MUTWE WA KULILONGESA 41
MWASO 13 Kristu, Chilweza Chetu
Yika Mutuhasa Kulilongesa ha Matangwa 40 Akasula a Yesu Hano Hashi?
“O kamumwene ha matangwa 40 mba iye yaalongesa hakutwala ku Wanangana wa Zambi.”—YILI. 1:3.
YIZE MUTULILONGESA
Mutumona chize mutuhasa kwimbulula chilweza cha Yesu ha matangwa jenyi akasula 40 hano hashi.
1-2. Yika yalingiwile kuli tumbaji twa Yesu aali waze te anayi ku Emeu?
LILI tangwa 16 ya Nisane, 33 M.J., tumbaji twa Yesu kananenganyana chinji ni kwivwa woma unji. Aali a kuli ayo, yahichika Yerusaleme ni kuya ku Emeu. Kukatuka ku Yerusaleme ni kuya ku mbonge yacho, hapwile kilometro 11. Ayo te kanahongo chinji mumu lia kufwa cha Yesu. Kutalatala chize apwile nacho ha yize Mesaya te maalingila, chasolokele ngwe chatoka. Alioze yikulingiwa chuma chize o te keshi ni kushimbwila.
2 Umwe lunga yoze o kanyingikine yaakundama ni kuputuka kwenda no. Mba tumbaji yamulweza yuma yipi yize yalingiwile kuli Yesu. Chocho lunga wacho, yaputuka kwalweza yuma yize o kechi keza kavulama “katu kuli Mose ndo kuli Aprofeta eswe.” Iye yaalumbunwina ngwo, Mesaya chamutamba kumona lamba ni kufwa. Muze tumbaji ahetele ku Emeu, ayo yanyingika ngwo lunga wacho te Yesu, yoze Zambi ahindwishile ku ufwe. Mutuhasa kunyonga chiseke chize tumbaji evwile ha kunyingika ngwo Mesaya kali ni mwono.—Luka 24:13-35.
3-4. Yika yalingiwile kuli tumbaji twa Yesu, mba yika mutumona ha mutwe uno? (Yilinga 1:3)
3 Ha matangwa jenyi 40 akasula hano hashi, Yesu yasoloka yisuho yinji kuli tumbaji twenyi. (Tanga Yilinga 1:3.) Ha mashimbu jacho, woma ni chinyengo cheswe chize tumbaji apwile ni kwivwa yichalumuka chiseke ni ujikijilo, ni kwaha hamu lia kwambujola Wanangana ni kulongesa akwo umwenemwene.a
4 Mutuyuka chinji ha kulilongesa hakutwala ku yize Yesu alingile ha mashimbu jacho. Ha mutwe uno, mutumonaho yize Yesu alingile ha mashimbu jacho (1) hanga atakamise tumbaji twenyi, (2) hanga aakwase kunyingika kanawa yisoneko, ni (3) hanga aafumbe ha yiteli yize te mapwa nayo kulutwe lia matangwa. Ha hita chikuma, mutumona chize mutuhasa kwimbulula chilweza cha Yesu.
KOLWEZA AKWENU
5. Mumu liaka tumbaji twa Yesu afupiwile utakamiso?
5 Tumbaji twa Yesu kafupiwile chinji utakamiso. Mumu liaka? Mumu amwe a kuli ayo kahichikile mazuwo, asoko ni mingoso yo hanga akaule Yesu mashimbu eswe. (Mateu 19:27) Akwo kapwile ni kwahuma mukachi ka atu ha mashimbu jacho, mumu lia kupwa tumbaji twa Yesu. (Yoa. 9:22) Ayo kahichikile yuma yino yeswe mumu lia kutayiza ngwo, Yesu kapwile Mesaya yoze alakenyene. (Mateu 16:16) Alioze muze Yesu afwile, o yanenganyana chinji ni kutokesa kutalatala cho.
6. Yika Yesu alingile hanyima lia kumuhindwisa?
6 Yesu kanyingikine kanawa ngwenyi, yikola yize tumbaji twenyi apwile ni kwivwa, kuyakapwile ni kusolola ngwo kali ni ufulielo ukepe. Alioze kanyingikine ngwenyi, tumbaji twenyi te mahasa kulivwa chocho mumu lia kufwa chenyi. Kashika ha tangwa lizeliene amuhindwishile, iye yaputuka kutakamisa masepa jenyi. Ngwe chilweza, yasoloka kuli Maria Ka-Mandala muze apwile kufuka lienyi ni kulila. (Yoa. 20:11, 16) Yasoloka nawa kuli tumbaji aali waze twatongola ku uputukilo wa mutwe uno ni kuli postolo Petulu. (Luka 24:34) Yika mutuhasa kulilongesa ha chilweza chino cha Yesu? Tutalenu yize yalingiwileko muze asolokele kuli Maria Ka-Mandala.
