Junho

Yehova kawahishile Akwa-Kristu a ku sekulu yitangu muze te ananyongonona mu yihungumiona. Yino yapwile ni kulingiwa ha mashimbu waze te keshi ni kushimbwila. Talenu yize yalingiwile kuli Paulu ni Mbarnabe muze te anambujola mu Lisetra. Ku uputukilo, atu yaatambula kanawa, chocho yapanjika sango jize te anambujola. Alioze ha amwe mashimbu, akwa-kole yashinjila mbunga, hachino amwe a kuli atu waze chitangu aapanjikile yafupa kushiha Paulu ni mawe. (Yili. 14:19) Chipwe chocho, Mbarnabe ni Paulu yanunga ni kwambujola ku yihela yikwo. Yika azukileko? Ayo yakwasa ‘atu anji kupwa tumbaji’ twa Kristu. Chikwo nawa, maliji ni chilweza cho yatakamishine chinji mandumbu ha mashimbu jo. (Yili. 14:21, 22) Paulu ni Mbarnabe kakechele kwambujola chipwe muze te akwahungumiona; chino chayukishile atu anji. Ni yetu matuwahisa, nyi twanunga ni kulinga mulimo uze Yehova hanatwehe. w23.04 16-17 ¶13-14

Ndawichi kalimikine ni akwa-kole jenyi anji, chikwo nawa, iye te kakwita ukwaso wa Yehova mashimbu eswe. Ndawichi kapwile ni shindakenyo ngwenyi, Yehova te kakwivwa yilemba yenyi ni kuyikumbulula. Ni yetu mutuhasa kupwa ni shindakenyo yacho. Mbimbiliya yasolola pundu ngwo, Yehova mahasa kutwaha mana ni tachi jize tunafupiwa hanga tunyongonone. Iye mahasa kuzachisa mandumbu jetu chipwe atu waze keshi kumuwayila hanga atukwase ha yize tunafupu. Chipwe ngwe Yehova keshi kukumbulula yilemba yetu mashimbu eswe mu mutapu uze tunazange, chuma twatamba kunyingika chili ngwo, nihindu mayikumbulula. Iye matwaha yuma yeswe yize tunafupiwa ha shimbu lialita. Kashika, tunungenu ni kulemba ni ufulielo hamwe ni shindakenyo ngwetu, Yehova matukwasa haliapwila mba mu chifuchi chaha ‘makayukisa usona wa yitangiwa yeswe ya mwono.’—Samu 145:16. w23.05 8 ¶4; 13 ¶17-18

Chili chilemu kunyonga ha yiwape yize muzuka ha kumanununa yize watesele ku ufulielo. Shina hiunanyongo kama ha yiwape yize muhasa kuzuka, nyi mumanununa yize watesele ku ufulielo? Chakutalilaho, nyi hiunatese kutanga Mbimbiliya ni kululieka kulemba che, nyonga ha chize yino muyihasa kukolesa usepa we ni Yehova. (Samu 145:18, 19) Nyi unatese kupwa ni chimwe chitanga cha Akwa-Kristu, nyonga chize chitanga chacho muchipemesa usepa we ni akwenu. (Kolo. 3:14) Nyi muchilita, linga katalilo wa yuma yize muhasa kuzuka nyi wamanununa yize watesele. Konga-konga liso ha katalilo wacho. Palikisa mashimbu ni atu waze makukwasa kulinga yuma yize watesele ku ufulielo. (Yishi. 13:20) Kwamba umwenemwene, yetu eswe tuli ni matangwa waze kutushi kupwa ni zango lia kulinga yimwe. Shina chino muchihasa kutukwika kulinga yize twatesele? Ka. Mutuhasa kulinga yize hitunatese ku ufulielo chipwe ngwe kutushi ni zango linji lia kuyilinga. Tunanyingika ngwetu kulinga chino hi chashi ko, alioze mutuhasa kuchilinga. w23.05 27-28 ¶5-8

Kunyingika ngwo twatamba kutayiza yilemu yize muyiza ku yiyulo yetu, muchihasa kutukwasa hanga twambulule shili yize twalinga, kululieka mwono wetu ni kwehuka kufunyina shili yacho. Kulinga yuma yino, muchitukwasa kununga mu kuzomboka cha mwono. Yika muhasa kulinga nyi wakwata chiyulo chipi? Tayiza ngwe kuuchi kuhasa kwalumuna yize walingile kunyima. Shimbu ulinge chocho, tayiza ngwe wahengesele ni kulinga yize muhasa hanga ululieke yuma. Nyi unevu yikola ha chuma chize walingile, likehese ha kulemba kuli Yehova, kutayiza uhenge wacho ni kumwita hanga akukonekene. (Samu 25:11; 51:3, 4) Eta ukonekeno kuli waze walemeka ku mbunge, chikwo nawa, nyi muchilita fupa ukwaso wa makulwana mu chikungulwila. (Tia. 5:14, 15) Wana malongeso ha upi uze walinga, ni kusa tachi hanga uhone kuufunyina. Nyi walinga yuma yino, muhasa kupwa ni shindakenyo ngwe, Yehova makusolwela keke ni kukukwasa ha yize unafupiwa.—Samu 103:8-13. w23.08 28-29 ¶8-9

