Zambi Iya?

Chize ku shakulu, atu kakuwayila tuzambi anji alisa. Alioze Mbimbiliya yakuhanjika hali umwe Zambi “munene helu lia tuzambi tukwo tweswe.” (2 Sango ja Mianangana 2:5) Zambi wacho iya? Yika yakumupwisa munene helu lia tuzambi tukwo? Zambi wacho kanazange hanga umunyingike kanawa. Mutulilongesa hali iye ha longeso lino.

1. Jina lia Zambi iya? Kuchi tunanyingika ngwetu iye kanazange hanga tunyingike jina lienyi?

Zambi kakulisolola mwene mu Mbimbiliya ngwenyi: “Yami Yehova. Lie jina liami lienalio.” (Tanga Izaia 42:5, 8.) Jina “Yehova” linakatuka mu limi lia Hepreu lize linalumbunuka ngwo, “Iye kakulinga cheswacho anazange.” Yehova kanazange hanga tunyingike jina lienyi. (Kutuhuka 3:15) Kuchi mutuhasa kunyingika ngwetu kanazange hanga tunyingike jina lienyi? Yehova kanasolola jina lienyi mu Mbimbiliya ha unji wa yisuho kuhiana 7.000!a Jina Yehova kuliatela wika ‘Zambi wamwenemwene wa mwilu ni hashi.’—Shimbi Yamuchiali 4:39.

2. Yika Mbimbiliya yakuhanjika hali Yehova?

Atu kakuwayila tuzambi anji, alioze Mbimbiliya yinambe ngwo, Yehova wika mwe Zambi wamwenemwene. Mumu liaka? Kuli yikuma yinji. Niumwe yoze uli ni wata kuhiana Yehova wakuhi, mumu iye wika “mwe Chitunda Helu lia hashi heswe.” (Tanga Samu 83:18.) Iye kali “Mukwa-Ndundo-Jeswe” mumu mahasa kulinga cheswacho chuma chize mazanga kulinga. Yehova mwe ‘watangile yuma yeswe,’ malilu ni hashi ni yuma yize yatwama hashi. (Usolwelo 4:8, 11) Yehova wika mwe keshi uputukilo hanji songo, iye kapwa wa mutolo.—Samu 90:2.

3. Zambi kakwete yisanyiko yinji, alioze jina lienyi limuwika

Nyi unazange kunyingika kalisa watwama hakachi ka chisanyiko cha mutu ni jina lienyi, Tala CHINEMA, mba nushimutwine chihula chinahateho.

CHINEMA: Yisanyiko Yinji, Alioze Jina Lienyi Limuwika (0:41)

• Kalisa muka watwama hakachi ka jina ni chimwe chisanyiko ngwe “Mwene”?

Mbimbiliya yinambe ngwo, atu kakuwayila tuzambi anji. Tanga Samu 136:1-3, mba nushimutwine chihula chino:

• “Zambi ya mazambi” ni “Mwene wa ene” Iya?

4. Yehova kanazange hanga unyingike jina lienyi ni kulizachisa

CHINEMA: Shina Zambi Jina Akwete?—Chinema Chikehe (3:11)

• Ku nyonga lie, mumu liaka Yehova anazange hanga atu anyingike jina lienyi?

Yehova kanazange hanga atu azachise jina lienyi. Tanga A-Roma 10:13, mba nushimutwine yihula yino:

• Mumu liaka chili chilemu kuzachisa jina lia Zambi, Yehova?

• Kuchi wakwivwa muze akwenu akwiwuluka jina lie?

• Ku nyonga lie, kuchi Yehova akwivwa muze wakuzachisa jina lienyi?

5. Yehova kanazange hanga ukundame kuli iye

CHINEMA: Kufupa-fupa Zambi Wamwenemwene (8:18)

• Kulita ni chinema, kuchi mwono wa Soten walumukine ha kunyingika jina lia Zambi?

Nyi unazange kupwa sepa lia umwe mutu chitangu watamba kunyingika jina lienyi. Tanga Tiangu 4:8, mba nushimutwine yihula yino:

• Yika Yehova anakwichi?

• Kuchi kunyingika jina lia Zambi ni kulizachisa muchihasa kukukwasa kukundama kuli iye?

YIZE WALILONGESA

Yehova lie jina lia Zambi wamwenemwene. Kanazange hanga tukundame kuli iye, kashika chili chilemu kunyingika jina lienyi ni kulizachisa.

Kuhitulula

• Mumu liaka Yehova alisa ni tuzambi akwo?

• Mumu liaka chili chilemu kuzachisa jina lia Zambi?

• Yika yinasolola ngwo Yehova kanazange hanga tukundame kuli iye?

HENGWOLA NAWA

Tala yikuma yitano yize yinasolola ngwo Zambi kwali.

“Shina Zambi Kwali?” (Lusango wa ha internet)

Tala mumu liaka twatamba kutayiza ngwetu Zambi keshi uputukilo.

“Iya Watangile Zambi?” (Kaposhi wa Kutalila 1 wa Agosto, 2014)

Chipwe ngwe kutwanyingikine kanawa chize apwile ni kuvuluka jina lia Zambi ku mashimbu a kunyima, nihindu nyingika mumu liaka chili chilemu kuzachisa jina liacho.

“Yehova Iya?” (Lusango wa ha internet)

Shina chili chilemu kusanyika Zambi ha jina? Tala mumu liaka mutuhasa kwamba ngwetu Zambi kakwete jina.

“Zambi Majina Angahi Akwete?” (Lusango wa ha internet)