7. Kulita ni Yoano 20:11-16, yika Maria te analingi yize Yesu amwene, mba yika Yesu amulingilile? (Tala nawa chizulie.)
7 Tanga Yoano 20:11-16. Ha chimene-mene 16 ya Nisane, amwe mapwo yaya ndo kufuka kuze afunjile Yesu. (Luka 24:1, 10) Umwe wa kuli mapwo jacho kapwile Maria Ka-Mandala. Muze ahetele ku fuka, iye yamona ngwo mujimba wa Yesu te kuushimo nawa. Chocho yazomboka ni kulweza Petulu ni Yoano yize yalingiwileko. Malunga wano aali yazomboka ndo ku fuka, Maria yakaula munyima. Muze asele shindakenyo ngwo mu fuka mwapwile mwamokomoko, malunga jacho yafuna ku zuwo. Alioze Maria kaakawile. Iye yanunga kuze kwene ku fuka ni kulila. Kakanyingikine chipwe hakehe ngwenyi, Yesu te kanamono yuma yeswe yize analingi. Yesu kamwene pwo wacho malila, chocho yazanga kumulembejeka. Hachino, yasoloka kuli iye ni kumulweza maliji akehe wika waze amutakamishine. Yahanjika nenyi ni kumwaha umwe mulimo ulemu, wa kuya ni kulweza mandumbu jenyi ngwo Yesu kali ni mwono.—Yoa. 20:17, 18.
Imbulula Yesu ha kutala kanawa yize mandumbu anapalika ni kulinga yize muhasa hanga waatakamise (Tala paragrafu 7)
8. Kuchi mutuhasa kwimbulula Yesu?
8 Kuchi mutuhasa kwimbulula Yesu? Mutuhasa kwimbulula Yesu ha kutakamisa mandumbu jetu a malunga ni a mapwo hanga anunge ni kuwayila Yehova. Ngwe Yesu, twatamba kunyingika yize akwetu anapalika ni chize analivu mba twatakamise. Tutalenu yize yalingiwile kuli ndumbu Jocelyn, yoze mwanakwo wafwile chipi ku yimwe ponde. Iye yamba ngwenyi: “Ha tukweji anji, nanenganyanyine ni kuhonga chinji.” Alioze umwe ndumbu ni mukwo-pwo yamusanyika ku zuwo lio ni kumwecha hanga ahanjike chize te analivu. Ayo yamupanjika kanawa ni kumulembejeka ni kumulweza ngwo, Yehova kakumulemesa chinji. Jocelyn yamba nawa ngwenyi: “Napwile ni kusakalala chinji ni kulivwa ngwe nguli mu umwe kangonga mu kalunga lwiji. Alioze, Yehova yangulamwina kupalikila muli mandumbu wano. Ayo kangukwashile kupwa cheka ni uwahililo wa Yehova.” Ni yetu, mutuhasa kutakamisa akwetu ha kwaecha hanga ahanjike chize analivu ni kwapanjika kanawa. Nyi twachilinga, mututakamisa akwetu ni kwakwasa anunge ni kuwayila Yehova.—Roma 12:15.
KWASA AKWENU HANGA ANYINGIKE LIJI LIA ZAMBI
9. Kapinda muka tumbaji twa Yesu apwile nenyi, mba kuchi iye aakwashile?
9 Tumbaji twa Yesu te kakufuliela ha Yisoneko ni kusa tachi hanga ononokene Yehova. (Yoa. 17:6) Alioze ayo kakanyingikine mumu liaka Yesu amushihile ngwe chingulungulu. Chipwe chocho, Yesu kanyingikine ngwenyi tumbaji twenyi kapwile ni ufulielo nawa te kakuzanga Yehova, alioze kamwene ngwenyi, o te kanafupiwa kunyingika kanawa Yisoneko. (Luka 9:44, 45; Yoa. 20:9) Kashika aakwashile hanga apwe ni ulumbunwiso upema wa yize o atangile mu Yisoneko. Tutalenu chize alingile chino muze asolokele kuli tumbaji twenyi aali waze te anayi ku Emeu.
