Chize Chikungulwila Muchihasa Kwimbulula Yehova Hakutwala Kuli Waze Alinga Shili Yinene

1. Yika Yehova anazange hali atu eswe?

YEHOVA katutangile ni uhashi wakusakula yize mutulinga. Uhashi wacho wakutukwasa kukwata yiyulo tangwa ha tangwa. Chiyulo chilemu chize hita umwe wa kuli yetu mahasa kukwata, chili kulihana kuli Yehova ni kumulingila hamuwika ni mandumbu jetu. Yehova kanazange hanga atu eswe amuwayile. Mumu liaka? Mumu iye kakuzanga atu nawa kakuzanga upeme wo. Chikwo nawa, Yehova kanazange hanga tupwe masepa jenyi ni kuzuka mwono wa mutolo.—Shimbi 30:19, 20; Ngala. 6:7, 8.

2. Yika Yehova anashimbwila hali yivulumunyi waze kalikonyekene? (1 Yoano 2:1)

² Alioze, Yehova keshi kushinjila mutu niumwe hanga amuwayile. Iye kanazange hanga mutu ni mutu akwate chiyulo ha yize malinga. Mba yika muyilingiwa kuli ndumbu wakupapachisa, yoze mehuka shimbi ja Yehova ni kulinga shili yinene? Nyi kalikonyekene, mamuchiza mu chikungulwila. (1 Kori. 5:13) Chipwe ngwe mamuchiza mu chikungulwila, nihindu Yehova mashimbwila hanga alikonyeke ni kupwa cheka sepa lienyi. Iye kahanyine ukuule hanga ahase kukonekena shili ya atu waze malikonyeka. (Tanga 1 Yoano 2:1.) Mumu lia zango lienyi, Yehova Zambi yetu, kakutoweza atu waze alinga shili yinene hanga alikonyeke.—Zeka. 1:3; Roma 2:4; Tia. 4:8.

3. Yika mutumona ha mutwe uno?

³ Yehova kanatulweze chize akulivwa hakutwala kuli waze akulinga shili yinene, chikwo nawa, iye kanazange hanga tumwimbulule. Ha mutwe uno, mutumonaho majila atatu a chize mutuhasa kuchilinga: (1) Chize chikungulwila cha Korindu chatalile mulonga wa ndumbu yoze walingile shili yinene. (2) Usongwelo uze Paulu ahanyine muze chivulumunyi wacho alikonyekene, ni (3) chize lusango yono anasolola nyonga lia Yehova hakutwala kuli Mukwa-Kristu yoze walinga shili yinene.

KUCHI CHIKUNGULWILA CHATALILE MULONGA WA NDUMBU YOZE WALINGILE SHILI YINENE?

4. Yika yalingiwile mu chikungulwila cha A-Korindu? (1 A-Korindu 5:1, 2)

⁴ Tanga 1 A-Korindu 5:1, 2. Mu wenyi wamuchitatu wa mishionaliu, Paulu yevwa umwe lusango mupi wa yize yalingiwile mu chikungulwila chaha mu Korindu. Umwe ndumbu mu chikungulwila chacho, te kakulinga utanji ni pwo lia tato. Chuma chino, te keshi kuchilinga “chipwe hakachi ka akwa-mavungu.” Alioze mandumbu mu chikungulwila kanyongene ngwo, yize analingi hi yipi ko mahasa kununga mu chikungulwila. Kota amwe mu chikungulwila kanyongene ngwo, te kanamusolwela keke ngwe chize Yehova akulinga hali yihenge. Alioze Yehova keshi kutayiza yitanga yipi mukachi ka atu jenyi. Mumu lia yitanga yenyi yipi, lunga yono te kanapihisa lufuma mupema wa chikungulwila. Iye nawa kota katwalile Akwa-Kristu akwo hanga amwimbulule. Mba usongwelo uka Paulu ahanyine kuli mandumbu jacho?

5. Yika Paulu alwezele chikungulwila hanga chilinge, nawa yika iye azangile kwamba? (1 A-Korindu 5:13) (Tala nawa chizulie.)

⁵ Tanga 1 A-Korindu 5:13. Kupalikila mu usongwelo wa Yehova, Paulu yasoneka mukanda hanga achize mu chikungulwila chivulumunyi wacho yoze kakalikonyekene. Kuchi te mandumbu ashishika mu chikungulwila atamba kumona mutu wacho? Paulu yaalweza hanga ‘eche kulikata nenyi.’ Yika chino te chinalumbunuka? Paulu yalumbunwina mandumbu ngwenyi, “chipwe kulia, kanda nulia hamwe nenyi.” (1 Kori. 5:11) Mumu liaka? Mumu nyi muulia hamwe ni umwe, kanji-kanji muopwa ni yuma yinji ya kuhanjika nenyi. Kashika Paulu ambile ngwenyi chikungulwila te kuchatambile kulikata ni mutu wacho. Kulinga chino, te muchifunga chikungulwila ku yitanga yenyi yipi. (1 Kori. 5:5-7) Chikwo nawa, chino te muchikwasa lunga wacho anyingike chize evwishile Yehova yikola ku mbunge ni mwene kwivwa yikola ku mbunge hanga alikonyeke.