Jehoiada kakwashile Mwanangana Njoashe kupwa mutu mupema. Kashika, mukweze Njoashe azangile kuvwisa Yehova kuwaha. Alioze muze Jehoiada hafwa, Njoashe ‘yaputuka kukaula yitanga ya mianangana waze te keshi kwononokena Yehova. (2 Sango 24:4, 17, 18) Yehova yevwa chinyengo ha yuma yacho, chocho “yatuma aprofeta kuli ayo akaakoke kuli iye . . . , alioze kaapanjikile.” Ayo kakazangile chipwe kupanjika Zekaria, mwana wa Jehoiada, yoze wapwile musonyi wa Njoashe, nawa profeta kanda sasendote wa Yehova. Nyi kwakapwile usoko wa Zekaria, kachi Njoashe kakatwamine ni mwono. Alioze, iye yatuma kushiha Zekaria. (2 Sango 22:11; 24:19-22) Njoashe kakapwile ni kuvwila Yehova woma mu jila yalita. Yehova kambile ngwenyi: “Waze mangulelesa, kumakasauka.” (1 Samue. 2:30) Hachino, chipwe ngwe kapwile ni maswalale anji, Njoashe yamukumba ku chilombo chikehe cha maswalale A-Seria waze amulemekene chinji. (2 Sango 24:24, 25) Muze A-Seria ayile kwo, Njoashe yamushiha mumu lia kushiha Zekaria. w23.06 18-19 ¶16-17

Postolo Paulu kapalikishile mashimbu hamwe ni mandumbu mu Efwesu, ha kwambujola ni kulongesa sango jipema. (Yili. 19:1, 8-10; 20:20, 21) Iye kazangile chinji mandumbu jacho, kashika afupile kwakwasa hanga anunge ni kushishika kuli Yehova. Mandumbu mu Efwesu kapwile ni uwayilo weka ni weka; nawa te kakulinga chinji yuma ya tufuta-futa. Atu mu Efwesu te kakulinga chinji yuma ya upangala, nawa te keshi kwivwa sonyi ja kuyilinga. Atu anji te kakuhanjika chinji yuma ya upangala ni ya utanji. Hi wika ko mu yiheho, alioze ni ha yiwanyino ya mayingeleja. (Efwe. 5:3) A-Efwesu anji te “hanatokesa mana” a kulinga yuma yipema. Maliji wano kanalumbunuka ngwo, ayo te keshi ‘kwivwa yikola ha yuma yipi yize apwile ni kulinga.’ (Efwe. 4:17-19) Muze te kanda achinyingika Yehova, ni kulilongesa hakutwala ku chipi ni chipema, shimbi yo ya mbunge te kuyishi kwahisa muze apwile ni kulinga yuma yipi. Ayo nawa te keshi kulihulumba nyi yuma yize akulinga yakuvwisa Yehova yikola ku mbunge nyi ka. Kashika Paulu ambile ngwenyi, ‘kunyonga cho chapwile mu milima; kapwile kusuku ni mwono uze Zambi akuhana.’ Atu amwe mu mbonge ya Efwesu, katuhukile mu milima. w24.03 20 ¶2, 4; 21 ¶5-6

Mba akalakale ngwe mukwa-kuyula mu Izalele, Ngideone kafupiwile kupwa ni tachi jinji ku mujimba. Muze A-Mindiane achinyine jita ha ufuku, Ngideone yaakaula kukatuka mu chikulo cha Yezerele ndo ku lwiji Yordau. (Kuyu. 7:22) Shina Ngideone kamanyine muze ahetele ku lwiji Yordau? Ka! Chipwe ngwe te hahonga, iye ni maswalale jenyi 300 yazauka lwiji; yanunga ni kwakaula. Hachino, yakwata maswalale A-Mindiane yaashiha. (Kuyu. 8:4-12) Ngideone kanakafuliela ngwenyi, Yehova mamwaha tachi. Yino ye Yehova alingile lume. (Kuyu. 6:14, 34) Ha shimbu limwe, Ngideone ni maswalale jenyi, kakawile mianangana aali A-Mindiane; ayo kapwile ni kwendela hashi, alioze mianangana jacho kota kapwile ha tumelu. (Kuyu. 8:12, 21) Ni ukwaso wa Yehova, o yakwata mianangana jacho ni kukumba jita. Makulwana no mahasa kujikijila muli Yehova, mumu iye ‘keshi kuhona tachi chipwe kuhonga.’ Yehova maaha tachi jize mafupiwa.—Iza. 40:28, 29. w23.06 6 ¶14, 16

Mutuhasa kukolesa ufulielo wetu muli Yehova, chipwe muze mutupalika mu yipikalo yeswayo. Kashika, nunga ni kujikijila muli Yehova. Talenu chize Mbarake ayukile mumu lia kujikijila ha usongwelo wa Yehova. Ha mashimbu jacho, A-Izalele te keshi nawa ni uhashi wa kwasa jita mumu chipwe mata kakapwile no. Alioze, Yehova yalweza Mbarake hanga aye ni kwasa jita ni Sisera, mwata wa tujita twa A-Kanana waze apwile ni mata anji. (Kuyu. 5:8) Profeta wa pwo Debola, yalweza Mbarake aye ku chihela chize kushi milundu hanga ase jita ni Sisera hamwe ni matemba jenyi a jita 900. Chapwile chashi kuli A-Kanana kwashila jita ha chihela chize kuheshi milundu mumu lia matemba waze apwile no. Chipwe chocho, Mbarake yononokena shimbi ya Yehova. Muze maswalale te anapalumuka ku mulundu Tabore, Yehova yanokesa vula munji, chocho matemba a tujita twa Sisera yapatama mu malowa, mba Yehova yakwasa Mbarake kukumba Sisera. (Kuyu. 4:1-7, 10, 13-16) Chizechene nawa, Yehova matukwasa kukumba nyi mutujikijila muli iye ni ha usongwelo uze akutwaha kupalikila mu ululikiso wenyi. w23.07 19 ¶17-18

