MUTWE WA KULILONGESA 23
MWASO 2 Jina Lie Yehova
Mumu Liaka Jina lia Yehova Lili Lilemu Kuli Yetu?
“Yehova kanambe ngwenyi, Enu nuli yela jami.”—IZA. 43:10.
YIZE MUTULILONGESA
Mutumona yize mutulinga hanga tusolole ngwetu, Yehova kali musandu, nawa yuma yeswe yize Satana ambile hali iye yili ya mahuza.
1-2. Kuchi tunanyingika ngwetu, jina lia Yehova lili lilemu chinji kuli Yesu?
JINA lia Yehova lili lilemu chinji kuli Yesu. Iye mwe wakukalila chinji lufuma wa jina lia Yehova. Ngwe chize twamonanga ha mutwe wapalika, Yesu kazangile lume kufwa hanga asolole ngwenyi, Yehova kali musandu, nawa yuma yeswe yize iye akulinga yapwa yingunu. (Marku 14:36; Hepre. 10:7-9) Chikwo nawa, kusongo lia Kanunu ka Miaka ya Kuyula chenyi, Yesu makafunyisa wata kuli Tato, mumu kanazange hanga Yehova atambule uhaliso weswe. (1 Kori. 15:26-28) Zango lia Yesu ha jina lia Zambi, liakusolola nawa ngwo, iye kakwete usepa ukolo ni Tato. Yuma yeswe yize Yesu akulingila Tato, yakusolola pundu ngwo kakumuzanga chinji.
2 Yesu kejile hano hashi hanga ahanjike mu jina lia Tato. (Yoa. 5:43; 12:13) Iye kanyingikishine jina lia Yehova kuli tumbaji twenyi. (Yoa. 17:6, 26) Kalingile nawa yikomokeso ni kulongesa mu jina lia Tato. (Yoa. 10:25) Muze ahanjikile hali tumbaji twenyi, Yesu yeta kuli Yehova ngwenyi: “Tata, afungenu kama mumu lia jina lienu.” (Yoa. 17:11) Chinasoloka pundu ngwo, kuli Yesu, jina lia Yehova lili lilemu chinji kuhiana chuma cheswacho. Nyi chenacho, mba kuchi mutu mahasa kulilamba ha pambo ngwenyi, kali Mukwa-Kristu wamwenemwene, alioze kanyingikine jina lia Tato ya Kristu?
3. Yika mutulilongesa ha mutwe uno?
3 Amu tuli Akwa-Kristu amwenemwene, twakwimbulula Yesu ha kuzanga jina lia Yehova ni kulivumbika. (1 Petu. 2:21) Ha mutwe uno, mutulilongesaho mumu liaka atu waze akwambujola “sango jipema ja Wanangana,” akwavuluka mu jina lia Yehova. (Mateu 24:14) Mutulilongesa nawa chize mutuhasa kusolola ngwetu, jina lia Yehova lili lilemu kuli umwe ni umwe wa kuli yetu.
“LIMWE VUNGU LIZE MULIMBATA JINA LIENYI”
4. (a) Yika Yesu alwezele tumbaji twenyi muze te hikwasala hakehe hanga afune mu malilu? (b) Chihula chika mutukumbulula?
4 Muze te hikwasala hakehe hanga afune mu malilu, Yesu yalweza tumbaji twenyi ngwenyi: ‘Muze spiritu yisandu muyikeza hali yenu, munukatambula ndundo mba munukapwa yela jami mu Yerusaleme, mu Yundeya mweswe ni mu Samaria, ndo ku masongo a hashi.’ (Yili. 1:8) Maliji wano kanalumbunuka ngwo, tumbaji twa Yesu te mambujola sango jipema ku yihela yeswe hi mu Izalele wika ko. Ha kupalika cha mashimbu, atu aku mavungu eswe te mapwa ni uhashi wa kupwa tumbaji twa Yesu. (Mateu 28:19, 20) Alioze Yesu kambile ngwenyi: ‘Munukapwa yela jami.’ Shina tumbaji te mapwa wika yela ja Yesu nyi te katamba kunyingika nawa jina lia Yehova? Mutuwana kumbululo lia chihula chino ha Yilinga kapitulu 15.
