Julho

Yuma yeswe yize Yesu ambile ni yize alingile, kuchingako yikomokeso, iye kembulwile ni ungunu weswe kunyonga cha Yehova ni chize akumwenamo yuma. (Yoano 14:9) Yika mutuhasa kulilongesa ha yikomokeso ya Yesu? Yesu ni Yehova kakutuzanga chinji. Muze Yesu apwile hano hashi, kasolwele chize te akuzanga atu ni kulinga yikomokeso hanga atepulule lamba lize o apwile ni kumona. Ha shimbu limwe, atu aali afwa meso yaliumba kuli Yesu hanga aakwase. (Mat 20:30-34) Yesu yevwila keke malunga jacho, chocho yaauka. Ha versu yino, Liji lia Ngregu lize akulumbununa ngwo, ‘yevwila keke,’ liakusolola keke yinji yize mutu akwivwa. Keke yamutapu au yize yakukatuka ha zango, ye yatwalile Yesu mba alise atu waze apwile ni zala ni kuuka mukwa-mbumba. (Mat 15:32; Marku 1:41) Mutuhasa kupwa ni shindakenyo ngwetu, Yehova, Zambi ‘mukwa keke’ ni Mwanenyi Yesu, kakutuzanga chinji. Chikwo nawa, o kakupinda muze akutumona mutupalika mu yipikalo. (Luka 1:78; 1 Petu. 5:7) Tuli ni shindakenyo ngwetu, Yehova ni Yesu kanazange chinji kuhwisa lamba lieswe lize liakupinjisa atu hano hashi! w23.04 3 ¶4-5

Twatamba kulinga yeswe yize mutuhasa hanga twehuke manyonga ni yitanga yipi ya hano hashi ha Satana. Nyi twatanga Mbimbiliya ni kulilongesayo, mutuzalisa manyonga jetu ni yuma yipema. Kuya ku kukunguluka ni kwambujola, muyitukwasa kufunga manyonga jetu. Hachino, Yehova mamanununa chilakenyo chenyi cha kutukwasa tuhone kupalika mu cheseko chize kutuchi kuhasa kukumba. (1Ko 10:12, 13) Ha mashimbu wano, hita umwe wa kuli yetu kanafupiwa kulemba chinji kuhiana kunyima. Nyi twachilinga, mba mutuhasa kununga ni kushishika kuli Yehova ha matangwa wano akalu. Kashika, sako mashimbu hita tangwa hanga ulembe kuli Yehova ni mbunge yeswe. Yehova kanazange hanga ‘tuzukwile mbunge jetu kuli iye’ kupalikila mu yilemba. (Samu 62:8) Sakwilila Yehova ni kumuhalisa ha yeswe yize akulinga. Mwite ukwaso hanga upwe ni hamu mu mulimo wa kwambujola. Lemba hanga wite ukwaso wa kunyongonona mu yipikalo, ni kwehuka cheseko cheswacho muchisolokako. Kanda wecha chuma nichimwe hanji mutu apihise katalilo we wa kulemba kuli Yehova. w23.05 7 ¶17-18

Mumu liaka twakukunguluka? Chikuma chilemu twakulikungulwila chili kuhalisa Yehova. (Samu 26:12; 111:1) Chikuma chikwo chili hanga tulitakamise umwe ni mukwo ha mashimbu wano akalu tuli. (1 Tesa. 5:11) Muze twakuzundula kwoko ni kuhana kumbululo, twakulinga yuma yino yaali. Alioze, hakutwala ku kuhana makumbululo hanji mutuhasa kupwa ni umwe kapinda. Mutuhasa kwivwa woma wakuhana makumbululo, hanji kuzanga kuhana makumbululo anji, alioze kechi kututongola ngwe chize tunazange. Mba kuchi mutuhasa kukumba kapinda yono? Paulu yamba ngwenyi, ayo te katamba kulihulikila ha chikuma cha ‘kulitakamisa umwe ni mukwo. Kashika nyi twanyingika ngwetu, mandumbu akwo mahasa kuwana utakamiso ha kumbululo lieswalio mutuhana, muchitukwasa tununge ni kuhana makumbululo. Chikwo nawa, chipwe ngwe katutongwele ha yisuho yinji ngwe chize tunazange, mutuhasa kuwahilila ha kunyingika ngwetu, mandumbu akwo kahasa kuhana makumbululo.—1 Petu. 3:8. w23.04 20 ¶1-3

A-Izalele waze apwile mu undungo ku Babilonia ha miaka 70, te mafuna mu chifuchi cho cha Izalele. (Ezera 1:2-4.) Chinasoloka pundu ngwo, Yehova mwe wapwile ni kusongwela yuma yeswe. Mumu A-Babilonia te keshi kwecha funge jo chamwechela. (Iza. 14:4, 17) Mwanangana mwaha yoze wanjilileho, yatayiza hanga A-Izalele atuhuke mu chifuchi. Hachino, hita Ka-Izalele, chipi-chipi miata a mu usoko kafupiwile kukwata chiyulo cha kutuhuka mu Babilonia hanji kunungamo. Chiyulo chino kuchakapwile chashi. A-Izalele anji te hapwa tushinakaji, kashika wenyi wacho te muukaliwa chinji kuli ayo. Chikwo nawa, A-Izalele anji waze apwilemo kasemukinyine mu Babilonia. Chino che chifuchi chimuwika chize te anyingika. Kuli ayo, chifuchi cha Izalele chapwile wika cha yisemi jo hanji akako. A-Izalele amwe te hapwa pichi mu Babilonia. Kuli ayo, chapwile chikalu kuhichika mazuwo jo apema mingoso yize te akulinga, hanga aye ni kuputuka mwono waha mu chifuchi chize te kanyingikine. w23.05 14 ¶1-2

