Ukonekeno wa Yehova Wakutuyukisa

1-2. Mu mutapu uka yuma yize yalingiwile kuli atu yinalifu ni ya mukweze yoze atongola ha paragrafu 1?

TUCHINYONGENU hali umwe mukweze yoze wakolelele mu usoko uze ukwete upite unji. Alioze tangwa limwe, yikulingiwa yimwe; yisemi jenyi yafwa. Mukweze kevwile yikola yinji mumu lia yize yalingiwileko. Alioze, kwalingiwile yuma yikwo yipi chinji. Iye yanyingika ngwenyi, yisemi jenyi kakishile upite weswe ni kumuhichikila makongo anji. Hachino, shimbu ahinge upite, yahinga makongo. Alioze iye te keshi ni uhashi wakufweta makongo jacho.

² Chizechene nawa, ni yetu tunapalika mu yuma ngwe ya mukweze yono. Yisemi jetu atangu Alama ni Eva, kapwile angunu, te katwama mu paraisu, chimwe chihela chipema chinji. (Uputu. 1:27; 2:7-9) Ayo kapwile ni kutalatala cha kutwama ku miaka yeswe ni mwono upema. Alioze yuma yiyalumuka, yatokesa chihela cho mu paraisu ni kutalatala cha mwono wa mutolo. Mba chihinga chika ahichikilile ana jo? Mbimbiliya yakwamba ngwo: “Chizechene ngwe kuli mutu umuwika [Alama] shili yanjilile hano hashi ni ku shili kufwa chanjilile, chocho kufwa chahetele kuli atu eswe, mumu eswe te hanavulumuna.” (Roma 5:12) Chihinga chize Alama atuhichikilile, chili shili ni kufwa. Shili yize twahingile yili ngwe limwe kongo linene lize niumwe wa kuli yetu mahasa kulifweta wakuhi.​—Samu 49:8.

3. Mumu liaka shili yize twakulinga mutuhasa kuyitesa ni “kongo”?

³ Yesu katesele shili ni “kongo.” (Mateu 6:12; Luka 11:4) Muze twakulinga shili, chakupwa ngwe tuli ni limwe kongo kuli Yehova. Twatamba kufweta kongo liacho. Nyi kutwalifwetele, mulikahwa wika muze mutukafwa.​—Roma 6:7, 23.

4. (a) Nyi te kutushi ni ukwaso wa Yehova, kachi yika muyilingiwa kuli yetu eswe? (Samu 49:7-9) (b) Mu Mbimbiliya liji “shili” yika linalumbunuka? (Tala mushete, “Shili.”)

⁴ Shina mutuhasa kupwa cheka ni yuma yeswe yize Alama atokesele? Ewa, alioze ukawetu kutuchi kuhasa. (Tanga Samu 49:7-9.) Nyi te kutushi ukwaso wa Yehova, kachi kutushi ni kutalatala cha kupwa ni mwono upema hanji cha uhindukilo. Kwamba umwenemwene, chuma te muchilingiwa kuli yetu chili wika kufwa chakuhona kutalatala ngwe chizechene akufwa tushitu.​—Chilu. 3:19; 2 Petu. 2:12.

5. Kuchi Tata yetu Yehova atukwashile kufweta kongo lia shili yetu? (Tala chifukilo.)

⁵ Tunyongenu cheka ha chilweza cha mukweze yoze twatongola ku uputukilo. Kuchi te malivwa nyi umwe pichi masoloka hanga afwete makongo jenyi eswe? Pundu lume, te masakwilila ni kutayiza chawana chacho cha zango. Chizechene nawa, Tata yetu Yehova, hanatwehe chawana chize muchihasa kufweta kongo lia shili yize twahingile kuli Alama. Yesu kalumbunwine chikuma chino ha kwamba ngwenyi: ‘Zambi wazangile chinji akwa-hashi, kashika atumine Mwanenyi wa wika, hanga mweswawo mafuliela muli iye kechi kamunongesa, alioze akapwe ni mwono wa mutolo.’ (Yoa. 3:16) Chikwo nawa, chawana chino chakutwaha uhashi wa kupwa masepa ja Yehova.

