Halisenu Yehova

1. Ha yika atu anji akulihulikila chinji musono?

KOTA hiunamona ngwe atu anji musono, kakulihulikila chinji hali ene kuhiana hali akwo. Ngwe chilweza, atu anji kakusa tachi jinji hanga asolole yizulie yo ha internet hanji ha rede social hanga aamone kuli akwo ni kunyingika yuma yize akulinga. Hachino, atu akehe wika e akuhalisa Yehova musono. Ha mutwe uno, mutumonaho yize kuhalisa Yehova chinalumbunuka ni chize twatamba kuchilinga. Mutumona nawa chize mutuhasa kuhana kuli Zambi uhaliso uze atela ni chize mwene makahalisa jina lienyi kulutwe lia matangwa.

KUHALISA YEHOVA YIKA CHINALUMBUNUKA?

2. Yika Yehova alingile ku Mulundu Sinai? (Tala nawa chizulie ha.)

² Uhaliso hanji uhenya yika unalumbunuka? Mu Mbimbiliya, liji uhaliso mulihasa kutala ha chuma chize chakupwisa mutu mulemu. Yehova kasolwele uhenya wacho, ha amwe matangwa muze atuhwishile A-Izalele mu undungo ku Engitu. Tuchinyongenu ha chino: Tununu twa A-Izalele yalikungulula hakamwihi ni Mulundu Sinai hanga evwe yize Zambi te maalweza. Limwe lelwa lilaa yilijingilika mulundu. Hazehene, yikulingiwa umwe munyiko unene, mihenyo ni kukulunguza. (Kutuhu. 19:16-18; 24:17; Samu 68:8) A-Izalele kakomokene muze amwene Yehova masolola ndundo ni uhenya wenyi.

3. Kuchi mutuhasa kuhalisa Yehova?

³ Mba yika mutwamba hali yetu? Shina mutuhasa lume kuhalisa Yehova? Ewa, mutuhasa. Jila yimwe yize mutuhalishilamo Yehova, yili kuhanjika ni akwetu hakutwala ku ndundo ni yitanga yenyi yipema. Twakuhalisa nawa Yehova muze twakumuchichimieka ha yuma yize twakulinga ni ukwaso wenyi. (Iza. 26:12) Mwanangana Ndawichi kali chilweza chipema cha mutu yoze wahalishile Yehova. Ha chimwe kulemba chize alingile kulutwe lia chikungulwila cheswe cha A-Izalele, Ndawichi yalweza Zambi ngwenyi: “Unene weswe wa mbala wa yenu Yehova, ni ndundo ni uhenya ni kukumba ni wanangana. Mumu cheswe chili mwilu ni hashi ni chenu.” Muze Ndawichi ahwishile kulemba, ‘chikungulwila cheswe yichihalisa Yehova.’—1 Sango 29:11, 20.

4. Kuchi Yesu ahalishile Yehova?

⁴ Muze Yesu apwile hano hashi, iye kahalishile Tato ha kulweza atu ngwenyi, Yehova mwe wamuhele ndundo ja kulinga yikomokeso. (Marku 5:18-20) Yesu nawa kakwashile akwo amone chize Yehova apwa mupema. Kachilingile ha chize apwile ni kuhanjika ni akwo hakutwala hali Tato, ni chize atwamine no. Tangwa limwe, Yesu te kanalongesa mu sunangonga. Hakachi ka waze apwile ni kumupanjika, hapwile umwe pwo yoze wapwile ni ndemoniu ha miaka 18. Ndemoniu wacho yapwisa pwo chilema, te keshi kuhasa kwoloka. Chino te chakumunehena chinyengo! Mumu lia keke, Yesu yakundama kuli pwo, ni kumulweza ngwenyi: “Pwo, hiwatusuka ku musongo we.” Iye yasayika moko hali pwo wacho, hazehene yoloka, chocho “yaputuka kuhalisa Zambi” ha kumupwisa cheka ni mujimba upema. (Luka 13:10-13) Pwo wacho kapwile ni yuma yinji yipema ya kuhalishila Yehova, ni yetu nawa tuli nayo.

MUMU LIAKA TWAKUHALISA YEHOVA?