6. Kuchi mukanda wa Paulu wakwachile ha chikungulwila ni hali lunga yoze walingile shili yinene?

⁶ Hanyima lia kusonekena mukanda Akwa-Kristu mu Korindu, Paulu yaputuka kunyonga ha yize te mandumbu malinga muze mautambula. Chakuhona kushimbula, Titu yanehena Paulu lusango mupema ngwo: chikungulwila chakawile usongwelo wa Paulu wa kuchiza chivulumunyi wacho mu chikungulwila. (2 Kori. 7:6, 7) Chapemene chinji mumu muze chikungulwila chakawile usongwelo wa Paulu, lunga wacho yalikonyeka ha yize alingile. Iye kalumwine yitanga yenyi ni kuputuka kukaula shimbi ja Yehova. (2 Kori. 7:8-11) Yika Paulu alwezele nawa chikungulwila hanga chilinge?

KUCHI CHIKUNGULWILA CHAMWENE CHIVULUMUNYI YOZE WALIKONYEKENE?

7. Lunga yoze walingile shili yinene yika alingile muze amuchijile mu chikungulwila? (2 A-Korindu 2:5-8)

⁷ Tanga 2 A-Korindu 2:5-8. Paulu yamba ngwenyi: “Yenu hinunapatwila kulu mutu yoze walingile shili yacho.” Mu maliji akwo, fumbo lize lunga wacho atambwile lialingile mulimo walio. Mulimo uka wenawo? Liamukwashile kulikonyeka.—Hepre. 12:11.

8. Yika Paulu alwezele nawa chikungulwila hanga chilinge?

⁸ Paulu yalweza chikungulwila ngwenyi: “Nwatamba kumukonekena, ni kumutakamisa” ni ‘kukolesa zango lienu hali iye.’ Maliji wano kanasolola ngwo, Paulu kazangile hanga mandumbu mu chikungulwila alinge yuma yinji hi wika ko kutayiza ndumbu wacho mukachi ko. Iye kazangile hanga mandumbu asolole mu maliji ni mu yitanga yo ngwo, kamukonekena ni kumuzanga. Kulinga chino, te muchihana shindakenyo kuli ndumbu wacho ngwo, eswe mu chikungulwila kanawahilila ha kufuna chenyi.

9. Mumu liaka chapwile chikalu kuli amwe kukonekena chivulumunyi yoze walikonyekene ni kufuna mu chikungulwila?

⁹ Kota chapwile chikalu kuli amwe kusolwela lunga wacho keke muze afunyine mu chikungulwila. Mumu liaka twamba chocho? Amwe kota kanakapihilila mumu lunga wacho kapihishile lufuma wa chikungulwila. Akwo kota kevwile yikola ku mbunge mumu upi uze alingile wakwachile ku mwono wo. Mandumbu mu chikungulwila kasele tachi jinji hanga ononokene shimbu ja Yehova. Hachino, amwe kota kanyongene ngwo, kuchalitele kufunyisa chivulumunyi wacho mu chikungulwila. (Tesa ni Luka 15:28-30) Mba mumu liaka chapwile chilemu chikungulwila kusolwela ndumbu wacho zango liamwenemwene?

10-11. Yika te muyilingiwa nyi makulwana malituna kukonekena chivulumunyi yoze walikonyekene?

¹⁰ Kuchi lunga wacho te malivwa nyi makulwana malituna kumufunyisa mu chikungulwila hanyima lia kulikonyeka? Hanji kuchi te malivwa nyi ngwe mafuna, alioze mandumbu mu chikungulwila mecha kumusolwela zango? Paulu kambile ngwenyi, lunga wacho te mahasa kwivwa “chinyengo chinji kuhiana.” Chikwo nawa, te mahasa kulivwa ngwe katelele kuwayila Yehova ni kunyonga ngwenyi, Yehova kechi keza kamukonekena, kashika kukushi ulemu wa iye kwalumuna yitanga yenyi.

¹¹ Yika te muyihasa nawa kulingiwa nyi mandumbu malituna kukonekena lunga wacho? Chino te muchipihisa usepa wo ni Yehova. Mumu liaka? Mumu ayo te kechi kwimbulula Yehova yoze wakukonekena yivulumunyi waze akulikonyeka. Alioze te membulula Satana yoze ukwete mbunge yikalu. Hachino, ayo te mapwa yikwata yize Satana makalakalisa hanga apihise ufulielo wa lunga wacho.—2 Kori. 2:10, 11; Efwe. 4:27.