Liji lia Zambi liakutukwasa hanga tununge ni kusolola yitanga ngwe, kunyongonona, keke ni zango. Luka 21:19 unambe ngwo: ‘Nyi nwanyongonona munukalamwina mwono wenu.’ A-Kolosu 3:12 unambe ngwo: ‘Zalenu keke.’ 1 A-Tesalonika 4:9, 10 unambe ngwo: ‘Zambi kakunulongesa hanga nulizange umwe ni mukwo. . . . Alioze, tunaliumbu mandumbu hanga nununge ni kuchilinga chinji kuhiana.’ Maliji wano kaasonekenene tumbaji waze te akusolola kunyongonona, keke ni zango. Chipwe chocho, ayo katambile kununga ni kusolola yitanga yacho. Ni yetu che twatamba kulinga. Kashika, chitangu mona chize Akwa-Kristu ku sekulu yitangu apwile ni kusolola yitanga yino. Mba mumona chize muhasa kwimbulula tumbaji jacho ni kusolola ngwetu hitwalilulieka hakutwala ku luyinda munene. w23.07 3 ¶4, 8

Chipwe ngwe tuli Akwa-Kristu akuwayisa hanji ka, yetu eswe twatamba kusa tachi hanga twendele mu “Tapalo Lisandu.” Kulinga chino, muchitukwasa kuwayila Yehova musono ni kulutwe lia matangwa muze mutukatambula yiwape yize Wanangana wa Zambi muukatwaha. (Yoa. 10:16) Kukatuka ha mwaka 1919 M.J, tununu twa malunga, mapwo ni twanuke, kakutuhuka mu Babilonia Yinene hanji ngwetu uwayilo wa mahuza ni kuputuka kulinga wenyi mu tapalo lino lia chilayi. Muze A-Yunda akatukile kuu Babilonia, Yehova te machiza chuma cheswe chize muchikwika A-Izalele kutuhuka mu Babilonia. (Izaia 57:14) Shina yuma yacho yinalingiwa mu “Tapalo Lisandu”? Ewa, ha miaka yinji kunyima muze te kanda tuheta ha mwaka 1919, Yehova kazachishile malunga ashishika hanga akwase akwo kutuhuka mu Babilonia Yinene. (Tala nawa Izaia 40:3.) Malunga wano kaluliekele jila hanga atu a mbunge yipema ahase kutuhuka mu uwayilo wa mahuza ni kulichinga ni atu jenyi hanga amuwayile. w23.05 15-16 ¶8-9

Yehova kanazange hanga yetu ene tumulingile ni mbunge yetu yeswe hi ku tachi ko. (2 Kori. 9:7) Nyi kuushi ni zango lia kumanununa chimwe chize watesele ku ufulielo, shina muhasa kusa tachi hanga uchimanunune? Tutalenu chilweza cha postolo Paulu. Iye kambile ngwenyi: ‘Nakumbufula mujimba ni kuutwala ku undungo.’ (1 Kori. 9:25, 27, ftn.) Paulu te kakusa tachi ha kulinga yize yalita chipwe muze te keshi kupwa ni zango linji lia kuyilinga. Mba yika te Yehova akunyonga ha yize Paulu apwile ni kulinga? Iye kanakawahilila ha mulimo wa Paulu ni kumuwahisa ha tachi jize te akusa. (2 Timo. 4:7, 8) Chizechene nawa, Yehova kakuwahilila chinji muze akutumona mutusa tachi hanga tulinge yimwe ku ufulielo chipwe ngwe kutushi ni zango linji lia kuyilinga. Iye kakuwahilila mumu kananyingika ngwo twakusa tachi, hi ko mumu lia kuzanga yize tunalingi, alioze mumu lia kumuzanga iye. Chizechene Yehova awahishile Paulu, mawahisa tachi jize mutusa. (Samu 126:5) Chikwo nawa, muze twakunyingika ngwetu Yehova kanatuwahisa, chino chakutukolweza chinji. w23.05 29 ¶9-10

Postolo Paulu kanatese atu waze kechi kalilamwina ha tangwa lia Yehova ni waze anayi tulo. Atu jacho kanyingikine chize tangwa linapalika ni yize yinalingiwa haze anapombo. Kashika, akununga chakuhona kulinga nichimwe mumu keshi kuhasa kunyingika yuma yilemu yize yalingiwako. Atu anji musono kanayi tulo a ku ufulielo. (Roma 11:8) Muze hano hashi hakulingiwa yuma yipi, ngwe jita ni misongo, ayo kakuhinduka ni kuputuka kuzanga sango jipema. (2 Petu. 3:3, 4) Alioze, yetu tunanyingika ngwetu chili chilemu kununga ni kulawola. (1 Tesa. 5:6) Mumu liaka chino chili chilemu? Chili chilemu, mumu muchitukwasa hanga tuhone kulinjisa mu yuma ya mafwefwe ni mu yuma yikwo ya hano hashi. Amu tunayi ni kukundama ku tangwa lia Yehova, chino muchitwala akwa-hashi hanga atushinjile kulinga yuma yacho. Alioze, kutwatambile kulihulumba ha chikuma chacho. Spiritu ya Yehova muyitukwasa kuhwima mbunge ni kukwata yiyulo yipema.—Luka 12:11, 12. w23.06 10 ¶6-7