Nyi tunazange tukatwame ku miaka yeswe, tunafupiwa kupwa akwa-kulihumikiza. Ngwe chizechene alingile tuvumbi twa Yehova kunyima, tunafupiwa kushimbwila ni uhumikizo muli Yehova hanga amanunune yilakenyo yenyi. (Hepre. 6:11, 12) Mbimbiliya yakutesa yuma yize tunapalika ni njimi. (Tia. 5:7, 8) Njimi kakuvuka minda ni kulima mbuto, alioze kanyingikine shimbu lize mbuto yacho muyikola. Chipwe chocho, njimi kakufupiwa kushimbwila ni uhumikizo hamwe ni shindakenyo ngwenyi, macha yize alima. Chizechene nawa, tunafupiwa kununga ni kulihulikila ku yuma ya ku spiritu, chipwe ngwe kutwanyingikine ola yize ‘Mwene wetu meza.’ (Mateu 24:42) Yetu twakushimbwila ni uhumikizo hamwe ni shindakenyo ngwetu, ha ola yalita Yehova makamanununa yilakenyo yenyi yeswe. Nyi twahona uhumikizo, mutuhasa kuhona kushimbwila, chocho hakehe-hakehe mutuputuka kusosoloka kuli Yehova. Chikwo nawa, mutuhasa kuputuka kulihulikila chinji ha yuma yize tunanyongo ngwetu, muyituvwisa kuwaha ha mashimbu wano. Alioze nyi mutulihumikiza, mutuhasa kunyongonona ndo ku songo ni kutulamwina.—Mika 7:7. w23.08 22 ¶7

Muze twakutesa usolwelo uli ha Daniele 2:41-43 ni ukwo uze uli mu mukanda wa Daniele ni mu Usolwelo, twakupwa ni shindakenyo ngwetu yiliato ya kaponya yinalumbunuka, Estados Unidos ni Grã-Bretanha. Yifuchi yino yaali, yakukalakala hamuwika; nawa yinalingi wanangana wa ndundo ja hashi heswe. Hakutwala ku wanangana wa ndundo ja hashi heswe, Daniele yamba ngwenyi: “Chocho wanangana muukapwa kanda ukolo kanda ulelu.” Mba mumu liaka Daniele ambile ngwenyi, wanangana wacho te mupwa ulelu? Mumu atu waze anatese ni uma kakukwika uhashi wa wanangana uno kusolola ndundo ngwe utale. Mutuhasa kulilongesa umwenemwene ulemu ha yize Daniele alumbunwine. Tunanyingika ngwetu, Wanangana wa Anglo-Americana wakusolola ndundo jawo mu majila eka ni eka. Chakutalilaho, Estados Unidos ni Grã-Bretanha, yili yifuchi yize yakumbile jita yitangu ni yamuchiali ya hashi heswe. Alioze wanangana uno, unayi ni kupwa ulelu. Yino muyinunga lume chizechene mumu atu kanalihandununa ene; nawa keshi kuwahilila ha chize anayulu. Umwenemwene ukwo uze twalilongesa uli ngwo, wanangana uno, muupwa wanangana wa kasula kuyula, ndo haze Wanangana wa Zambi muwiza ni kusalakana mawanangana eswe a atu. w23.08 10-11 ¶12-13

Ha mashimbu amwe, Ndawichi te kakuhonga ku mbunge mumu lia lamba ni yipikalo yize apwile ni kupalika. (Samu 18:4, 5) Chipwe chocho, zango ni ufunge wa Yehova, yapwile ni kumuhuzulula ku mbunge. Chapwile ngwe Yehova kanatwale Ndawichi ku chihela chipema, ku sesa lia meya a uhwimino. Chino te chakukwasa Ndawichi kupwa ni tachi ni kununga kulingila Yehova ni uwahililo. (Samu 18:28-32; 23:2) Ni musono nawa, twakuhasa kukumba yipikalo ni ukwaso wa Yehova. Ngwe chize Mbimbiliya yinambe, tuli ni mwono mumu lia utu wa zango lia Yehova. (Lungu. 3:22; Kolo. 1:11) Ndawichi kapwile ni akwa-kole anji a ndundo. Chocho ha yisuho yinji, yapwa mu ponde ya kutokesa mwono wenyi. Chipwe chocho, kapwile ni kulivwa mu ufunge upema, mumu lia zango lia Yehova. Iye kapwile ni kulivwa ngwe Yehova kali hamwe nenyi mashimbu eswe, chino te chakumuhuzulula mbunge. Kashika ahashile kwimba ngwenyi: “[Yehova] wangupulwile ku woma wami weswe.” (Samu 34:4) Ha mashimbu amwe, Ndawichi kapwile ni kwivwa woma unji, chipwe chocho te kakuhasa kuukumba mumu kanyingikine ngwenyi, Yehova kakumuzanga. w24.01 30 ¶15-17