12. Kuchi mandumbu mu chikungulwila ahashile kwimbulula Yehova?

¹² Kuchi mandumbu mu chikungulwila cha A-Korindu embulwile Yehova chakuhona kwimbulula Satana? Ayo kachilingile, ha kukaula mutapu uze Yehova akumwenamo yivulumunyi waze akulikonyeka. Tutalenu yize amwe akwa-kusoneka Mbimbiliya ambile hakutwala kuli Yehova. Ndawichi kambile ngwenyi: ‘Yehova kali mupema; kali mukwa kukonekena.’ (Samu 86:5) Mika yasoneka ngwenyi: “Te kwali umwe Zambi mukwo ngwe yenu, mukwa kukonekena uhenge ni kuzomboka milonga?” (Mika 7:18) Izaia neye yamba ngwenyi: “Chingulungulu akambile ndako jenyi, mukwa uhenge akambile manyonga jenyi. Eze kuli Yehova hanga amuvwile keke; eze kuli Zambi yetu mba mamwaha ukonekeno wa kulumbama.”—Iza. 55:7.

13. Mumu liaka kuchakapwile ni ulemu makulwana kushimbwila chinji mba afunyise chivulumunyi yoze walikonyekene? (Tala mushete, “Mashimbu Angahi Apalikile Mba Afunyise Lunga Wacho?”)

¹³ Mba embulule Yehova, mandumbu mu Korindu, katambwile ni zango lunga yoze walikonyekene ni kufuna mu chikungulwila. Paulu kambile ngwenyi, nyi ayo makonekena lunga yoze walikonyekene, te masolola ngwo ‘kakwononoka ha yuma yeswe.’ (2 Kori. 2:9) Chipwe ngwe kwapalikile tukweji akehe mba lunga wacho amufunyise mu chikungulwila, nihindu iye kalikonyekene. Kashika kuchakapwile ni ulemu makulwana kushimbwila chinji mba amufunyise mu chikungulwila.

CHIZE MUTUHASA KWIMBULULA ULULI NI KEKE YA YEHOVA

14-15. Yika mutuhasa kulilongesa ha yize yalingiwile mu Korindu? (2 Petulu 3:9) (Tala nawa chizulie.)

¹⁴ Lusango yono walingiwile mu chikungulwila cha Korindu, kamusonekene ni kumufunga hanga atukwase kuwana malongeso. (Roma 15:4) Lusango yono katulongesa ngwo, Yehova keshi kwecha mutu yoze walinga shili yinene chakuhona kulikonyeka anunge mu chikungulwila. Amwe mahasa kunyonga ngwo, amu Yehova apwa mukwa-keke mecha hanga mutu yoze walinga shili chakuhona kulikonyeka anunge mu chikungulwila. Alioze Yehova keshi kusolola keke mu jila yino. Chipwe ngwe kali mukwa-keke, nihindu iye keshi kutayiza yitanga yize kuyalitele. Shimbi jenyi hakutwala ku chipi ni chipema, kujishi kwalumuka. (Yunda. 4) Nyi Yehova matayiza yivulumunyi waze kalikonyekene anunge mu chikungulwila, chino te kuchichi kusolola keke; nawa muchipinjisa chikungulwila.—Yishi. 13:20; 1 Kori. 15:33.

¹⁵ Chipwe chocho, tunanyingika ngwetu Yehova kazangile mutu niumwe hanga atoke. Iye kanazange chinji kulamwina atu. Yehova kakusolola keke kuli atu waze akwalumuna yitanga yo ni kuzanga kululieka usepa wo ni iye. (Eze. 33:11; tanga 2 Petulu 3:9.) Hachino, muze lunga wa mu Korindu alikonyekene ni kwalumuna yitanga yenyi, Yehova yasongwela mandumbu mu chikungulwila hanga akonekene lunga wacho ni kumutambula kanawa.

16. Kuchi walivwa hanyima lia kunyingika yize yalingiwile mu chikungulwila cha Korindu?

¹⁶ Yize yalingiwile mu chikungulwila cha Korindu, yinasolola ngwo Yehova kali mukwa-zango nawa mukwa-ululi. (Samu 33:5) Chino chakututwala hanga tuhalise chinji Yehova. Twakumusakwilila chinji ha kupwa mukwa-keke, mumu yetu eswe tuli yihenge, chikwo nawa, tunafupu ukonekeno wenyi. Twakumusakwilila nawa ha kutwaha ukuule hanga akonekene shili yetu. Chili utakamiso kunyingika ngwo, Yehova kakuzanga chinji atu jenyi nawa kanazange upeme wo.

17. Yihula yika mutukumbulula ha mutwe uze muuhataho?

¹⁷ Mba yika mutwamba musono? Nyi umwe ndumbu malinga shili yinene, kuchi makulwana a mu chikungulwila mahasa kwimbulula zango lia Yehova ha kukwasa ndumbu wacho hanga alikonyeke? Kuchi mandumbu atamba kumona makulwana muze makwata chiyulo cha kuchiza hanji kufunyisa umwe mu chikungulwila? Mutukumbulula yihula yino ha mutwe uze muuhataho.