Yika wakunyonga muze wakwivwa jina ngwo Samasone? Kota wakwiwuluka lunga yoze wapwile ni tachi jinji. Chochene lume. Alioze iye kakwachile yiyulo yipi yize yamunehenene lamba. Chipwe chocho, Yehova yalihulikila ha yuma yipema yize alingile, chocho yatuma kusoneka chilweza chenyi mu Mbimbiliya hanga chitukwase musono. Yehova kakwashile Samasone kulinga yuma ya kukomwesa ni kukwasa A-Izalele. Ha kupalika cha miaka yinji chize haze Samasone afwile, ni ukwaso wa Yehova, Paulu yasoneka jina lia Samasone mukachi ka majina ja atu waze asolwele ufulielo ukolo. (Hepre. 11:32-34) Chilweza cha Samasone, muchihasa kututakamisa chinji musono. Muze apalikile mu yipikalo, Samasone kanakajikijila pundu muli Yehova. Chilweza chenyi muchihasa kutukolweza musono ni malongeso alemu waze mutuwanaho. w23.09 2 ¶1-2

Mutuhasa kukolesa kunyongonona chetu nyi mutulemba kuli Yehova mashimbu eswe ni kumulweza yize yinatupinjisa. (1 Tesa. 5:17) Hanji ha mashimbu wano kuushi kupalika mu kapinda munene. Alioze, shina wakulemba kuli Yehova ni kwita ukwaso wenyi muze unevu uli hanji muze kuwamwene yize mulinga? Nyi ukwete chako cha kwita ukwaso wa Yehova hanga ukumbe yipikalo yikehe-yikehe ya hita tangwa, che mukalinga nawa muze mukapalika mu kapinda munene kulutwe. Hachino, mukapwa ni shindakenyo ngwe Yehova kananyingika shimbu lize makukwasa ni chize machilinga. (Samu 27:1, 3) Nyi mutunyongonona haliapwila mu yipikalo yize tunapalika ku mwono, muchikapwa chashi kunyongonona ha luyinda munene. (Roma 5:3) Kuchi tunachinyingika? Mandumbu anji hananyingika ngwo, hita shimbu mapalika mu cheseko cha ku ufulielo, kakupwa ni tachi ja kunyongonona mu yipikalo yize muyiza kulutwe. Muze akupalika mu yipikalo mba manyongonona, ufulielo wo ha ukwaso wa Yehova wakwoka chinji. Ufulielo wacho wakwakwasa kukumba yipikalo yize muyiza kulutwe.—Tia. 1:2-4. w23.07 3-4 ¶7-8

Kulikehesa ni keke ya Yehova, yakumukwasa kuhona kulikwachilila ha manyonga jenyi. Chakutalilaho, kulikehesa cha Yehova chasolokele zwalala muze te anambe kunongesa mbonge ya Sondome. Kupalikila muli angelo, Yehova yalweza Lote, lunga washishika hanga achinyine ku milundu. Alioze, Lote yevwa woma; kazangile kuyako. Chocho yamwita hanga iye ni usoko wenyi achinyine ku Zoare, yimwe mbonge yikehe yize Yehova atesele kunongesa. Yehova kachi kalwezele Lote ngwenyi, watamba kukaula usongwelo uze ngunakwehe. Alioze shimbu achilinge, iye yakaula yize Lote amwichile, chocho yalitwamina kunongesa mbonge yacho. (Uputu. 19:18-22) Ha kupalika cha jimwe sekulu, Yehova yasolwela keke Akwa-Ninive. Iye yatuma profeta Yona hanga aalweze ngwenyi, mbonge ya Ninive ni atu eswe waze alimo mayinongesa. Alioze muze A-Ninive alikonyekene Yehova yaevwila keke, chocho yecha kunongesa mbonge yacho.—Yona 3:1, 10; 4:10, 11. w23.07 21 ¶5

Yika mutuhasa kulilongesa ha chilweza cha Njoashe? Mutondo uze kuushi ni miji yikolo, wakufupiwa ukwaso mba ununge ni kumana. Nyi muhona ukwaso, fuji muyiulimbula. Yino ye yalingiwile kuli Njoashe. Iye kapwile ni ukwaso wa Jehoiada, alioze hanyima lia kufwa cha Jehoiada ni yitanga ya yitanganyanyi, Njoashe yalimbuka ku ufulielo, chocho yahona kushishika kuli Yehova. Chilweza chenyi, chasolola ngwo kutwatambile kwononokena Yehova, mumu ngwo asoko jetu hanji mandumbu akwo mu chikungulwila kakutukolweza hanga tuchilinge. Nyi tunazange kupwa ni usepa ukolo ni Yehova, twatamba kukolesa zango ni woma wetu hali iye, ha kulilongesa Mbimbiliya mashimbu eswe, kupukuna ni kulemba. (Jere. 17:7, 8; Kolo. 2:6, 7) Kwamba pundu, yuma yize Yehova akutwita hi yikalu ko. Yeswe yize anazange hali yetu, yili ha mukanda wa Chilumbununyi 12:13, unambe ngwo: “Vwila woma Zambi, ni kufunga shimbi jenyi, mumu henaho hasulila milimo ya mutu.” Nyi mutuvwila Yehova woma, mutuhasa kukumba yipikalo hanji cheseko cheswacho mutupalika kulutwe. Nyi twachilinga, kukushi chuma nichimwe hanji mutu niumwe yoze mahasa kupihisa usepa wetu ni Yehova. w23.06 19 ¶17-19