Lilongese ha yiyulo yipi yize Njoashe akwachile. Hanyima lia kufwa cha Jehoiada, Njoashe yaputuka kulikata ni atu api. (2 Sango 24:17, 18) Iye yakaula yiyulo ya yilolo a mu Yunda waze te keshi kuzanga Yehova. Yena hanji muhasa kutayiza ngwe Njoashe kachi kechele kulikata ni yilolo jacho. Shimbu achilinge, iye yasolola uhepuke ha kupanjika yiyulo yo yipi. Chaluyinda, muze Zekaria; musonyi wa Njoashe afupile kumukwasa, Njoashe yatuma kumushiha. (2 Sango 24:20, 21; Mateu 23:35) Iye kalingile chuma chipi chinji! Njoashe kaputukile kanawa, alioze kulutwe yapwa chitanguke; nawa chingalwe. Ha kupalika cha mashimbu, yamushiha kuli tuvumbi twenyi. (2 Sango 24:22-25) Nyi kanungine ni kupanjika Yehova ni waze akumuzanga, kachi yuma ya mutapu au kuyakalingiwile ku mwono wenyi! w23.09 9 ¶6

Yesu kanyingikine ngwenyi Petulu te mahasa kununga ni kushishika. Hachino, ni zango lieswe Yesu yalweza Petulu ngwenyi: “Kanda wivwa woma.” Maliji wano kasolwele ngwo, Yesu te kakujikijila hali Petulu; yino yiyalumuna mwono wenyi. Kulutwe, Petulu ni ndumbwenyi Andeleu, yecha mulimo wa kuta yishi, yaputuka kuya hamwe ni Yesu mu mulimo wa kwambujola. Hachino, Yehova yaawahisa chinji. (Marku 1:16-18) Petulu kamwene yuma yinji yipema mumu lia kupwa kambaji ka Yesu. Iye kamwene Yesu mauka mweji ni kutuhwisa andemoniu, ha mashimbu amwe ni kuhindwisa afu. (Mateu 8:14-17; Marku 5:37, 41, 42) Petulu nawa kamwene mu usolwelo chize Yesu te mayula mu Wanangana wa Zambi kulutwe lia matangwa. Usolwelo uno, wakwachile chinji ha mwono wenyi. (Marku 9:1-8; 2 Petu. 1:16-18) Petulu kamwene yuma yize te kechi kuhasa kumona nyi kakapwile kambaji ka Yesu. Chochene, kanakawahilila chinji mumu lia kukumba ulelu wenyi ni kupwa ni uhashi wa kuzuka yiwape yinji! w23.09 21-22 ¶4-5

Ha mukanda wenyi utangu, postolo Petulu yazachisa liji “lizangenu chinji.” Zango lia mutapu au, liakutukwasa kukonekena hi wika ko shili yikehe, alioze chipwe “shili yinji.” (1 Petu. 4:8) Hanji Petulu kewulukile yize alilongesele kuli Yesu ha yimwe miaka kunyima hakutwala ku kukonekena. Ha mashimbu jacho, Petulu kamwene ngwe te kanasolola umbovu muze ambile ngwenyi, ngwo, ndumbu te mahasa ‘kukonekena mukwo ha yisuho shimbiali.’ Alioze, Yesu yalongesa Petulu ni yetu eswe ha kukonekena akwetu “ndo yisuho 77,” hanji ngwetu, mutuhasa kuchilinga ha shimbu lieswalio mutupwa ni uhashi. (Mateu 18:21) Nyi chakukukalila kukaula shimbi yino, kanda uhonga. Yetu eswe ha mashimbu amwe, chakutukalila kukonekena akwetu! Chuma chilemu watamba kulinga chili, kununga ni kusa tachi hanga ukonekene ndumbwe ni kuneha sambukila. w23.09 29 ¶12

Muze te ali mujimo lia yishi, Yona kapwile ni shindakenyo ngwenyi, Yehova mapanjika ni kumukwasa ha kulemba chenyi cha kulikehesa ni kulikonyeka. Yehova yalamwina Yona; mba kulutwe iye yalihana hanga alinge mulimo uze Yehova amuhele. (Yona 2:10–3:4) Shina hi yinalingiwa kuli yena, muze unapalika mu umwe kapinda yiuhona kulweza Yehova chize unevu? Shina hiunalivu ngwe unahongo chinji mba yiuhona tachi ja kulilongesa? Nyingika ngwe Yehova kananyingika yize unapalika. Kashika, chipwe ngwe mulemba hakehe, nihindu muhasa kupwa ni shindakenyo ngwe, iye makwaha yize unafupiwa. (Efwe. 3:20) Nyi yikola yize unevu ku musunya ni ku manyonga muyikukwika kutanga Mbimbiliya ni kulilongesayo, eseka kupanjika maliji akukopa a Mbimbiliya ni a mikanda yetu. Chikwo nawa, muhasa kuwana ukwaso ha kwimba umwe mwaso wetu, hanji kutala chimwe chinema ha jw.org. Nyi mulemba kuli Yehova ni kufupa makumbululo mu Mbimbiliya ni mu mikanda yetu, muchipwa ngwe unasanyika Yehova hanga akutakamise. Hachino, iye meza lume ni kukutakamisa. w23.10 13 ¶6; 14 ¶9