5. Kuchi apostolo ni makulwana mu Yerusaleme asolwele ngwo, atu eswe katamba kunyingika jina lia Yehova? (Tala nawa chizulie.)
5 Ha mwaka 49 M.J., apostolo ni makulwana mu Yerusaleme yalikungulula hanga atale ha chikuma cha akwa-mavungu waze te yilima, ni kutala yize o atambile kulinga hanga apwe Akwa-Kristu. Kusongo lia kukunguluka chacho, Tiangu mwanakwo ya Yesu yamba ngwenyi: ‘[Petulu] kambulwile mu yimako-yimako, chize Zambi alihulikilile hali akwa-mavungu ha chisuho chitangu, hanga akasakuleho limwe vungu lize mulimbata jina lienyi.’ Ha jina liaya Tiangu te anahanjikila? Ha kutongola uprofeto wa Mose, iye yanunga ni kwamba ngwenyi: “Hanga masalila ja atu akafupe Yehova hamwe ni akwa-mavungu eswe waze akwavuluka ha jina liami, chocho anambe Yehova.” (Yili. 15:14-18) Tumbaji wano aha te kechi kulilongesa wika hakutwala kuli Yehova, alioze te maavuluka nawa ha jina lienyi. Chino chinalumbunuka ngwo, ayo te manyingikisa jina lia Yehova kuli atu akwo ni kwanyingika nawa ha jina liacho.
Ha chimwe kukunguluka ku sekulu yitangu, Chizavu cha Tusongo yichimona ngwo, chinalite Akwa-Kristu kumbata jina lia Yehova (Tala paragrafu 5)
6-7. (a) Mumu liaka Yesu ejile hano hashi? (b) Chikuma chika chilemu chize chamunehenene hano hashi?
6 Jina lia Yesu linalumbunuka ngwo, “Yehova kali chilamwina.” Chino chinalite mumu Yehova kamutumine hano hashi, hanga alamwine atu eswe waze ali ni ufulielo. Yesu kejile hano hashi ni kuhana mwono wenyi hanga alamwine atu eswe. (Mateu 20:28) Ha kufweta ndando ya ukuule, Yesu yahana kuli atu eswe uhashi wa kwakonekena shili yo ni kupwa ni kutalatala cha mwono wa mutolo.—Yoa. 3:16.
7 Mba mumu liaka atu afupile ukuule? Kaufupile mumu lia yize yalingiwile mu munda wa Endene. Ngwe chize twamonanga ha mutwe wapalika, Alama ni Eva kehukile Yehova, chocho yatokesa uhashi wo wa kutwama ni mwono ku miaka yeswe. (Uputu. 3:6, 24) Alioze, Yesu kejile hano hashi hanga alinge chimwe chuma chilemu chinji kuhiana kulamwina atu. Satana kalamikijine Yehova ni kumwamba yuma yipi. (Uputu. 3:4, 5) Kashika, ulamwino wa atu te unatale nawa ha chimwe chuma chilemu chinji; kuhalisa jina lia Yehova. Yesu kapwile ni kumanyinako Yehova, chocho yalinga upale wenyi ni ungunu weswe. Chochene, iye kapwile lume mutu walita yoze te mahalisa jina lia Yehova.
Kuchi mutu mahasa kulilamba ha pambo ngwenyi, kali Mukwa-Kristu wamwenemwene, alioze kanyingikine jina lia Tato ya Kristu?
