Muze Muwivwa Ngwe Watamba Kufwa
SHINA hiunevu ngwe kuwatambile nawa kununga ni mwono? Nyi hiunevu chocho, muhasa kunyingika chize Adriana apwile ni kwivwa. Te kakupinda ni musongo wa kuzakalala mu mbunge, musongo wacho te wakumunehena yinyengo yinji ni kumuhongesa chinji. Muze Adriana amupimine yamuwana ni musongo wa kuhonga mu mbunge.
Tala nawa chilweza cha umwe lunga wa ku Japão anavuluka ngwo, Kaoru, yoze te wakufunga yisemi jenyi ayiza. Yamba ngwenyi, “ha mashimbu jacho te nakuhonga chinji hamukunda wa milimo yinji. Ha kupalika cha mashimbu mate akulia te chishi kupwa no, ni tulo te chishi kwamona. Ha chino, yingunyonga ngwami, yipikalo yacho te muyihwa nyi mungufwa.”
Umwe lunga wa ku Nigeria avuluka ngwo, Ojebode, yamba ngwenyi, “ha mashimbu eswe te nakwivwa yinyengo ni kulila, kashika yingufupa jila yakulishiha.” Alioze, Ojebode, Kaoru, ni Adriana kakalishihile. Chipwe chocho, ha miaka yeswe atu anji kakulishiha ene.
KUZE MUHASA KUWANA UKWASO
Atu anji waze akulishiha kali malunga, anji a kuli ayo kakwivwa sonyi ja kwita ukwaso. Yesu kambile ngwenyi mutu wayiza mwe wakufupa mbuki. (Luka 5:31) Kashika, nyi wakunyonga kulishiha, kanda wivwa sonyi ja kwita ukwaso. Atu anji waze ali ni musongo wa kuhonga ku mbunge, hananyingika ngwo, kufupa uukiso kuli ma ndotolo chakwakwasa kunyongonona. Ojebode, Kaoru, ni Adriana, eswe katambwile ukwaso kuli ndotolo, haliapwila kakuhasa kunyongonona mu yikola yo.
Ma ndotolo mahasa kuzachisa yitumbo hanji kuhanjieka ni mieji hanga awuke musongo wa kuhonga ku mbunge. Atu waze ali ni musongo wa kuhonga ku mbunge, kakuzanga hanga asoko ni masepa jo aakwase, asolwele zango ni kwapanjika kanawa. Alioze sepa mupema yoze mahasa kupwa nenyi kali Yehova Zambi, yoze wakuhana ukwaso upema kupalikila mu Liji lienyi, Mbimbiliya.
SHINA LAMBA LINO MULIZA KAHWA?
Atu waze ali ni musongo wa kuhonga ku mbunge kanji-kanji kakufupiwa uwukiso wa mashimbu anji, ni kunyingika chize atamba kutwama ni musongo wacho mba alumune yimwe ku mwono wo. Alioze, nyi wakupinda ni musongo uno, muhasa kulihulikila ha mwono upema wa kulutwe lia matangwa, ngwe chize akulinga Ojebode. Yamba ngwenyi, “ngunashimbwila kumona umanunuko wa mukanda wa Izaia 33:24, muze ‘Niumwe watungako mamba ngwenyi, Ngunayiji.’” Ngwe Ojebode, fuliela ha chilakenyo cha Zambi cha “hashi haha,” haze “yikola” kuyichi kapwaho nawa. (Usolwelo 21:1, 4) Yilakenyo yino yinasolola ngwo, yikola yeswe muyikahwa. Lamba lie mulikahwa ku miaka yeswe. Kuuchi kevwa nawa yinyengo ya lamba, mumu “yuma yakushi kechi kayiwuluka nawa, chipwe kuyinyonga.”—Izaia 65:17.