Tabernakulu ni tembele jize atungile mu Yerusaleme, yapwile ni kulifwa muchima. Muchima lia yino, mwapwile mwakuteta mu yihanda yaali. Chimwe, “Muma Musandu;” chikwo, “Muma Musandu Mwahiana,” chize chapwile chakuteta ni hina hamuchima. (Hepre. 9:2-5; Kutuhu. 26:31-33) Muma Musandu, mwapwile chikwachilo cha ndeya cha oru, chilumbilo cha kwochela insensu ni mesa ya mbolo. “Asasendote waze te awayisa ni maji” e wika te mahasa kunjila Muma Musandu hanga alinge mulimo usandu. (Kwa. 3:3, 7, 10) Muma Musandu Mwahiana, mwapwile mushete wa usendo uze weswe wapwile wakushila ni oru. Mushete uno te wakusolola ngwo, Yehova kali mu chihela chacho. (Kutuhu. 25:21, 22) Mwata wa asasendote, mwe wika wapwile ni ulite wa kupalika hina lize liapwile hakachi, ni kunjila Muma Musandu Mwahiana kamuwika ha mwaka ha tangwa lia kufuka shili ya atu. (Levi 16:2, 17) Iye te kakunjilamo ni manyinga a tushitu hanga afuke shili yenyi mwene ni ya vungu lieswe lia Izalele. Mba ha kupalika cha mashimbu, Yehova yasolola ulumbunwiso wa yipatulo yino yaali yize yapwile mu tabernakulu.—Hepre. 9:6, 7. w23.10 27-28 ¶12

Ha versu jinji mu Mbimbiliya, twakuwanaho shimbi ja Zambi jize jinatukolweza hanga “tulizange umwe ni mukwo.” (Yoa. 15:12; Roma 13:8; 1 Tesa. 4:9; 1 Petu. 1:22; 1 Yoa. 4:11) Alioze zango lili chitanga cha ku mbunge, chekwamba chize twakwivwa muchima lietu. Kashika, kukushi mutu niumwe yoze mahasa kumona yize yili ku mbunge yetu. Mba kuchi akwetu mahasa kunyingika ngwo, twakwazanga? Mahasa kuchimona kupalikila mu maliji ni mu yitanga yetu. Kuli majila anji waze mutuhasa kusolwelamo ngwetu, twakuzanga mandumbu jetu. Tutalenu yimwe yilweza: “Hanjikenu umwenemwene umwe kuli mukwo ni mukwo.” (Zeka. 8:16) “Pwenu ni sambukila umwe ni mukwo.” (Marku 9:50) “Ha ulemu, eswe nukaliange kulilemesa umwe ni mukwo.” (Roma 12:10) “Litambulenu umwe ni mukwo.” (Roma 15:7) “Nungenu . . . ni kulikonekena umwe ni mukwo.” (Kolo. 3:13) “Nungenu ni kulimbachila yilemu umwe ni mukwo.” (Ngala. 6:2) “Nungenu ni kulitakamisa umwe ni mukwo.” (1 Tesa. 4:18) ‘Nungenu ni kulilembejeka umwe ni mukwo.’ (1 Tesa. 5:11) ‘Lilembelenu umwe ni mukwo.’—Tia. 5:16. w23.11 9 ¶7-8

Hita tangwa, twakufupiwa kukwata yiyulo, yimwe yikehe-yikehe; yikwo yinene-yinene. Ufulielo ukolo wakutukwasa kukwata yiyulo yipema. Chakutalilaho, twakukwata yiyulo hakutwala ku usepa, yiheho, shikola, ulo, kupwa ni ana ni mulimo wa ku musunya. Muchilita kulihula ngwe: ‘Shina yuma yize nakuzanga kulinga yakusolola pundu ngwo, nakufuliela ngwami, kwasala hakehe Zambi manongesa chifuchi chino ni kuneha chifuchi chaha? Nyi hanji nakulinga yuma yalifwa ni yize akulinga atu waze akwamba ngwo, chili chikalu kutwama ku miaka yeswe?’ (Mateu 6:19, 20; Luka 12:16-21) Nyi mutufuliela ngwetu, chifuchi chaha chinakundama, muchitukwasa kukwata yiyulo yalita. Yetu nawa tunafupiwa kupwa ni ufulielo ukolo mba tuhase kukumba yipikalo. Ha mashimbu amwe hanji mutupalika mu yihungumiona, mutukwachika musongo uze kushi kuhwa, hanji chuma chikwo chize muchituchiza uwahililo. Kuuputukilo hanji mutumona ngwetu, mutuhasa kukumba yuma yacho. Alioze, nyi yuma yacho muyinunga ha miaka yinji, mutufupiwa ufulielo ukolo mba tuhase kunyongonona ni kununga kulingila Yehova ni uwahililo.—1 Petu. 1:6, 7. w23.04 27 ¶4-5

