Kuzauka Cha Kalunga-Lwiji Muchila

TALA yize yinapuko! Au Mose, kanolola mukombo wenyi helu lia Kalunga-lwiji Muchila. Kali hamuwika ni A-Izalele, haalamwina. Alioze Falau ni maswalale jenyi eswe kanashimbama mu Kalunga-lwiji. Tutalenu kuchi chino chinakapwa.

Twalilongesanga ngwo, Falau yecha A-Izalele hanga aye kwo muze te Zambi hatuma lamba liamuchikumi kuli A-Engitu. A-Izalele kanakatuhukamo mu unji wa 600,000 a malunga, hamwe ni mapwo ni ana. Nawa ni atu akwo anji waze anakafuliela kuli Yehova yaya hamuwika ni A-Izalele. Eswe yambata mapanga jo, ni pembe ni ngombe.

Muze te kanda achiya, A-Izalele yeta kuli A-Engitu mazalo, ni upite wa oru ni wa prata. A-Engitu te woma unji anevu, ha mukunda wa lamba lia kasula lize anakapwa nalio. Ayo yahana kuli A-Izalele yuma yeswe yize ayo anaketa.

Kulutwe lia amwe matangwa, A-Izalele yaheta ku Kalunga-lwiji Muchila. Hazehene ayo yahwima. Alioze, Falau ni atu jenyi yaputuka kwivwa kupihia ku mbunge ha kwecha A-Izalele hanga aye kwo. Ayo yamba ngwo, ‘Twachinyisa tupinji jetu!’

Kashika, Falau yanyonga cheka. Yalulieka kawashi-kawashi mashinyi a jita ni maswalale. Ayo yaputuka kukaula A-Izalele hamuwika ni 600 ja mashinyi a jita, ni mashinyi akwo eswe a mu Engitu.

Muze A-Izalele amwene Falau ni maswalale jenyi, yaputuka kwivwa woma unji. Ayo te kaso kumona kuze machinyina. Kulutwe te Kalunga-lwiji Muchila uliko, kunyima te A-Engitu anezako. Alioze Yehova yasa limwe lelwa hanga lihandunune atu jenyi ni A-Engitu. Kashika, ayo te keshi kuhasa kumona A-Izalele hanga akwate.

Yehova yamba kuli Mose ngwenyi, zundula mukombo we uwolole ha Kalunga-lwiji Muchila. Muze iye alingile chocho, Yehova yaneha chimwe chijimbi chinene cha ku chivumbuko. Meya eswe a mu Kalunga-lwiji yaliteta ha muchima yaakala mbe sali ni sali ngwe yikalakala.

Mba A-Izalele yenda hashi homu mukachi ka Kalunga-lwiji. Kunakapalika maola anji ha kuzauka cha tununu twa atu ni yimuna yo yeswe ha kwalamwina hanga aye sali likwo. Mba, A-Engitu yaamona cheka A-Izalele. Tupinji jo te kanachina! Ayo yanjila mu kalunga-lwiji hanga aakaule.

Muze ayo alingile chocho, Zambi yasepwola malota ja mashinyi jo. A-Engitu yevwa woma unji yaputuka kuteta ngwo: ‘Yehova mwe unakalila A-Izalele. Tufwambukenu muno!’ Alioze mashimbu te hapalika kulu.

Chino chinakapwa muze Yehova anakatuma Mose hanga olole mukombo wenyi ha Kalunga-lwiji Muchila, ngwe chize unamono ha chizulie. Muze Mose anakalinga chino, yikalakala ya meya yiyifuka A-Engitu ni mashinyi jo eswe. Maswalale eswe kanakanjila muchima lia Kalunga-lwiji hakukaula A-Izalele. Kashika niumwe wa kuli A-Engitu wasalile ni mwono wakwihi!

Chiseke chinji atu ja Zambi anakapwa nacho ha kwaalamwina! Malunga yemba mwaso wakuhalisa nawo Yehova ngwo: ‘Yehova hanangama ni kukumba cha uhenya. Hanyasa tuvwalu ni akwa kwaendesa mu kalunga-lwiji.’ Miriame, ndumbu ya Mose, yakwata kalialia, ni mapwo eswe yalinga chochene. Yaputuka kukina ni chiseke chinji, noo yemba ngwo: ‘Yehova hanangama ni kukumba cha uhenya. Hanyasa tuvwalu ni akwa kwaendesa mu kalunga-lwiji.’