Fumbo—Liakusolola Zango lia Zambi

1. Kanji-kanji kuchi Mbimbiliya yakulumbununa liji fumbo?

YIKA wakunyonga muze wakwivwa liji “fumbo”? Atu anji kakunyonga ha lamba hanji kastigu, alioze fumbo linalumbunuka yuma yinji. Mbimbiliya yinambe ngwo fumbo liapwa lipema ku mwono wetu, nawa ha mashimbu amwe kakulitesa ni chinyingi, mana, zango ni mwono. (Yishima 1:2-7; 4:11-13) Mumu fumbo lia Zambi liakusolola ngwo kakutuzanga, nawa kanafupu tupwe ni mwono wa miaka yeswe. (A-Hepreu 12:6) Chipwe ngwe ha mashimbu amwe fumbo lia Zambi liakupwa kastigu, nihindu hi mukalu ko. Kwamba pundu, ulumbunwiso ulemu wa liji “fumbo” uli kulongesa, ngwe chize chisemi akulongesa mwana yoze azanga chinji.

2, 3. Kuchi fumbo mulihasa kuchinga longeso ni kastigu? (Tala chizulie ha uputukilo.)

² Achinyonga ha chilweza chino. Umwe kanuke avuluka ngwo Yoano kanahehe konda mu zuwo. Naye yamulweza ngwenyi: “Yoano, kuwatambile kwashila konda mu zuwo! Mumu muhasa kupalula yuma.” Alioze kapanjikile naye, yanunga ni kwasa konda. Chocho yapalula umwe mulondo! Yika naye ya Yoano malinga hanga amufumbe? Naye te hanamulweze mumu liaka kwashila konda mu zuwo chili chipi. Iye kanazange hanga mwanenyi anyingike ngwenyi chili chipema kwononokena yisemi jenyi nawa ngwo yiyulo yo yikwete ulemu. Mba akwase Yoano kuwana longeso, naye yakwata nawa chiyulo chakumwaha kastigu wa kumutambula ndundu ha amwe mashimbu. Chino muchivwisa Yoano chinyengo, alioze muchimukwasa kwiwuluka ngwenyi, nyi mahona kwononokena yisemi jenyi, mahasa kumona lamba.

³ Amu tuli akwa-Kristu, tuli akwa-zuwo lia Zambi. (1 Timoteu 3:15) Tata wetu, Yehova, kali ni ulite wa kusa shimbi ja yuma yipema ni yipi ni kutufumba muze mutumwehuka. Nawa, nyi yitanga yetu muyitumwesa lamba, fumbo lia Yehova mulitukwasa twiwuluke ulemu wa kumwononokena. (A-Ngalashia 6:7) Zambi katuzanga chinji, nawa keshi kuzanga hanga tumone lamba.—1 Petulu 5:6, 7.

4. (a) Kuchi Yehova anazange hanga tulongese akwetu? (b) Yika mutushimutwina mu mutwe uno?

⁴ Nyi mutuhana fumbo lize linakatuka ha Mbimbiliya mutuhasa kukwasa mwana hanji longi wa Mbimbiliya kupwa kambaji ka Kristu. Twakuzachisa Mbimbiliya hanga tulongese alongi jetu yize yalita ni yize kuyalitele ni kwaakwasa hanga anyingike ni ‘kufunga yuma yeswe yize Yesu hanatwehe.’ (Mateu 28:19, 20; 2 Timoteu 3:16) Yino ye jila yize Yehova anazange twaalongeselemo hanga no ahase kukwasa akwo apwe tumbaji twa Kristu. (Tanga Titu 2:11-14.) Haliapwila mutushimutwina yihula yitatu yilemu: (1) Kuchi fumbo lia Zambi liakusolola ngwo kakutuzanga? (2) Yika mutuhasa kulilongesa ha chilweza cha atu waze afumbile kuli Zambi? (3) Kuchi mutuhasa kwimbulula chize Yehova ni Yesu akufumba atu?

ZAMBI KAKUHANA FUMBO NI ZANGO

5. Kuchi kufumba cha Yehova chakusolola ngwo kakutuzanga?

⁵ Yehova kakutululamisa, kutulongesa, ni kutufumba mumu katuzanga. Kanazange hanga tukundame kuli iye ni kupwa ni kutalatala cha mwono wa mutolo. (1 Yoano 4:16) Yehova keshi kutumona ngwe kutushi ulemu. (Yishima 12:18) Alioze, kakulihulikila ha yitanga yetu yipema ni kutwecha hanga tusakule yize tunazange ku mwono wetu. Shina muhasa kumona chize fumbo twakutambula kupalikila mu Mbimbiliya, mikanda yetu, yisemi jetu, ni makulwana amu chikungulwila liakusolola zango lia Yehova hali yetu? Kwamba pundu, muze makulwana matufumba ni zango lieswe chipwe ngwe kutwalingile upi niumwe, ayo kanembulula chize Yehova akusolola zango hali yetu.—A-Ngalashia 6:1.