10. Kuchi Yesu akwashile tumbaji twenyi kunyingika ngwo, chamwenemwene iye kapwile Mesaya? (Luka 24:18-27)
10 Tanga Luka 24:18-27. Ku uputukilo, Yesu kakalisolwele. Shimbu achilinge, iye yaahula yimwe yihula. Mumu liaka achilingile? Kota kazangile kwaha uhashi hanga ambe chize analivu ku mbunge. Yino ye ayo alingile lume. Yamulumbunwina ngwo, ayo kapwile ni kushimbwila hanga Yesu apwe mwanangana mu Izalele, ni kwatusula mu chiyulo cha A-Roma. Hanyima lia kulumbununa chize te analivu, Yesu yaakwasa kupalikila mu Yisoneko hanga anyingike yize yalingiwileko.b Ha tangwa lizeliene ha ufuku, Yesu yawana nawa tumbaji akwo ni kwalumbunwina uprofeto wacho. (Luka 24:33-48) Yika yino yinatulongesa?
11-12. (a) Yika mutuhasa kulilongesa ha mutapu uze Yesu apwile ni kulongesa umwenemwene wa mu Mbimbiliya? (Tala nawa yizulie.) (b) Kuchi Nortey amukwashile kuli longeshi wenyi?
11 Kuchi mutuhasa kwimbulula Yesu? Muze unasongwela malongeso a Mbimbiliya, hula longi yihula yize muyimukwasa kulumbununa chize analivu. (Yishi. 20:5) Hanyima lia kunyingika chize analivu, musolwele chize mahasa kuwana yisoneko ya mu Mbimbiliya yize muyimukwasa ha chikuma chacho. Shimbu umulweze yize atamba kulinga, muhule hakutwala ku jimwe versu ja mu Mbimbiliya, ni kumukolweza apukune ha yize anatange ni chize mahasa kuyisa mu yitanga. Tutalenu chilweza cha ndumbu Nortey yoze watwama mu Gana.
12 Nortey kapwile ni miaka 16 muze aputukile kulilongesa Mbimbiliya. Alioze, asoko jenyi te keshi kuzanga hanga alilongese Mbimbiliya. Yika iye alingile mba anunge ni kulilongesa? Longeshi wenyi wa Mbimbiliya yamutangila Mateu kapitulu 10 ni kumulweza ngwenyi, Akwa-Kristu amwenemwene mapalika mu yihungumiona. Nortey yamba ngwenyi: “Muze naputukile kumona yihungumiona, yingupwa ni shindakenyo ngwami, nawana umwenemwene.” Longeshi wenyi yamusolwela nawa Mateu 10:16 unasolola ngwo, twatamba kukanyama. Chikwo nawa, ayo yahanjika ha chize versu yacho te muyikwasa Nortey kulumbunwina asoko jenyi yize iye afuliela ni vumbi lieswe. Hanyima lia kumupapachisa, Nortey yazanga kupwa pionelu, alioze tato kazangile hanga iye alilongese shikola yinene. Cheka nawa, longeshi wenyi shimbu amulweze yize atamba kulinga, yamuhula yihula yize yamukwashile kunyonga ha Shimbi ja mu Mbimbiliya ni kukwata yiyulo yenyi mwene. Yika yalingiwileko? Nortey yakwata chiyulo cha kunjila mu mulimo wa shimbu lieswe. Tato kakazangile chiyulo chacho, chocho yamuhuma ku zuwo. Yika Nortey anambe hakutwala ku yuma yino yeswe? Iye kanambe ngwenyi: “Chishi kukakajana ngwami, nakwachile chiyulo chalita.” Muze twakukwasa akwetu hanga apukune ha yize Mbimbiliya yakwamba, twakwakwasa, akolese ufulielo wo ni kununga ni kulingila Yehova.—Efwe. 3:16-19.
