Muze Mutu Yoze Walimbata Nenyi Malumbuka

“Nevwile ngwe mungufwa muze lunga liami angulwezele ngwo, mangwecha hamukunda wa umwe mwana pwo. Muze newulukile yuma yeswe yize napwile ni kumulingila, chakanyongene ngwami iye te mahasa kulinga chuma cha mutapu au.”—Maria, wa ku Espanha.

“Muze mukwetu-pwo alumbukile ni lunga mweka, nevwile yikola yinji ku mbunge. Yuma yeswe yize twatesele hanga te tulinge mu ulo wetu yatokele. Ha mashimbu amwe muze te nakwivwa ngwe yuma yacho hiyapalika, susumuku munguputuka kuyishinginyeka nawa.”—Bill, wa ku Espanha.

MUTU kakwivwa yikola yinji ku mbunge muze yoze alimbata nenyi malumbuka. Kwamba pundu, amwe waze alimbata kakuhasa kukonekena mukwo yoze walumbuka nyi malikonyeka, nawa kakulikolweza hanga akolese ulo wo.a Chipwe ngwe ulo muununga hanji ka, yoze manyingika ngwenyi, mukwo kalumbuka, kakwivwa yikola yinji ku mbunge. Kuchi mutu mahasa kukumba yikola yacho?

VERSU JA MU MBIMBILIYA JIZE MUJIHASA KUKUKWASA

Chipwe ngwe atu anji kakupalika mu kapinda wacho, nihindu kakuwana utakamiso mu Mbimbiliya. Hanalilongesa ngwo, Zambi kakumona masoji jo, ni kulipikala ha yikola yo.—Malakia 2:13-16.

“Hakachi ka kulumbama cha manyonga jami muchima, kulembejeka che chakunguwahisa.”—Samu 94:19.

Bill yamba ngwenyi, “muze natangile chisoneko chino, yingunyonga Yehova kanangulembejeka ni zango lieswe, ngwe umwe tata wa keke.”

“Kuli angunu kumulisolola uli mungunu.”—Samu 18:25.

Carme, yoze lunga lienyi walumbukile ha tukweji anji, yamba ngwenyi, “lunga liami kakashishikile kuli yami. Alioze, yingujikijila ha ushishiko wa Yehova. Mumu Yehova nilimwe tangwa kechi keza kanguhichika ukawami.”

“Kanda nukalipikala ha chuma nichimwe; alioze ha yuma yeswe ku kulemba ni kuliumba . . . kwita chenu akachinyingike kuli Zambi. Mba sambukila ya Zambi, yize yakuhiana kunyonga cheswe, muyikafunga mbunge jenu.”—A-Fwilipu 4:6, 7.

Sasha yamba ngwenyi, “natangile chisoneko chino ha yisuho yinji. Muze te nakulemba mashimbu eswe, Zambi yangwaha sambukila ku mwono wami.”

Atu eswe twatongola helu, ha mashimbu amwe kevwile ngwe kumafwa. Alioze ayo yajikijila muli Yehova ni kuwana tachi mu Liji lienyi. Bill yamba ngwenyi: “Ufulielo wami wangukwashile chinji muze namwene ngwe ufuku hiwanjila mu swaha. Chipwe mungwenda ndusu mu “chikulo cha chizulie cha kufwa,” Zambi kali hamwe ni yami.—Samu 23:4.

a Nyi muzanga nawa kunyingika hakutwala ku chikuma chino, tala chikuma “Quando o cônjuge é infiel” ha Despertai! ya 22 Abril, 1999.

Yize Yakwashile Atu Amwe Kunyongonona

Pukuna ha Yisoneko Yize Muyihasa Kukutakamisa.

Bill yamba ngwenyi, “yami nakutanga mukanda wa Yombi ni wa Masamu, nakusonejeka maliji waze nakumona analite ni yuma yize ngunapalika ku mwono wami. Mikanda yino yakungukwasa kunyingika ngwami, atu waze ayisonekene no kapalikile mu kapinda ni yipikalo ngwe yize napalikile.”

Wana utakamiso ha kupanjika miaso yipema.

Carme yamba nawa ngwenyi, “nyi chamwene tulo ha ufuku, nakupanjika miaso. Miaso te yakungutakamisa chinji.” Daniele yamba ngwenyi: “Yami nalilongesele kwimba kalialia, kuwaha chize chakwiza ha kwimba kalialia changukwashile kupwa ni sambukila hamwe ni uwahililo.”

Hanjika ni umwe mutu ha yize unevu.

Daniele yamba ngwenyi, “Te chishi kuzanga kuhanjika ni akwetu hakutwala ku yize ngunevu. Alioze napwile ni masepa apema, nawa yinguputuka kuhanjika no matangwa eswe. Muze te nakuhanjika no hanji kwasonekena hakutwala ku yize ngunevu, chino te chakungukwasa chinji.” Sasha yamba ngwenyi: “Ukwaso uze asoko jami anguhele wapwile ulemu chinji. Ha mashimbu eswe mama te kakungukwasa. Muze te nakuhanjika iye te kakungupanjika. Tata neye kangukwashile ni kungutakamisa hanga nguwahilile cheka.”

Nyongonona mu Yilemba.

Carme yamba ngwenyi, “te nakulemba mashimbu eswe.” Nevwile ngwami, Zambi kali hamwe ni yami, kanangupanjika ni kungukwasa. Mashimbu jacho akalu kangukwashile chinji kukundama kuli Zambi.”