6. Maliji aka a mu Mbimbiliya waze mutulilongesa ha mutwe uno, nawa mumu liaka?

⁶ Yehova kakukonekena shili yetu kupalikila mu chawana chino cha zango. Mbimbiliya yakulumbununa chikuma chino ha kutongola maliji wano: kulivwashana, kufuka shili, ukuule, chawana cha keke ni kupwisa atu akwa-ululi. Ha mutwe uno, mutumonaho ulumbunwiso wa maliji wano. Nyi twapukuna ha ulumbunwiso wa maliji wano ni ha yize Yehova alingile hanga atukonekene, usakwililo wetu kuli iye muwoka chinji.

YEHOVA KANAZANGE TULIVWASHANE NENYI

7. (a) Yika Alama ni Eva atokesele? (b) Yika twatamba kulinga mumu lia kupwa ana ja Alama ni Eva? (A-Roma 5:10, 11)

⁷ Alama ni Eva kakatokesele wika uhashi wa kutwama mu paraisu ku miaka yeswe, katokesele nawa usepa wo ni Yehova. Ku uputukilo, Alama ni Eva kapwile mu usoko wa Zambi. (Luka 3:38) Alioze muze ahonene kwononokena Yehova, iye yaahuma mu usoko wenyi shimbu te kanda achipwa ni ana. (Uputu. 3:23, 24; 4:1) Kashika amu tuli ana jo, twatamba kulivwashana ni Yehova. (Tanga A-Roma 5:10, 11.) Mu maliji akwo, tunafupu kupwa ni usepa upema ni Yehova. Mu limi lia Ngregu, liji “kulivwashana,” linalumbunuka “kutayiza mukwa-kole ye apwe sepa lie.” Chili kukomoka ha kunyingika ngwo, Yehova mwe waliangile kulivwashana ni yetu. Kuchi achilingile?

ZAMBI KAPWISHILE CHASHI HANGA TUPWE MASEPA JENYI

8. Kufuka shili yika chinalumbunuka?

⁸ Zambi kapwishile chashi hanga yihenge apwe masepa jenyi. Yino ye Mbimbiliya yakuvuluka ngwo kufuka shili. Kufuka shili chinalumbunuka kusalakanyisa chimwe chuma ni chikwo chize chili ni ndando yimuwika. Hachino, Yehova yafunyisa yize Alama atokesele ha kuhana chuma chize chafwikile ndando yimuwika. Yisoneko ya Ngregu yakusolola nawa chize Yehova akupwisa chashi umwe mutu kupwa sepa lienyi.​—Roma 3:25.

9. Yika Yehova alingile hanga akonekene shili ya A-Izalele?

⁹ Yehova kaluliekele yimwe jila hanga akonekene A-Izalele waze malinga shili ni kulikonyeka, apwe cheka ni usepa upema ni iye. Hita mwaka, A-Izalele kapwile ni kulinga chiwanyino cha kufuka shili. Ha tangwa liacho, mwata wa asasendote te kakuhana yitapo ya tushitu hanga afuke shili ya atu. Kwamba pundu, yitapo yino te kuyishi kujimuna shili ya mutu niumwe, mumu tushitu keshi ni ndando yimuwika ni atu. Alioze, muze A-Izalele waze te akulikonyeka akuhana yitapo yize Yehova apwile ni kwita, ayo te kakupwa ni shindakenyo ngwo, Yehova makonekena shili yo. (Hepre. 10:1-4) Chikwo nawa, kuhana yitapo ya tushitu chapwile ni kwiulula A-Izalele ngwo, kali yihenge, nawa ngwo, mba ajimune shili yo yeswe o te mafupiwa chuma chilemu chinji kuhiana tushitu.

10. Yika Yehova alingile hanga akonekene liakulu shili ya atu?

¹⁰ Yika Yehova alingile hanga akonekene liakulu shili ya atu? Iye kalambwile Mwanenyi hanga ambate shili ya anji “kamuwika kunahu.” (Hepre. 9:28) Yesu kahanyine mwono “wenyi ngwe ukuule hali anji.” (Mateu 20:28) Ukuule yika?