Versu yino yinaputuka ni maliji anambe ngwo: “Yoze te unatwama ha ngunja yamba ngwenyi.” (Uso. 21:5a) Maliji wano kali alemu, mumu chili chisuho chamuchitatu chize Yehova mwene anahanjika mu mukanda wa Usolwelo. Hi mungelo ko hanji Yesu wahanyine chilakenyo chino, alioze Yehova mwene! Chino chinasolola ngwo, mutuhasa kufuliela ni mbunge yeswe ha yize iye anambe mu maliji anahateho mu versu yamuchitano. Mumu liaka? Mumu Yehova “keshi mahuza.” (Titu 1:2) Kashika, mutuhasa kujikijila ha maliji ali ha Usolwelo 21:5, 6. Maliji akwo a Yehova kali ngwo: “Tala!” Liji lia Ngregu lize akulumbununa ngwo: “Tala!” kakulizachisa chinji mu mukanda wa Usolwelo. Mba yika Zambi ambile hanyima lia maliji jacho? Iye yamba ngwenyi: “Ngunalingi yuma yeswe yaha.” Yuma yino, Yehova makayilinga kulutwe, alioze kali ni shindakenyo ngwenyi, makamanununa yize hanalakenya. Kashika, unahanjika ngwe yuma yacho kanayilingi.—Iza. 46:10. w23.11 3-4 ¶7-8

Postolo Petulu te kakupinda ni ulelu wenyi. Tutalenu yilweza yimwe. Muze Yesu ambile ngwenyi, te katamba kumona lamba ni kufwa, hanga amanunune uprofeto wa mu Mbimbiliya, Petulu yalweza Yesu ngwenyi yino kuyichi kulingiwa kuli iye. (Marku 8:31-33) Ha yisuho yinji, Petulu ni apostolo akwo te kakuzwela hanga anyingike yoze ukwete ulemu mukachi ko. (Marku 9:33, 34) Ha ufuku uze te mashiha Yesu, Petulu mumu lia kulipupula; yateta twitwi lia umwe lunga. (Yoa. 18:10) Ha ufuku uzewene, Petulu yevwa woma unji; chocho yalituna ha yisuho yitatu ngwo kanyingikine Yesu. (Marku 14:66-72) Yino yiyimutwala kulila chinji. Petulu kevwile yikola yinji ku mbunge ha yize alingile, chipwe chocho Yesu kakamwehukile. Hanyima lia kumuhindwisa, Yesu yahana kuli Petulu uhashi wa kusolola nawa zango lienyi ali iye. Yesu yahana mulimo waha kuli Petulu, wa kupwa kafunga walikehesa yoze mafunga mapanga jenyi. (Yoa. 21:15-17) Petulu kalingile yizeyene Yesu amwichile. Ha tangwa lia Pentekoste, Petulu kapwile mu Yerusaleme; chocho yapwa umwe wa kuli tumbaji atangu waze atambwile spiritu yisandu. w23.09 22 ¶6-7

“Funga ana-mapanga jami,” postolo Petulu kalwezele makulwana. (1 Petu. 5:1-4) Nyi uli mukulwana, tunanyingika ngwetu wakuzanga mandumbu ni kuzanga kwafunga. Alioze ha mashimbu amwe, muhasa kupwa ni milimo yinji hanji kuhonga, chocho muhona kulinga kanawa mulimo we. Nyi yino muyilingiwa kuli yena, yika muhasa kulinga? Lweza Yehova chize unevu. Petulu kasonekene ngwenyi: “Nyi mutu kanalingila akwo, achilinge ni kujikijila ha tachi jize Zambi a kuhana.” (1 Petu. 4:11) Mandumbu anji kanapalika mu yipikalo yimwe yize hanji kuyichi kuhwa yeswe ha miaka yino tuli. Alioze, iwuluka ngwe “kafunga munene,” Yesu Kristu, mahasa kwakwasa kuhiana yena. Iye mahasa kuchilinga musono ni mu chifuchi chaha. Yize Yehova anete kuli makulwana hanga alinge, yili wika kuzanga mandumbu jo; kwameneka ni kwatakamisa ni kupwa “chilweza chipema kuli mapanga.” w23.09 30 ¶13-14

Twatamba kwehuka kunyonga cha hano hashi. Nyi kutwakeyele, mutuhasa kwimbulula kunyonga cha atu waze keshi kwononokena shimbi ja Yehova. (1 Kori. 3:19) “Mana a hano hashi,” kanji-kanji kakutwala atu apwe ni manyonga a musunya ni kwehuka kukaula shimbi ja Yehova. Akwa-Kristu amwe mu Perekamu ni mu Tayatera, kembulwile yitanga ya atu waze te atunga no, apwile ni kulinga utanji ni kuwayila mahamba. Yesu kahanyine yiyulo ya tachi ku yikungulwila yacho, mumu ayo kapwile ni kwecha mandumbu amwe malinga utanji. (Uso. 2:14, 20) Musono, kuze twatwama atu mahasa kufupa hanga twimbulule yitanga yo yipi. Asoko ni enyembo jetu mahasa kutulweza ngwo, kutwatambile kukalisa mbunge; hi chipi ko kwehuka shimbi ja Yehova. Chakutalilaho, mahasa kwamba ngwo hi chipi ko kulinga yize mujimba wetu unete, nawa ngwo, shimbi ja Yehova kujishi ni ulemu musono. Ha mashimbu amwe, mutuhasa kunyonga ngwetu, usongwelo uze Yehova akutwaha kuushi kusoloka kanawa. Hanji mutunyonga ngwetu, twatamba kulinga yuma ‘kuhiana yize yinasonewa.’—1 Kori. 4:6 w23.07 16 ¶10-11