5. Yuma yika yakututwala tuvumbike Yehova?

⁵ Twakuhalisa Yehova mumu twakumuvumbika chinji. Yetu tuli ni yuma yinji yize yakututwala hanga tuvumbike Yehova. Iye kali ni ndundo ja kulinga yeswayo mazanga, chikwo nawa keshi kuhonga. (Samu 96:4-7) Mana jenyi kakusoloka zwalala ku yuma yize atangile. Iye kali Chishina cha mwono, nawa kakutwaha yize tunafupu hanga tununge ni mwono. (Uso. 4:11) Iye kashishika. (Uso. 15:4) Yuma yeswe yize akulinga yakuwaha, nawa kakumanununa yilakenyo yenyi yeswe. (Yoshu. 23:14) Kutushi kukomoka ha yize profeta Jeremia ambile hali Yehova ngwenyi: “Hakachi ka akwa mana a mavungu, ni mu yifuchi yo kukushi niumwe walita ni yena.” (Jere. 10:6, 7) Pundu lume, tuli ni yuma yinji yize yakututwala hanga tuvumbike Tata yetu wa mu malilu. Alioze, yetu kutushi kuvumbika wika Yehova, twakumuzanga nawa chinji.

6. Mumu liaka twakuzanga Yehova?

⁶ Twakuhalisa Yehova mumu twakumuzanga chinji. Tutalenu yitanga yinji ya Yehova yize yakututwala hanga tumuzange. Iye kali mukwa-keke nawa kakulisa mu chihela chetu. (Samu 103:13; Iza. 49:15) Muze twakumona lamba, neye kakwivwa yikola ku mbunge. (Zeka. 2:8) Kakutukwasa tumunyingike ni kupwa masepa jenyi. (Samu 25:14; Yili. 17:27) Iye kalikehesa; kakuhetama ni ‘kutala yuma ya mwilu ni hashi, kakukatwisa chiswale mu fufuta.’ (Samu 113:6, 7) Twakuhalisa Zambi yetu munene mumu lia yitanga yino yeswe.—Samu 86:12.

7. Uhashi uka tuli nawo?

⁷ Twakuhalisa Yehova mumu twakuzanga hanga akwetu amunyingike. Atu anji kanyingikine umwenemwene hakutwala kuli Yehova. Mumu liaka? Mumu Satana hanapupuchisa manyonga jo, ni kumwanga mahuza hali Yehova. (2 Kori. 4:4) Satana kakutwala atu anyonge ngwo, Yehova kali Zambi ya ufwatulo, keshi kulihulumba hali yetu; nawa ngwo, iye mwe wakutunehena lamba. Alioze, yetu tunanyingika umwenemwene hakutwala kuli Zambi yetu. Tuli ni uhashi wa kulweza atu umwenemwene ni kuhalisa Zambi. (Iza. 43:10) Samu 96 yakuhanjika wika ha kuhalisa Yehova. Muze mutuhengwola yikuma yimwe ha Samu yino, nyonga ha chize muhasa kuhana kuli Yehova uhaliso uze atela.

KUCHI MUTUHASA KUHANA KULI YEHOVA UHALISO UZE ATELA?

8. Jila yika mutuhasa kuhalishilamo Yehova? (Samu 96:1-3)

⁸ Tanga Samu 96:1-3. Mutuhasa kuhalisa Yehova kupalikila mu yuma yize twakwamba hali iye. Versu jino, jinakolweza atu ja Yehova ‘embile Yehova,’ ‘afumanyise jina lienyi,’ ‘ambujole ulamwino wenyi’ ni ‘kulumbununa yitanga yenyi ya kukomwesa hakachi ka mavungu.’ Wano eswe kali majila waze mutuhasa kuhalishilamo Tata yetu wa mu malilu. A-Yunda ashishika ni Akwa-Kristu ku sekulu yitangu, kakalitwaminyine kuhanjika ni akwo hakutwala ku yuma yipema yize Yehova aalingilile ni kukalila lufuma wenyi. (Danie. 3:16-18; Yili. 4:29) Kuchi yetu mutuhasa kuchilinga?

9-10. Yika walilongesa ha chilweza cha Angelena? (Tala nawa chizulie.)

⁹ Tutalenu chilweza cha ndumbu Angelena,a yoze watwama mu Estados Unidos. Iye kanakakalila ni hamu lieswe lufuma wa Yehova kuli akwa-milimo-ni-akwo. Muze Angelena apwile mwaha ku mulimo, yamusanyika ha kukunguluka cha waze apwile aha ku mulimo wacho hanga ahanjike ha utotombo uze apwile nawo. Angelena yazanga kusolola jimwe foto hanga alumbunune mwono wa uwahililo uze ali nawo mumu lia kupwa Chela cha Yehova. Alioze muze te kanda achiputuka kuhanjika, umwe mukwa-mulimo-ni-mukwo, yalisolola ngwenyi, kamulelele ngwe Chela cha Yehova. Iye yaputuka kwamba yuma yipi hali Yela ja Yehova ni ha yize twafuliela. Angelena yamba ngwenyi: “Yingwivwa woma unji. Alioze yingunyonga ngwami: ‘Shina mungwecha lume umwe ambe yuma ya mahuza hali Yehova? Nyi shina mungumukalila?’”