Yehova kanashimbwila tulinge yuma kulita ni yize twakwita mu yilemba. Tutalenu chilweza, umwe ndumbu malemba kuli Yehova hanga amwehe tangwa ku mulimo wenyi aye ku kukunguluka cha mambonge. Kuchi Yehova mahasa kukumbulula yilemba ya mutapu au? Yehova mahasa kuhana hamu kuli ndumbu hanga ahanjike ni mwata wa milimo yenyi. Alioze ndumbu neye katamba kulinga chihanda chenyi ha kuya ndo kuli mwata wa milimo yenyi hanga ete tangwa lize anazange kuya ku kukunguluka. Chino hanji machilinga ha yisuho yinji. Hanji mahasa kwita kuli mukwa-mulimo-ni-mukwo akalakale mu chihela chenyi mba ahase kuya ku kukunguluka. Chikwo nawa, nyi muchilita, mahasa kwita amutete mbongo ja tangwa lize maya ku kukunguluka. Yehova kanashimbwila hanga tununge ni kwita yuma yize tunafupiwa. Yesu katukwashile kumona ngwo, yuma yimwe yize twakwita kechi kutwahayo ha shimbu lizeliene. (Luka 11:9) Kashika, kanda ulitwamina kulemba! Lemba kuli Yehova mashimbu eswe. (Luka 18:1-7) Nyi twachilinga, twakusolola kuli Yehova ngwetu chuma chacho chili ni ulemu kuli yetu, tushi kuchita chamwichila. Chikwo nawa, chakusolola ngwo, tunafuliela ngwetu iye kali ni uhashi wa kutukwasa. w23.11 22-23 ¶10-11

Yehova kalakenyene sepa lienyi Apalahama ngwenyi, mapwa ni mwana; nawa mavungu eswe a hashi mazuka yiwape kupalikila muli iye. (Uputu. 15:5; 22:18) Apalahama kapwile ni ufulielo ukolo muli Zambi, kashika apwile ni shindakenyo ngwenyi, Zambi mamanununa chilakenyo chenyi. Alioze Apalahama te hapwa ni miaka 100; Sara 90, nihindu te kanda achipwa ni mwana. (Uputu. 21:1-7) Chipwe chocho, Mbimbiliya yakwamba ngwo: “Apalahama mu kutalatala wafulielele chize kechi kuhasa kuchitalatala hanga akapwe tato ya mavungu anji.” (Roma 4:18) Yetu tunanyingika ngwetu, yize Apalahama apwile ni kushimbwila yinakalingiwa. Ayo yasema Izake, mwana yoze apwile ni kushimbwila chinji. Mba, mumu liaka Apalahama apwile ni ufulielo uno ukolo muli Yehova? Apalahama te kanyingika kanawa Yehova, kashika apwile ni shindakenyo ngwenyi, “cheswacho Zambi hanalakenya mahasa kuchilinga.” (Roma 4:21) Yehova yatayiza Apalahama, chocho yamutongola ngwe mukwa-ululi mumu lia ufulielo wenyi.—Tia. 2:23. w23.12 8 ¶1-2

Mukweze yoze atu akujikijila, kakuhasa kulinga kanawa yiteli yenyi. Tutalenu chilweza cha Yesu. Yesu kakapwile ni kuliechelela hanji kusolola uleya. Shimbu achilinge, iye kamanunwine yiteli yeswe yize Yehova amuhele, chipwe ngwe chapwile chikalu kuchilinga. Kazangile chinji atu, chipi-chipi tumbaji twenyi, chocho yahana mwono wenyi hali ayo. (Yoa. 13:1) Muhasa kwimbulula Yesu ha kusa tachi hanga ulinge mulimo weswawo makwaha. Nyi kuushi kuhasa kulinga chimwe chuma, solola kulikehesa, eta ukwaso kuli Akwa-Kristu waze ajama. Kanda uwahilila wika ha kulinga yuma yikehe-yikehe. (Roma 12:11) Shimbu uchilinge, manununa chiteli che ha kunyingika ngwe “unalingila Yehova hi atu ko.” (Kolo. 3:23) Tunanyingika ngwetu hi uli mungunu ko, kashika nyingika haze hasulila uhashi we ni kutayiza kapalia mweswawo mulinga.—Yishi. 11:2. w23.12 26 ¶8

Twakuwahilila chinji muze akutupapachisa ni kulinga chihanda mu usoko wa Yehova. Waze hanapapachisa; nawa ali ni usepa upema ni Yehova, matayiza maliji wano a Ndawichi, anambe ngwo: “Kawaha yoze hiwamutongola yena ni kumukundamisa kuli yena, akatwame mu yiize ye.” (Samu 65:4) Yehova kakusakula kanawa atu waze malinga chihanda mu usoko wenyi. Iye kakutongola atu waze anazange kupwa ni usepa ukolo ni iye. (Tia. 4:8) Muze mulihana kuli Yehova ni kukupapachisa, muhasa kupwa ni shindakenyo ngwe, muze makupapachisa Yehova ‘makwaha yiwape ya kulumbama.’ (Mala. 3:10; Jere. 17:8) Upapachiso uli wika uputukilo. Yena mwene watamba kusa tachi hanga ulinge yize muhasa ha kununga ni kushishika kuli Yehova chipwe muze mupalika mu yipikalo ni mu yeseko. (Chilu. 5:4, 5) Amu uli kambaji ka Yesu, musa tachi hanga ukaule chilweza chenyi ni malongeso jenyi.—Mateu 28:19, 20; 1 Petu. 2:21. w24.03 8 ¶1-3