8. Yika tumbaji eswe a Yesu atambile kunyingika?
8 Waze eswe te mazanga kupwa tumbaji twa Yesu, chipwe A-Yunda hanji akwa-mavungu, katambile kunyingika ngwo, Yehova, Tato ya Yesu, mwe Chishina cha ulamwino. (Yoa. 17:3) Chikwo nawa, chizechene ngwe Yesu, no te maanyingika mu jina lia Yehova. Ayo nawa katambile kunyingika ulemu wa kuhalisa jina liacho, mumu ulamwino wo te unatale ha chikuma chino. (Yili. 2:21, 22) Kashika, tumbaji eswe ashishika a Yesu, katambile kulilongesa hakutwala kuli Yehova ni Yesu. Chino kota che chatwalile Yesu, mba ahwise kulemba chenyi ni maliji waze ali ha Yoano kapitulu 17, anambe ngwo: “Yami naanyingikisa jina lienu, mungukaanyingikisalio cheka, hanga zango lize nwanguzangile nalio lipwe muli ayo, ni yami ngulivwashane no.”—Yoa. 17:26.
“ENU NULI YELA JAMI”
9. Kuchi mutuhasa kusolola ngwetu, jina lia Yehova lili ni ulemu unji kuli yetu?
9 Pundu lume, tumbaji eswe amwenemwene a Yesu, katamba kuhalisa jina lia Yehova. (Mateu 6:9, 10) Jina lia Yehova liatamba kupwa chuma chilemu chinji kuli yetu eswe. Twatamba kusolola ulemu wacho ha yuma yeswe yize mutulinga ku mwono wetu. Mba yika twatamba kulinga hanga tuhalise jina lia Yehova ni kusolola ngwetu, Satana kali mukwa-mahuza?
10. Chikuma chika twakutanga ha Izaia kapitulu 42-44? (Izaia 43:9; 44:7-9) (Tala nawa chizulie.)
10 Mukanda wa Izaia kapitulu 42-44, unashindakenya chiteli chize tuli nacho ha kuhalisa jina lia Yehova. Mu tupitulu jacho, Yehova kanasanyika atu hanga akunguluke ngwe waze ali mu chota cha usopelo. Iye kanahamwisa waze akuliamba ngwo kali tuzambi, hanga asolole nyi kali lume amwenemwene. Yehova kanete nawa hanga yela anjile ni kwamba yuma yize muyisolola nyi tuzambi twacho katwamako lume. Alioze, niumwe kahashile kuchilinga.—Tanga Izaia 43:9; 44:7-9.
Twakusolola kupalikila mu yitanga ni mu maliji yetu ngwetu, kukushi Zambi mukwo wahiana Yehova (Tala maparagrafu 10-11)
11. Yika Yehova analweze atu jenyi ha Izaia 43:10-13?
11 Tanga Izaia 43:10-13. Ha kuhanjika ni atu jenyi, Yehova yamba ngwenyi: “Enu nuli yela jami, . . . Yami Zambi.” Chocho yaeta hanga akumbulule chihula chino: ‘Kuli umwe Zambi walifwa ni yami?’ (Iza. 44:8) Kashika chili kuyuka chinene kuli yetu, kukumbulula chihula chino. Twakuhana uchela kupalikila mu maliji ni mu yitanga yetu ngwetu, Yehova wika mwe Zambi wamwenemwene. Jina lienyi linahiane majina eswe. Mutapu uze twakutwama ku mwono wetu, wakusolola ngwo twakuzanga Yehova ni kushishika kuli iye chipwe ngwe Satana matulinga yuma yeswayo. Muze twakuchilinga, twakupwa ni uhashi wa kukwasa ni kuhalisa jina lia Yehova.