Imbulula Yesu ha kukwasa akwenu anyonge ha Yisoneko (Tala paragrafu 11)e
FUMBA AKWENU APWE ‘YAWANA YA ATU’
13. Yika Yesu alingile hanga mulimo wa kwambujola ununge chipwe muze te mafuna mu malilu? (A-Efwesu 4:8)
13 Muze apwile hano hashi, Yesu kalingile yeswe yize Yehova amwichile. (Yoa. 17:4) Alioze kakanyongene ngwenyi, ‘Mba yuma yeswe yende kanawa, iye mwene mwe watamba kuyilinga.’ Shimbu anyonge chocho, ha miaka yitatu ni chipinji ya mulimo wenyi, iye yafumba akwo. Iye te kakujikijila hali tumbaji twenyi, chocho yaaha chiteli cha kwambujola sango jipema, kulongesa ni kufunga mapanga alemu a Yehova. Amwe yaputuka kutambula yiteli yilemu kota muze te kanda achipwa ni miaka 30. (Tanga A-Efwesu 4:8.) Malunga wano, kakalakalile chinji hamwe ni Yesu ni kushishika kuli iye. Alioze muze te kanda achiya mu malilu, iye yaaha fumbo lize te muliakwasa kupwa ‘yawana ya atu.’ Kuchi aafumbile?—Tala nota ya estudo ha A-Efwesu 4:8 mu malimi akwo.
14. Yika Yesu alongesele tumbaji twenyi ha matangwa jenyi 40 a kasula hano hashi? (Tala nawa chizulie.)
14 Yesu kahanyine yimwe yiyulo kuli tumbaji twenyi yize te o atamba kwivwa, alioze kachilingile ni zango. Ngwe chilweza, iye kanyingikine ngwenyi, amwe a kuli tumbaji twenyi kapwile ni kukakajana, chocho yaakwasa ha kwaha yimwe yiyulo. (Luka 24:25-27; Yoa. 20:27) Iye yaalweza hanga alihulikile ha kufunga tuvumbi twa Yehova shimbu alihulikile ha kufupa mbongo. (Yoa. 21:15) Yaewulula nawa hanga ahone kulitesa ni akwo muze analingila Yehova. (Yoa. 21:20-22) Chikwo nawa, Yesu kaakwashile kwehuka manyonga api waze apwile no hakutwala ku Wanangana wa Zambi ni kwakwasa hanga alihulikile mu mulimo wa kwambujola. (Yili. 1:6-8) Yika makulwana a mu chikungulwila mahasa kulilongesa ha chilweza cha Yesu?
Imbulula Yesu ha kufumba mandumbu a malunga hanga atambule yiteli (Tala paragrafu 14)
15-16. (a) Mu mutapu uka makulwana a mu chikungulwila mahasa kwimbulula Yesu? Lumbununa. (b) Kuchi Patrick ayukile ha chiyulo chize amuhele?
15 Kuchi makulwana a mu chikungulwila mahasa kwimbulula Yesu? Ayo machilinga ha kufumba mandumbu a malunga hanga atambule yiteli mu chikungulwila chipwe waze achili akweze.c Alioze makulwana katambile kushimbwila ngwo, mandumbu waze anafumbu apwe angunu. Ayo katamba kuhana yiyulo ya zango kuli mandumbu wano akweze hanga ajame ni kumona ulemu wa kupwa akwa-kulikehesa, kushishika ni kulihana hanga alingile akwo.—1 Timo. 3:1; 2 Timo. 2:2; 1 Petu. 5:5.
16 Tutalenu chize ndumbu Patrick ayukile ha chiyulo chize amuhele. Muze apwile mukweze, iye kapwile mutu mukalu ha kuhanjika ni akwo chipwe kuli mandumbu a mapwo. Chocho umwe mukulwana wa mu chikungulwila wajama yamona ngwenyi, Patrick katambile kwalumuna yitanga yenyi. Mba yamwaha chimwe chiyulo chakuhona kulijinga-jinga, alioze ni zango. Patrick yamba ngwenyi: “Nalivwile kanawa ha kungwaha chiyulo chacho. Kanji-kanji te nakunenganyana muze napwile ni kumona akwetu matambula yiteli yize napwile ni kuzanga. Alioze chiyulo cha mukulwana wacho changukwashile kumona ngwami, natamba kupwa mukwa-kulikehesa ni kulingila mandumbu jami a malunga ni a mapwo, shimbu nguzange kupwa ni yiteli hanji kufupa kusoloka mu chikungulwila.” Muze achilingile, Patrick yamutongola ngwe mukulwana wa mu chikungulwila muze apwile ni miaka 23.—Yishi. 27:9.