Mba yika munulinga nyi kunushi kuzanga kupalikisa mashimbu hamuwika? Mba yika nwatamba kulinga nyi yino ye yakulingiwa mu ulo wenu? Nyongenu nawa ha chilweza cha jiko lia kahia. Kahia keshi kwoka ha jiko ha shimbu limuwika; chakufupiwa kusoselaho mba kahia kacho koke chinji. Kulita ni chilweza chino, muchilita hita tangwa nupwe ni kupalikisa mashimbu akehe hamuwika. Fupenu kulinga yuma yize yenu eswe aali nwakuzanga. (Tia. 3:18) Nyi nwaputuka kulinga yuma yino, hakehe-hakehe munuhasa kwokesa nawa zango lienu. Vumbi likwete ulemu unji mu ulo. Vumbi mutuhasa kulitesa ni fuji. Nyi kukushi fuji kahia mukahasa kujima ni kawashi. Chizechene nawa, nyi lunga ni pwo keshi kulisa vumbi, zango lize akwete hakachi ko mulihasa kukekema. Chikwo nawa, nyi lunga ni pwo masa tachi hanga alisolwele vumbi umwe ni mukwo, acho zango lio mulinunga ni kukola. Muchihasa kupwa ngwe yena wakunyonga ngwe wakuvumbika mutu yoze walimbata nenyi, alioze shina mukwenu-lunga hanji mukwenu-pwo kakulivwa lume ngwo wakumuvumbika? w23.05 22 ¶9; 24 ¶14-15

Mbimbiliya yakutongola tuvumbi amwe a Yehova ashishika, waze anenganyanyine ni kwivwa woma wa akwo-kole jo ni wa yipikalo yikwo nawa. (Samu 18:4; 55:1, 5) Chizechene nawa, muchihasa kupwa ngwe tunapalika mu yihungumiona ku shikola, ku mulimo, mu usoko wetu, hanji lume ku nguvulu. Hamwe mutuhasa kwivwa woma wa kufwa mumu lia musongo uze tuli nawo. Ha mashimbu a mutapu au, mutuhasa kulivwa ngwe kanuke yoze keshi mu ufunge upema. Mba kuchi Yehova matukwasa mu yuma ya mutapu au? Iye matulembejeka. Kashika, kanda ukeza kecha kupalikisa mashimbu ni Yehova ha kuhanjika nenyi ni kutanga Liji lienyi. (Samu 77:1, 12-14) Nyi muopwa ni chako cha kulinga yuma yino hita shimbu mupalika mu yipikalo, nyonga lie litangu mulipwa lia kufupa ukwaso wa Yehova. Lweza Yehova yipikalo ni woma uze unevu. Hanyima, panjika yize Yehova makulweza kupalikila mu Mbimbiliya. Nyi wachilinga, muhasa kumona chize Yehova makulembejeka.—Samu 119:28. w24.01 25 ¶14-16

Mba tuhase kumanununa yize twatesele ku ufulielo, chili chilemu kupwa ni nyonga lia kuyilinga. Nyonga lia kulinga yimwe, linalumbunuka kupwa ni zango ni kusa tachi ha kulinga chuma chize twatesele. Chikwo nawa, tuli ni zango lia kulinga yimwe muchipwa chashi kumanununa yize twatesele. Mba, yika watamba kulinga mba ulivwe ngwe uli ni zango liacho? Lemba kuli Yehova hanga wokese zango lie lia kulinga yimwe. Iye mahasa kuzachisa spiritu yenyi yisandu hanga akukwase kulinga yuma yize hiunatese. Ha mashimbu amwe, mutuhasa kutesa kulinga yimwe ku ufulielo, mumu tunanyingika ngwetu yino ye twatamba kulinga. Nyonga lino hi lipi ko. Alioze muchihasa kupwa ngwe kutushi ni zango hanji nyonga lia kulinga chuma chacho. Pukuna ha yuma yize Yehova hanakulingila. (Samu 143:5) Postolo Paulu te kakupukuna ha chawana cha vumbi lia Zambi chize amusolwelele, chino chamukwashile kulingila chinji Yehova. (1 Kori. 15:9, 10; 1 Timo. 1:12-14) Chizechene nawa, nyi mupukuna chinji ha yize Yehova hanakulingila, muopwa ni zango linji lia kulinga yize hiunatese ku ufulielo.—Samu 116:12. w23.05 27 ¶3-5

Tata yetu wa mu malilu kakuwahilila chinji muze twakuhalisa jina lienyi. (Samu 119:108) Shina chino chinalumbununa ngwo, Yehova kali ngwe atu yihenge waze akufupa hanga akwo aachichimieke mba alivwe kanawa? Ka, hi chocho ko. Muze twakuhalisa Yehova, twakusolola nawa ngwetu, yuma yize Satana ahanjikile hali yetu yili ya mahuza. Mu mutapu uka? Iye kambile ngwenyi, kukushi mutu niumwe yoze makalila jina Yehova ni ushishiko. Kukushi niumwe, yoze nyi mamweseka manunga ni kushishika kuli Yehova. Iye kashindakenyene ngwenyi, yetu eswe lume mutuhasa kuhichika Yehova, nyi umwe matwaha chuma chipema. (Yombi 1:9-11; 2:4) Chipwe chocho, Yombi kasolwele ngwenyi, Satana kali mukwa-mahuza. Mba yika mutwamba hali yetu? Yetu eswe tuli ni uhashi wa kukwasa jina lia Yehova ni ushishiko ni kununga kumuwayila. (Yishi. 27:11) Chino chili chuma chilemu chize twatamba kulinga ku mwono wetu. w24.02 8-9 ¶3-5