12. Kuchi uprofeto uli ha Izaia 40:3, 5 wamanunukine?
12 Muze twakuhalisa jina lia Yehova, twakwimbulula Yesu Kristu. Mu umwe uprofeto, Izaia yamba ngwenyi: ‘Umwe te malulieka jila ya Yehova.’ (Iza. 40:3) Kuchi uprofeto uno wamanunukine? Yoano Chipapachisa, mwe waluliekelele Yesu jila, yoze wejile mu jina lia Yehova ni kuhanjika ha jina liacho. (Mateu 3:3; Marku 1:2-4; Luka 3:3-6) Izaia yaprofeteza nawa ngwenyi: “Uhenya wa Yehova kumakausolola.” (Iza. 40:5) Kuchi Uprofeto uno wamanunukine? Muze Yesu ejile hano hashi, iye yamanyinako Yehova ni ungunu weswe, kashika chapwile ngwe Yehova mwene mwe te uli hano hashi.— Yoa. 12:45.
13. Kuchi mutuhasa kwimbulula Yesu?
13 Chizechene ngwe Yesu, ni yetu tuli yela waze akukalila jina lia Yehova. Twakumbata jina liacho ni kulweza atu eswe yuma yipema yize iye akulinga. Alioze, mba tununge ni kupwa yela apema, twatamba kulweza atu yuma yeswe yize Yesu alingile hanga ahalise jina lia Yehova. (Yili. 1:8) Yesu kali Chela yoze wasele tachi jinji hanga akalile jina lia Yehova, kashika twatamba kwimbulula chilweza chenyi. (Uso. 1:5) Mba yika mutulinga hanga tusolole ngwetu, jina lia Yehova lili ni ulemu unji kuli yetu?
TWAKUSOLOLA ULEMU WA JINA LIA YEHOVA
14. Kulita ni Samu 105:3, kuchi twakulivwa hakutwala ku jina lia Yehova?
14 Yetu twakulisamba ha jina lia Yehova. (Tanga Samu 105:3.) Yehova kakuwahilila chinji muze akumona ngwenyi, twakulisamba ha jina lienyi. (Jere. 9:23, 24; 1 Kori. 1:31; 2 Kori. 10:17) Kuli yetu, chili chiwape chinene kulemesa ni kukalila lufuma wa jina lia Yehova. Kutuchi keza kevwa sonyi nilimwe tangwa ha kulweza akwa-milimo-ni-akwetu, alongi-ni-akwetu, ni enyembo jetu ni atu akwo ngwetu, tuli Yela ja Yehova. Ndiapu kanazange hanga tweche kulweza atu akwo hakutwala kuli Yehova. (Jere. 11:21; Uso. 12:17) Kwamba umwenemwene, Satana ni eswe waze akumwanga sango ja mahuza, kanazange hanga atu avulame jina lia Yehova. (Jere. 23:26, 27) Alioze mumu lia zango lietu ha jina lia Yehova, twakununga ni kumuhalisa “tangwa lieswe nganganga.”—Samu 5:11; 89:16.
15. Kuvuluka jina lia Yehova yika chinalumbunuka?
15 Yetu twakununga ni kuvuluka jina lia Yehova. (Joele 2:32; Roma 10:13, 14) Kuvuluka jina lia Yehova chinalumbunuka yuma yinji hi wika ko kumunyingika ni kumbata jina lienyi. Yetu twanyingika kanawa utu wa Yehova, twakumujikijila ni kufupa ukwaso ni usongwelo wenyi. (Samu 20:7; 99:6; 116:4; 145:18) Twakulweza nawa atu jina ni yitanga yenyi, kwakwasa alumune mwono wo ni kuvwisa Yehova kuwaha hanga akaalamwine.—Iza. 12:4; Yili. 2:21, 38.