Maria kafupiwile tachi mba alinge yize Yehova amwichile. Iye kakapwile ku ulo, alioze mungelo yamba ngwenyi te mapwa kafumba. Iye te kanda achipwa ni chinyingi cha kulela ana, chipwe chocho te malela mwana yoze kulutwe mapwa Mesaya. Amu te kanda achilimona ni lunga; kuchi Maria te malumbununa chikuma chino kuli kasendo kenyi, Yosefwe? (Luka 1:26-33) Yika Maria alingile? Iye kafupile ukwaso wa akwo. Chakutalilaho, kahulile mungelo Gabriele sango jinji hakutwala ku chiteli chacho. (Luka 1:34) Hanyima lia yino, iye “yalinga wenyi wa kuya ku chifuchi” cha milundu mu Yunda hanga akameneke usoko wenyi Izabele. Izabele yachichimieka Maria, mba ni ukwaso wa Yehova yamba umwe uprofeto hakutwala kuli mwana wa Maria. (Luka 1:39-45) Maria yamba ngwenyi, Yehova “hanalingi yuma ya ndundo ni kwoko lienyi.” (Luka 1:46-51) Yehova kazachishile Gabriele ni Izabele hanga atakamise Maria. w23.10 14-15 ¶10-12

Amwe Akwa-Kristu kanaawayisa ni spiritu yisandu, kashika ayo kali ni usepa walipwila ni Yehova. Akwa-Kristu wano akuwayisa 144,000, makakalakala ngwe asasendote mu malilu hamwe ni Yesu. (Uso. 14:1) Muma Musandu mu tabenakulu, munalumbunuka kupwa cho cha ku spiritu ngwe ana ja Zambi muze achili hano hashi. (Roma 8:15-17) Muma Musandu Mwahiana mu tabernakulu, munalumbunuka mu malilu muze Yehova ali. Hina lize liapwile ni kuhandununa Muma Musandu ni Muma Musandu Mwahiana, linalumbunuka mujimba wa Yesu. Muze apwile hano hashi ni mujimba wa mutu, Yesu te kechi kuhasa kunjila mu malilu ni kupwa mwata wa asasendote mu tembele ya ku spiritu. Muze ahanyine mujimba wenyi ngwe chitapo hali atu, Yesu yazulula jila hanga Akwa-Kristu akuwayisa ni spiritu yisandu aye mu malilu. Chizechene ngwe Yesu, Akwa-Kristu akuwayisa ni spiritu yisandu no katamba kuhichika mijimba yo ya musunya, mba atambule chihinga cho mu malilu.—Hepre. 10:19, 20; 1 Kori. 15:50. w23.10 28 ¶13

Ngideone kahwmine mbunge muze amwambile yuma yipi kuli A-Eframe. (Kuyu. 8:1-3) Iye kakevwile uli. Iye kasolwele ngwenyi, kakulikehesa ha kupanjika kanawa yize atu jacho te anambe hali iye. Ni mana eswe yahwisa mbwanja yacho. Chili chilemu makulwana kwimbulula chilweza cha Ngideone ha kupanjika ni kukumbulula kanawa muze mandumbu akwo maamba yuma yipi. (Tia. 3:13) Nyi malinga chocho, maneha sambukila mu chikungulwila. Muze amuchichimiekene ha kulamwina A-Izalele ku moko ja A-Mindiane, Ngideone yahalisa Yehova ha yeswe yize alingile. (Kuyu. 8:22, 23) Kuchi makulwana mahasa kwimbulula chilweza cha Ngideone? Ayo mahasa kuchilinga ha kuhalisa Yehova ha yuma yeswayo malinga. (1 Kori. 4:6, 7) Chakutalilaho, nyi mukulwana wa mu chikungulwila mamuchichimieka mumu lia kulongesa kanawa, iye mahasa kwamba ngwenyi kalinga pande kanawa, mumu lia kulihulikila ha chishina cha malongeso jetu, Liji lia Zambi, hanji mumu lia fumbo lize atambula mu ululikiso wa Yehova. Hita shimbu, makulwana katamba kumana ni kunyonga nyi yize akulongesa yakuhalisa Yehova nyi yakwahalisa ene. w23.06 4 ¶7-8