Ha kupalika cha miaka, Yehova yasakula Akwa-Kuyula hanga asongwele atu jenyi. Kulutwe, ha mashimbu ja mianangana, Yehova yasakula aprofeta hanga asongwele atu jenyi. Mianangana waze te akushishika kuli Yehova, kapwile ni kukaula usongwelo wa aprofeta. Ngwe chilweza, Mwanangana Ndawichi ni kulikehesa cheswe kakawile chiyulo chize amuhele kuli Natane. (2 Samue. 12:7, 13; 1 Sango 17:3, 4) Mwanangana Yehosofate, kakawile usongwelo wa profeta Jahaziele hanga akolweze A-Yunda ‘afuliele muli aprofeta a Zambi.’ (2 Sango 20:14, 15) Mwanangana Hezekia muze apwile mu kapinda, kafupile ukwaso wa profeta Izaia. (Iza. 37:1-6) Muze mianangana apwile ni kukaula usongwelo wa Yehova te kakwawahisa, ni vungu lieswe te liakupwa mu ufunge upema. (2 Sango 20:29, 30; 32:22) Chasolokele zwalala ngwo, Yehova katongwele aprofeta hanga asongwele atu jenyi.w24.02 21-22 ¶8

Satana kanazange hanga masepa jetu apwe atu waze keshi kutukolweza kulinga upale wa Yehova. Twatamba kwiwuluka ngwetu, kutushi kupwa wika ni masepa waze mutulimona no meso ni meso, alioze ni ha internet nawa. Kanda tukaula kunyonga cha hano hashi chize chakusolola ngwo, kulinga yuma ya upangala chili chipema. Yetu tunanyingika ngwetu, manyonga wano kali a mahuza. (Efwe. 4:19, 20) Kashika, chili chilemu kulihula ngwe, shina nakusa tachi hanga nguhone kupwa chinji hamuwika ni akwa-milimo-ni-akwetu, alongi-ni-akwetu ni atu akwo nawa waze keshi kulemesa shimbi ja Yehova? Shina nguli ni hamu lia kukalila shimbi ja Yehova chipwe ngwe atu akwo keshi kujitayiza, hanji kungumona ngwe najingala? Ngwe chize anasolola ha 2 Timoteu 2:20-22, twatamba nawa kukeya muze tunasakula masepa mu chikungulwila. Twatamba kunyingika ngwetu, mandumbu amwe mu chikungulwila hanji kechi kutukwasa hanga tununge ni kushishika kuli Yehova. w24.03 22-23 ¶11-12

Shina hiunanyongo kama chize Yehova apwa? Tunanyingika ngwetu, kutuchi kuhasa kumona Yehova, alioze Mbimbiliya yakumusolola mu majila eka ni eka. Yakumuvuluka ngwo, “tangwa ni lukepwe,” “kahia kaze kakunongesa.” (Samu 84:11; Hepre. 12:29) Mu umwe usolwelo, profeta Ezekiele yasolola Yehova ngwe kalifwa ni liwe lia safira, unengu wa kulejima ni kongolo. (Eze. 1:26-28) Amu kutushi kumona Yehova, muchihasa kupwa chikalu kutayiza ngwo iye kakutuzanga. Atu amwe kamwene lamba linji ku mwono, kashika kakunyonga ngwo Yehova kechi keza kaazanga. Yehova kananyingika chize twakwivwa ni chize muchihasa kupwa chikalu kukundama kuli iye. Mba atukwase ha manyonga jacho, iye kanasolola mu Mbimbiliya ngwenyi, kali Zambi ya zango. Liji lize linakwate kanawa ku mwono wa Yehova, lili zango. (1 Yoa. 4:8) Mbimbiliya yakwamba ngwo, Zambi iye zango. Zango lie liakusongwela yuma yeswe yize Yehova akulinga. Yehova kakwete zango linji, kashika akuzanga chipwe atu waze keshi kumuwayila.—Mateu 5:44, 45. w24.01 26 ¶1-3

Yehova kasakwile Mose hanga akwase A-Izalele kutuhuka mu Engitu. Hachino, iye yasolola kuli A-Izalele zwalala ngwenyi, mu mwalwa, iye kazachishile nguji lia lelwa; ha ufuku yazachisa nguji lia kahia. (Kutuhu. 13:21) Mba ahete ni A-Izalele ku Kalunga-lwiji Muchila, Mose kakawile nguji lize liapwile ni kumusongwela. Muze A-Izalele hanyingika ngwo, A-Engitu te kanaakaula munyima, yevwa woma unji mumu kanyongene ngwe maashiha. Alioze, Mose kakalingile upi niumwe. Yehova mwe wazangile kutwala atu jenyi ku chihela chacho, chocho yalweza Mose hanga aatwale. (Kutuhu. 14:2) Mba chino yichikwasa Yehova kusolola ndundo jenyi mu jila yalipwila. (Kutuhu. 14:26-28) Ha miaka 40, Mose yanunga ni kujikijila ha nguji lia lelwa hanga asongwele atu ja Zambi mu puya. (Kutuhu. 33:7, 9, 10) Mose te kakuhanjika ni Yehova kupalikila mu nguji liacho, hanyima mba mapalikisa usongwelo wacho kuli A-Izalele. Chino te chakukwasa A-Izalele kumona pundu ngwo, Yehova katongwele Mose hanga aasongwele. w24.02 21 ¶4-5