¹⁰ Muze lunga wacho ahwishile kuhanjika, Angelena yalemba mu mbunge. Yahanjika nenyi ni vumbi lieswe ngwenyi: “Ni yami kangulelele mu usoko wa Yela ja Yehova ngwe yena, nihindu nguchili Chela cha Yehova.” Chipwe ngwe kuchakapwile chashi, Angelena yanunga ni kulihumikiza. Yasolwela akwa-milimo-ni-akwo foto haze iye ni masepa jenyi anawayila Yehova ni chiseke, nawa yalumbununa yize afuliela ni vumbi lieswe. (1 Petu. 3:15) Mba yika yalingiwileko? Muze Angelena ahwishile kuhanjika, lunga wacho yalumuna nyonga lienyi. Yaputuka kuhanjika ha yuma yipema yize apwile ni kumona ku ukweze muze apwile mukachi ka Yela ja Yehova. Angelena yamba ngwenyi: “Yehova katela kumukalila. Chili chiwape kukalila jina lienyi.” Ni yetu tuli ni chiwape cha kukalila jina lia Yehova ni kumuhalisa chipwe muze atu akwo akupihisa lufuma wenyi.

11. Chize ku shakulu, kuchi tuvumbi amwenemwene a Yehova akukaula maliji a Samu 96:8?

¹¹ Tanga Samu 96:8. Twakuhalisa Yehova ha kumwaha yuma yize tuli nayo. Tuvumbi amwenemwene a Yehova, kakumuhalisa mashimbu eswe mu jila yino. (Yishi. 3:9) Ngwe chilweza, A-Izalele kahanyine mbongo ni yuma yikwo hanga akwase mulimo wa kutunga tembele ni kuyifunga. (2 Mia. 12:4, 5; 1 Sango 29:3-9) Amwe a kuli tumbaji, kahanyine “yikumba yo” hanga akwase Yesu ni apostolo jenyi achine kuhona nichimwe mu mulimo wo. (Luka 8:1-3) Akwa-Kristu ku sekulu yitangu, kahanyine nawa milambu yo hanga akwase mandumbu jo a ku ufulielo. (Yili. 11:27-29) Musono, ni yetu mutuhasa kuhalisa Yehova ha kuhana milambu.

12. Kuchi milambu yetu muyihasa kuhalisa Yehova? (Tala nawa chizulie.)

¹² Tutalenu chimwe chilweza chinasolola chize milambu yetu yakuhalisa Yehova. Lusango umwe wa mwaka 2020 kalumbunwine changa chize chalingiwile ku Zimbábue. Tununu twa atu kapalikile mu zala, kuchingako ndumbu Prisca. Chipwe ngwe yuma yapihile chinji, nihindu Prisca yanunga ni katalilo wenyi wa kwambujola Liamatatu ni Liamatano chipwe muze apwile ha mashimbu a kulima. Enyembo jenyi kapwile ni kumukekuna mumu lia kuya ni kwambujola shimbu aye ni kulima, ni kumwamba ngwo: “Kumwofwa ni zala.” Prisca kapwile ni kwakumbulula ni shindakenyo yeswe ngwenyi: “Yehova kakufunga tuvumbi twenyi.” Ha kupalika cha mashimbu akehe, iye yatambula ukwaso kukatuka ku ululikiso wetu. Ukwaso wacho, kautambwile mumu lia milambu yize twakuhana. Enyembo ja Prisca yakomoka chinji ni kumulweza ngwo: “Zambi kakukukwasa mashimbu eswe, kashika tunazange kulilongesa hakutwala kuli iye.” Enyembo jenyi shimbiali yaputuka kukunguluka.