Nyi muchisoloka ngwe yilemba yetu Yehova keshi kuyikumbulula, muchilita kulihula ngwetu, ‘Shina ngunete lume yuma yize ngunafupu?’ Ha mashimbu amwe, twakunyonga ngwetu, tunanyingika yuma yize yinatupemena. Alioze kuma yize tunechi kuyichi kutuyukisa ha mashimbu anji. Nyi mutulemba kuli Yehova hanga atukwase kuhwisa umwe kapinda, mukuhasa kupwa mutapu walita wakumuhwishilamo kuhiana uze yena unete. Chikwo nawa, yuma yimwe yize twakwita kuli Yehova hanji kuyalitele chinji ni upale wenyi. (1 Yoa. 5:14) Achinyongenu ha chilweza cha yisemi waze etele kuli Yehova hanga akwase mwano anunge mu umwenemwene. Nyi mututala ha yize etele, mutumona ngwetu upi kuushiho. Alioze, Yehova keshi kushinjila atu hanga amuwayile. Iye kanazange hanga yetu eswe, kuchingako ana jetu, tulisakwile yetwene ha kumuwayila. (Shimbi 10:12, 13; 30:19, 20) Kashika shimbu ete kuli Yehova hanga akwase mwano anunge mu umwenemwene, ayo mahasa kumwita aakwase kukwata mwano ku mbunge muze anamulongesa hanga chino chimutwale kuzanga Yehova ni kupwa sepa lienyi.—Yishi. 22:6; Efwe. 6:4. w23.11 23 ¶12

Mumu liaka chili chilemu kutakamisa mandumbu jetu? Mukanda umwe wahanjika ya Mbimbiliya unambe ngwo, liji lize Paulu azachishile hakutwala ku “kutakamisa,” linalumbunuka “kupwa sali lia mutu yoze unamono lamba ni kumukolweza.” Kashika, muze mutukolweza mandumbu jetu waze anamono lamba, acho tunaakwase hanga anunge ni kulingila Yehova ni ushishiko. Hita tangwa mututakamisa umwe ndumbu, acho tunasolola ngwetu twakumuzanga. (2 Kori. 7:6, 7, 13) Nyi umwe mevwila keke mutu yoze unamono lamba, mazanga kumutakamisa ni kumukwasa. Kashika, chitangu twakuvwila mutu keke, hanyima mba mutumutakamisa. Tutalenu chize Paulu anatesa keke ya Yehova, ni utakamiso uze yetu twakuhana. Paulu kanambe ngwenyi, Yehova kali “Tata ya keke, kanda Zambi ya utakamiso.”—2 Kori. 1:3. w23.11 9-10 ¶8-10

Tumbaji eswe a Yesu tangwa limwe mapalika mu yimwe yipikalo. Tutalenu chilweza cha postolo Paulu. Iye kalwezele Akwa-Kristu mu Tesalonika ngwenyi: “Muze twapwile hamwe ni yenu, twapwile ni kunutoweza ngwetu, mutukamona lamba, mba yino ye yinalingiwa.” (1 Tesa. 3:4) Mba kuli A-Korindu, Paulu yasoneka ngwenyi: “Tunazange nunyingike mandumbu hakutwala ku lamba lietu lize liatuwanyine . . . Chocho yitunyonga ngwetu, kutuchi kumona mwono.” (2 Kori. 1:8; 11:23-27) Ni musono, yetu eswe mutuhasa kushimbwila kupalika mu yimwe yipikalo. (2 Timo. 3:12) Mumu lia kufuliela muli Yesu, masepa ni asoko je mahasa kukulinga yuma yipi. Shina akwenu ku mulimo we, kakukupinjisa mumu lia kuhanjika umwenemwene. (Hepre. 13:18) Chikwo nawa, mahasa kukuhungumiona kuli nguvulu mumu lia kwambujola sango jipema. Alioze, chipwe ngwe mutupalika mu lamba lieswalio, nihindu Paulu kambile ngwenyi mutuhasa kuwahilila. w23.12 10-11 ¶9-10

Yakomba kapalikile mu yipikalo yinji. Ana aali a Yakomba, Simeone ni Levi, kalingile yuma yize yapihishile lufuma wa jina lia usoko wo ni lia Yehova. Chikwo nawa, Rakele pwo yoze Yakomba azangile chinji yafwa ha kushita mwanenyi wamuchiali. Kusulaho, mumu lia zala yize yejile mu chifuchi, Yakomba chipwe ngwe kapwile kashinakaji yaya mu chifuchi cha Engitu. (Uputu. 35:16-19; 37:28; 45:9-11, 28) Chipwe ngwe kapalikile mu yipikalo yeka ni yeka, nihindu Yakomba kakahonene kufuliela muli Yehova ni mu yilakenyo yenyi. Hachino, Yehova yazanga chinji Yakomba. Chakutalilaho, Yehova kawahishile Yakomba ni yuma yinji. Yakomba kachichimiekene Yehova muze aliwanyine cheka ni Yosefwe, mwanenyi yoze te akuzanga chinji yoze anyongene ngwe hanafu! Usepa upema uze Yakomba apwile nawo ni Yehova we wamukwashile kukumba yipikalo yino yeswe. (Uputu. 30:43; 32:9, 10; 46:28-30) Ni yetu, nyi twanunga ni kukolesa usepa wetu ni Yehova; mutuhasa kukumba yipikalo yize muyiza susumuku. w23.04 15 ¶6-7