16. Kuchi mutuhasa kusolola ngwetu, Satana kali mukwa-mahuza?
16 Twakuzanga chipwe lume kumona lamba hanga tukalile jina lia Yehova. (Tia. 5:10, 11) Muze twakupalika mu yipikalo, twakununga ni kushishika kuli Yehova hanga tusolole ngwetu, Satana kali mukwa-mahuza. Ha mashimbu ja Yombi, Satana kambile hali waze eswe akuwayila Yehova ngwenyi: ‘Mutu mecha yeswe ali nayo hanga alamwine mwono wenyi.’ (Yombi 2:4) Mu maliji akwo, iye kazangile kwamba ngwenyi, atu mawayila wika Yehova muze yuma yinende kanawa ku mwono wo, alioze nyi mamona lamba mamuhichika. Yombi kasolwele ngwenyi, maliji jacho kapwile a mahuza. Ni yetu nawa tuli ni uhashi wa kusolola ngwetu, chipwe ngwe Satana matulinga yuma yeswayo, nihindu kutuchi kwehuka Yehova. Twatamba kupwa ni shindakenyo ngwetu, Yehova manunga ni kutufunga ni kutukwasa mumu lia jina lienyi.—Yoa. 17:11.
17. Kulita ni 1 Petulu 2:12, kuchi mutuhasa kuhalisa nawa jina lia Yehova?
17 Yetu twakuvumbika jina lia Yehova. (Yishi. 30:9; Jere. 7:8-11) Amu twakumanyinako Yehova ni kumbata jina lienyi, yitanga yetu muyihasa kuhalisa jina lienyi hanji ka. (Tanga 1 Petulu 2:12.) Twatamba kulinga yeswe yize mutuhasa hanga tuhalise jina lia Yehova kupalikila mu yize twakuhanjika ni yize twakulinga. Nyi twachilinga, chipwe ngwe tuli yihenge, mutuhalisa jina lia Yehova.
18. Kuchi mutuhasa kusolola nawa ngwetu, jina lia Yehova lili ni ulemu unji kuli yetu? (Tala nawa maliji mushi lia lifwo.)
18 Yetu twakulihulumba chinji ha jina lia Yehova kuhiana ha lufuma wetu. (Samu 138:2) Kuchi twakuchilinga? Muze twakulinga yuma yize yakuvwisa Yehova kuwaha, atu anji keshi kuzanga; ayo kakutwamba yuma yipi.a Tutalenu yize yalingiwile kuli Yesu. Muze afwile, atu kamumwene ngwe chingalwe ni kumulelesa. Alioze, Yesu kazangile kufwa mu mutapu wacho hanga ahalise jina lia Yehova. Iye kakevwile sonyi, hanji ngwetu, kakalihulikilile ha yize atu apwile ni kunyonga hali iye. (Hepre. 12:2-4) Nyonga lienyi liapwile kulinga upale wa Yehova.—Mateu 26:39.
19. Kuchi wakulivwa mumu lia kukuvuluka ngwo Chela cha Yehova, mumu liaka?
19 Twakulisamba ha jina lia Yehova, nawa chili chiwape chinene kuli yetu kutuvuluka ngwo Yela ja Yehova. Amu jina lia Yehova lili lilemu chinji kuli yetu, mutununga ni kumuhalisa chipwe ngwe atu matwamba yuma yipi hanji kutukekuna. Kuli yetu, jina lia Yehova lili ni ulemu unji kuhiana lufuma wetu. Kashika, chipwe ngwe Satana malinga chuma cheswacho hanga atukwike, yetu mutununga ni kuhalisa jina lia Yehova. Nyi twachilinga, chizechene ngwe Yesu, mutusolola ngwetu jina lia Yehova lili ni ulemu unji kuli yetu kuhiana chuma cheswacho.
MWASO 10 Halisa Yehova, Zambi Yetu!
a Chipwe kavumbi washishika Yombi, kalihulikilile chinji hali mwene muze masepa jenyi atatu amulamukijine ngwo kalinga upi. Ku uputukilo, muze afwishile ana jenyi ni kutokesa yuma yeswe yize apwile nayo, ‘Yombi kakavulumwine chipwe kusuma Zambi mulonga ha chize kuchalitele.’ (Yombi 1:22; 2:10) Alioze, muze amulamikijine ngwo kalinga upi, iye yaputuka kulikalila ni kwamba ‘maliji waze kalitele.’ Yalihulikila ha kukalila lufuma wenyi shimbu ahalise jina lia Yehova.—Yombi 6:3; 13:4, 5; 32:2; 34:5.