UKUULE WAFWETELE NDANDO

11. (a) Kulita ni Mbimbiliya, ukuule yika? (b) Iya te mahasa kufweta ukuule wacho?

¹¹ Kulita ni Mbimbiliya, ukuule uli ndando yize Yehova afwetele hanga akonekene shili yetu ni kutupwisa masepa jenyi.a Mba ndando yika te yinafupiwa kufweta hanga afunyise yize Alama atokesele? Twiulukenu ngwetu, Alama ni Eva katokesele mwono ungunu ni uhashi wa kutwama ku miaka yeswe. Kashika, ndando ya ukuule yatambile kupwa yimuwika ni yize o atokesele. (1 Timo. 2:6) Ndando yacho te mahasa wika kuyifweta kuli umwe lunga yoze hakola: (1) wapwile mungunu, (2) wapwile ni uhashi wa kutwama hano hashi ku miaka yeswe, ni (3) yoze te matayiza kuhana mwono wenyi hali yetu. Ha kulinga chino, mwono wa mutu wacho te muuhasa kufweta mwono uze watokele.

12. Mumu liaka Yesu wika mwe te watamba kufweta ukuule?

¹² Mumu liaka Yesu wika mwe te watamba kufweta ukuule? Mumu lia yikuma yitatu, (1) iye kapwile mungunu, “kakavulumwine.” (1 Petu. 2:22) (2) Mumu te mahasa kutwama hano hashi ku miaka yeswe. (3) Iye katayijile kufwa hanga ahane mwono wenyi hali yetu. (Hepre. 10:9, 10) Yesu kapwile mungunu ngwe chizechene apwile Alama shimbu te kanda achilinga shili. (1 Kori. 15:45) Kashika, ha kuhana mwono wenyi hali yetu, Yesu te mahasa kufweta ndando yalita ha yize Alama atokesele. (Roma 5:19) Ha kulinga chino, Yesu yapwa “Alama wa kasula.” Kutwafupiwile mutu mukwo mungunu hanga afwete yize Alama atokesele, mumu Yesu “kachilingile kamuwika kunahu.”​—Hepre. 7:27; 10:12.

13. Kalisa muka uli ha liji kufuka shili ni ukuule?

¹³ Kalisa muka uli ha liji kufuka shili ni ukuule? Kufuka shili chili chuma chize Zambi akulinga hanga tupwe masepa jenyi. Ukuule uli ndando yize iye afwetele hanga akonekene shili ya atu. Ndando yino ya ukuule, yinalumbunuka manyinga alemu a Yesu waze amwanganyine hali yetu.​—Efwe. 1:7; Hepre. 9:14.

YEHOVA KATUKUULILE KU SHILI NI KUFWA NI KUTUPWISA AKWA-ULULI

14. Yika mutumona haliapwila, nawa mumu liaka?

¹⁴ Kuchi twakuyuka ha yize Yehova alingile hali yetu? Mba tukumbulule chihula chino, mutumona ulumbunwiso wa maliji aali a mu Mbimbiliya, waze matukwasa kunyingika chize mutuhasa kuyuka ha ukonekeno wa Yehova. Muze mutuhengwola maliji jacho, mutumona nawa chize mahasa kukwata hali hita umwe wa kuli yetu.

15-16. (a) Kulita ni Mbimbiliya, liji chawana cha keke ha yika linatale? (b) Kuchi twakwivwa ha kunyingika ngwetu, hanatutusula ku shili ni kufwa?

¹⁵ Mu Mbimbiliya, liji chawana cha keke linatale ha ndando ya ukuule yize Yehova afwetele. Postolo Petulu kahanjikile ha chikuma chacho muze ambile ngwenyi: “Nunanyingika ngwenu kakanutuswile ni yuma yize ya kupola, ni prata hanji oru ku yitanga yenu yamokomoko, yize nwahingile kuli tulamba twenu. Alioze kanutuswile ni manyinga alemu, ngwe manyinga a mwana-panga yoze keshi kapalia, keshi chipeka, a Kristu.”​—1 Petu. 1:18, 19.