Mu Samu 23, Ndawichi kasolwele ujikijilo wenyi ngwenyi, Yehova kakumuzanga ni kumufunga. Iye kasolwele usepa upema uze apwile nawo ni Yehova, ni kumuvuluka ngwenyi kafunga kami. Ndawichi te kakulivwa mu ufunge upema ha kwecha Yehova hanga amusongwele. Iye te kakujikijila muli Yehova ni mbunge yeswe. Ndawichi kanyingikine ngwenyi, Yehova te mamusolwela zango matangwa eswe ku mwono wenyi. Yika yakwashile Ndawichi kupwa ni shindakenyo yacho? Ndawichi nihindu te kakulivwa ngwenyi, Yehova kakumufunga kanawa. Iye kapwile ni yuma yeswe yize te akufupiwa. Chikwo nawa, Ndawichi kanyingikine ngwenyi Yehova kali sepa lienyi; nawa kali ni utayizo wenyi. Kashika, apwile ni shindakenyo ngwenyi, yeswayo muyilingiwa kulutwe Yehova nihindu mamufunga. Ujikijilo uze Ndawichi apwile nawo ha zango lia Yehova, wapwile ni ndundo kuhiana kusakalala cheswacho apwile ni kwivwa. Ujikijilo wacho watwalile Ndawichi kupwa ni chiseke ni kuwahilila ni yuma yize apwile nayo.—Samu 16:11. w24.01 29 ¶12-13

Kukatuka ha jita yamuchiali ya hashi heswe, atu ja Yehova mu yifuchi yeka ni yeka yapwa ni umwe utuswilo wa kulinga mulimo wo wa kwambujola. Kwamba pundu, mulimo uno unakwase atu anji kunyingika Yehova. Musono, mandumbu a mu Chizavu cha Tusongo kananungu ni kukaula usongwelo wa Yesu. Ayo kakuchilinga ha kusa shindakenyo ngwo, yiyulo yize anakwate yinalite ni yize Yesu anazange. Chikwo nawa, tulayi a mbonge ni makulwana a mu yikungulwila, kakwatongola hanga apalikise usongwelo wacho kuli mandumbu mu yikungulwila yeswe. Makulwana a mu yikungulwila waze hanawayisa kali mu ‘kwoko lia chindume’ lia Kristu. (Uso. 2:1) Ewa, tunanyingika ngwetu, makulwana wano kali yihenge, hachino kakulinga amwe tupalia. Mose ni Yoshua kahengesele ha mashimbu amwe, ni apostolo no che alingile. (Kwa. 20:12; Yoshu. 9:14, 15; Roma 3:23) Chipwe chocho, twakumona pundu ngwetu, Yesu kananungu ni kusongwela ndungo wakanyama, hamwe ni makulwana eswe a mu yikungulwila. Iye manunga ni kuzachisa malunga wano. Kashika, yuma yino yeswe yinatukwase kununga ni kujikijila ha usongwelo uze Yesu anatwehe kupalikila muli malunga wano. w24.02 23-24 ¶13-14

Ni yetu nawa mutuhasa kuhalisa Yehova, ha kuhanjika hali iye ni zango ni kusolola usakwililo wetu. Muze tuli mu munda, muchilita kwiwuluka ngwetu, chikuma chilemu chili kukwasa atu hanga akundame kuli Yehova ni kunyingika ngwo, iye kali Tata yetu wa zango. (Tia. 4:8) Kuli yetu, chili kuyuka chinene ha kusolwela atu mu Mbimbiliya ngwo, Yehova kali Zambi wa zango, ululi, mana, ndundo nawa ngwo kali ni yitanga yikwo yipema. Jila yikwo ya kuhalishilamo Yehova ni kumuvwisa kuwaha, yili muze mutusa tachi hanga tumwimbulule. Chino muchihasa kukwasa atu akwo amone ngwo, twalisa ni atu anji hano hashi. (Mateu 5:14-16) Muze tuli hamuwika ni atu jacho, hanji mutupwa ni uhashi wa kwalumbunwina yize twalisela ni atu akwo. Hachino, atu amwe a mbunge yipema, mahasa kuzanga kulilongesa hakutwala kuli Yehova. Nyi twahalisa Yehova mu mutapu au, iye mawahilila chinji.—1 Timo. 2:3, 4. w24.02 10 ¶7

Mba upwe Mukwa-Kristu wajama, watamba kulilongesa umwe utotombo uze muukukwasa ku mwono. Utotombo wacho, muukukwasa kulinga kanawa milimo ye mu chikungulwila, ni kuwana mulimo uze muukukwasa kufunga usoko we ni kutwama kanawa ni akwenu. Ngwe chilweza, lilongese kutanga ni kusoneka kanawa. Mbimbiliya yakwamba ngwo, kutanga Liji lia Zambi mashimbu eswe ni kulipukuna, chakukwasa mutu kuwahilila ku mwono ni kuyuka ha yeswayo malinga. (Samu 1:1-3) Kutanga Mbimbiliya hita tangwa, muchikukwasa kunyingika kunyonga cha Yehova, muchikukwasa nawa kunyonga kanawa, kupwa ni malinjekela ni kulilongesa kukaula shimbi ja mu Mbimbiliya. (Yishi. 1:3, 4) Yikungulwila yinafupiwa mandumbu waze akulongesa kanawa hanga apwe ni kulongesa, ni kuhana yiyulo yize yinakatuka mu Mbimbiliya. Nyi wanyingika kutanga ni kusoneka kanawa, chino muchikukwasa kululieka pande jipema ni makumbululo waze makolesa ufulielo wa mandumbu. Chikwo nawa, muhasa kusonejeka yikuma yilemu muze unalilongesa, yize muyikolesa ufulielo we ni kuyizachisa hanga ukolweze mandumbu je. w23.12 26-27 ¶9-11