17. Kuchi Yesu asolwele ngwenyi te kakujikijila tumbaji twenyi?
17 Yesu kakahanyine wika kuli tumbaji twenyi chiteli cha kwambujola, alioze kaehele nawa chiteli cha kulongesa. (Tala nota ya estudo ha Mateu 28:20 “kwalongesa.”) Kota tumbaji kanyongene ngwo, kechi kuhasa kumanununa chiteli chacho. Alioze, Yesu kapwile ni shindakenyo ngwenyi, o te mahasa kulinga mulimo wacho. Kashika aalwezele ngwenyi: “Ngwe chize Tata angutumine, ni yami ngunanutumu.”—Yoa. 20:21.
18. Kuchi makulwana a mu chikungulwila mahasa kwimbulula Yesu?
18 Kuchi makulwana a mu chikungulwila mahasa kwimbulula Yesu? Makulwana waze ajama kakumona ulemu wa kuhana yiteli kuli waze anafumbu. (Fwili. 2:19-22) Ngwe chilweza, makulwana mahasa kukalakala hamwe ni akweze muze anakomba-komba ni kululieka Zuwo lia Wanangana. Ayo mahasa kuhana mulimo kuli umwe ndumbu ni kumulweza chize maulinga, mba chisuho chikwo mecha hanga ndumbu wacho a ulinge ukawenyi. Ndumbu Matthew, yoze machimutongola ngwe mukulwana mu chikungulwila yamba ngwenyi, chuma chize chamukwashile chinji chapwile fumbu lize amuhele chitangu kuli makulwana, ni kumujikijila ngwo mahasa kumanununa yiteli yenyi ukawenyi. Iye yamba ngwenyi: “Muze te nakuhengesa ha yisuho yimwe, ayo te kakungukwasa ngumone chize munguhasa kulinga kanawa mulimo wacho ha chisuho chikwo.”d
19. Yika tunazange kulinga?
19 Ha matangwa jenyi 40 akasula hano hashi, Yesu katakamishine akwo, yaalongesa ni kwafumba. Ni yetu tunazange chinji kwimbulula yize iye alingile. (1 Petu. 2:21) Yesu mwene matukwasa kuchilinga, mumu kalakenyene ngwenyi: “Nyingikenu ngwenu nguli hamuwika ni yenu matangwa eswe, ndo ku songo lia miaka yino.”—Mateu 28:20.
MWASO 15 Halisenu Mwana Mutangu wa Yehova
a Evanjelu ni mikanda yikwo ya mu Mbimbiliya, yakuhanjika ha yisuho yinji yize Yesu asolokele kuli atu hanyima lia kumuhindwisa, kuli Maria Ka-Mandala (Yoa. 20:11-18); kuli mapwo akwo (Mateu 28:8-10; Luka 24:8-11); kuli tumbaji 2 (Luka 24:13-15); kuli Petulu (Luka 24:34); kuli apostolo kuchizako Tomase (Yoa. 20:19-24); kuli apostolo kuchingako Tomase (Yoa. 20:26); kuli tumbaji 7 (Yoa. 21:1, 2); kuli tumbaji kuhiana 500 (Mateu 28:16; 1 Kori. 15:6); kuli mwanako Tiangu (1 Kori. 15:7); kuli apostolo eswe (Yili. 1:4); ni kuli apostolo waze apwile hakamwihi ni Mbetaniya. (Luka 24:50-52) Yisuho yikwo kota kakayisonekene mu Mbimbiliya.—Yoa. 21:25.
b Nyi unazange kunyingika uprofeto ukwo hakutwala kuli Mesaya tala chikuma, “Shina Uprofeto Wakusolola Ngwo Yesu Mwe Mesaya?” ha site jw.org.
c Makulwana amwe a mu chikungulwila waze achili akweze, mahasa kwatongola ngwe tulayi a mbonge, chipwe ngwe achili ni miaka 25 hanji 30. Alioze, chitangu katamba kupwa ni yimwe yinyingi ha kukalakala ngwe makulwana a mu chikungulwila.
d Nyi muzanga nawa kunyingika chize muhasa kukwasa umwe mukweze apwe ni yiteli, tala Kaposhi wa Kutalila Agosto, 2018 mafwo 11-12, paragrafu 15-17, ni Kaposhi wa Kutalila 15 Abril, 2015 mafwo 3-13.
e ULUMBUNWISO WA CHIZULIE: Hanyima lia kunyingika kanawa yize Mbimbiliya yakulongesa, umwe longi kakwata chiyulo cha kumbila yuma ya kulinga nayo chiwanyino cha Natale.