13. Kuchi yitanga yetu muyihasa kuhalisa Yehova? (Samu 96:9)

¹³ Tanga Samu 96:9. Mutuhasa kuhalisa Yehova kupalikila mu yitanga yetu. Asasendote waze apwile ni kulingila Yehova mu tembele, katambile kupwa alinanga ku mujimba. (Kutuhu. 40:30-32) Ni yetu twatamba kulinanga, hi wika ko ku mujimba, alioze ni ku yitanga. Chino chinachingi kwehuka kulinga yuma yeswe yize Yehova akuvwila lwaji. (Samu 24:3, 4; 1 Petu. 1:15, 16) Twatamba kusa tachi jinji hanga tuzule “utu ukulu,” hanji ngwetu, kwehuka yitanga ya luchisa ni kuzala “utu waha” ha kunyonga ni kulinga yuma yize muyisolola yitanga ya Yehova. (Kolo. 3:9, 10) Ni ukwaso wa Yehova, chipwe lume atu waze akulinga yuma ya upangala ni ungalwe mahasa kwalumuna yitanga yo ni kuzala utu waha.

14. Yika walilongesa ha chilweza cha Jack? (Tala nawa chizulie.)

¹⁴ Tutalenu chilweza cha Jack, umwe lunga chingalwe nawa musasu yoze te akuvuluka ngwo, Ndemoniu. Mumu lia ungulungulu uze apwile ni kulinga, yamupatwila kufwa. Alioze muze te anashimbwila kumushiha, iye yatayiza kulilongesa Mbimbiliya ni umwe ndumbu yoze te wakumeneka zuwo lia ususu lize apwile. Chipwe ngwe Jack kapwile chingalwe, ha kupalika cha mashimbu yalumuna yitanga yenyi mba yamupapachisa ngwe Chela cha Yehova. Jack kalumukine chinji; kashika muze tangwa lia kumushiha liahetele, tufunga a zuwo lia ususu, yaputuka kulila ha kulishika nenyi. Umwe mwata wa maswalale yoze te wakukalakala ku zuwo lia ususu, yamba ngwenyi: “Jack kapwile funge mupi chinji mu zuwo lino lia ususu. Alioze, haliapwila hapwa mutu mupema.” Ha poso yize yahachileho hanyima lia kumushiha, muze mandumbu afunyine hanga asongwele kukunguluka cha ha poso, ayo yawana umwe funge yoze te unakunguluka ha chisuho chitangu. Mumu liaka akwachile chiyulo cha kukunguluka? Iye kakomokene ha kwalumuka cha Jack, nawa kazangile kunyingika yize atamba kulinga hanga awayile Yehova. Pundu lume, yitanga yetu muyihasa kuhalisa Tata yetu wa mu malilu!—1 Petu. 2:12.

KUCHI YEHOVA MAKAHALISA JINA LIENYI KULUTWE LIA MATANGWA?

15. Kuchi Yehova makasolola kuli atu eswe ngwenyi katela kumuhalisa? (Samu 96:10-13)

¹⁵ Tanga Samu 96:10-13. Versu jino jakasula ja Samu 96, jinasolola Yehova ngwe Ngaji nawa Mwanangana wa ululi. Kuchi Yehova makahalisa jina lienyi kulutwe lia matangwa? Makachilinga kupalikila mu upatwilo wenyi wa ululi. Kwasala hakehe, iye manongesa Babilonia Yinene, mumu uwayilo wa mahuza wakulinga yuma yipi ni kulongesa mahuza hakutwala kuli Yehova. (Uso. 17:5, 16; 19:1, 2) Waze makamona unongeso wacho, makalichinga ni yetu mu uwayilo wamwenemwene. Mba ha jita ya Armagedone, Yehova makanongesa chifuchi chino cha Satana ni waze eswe akulimika nenyi ni kusaula jina lienyi. Alioze, makalamwina waze akumuzanga, kumwononokena ni kumuhalisa. (Marku 8:38; 2 Tesa. 1:6-10) Kusongo lia kanunu ka miaka ya kuyula cha Kristu, atu eswe makahalisa jina lisandu lia Yehova. (Uso. 20:7-10) Ha mashimbu jacho, ‘hashi muhakazala too ni chinyingi cha uhenya wa Yehova ngwe chizechene meya akufuka kalunga-lwiji.’—Haba. 2:14.

16. Yika tunazange kununga ni kulinga? (Tala nawa chizulie.)

¹⁶ Muchikawaha chinji muze atu eswe makahalisa Yehova ngwe chize atela! Alioze shimbu tangwa liacho kanda lichiheta, tunazange kuhalisa Zambi yetu ha uhashi weswawo mutupwa nawo. Mba atukwase kulihulikila ha chiteli chino chilemu, Chizavu cha Tusongo chasakula mukanda wa Samu 96:8 hanga upwe chisoneko chetu cha mwaka 2025, chinambe ngwo: “Hanenu kuli Yehova ulemu wa jina lienyi.”