Muze muwivwa woma, pukuna ha yize Yehova makalinga kulutwe muze Satana makamwonona, Chimweso chimwe ha kukunguluka cha mambonge cha 2014, chasolwele amwe asoko waze apwile ni kunyonga chize mwono muukapwa mu Paraisu. Mba yanyonga ha chize mukanda wa —2 Timoteu 3:1-5 muwalumuka ha kuutalikisa mu chifuchi chaha, ngwo: “Alioze nyingika chino ngwe, mu chifuchi chaha mumukapwa mashimbu apema chinji. Mumu atu makalizanga umwe ni mukwo, makazanga yuma ya ku ufulielo, makapwa akwa-kulikehesa, makawayila wika Yehova, makononokena yisemi jo, makapwa ni kusakwilila, akwa-ululi makazanga chinji asoko jo, makapwa ni kulivwashana ni akwo, makapwa ni kuhanjika yuma yipema hali akwo mashimbu eswe, makapwa akwa-kulihumikiza, makazanga yuma yipema, makapwa atu waze akujikijila, makazanga Zambi shimbu azange yuma ya hano hashi, makapwa ni kuwayila Zambi ni mbunge yeswe, kashika wano pwako no hamuwika.” Shina wakuhanjika ni asoko hanji ni mandumbu je hakutwala ku chize mwono muukapwa mu chifuchi chaha? w24.01 6 ¶13-14

Chapwa chipema chinji kunyingika yize anambe ha Samu 149:4, ngwo: “Yehova kakuwahilila ni atu jenyi.” Alioze, amwe kakuhonga ku mbunge ni kuputuka kulihula ngwo: ‘Shina yami nguli lume ni utayizo wa Yehova?’ Tuvumbi twa Yehova anji ashishika ku shakulu, ha mashimbu amwe no kapwile ni manyonga ngwe wano. (1 Samue. 1:6-10; Yombi 29:2, 4; Samu 51:11) Mbimbiliya yakusolola pundu ngwo atu chipwe ngwe kali yihenge, nihindu mahasa kuvwisa Yehova kuwaha ni kupwa ni utayizo wenyi. Kuchi mutuhasa kuchilinga? Mutuchilinga ha kusolola ngwetu twakufuliela muli Yesu ni kutupapachisa. (Yoa. 3:16) Nyi twachilinga, mutusolola ku mbunga ngwetu twalikonyeka ku shili yetu ni kulinga chilakenyo kuli Yehova hanga tulinge upale wenyi. (Yili. 2:38; 3:19) Yehova kakuwahilila chinji muze twakulinga yuma yino hanga tukundame kuli iye. Nyi twasa tachi hanga tumanunune chilakenyo chize twalingile, mutupwa ni utayizo wa Yehova ni kupwa masepa jenyi.—Samu 25:14. w24.03 26 ¶1-2

Nyi ngwe manguvulu matukanjisa kwambujola, mutuhasa kwimbulula apostolo ha kununga ni kwambujola sango jipema. Mutuhasa kupwa ni shindakenyo ngwetu, Yehova matukwasa kwambujola sango jipema. Kashika, twatamba kwita Yehova mu yilemba hanga atwehe hamu ni mana mba twambujole ni tachi muze tunapalika mu yuma yikalu chinji, hi wika ko ku musunya, alioze ni ku manyonga nawa. Amwe kafwishile atu waze azanga chinji, akwo kanapalika mu yuma yikalu mu usoko ngwe, yihungumiona ni yipikalo yikwo nawa. Chaluyinda, yuma ngwe musongo wa COVID-19 ni jita yinapihisa chinji yuma hano hashi. Hachino, lemba kuli Yehova ni mbunge yeswe. Mulweze yuma yeswe yize unapalika ngwe unahanjika ni sepa lie. Nyi wachilinga, muhasa kupwa ni shindakenyo ngwe Yehova makukwasa. (Sam 37:3, 5)Nyi mutununga ni kulemba, chino muchitukwasa hanga ‘tunyongonone mu yipikalo.’ (Roma 12:12) Yehova kananyingika yize tuvumbi twenyi anapalika, kashika ‘kakwivwa muteto wo wa kwalamwina.’”—Sam 145:18, 19. w23.05 5-6 ¶12-15

Muze tunazange kukwata chiyulo chilemu, muchilita kunyingika upale wa Yehova, mba mutulinga yuma kulita ni upale wacho. (Efwe. 5:17) Muze mutuwana shimbi ja mu Mbimbiliya jize jinakwate ha chikuma chetu, muchipwa ngwe twawana yize Yehova ananyongo ha yize tunambe kulinga. Mba nyi twakaula shimbi ja Yehova jize twawana, muchitukwasa kukwata yiyulo yipema. “Chingulungulu” hanji ngwetu, mukwa-kole yetu Satana, kanazange tulihulikile chinji ha yuma ya hano hashi hanga tuhone kupwa ni mashimbu a kulingila Yehova. (1 Yoa. 5:19) Chakuhona kunyingika, Mukwa-Kristu mahasa kuputuka kulihulikila chinji ha kufupa mbongo, kuya ku shikola ni ku mulimo, shimbu afupe uhashi wa kulingila chinji Yehova. Nyi yino muyilingiwa kuli Mukwa-Kristu, yili yilayi yize yinasolola ngwo haputuka kunyonga ngwe akwa-hashi. Tunanyingika ngwetu, mbongo, kulilongesa ku shikola ni yuma yikwo ya ku musunya hi yipi ko. Alioze, yuma yino yeswe kuyatambile kupwa ha chiheta chitangu ku mwono wetu. w24.03 24 ¶16-17