¹⁶ Mumu lia chitapo cha ukuule, hanatutusula ku shili ni kufwa ni ku lamba lieswe lize liakwiza ku yuma yacho. (Roma 5:21) Pundu lume, tuli ni kongo linene kuli Yehova ni kuli Yesu, ha kututusula kupalikila mu manyinga alemu a Yesu hanji ngwetu, mwono wenyi.​—1 Kori. 15:22.

17-18. (a) Kutupwisa akwa-ululi yika chinalumbunuka? (b) Kuchi chino chakutuyukisa?

¹⁷ Mbimbiliya yakwamba ngwo, tuvumbi twa Yehova hanaapwisa akwa-ululi. Chino chinalumbunuka ngwo, iye keshi kutufwetesa ha shili yize twakulinga. Ha kulinga chino, Yehova keshi kwehuka shimbi jenyi ja ululi. Iye keshi kutupwisa akwa-ululi mumu ngwo twatela, hanji kulengulula shili yetu. Alioze, kakujimuna kongo lietu mumu lia ufulielo uze twakusolola ha ukuule wa Yesu.​—Roma 3:24; Ngala. 2:16.

¹⁸ Yika chino chinalumbunuka kuli umwe ni umwe wa kuli yetu? Waze akusakula hanga akayule ni Yesu mu malilu, kakwapwisa akwa-ululi ngwe ana ja Zambi. (Titu 3:7; 1 Yoa. 3:1) Shili yo yeswe kakuyikonekena, chakupwa ngwe shili yacho kakayilingile. Hachino, Zambi kakwatayiza hanga apwe mu Wanangana wenyi. (Roma 8:1, 2, 30) Waze ali ni kutalatala cha kutwama hano hashi ku miaka yeswe, kakwapwisa akwa-ululi ha kupwa masepa ja Zambi ni kukonekena shili yo yeswe. (Tia. 2:21-23) Mbunga yinene ya atu waze makalamwina ha Armagedone, makapwa ni uhashi wa kununga ni mwono chakuhona kufwa. (Yoa. 11:26) “Akwa-ululi” ni “yihenge” waze anapombo mu ufwe, kali ni kutalatala cha kwahindwisa. (Yili. 24:15; Yoa. 5:28, 29) Tuvumbi twa Yehova eswe waze akumwononokena, makapwa ni “utuswilo wa uhenya wa ana ja Zambi.” (Roma 8:21) Twakuwahilila chinji ha kunyonga ha mashimbu waze mutukapwa ana angunu a Tata yetu, Yehova.

19. Kuchi kapinda wetu alumukine? (Tala mushete, “Yize Yino Yinalumbunuka kuli Yetu.”)

¹⁹ Umwenemwene uli ngwo, yetu hitunapalika mu yuma ngwe ya mukweze yoze twatongola ku uputukilo wa mutwe uno, yoze watokesele yuma yeswe ni kuhinga kongo linene lize te kechi kuhasa kufweta. Alioze, mumu lia keke ya Yehova, iye yatukwasa. Kapinda wetu kalumukine mumu Yehova kazulwile jila hanga afuke shili yetu ni kuhana Yesu ngwe ukuule. Ufulielo wetu muli Yesu, watutusula ku shili ni kufwa. Shili yetu mahasa nawa kuyikonekena. Muze chino chakulingiwa, chakupwa ngwe kutwakalingile shili yacho. Alioze chuma chilemu chili ngwo, mutuhasa kupwa ni usepa ukolo ni Tata yetu, Yehova.

20. Yika mutukalilongesa ha mutwe uze muuhataho?

²⁰ Twakusolola usakwililo wetu kuli Yehova ni Yesu, muze twakupukuna ha yize ayo atulingilile. (2 Kori. 5:15) Nyi te kutushi ukwaso wo, kachi kutushi ni kutalatala nichimwe. Mba yika ukonekeno wa Yehova unalumbunuka kuli hita umwe wa kuli yetu? Yino ye mutukalilongesa ha mutwe uze muuhataho.