. Zambi katumine kusoneka unji wa atu waze ashishikile ni waze kononokene. Katumine kusoneka nawa chize A-Izalele atambwile chifuchi cha Kanana ni milimo yize alingile akwa-kuyula ashishika mu Izalele. Chochene, Zambi katumine kusoneka mu yimako-yimako hita milimo yize alingile tuvumbi twenyi. Ha kutuma kusoneka sango jacho mu Mbimbiliya, iye kazangile kusolola pundu nyonga lize akwete ha kusoneka sango jamwenemwene.

³³ Yuma ya ku shakulu yize twakuwana mu Mbimbiliya, yakusolola sango jamwenemwene jize afungile kuli atu ja Yehova. Numeru jimwe nyi te kujatwamine mu Mbimbiliya kachi chapwile chikalu kulumbununa kanawa sango jimwe ja mu Mbimbiliya. Tutalenu yimwe yilweza: Uputukilo 46:27; Kutuhuka 12:37; Akwa Kuyula 7:7; 2 Mianangana 19:35; 2 Sango ja Mianangana 14:9-13; Yoano 6:10; 21:11; Yilinga 2:41; 19:19.

³⁴ Chipwe ngwe kutushi kusoneka yuma yeswe yize twakulinga mu mulimo wa Yehova, nihindu yize twakusoneka yili ni ulemu mu ululikiso wenyi. Ku sekulu yitangu muze apostolo afunyine mu mulimo wa kwambujola, yalweza Yesu ‘yuma yeswe alingile ni yize alongesele.’ (Marku 6:30) Ha mashimbu amwe lusango wa mulimo wetu wa kwambujola, mahasa kusolola haze twatamba kululieka. Kwalula chimwe, muchihasa kusolola ngwo twakalakala kanawa yimwe milimo, alioze milimo yikwo kuyishi ni kwenda kanawa, yili ngwe kwoka cha akwa-kwambujola waze keshi ni kuliwezelako. Hachino, hanji mukufupiwa kukolweza mandumbu hanji kululieka kapalia wacho. Mandumbu waze ali ni yiteli, kakuhengwola mulimo wa hita mukwa-kwambujola ni kusa tachi hanga akwase hita ndumbu hanji chikungulwila cheswe ha chuma cheswacho chinaakwika kutatuka ku ufulielo.

³⁵ Sango ja mu munda jakukwasa nawa ululikiso wetu hanga unyingike kuze kunafupiwa ukwaso wa akwa-kwambujola. Ku yihela yika kuze mulimo wa kwambujola unemi mihuko yinji? Ku yihela yika kuze mulimo wa kwambujola kuushi kwima mihuko yinji? Mikanda yika yize yinafupiwako mba akwase atu alilongese umwenemwene? Lusango wa mulimo wa kwambujola kakukwasa ululikiso hanga upwe ni nyonga lia unji wa mikanda yize yinafupiwa mu mulimo wa kwambujola mu yifuchi yalisa hashi heswe ni kululieka yuma hanga atume mikanda yacho.

³⁶ Kuli anji akuli yetu, lusango wa kwambujola kakutukolweza. Kwamba umwenemwene, yetweswe twakuwahilila chinji hakwivwa lusango wa mulimo wa kwambujola uze mandumbu akulinga hashi heswe. Lusango wacho kakutukwasa hanga tumone chize ululikiso wa Yehova unayi ni kukola. Sango ja yuma yize mandumbu jetu akulitakana nayo yakutwaha uwahililo, kwokesa zango lietu ni kutukolweza hanga tukalakale chinji mu mulimo wa kwambujola. (Yili. 15:3) Kuhana lusango wa mulimo wetu wa kwambujola chikwete ulemu nawa chakusolola ngwo twakulihulumba hali mandumbu jetu a hashi heswe. Nyi twalinga chuma chino chikehe mutusolola ngwetu twakuzeyela ku ululikiso wa Yehova.—Luka 16:10; Hepre. 13:17.

TESA YIZE MUHASA KULINGA MU MULIMO WA YEHOVA

³⁷ Kutwatambile kutesa mulimo wetu wa kwambujola ni wa akwetu. (Ngala. 5:26; 6:4) Mwono wa atu walisa. Chikwo nawa, mutuhasa kuyuka chinji nyi mututesa kulinga yuma ya ku ufulielo yize muyitukwasa kunyingika nyi mulimo wetu wa kwambujola unakolo nyi ka. Nyi twalinga yuma yize twatesele mutuwahilila chinji.

³⁸ Chinasoloka pundu ngwo Yehova kanatambwisa kawashi-washi mulimo wa kukunga waze makalamwina ha “luyinda munene.” Tuli ha matangwa akumanunuka cha uprofeto wa Izaia wakwamba ngwo: “Mukepe wahiana kumakapwa vungu lia ndundo, yami nguli Yehova, kumungukatambwisa chuma chino ha mwaka wacho.” (Uso. 7:9, 14; Iza. 60:22) Chili kuyuka chinene kwambujola sango lipema ha matangwa wano akusula.—Mateu 24:14.