6. Kuchi fumbo liakusolola zango lia Zambi chipwe ngwe mutu yoze aliaha kechi kutambula nawa yiteli?

⁶ Ha mashimbu amwe fumbo liakulumbunuka yuma yinji hi wika ko kuhana chiyulo. Nyi umwe ndumbu malinga shili yinene, iye keshi kujama nawa kutambula yimwe yiteli mu chikungulwila. Chipwe ngwe yino muyilingiwa, nihindu fumbo liacho mulisolola zango lize Zambi akwete hali iye. Chakutalilaho, mulimukwasa kumona ulemu watwama ha kulilongesa chinji Mbimbiliya, kupukuna ni kulemba. Kulinga yino muchihasa kumukwasa kukolesa usepa wenyi ni Yehova. (Samu 19:7) Hakupalika cha miaka, mahasa kumufunyishina yiteli yenyi yize atokesele. Chipwe muze akusosolola mutu mu chikungulwila, chakusolola zango lia Yehova, mumu chakufunga mandumbu ku yitanga yipi. (1 A-Korindu 5:6, 7, 11) Nawa, amu Zambi akufumba ni ululi, fumbo liacho liakukwasa mutu yoze hanasosolola hanga anyingike ulemu wa shili yenyi. Chino muchimukwasa hanga alikonyeke ha shili yenyi.—Yilinga 3:19.

TWAKUYUKA HA FUMBO LIA YEHOVA

7. Shepena te iya, nawa ndako yika yipi apwile nayo?

⁷ Mba tunyingike ulemu wa fumbo, mutushimutwina atu aali waze Yehova afumbile. Atu jacho umwe te Shepena, Ka-Izalele yoze watwamine ha mashimbu a Mwanangana Hezekia, nawa mukwo kali Graham, wa ha mashimbu jetu. Shepena kota kapwile “kavumbi ka zuwo” lia Mwanangana Hezekia, nawa kapwile ni wata unji. (Izaia 22:15) Alioze Shepena yalizata, nawa yazanga hanga akwo anyonge ngwo iye te mulemu chinji kuhiana. Mwene yalilingila fuka lia ndando yinji ni kutwama mu “matemba a uhenya.”—Izaia 22:16-18.

8. Kuchi Yehova afumbile Shepena, nawa yika yalingiwileko?

⁸ Amu Shepena afupile uhenya hali mwene, Zambi yahana chiteli chenyi kuli Eliakimi. (Izaia 22:19-21) Yino yalingiwile muze Mwanangana Senakeribe wamu Suria aliluliekele hanga alukukile Yerusaleme. Kulutwe, Senakeribe yatuma chizavu cha yilolo hamwe ni chilombo chinene cha maswalale hanga Mwanangana Hezekia alihane mwene. (2 Mianangana 18:17-25) Hezekia yatuma Eliakimi ni malunga akwo aali hanga akaliwane ni yilolo jacho. Umwe wakuli malunga jacho te Shepena, hano iye te hapwa mukwa-kusoneka. Ngwe chize twamona, kota Shepena kalilongesele kupwa mukwa-kulikehesa nawa kakalinyenyetele hamukunda wakutokesa chiteli chinene. Iye katayijile ni mbunge yeswe chiteli chikehe. Mutuhasa kuwana malongesa atatu ha yize yaligiwile kuli Shepena.

9-11. (a) Malongeso aka alemu mutuhasa kulilongesa hali Shepena? (b) Kuchi wakwivwa ha chize Yehova afumbile Shepena?

⁹ Chitangu, amu Shepena atokesele chiteli chenyi chilemu, chinatulongesa ngwo ‘mbunge ya kulizata yakutwala ku kulimbuka.’ (Yishima 16:18) Ni yetu mutuhasa kupwa ni yiteli yilemu mu chikungulwila, nawa akwetu mahasa kutumona ngwe tuli alemu chinji. Nyi che akutumona, shina mutuhasa kununga kupwa akwa-kulikehesa? Kutala tunanyingika ngwetu utotombo ni yuma yeswayo yipema tuli nayo yinakatuka kuli Yehova? (1 A-Korindu 4:7) Postolo Paulu yatoweza ngwenyi: “Ngunambe kuli mutu mweswe hakachi kenu ngwami, Kanda alinyongena kuhiana chize chamutamba kunyonga; alioze akanyonge ni mana.”—A-Roma 12:3.

¹⁰ Chamuchiali, fumbo linene lize Yehova ahanyine kuli Shepena linasolola ngwo iye kanakanyingika ngwenyi Shepena mahasa kwalumuna yitanga yenyi. (Yishima 3:11, 12) Lino lili longeso kuli atu waze hanatokesa yiteli yo. Shimbu evwe uli, ayo mahasa kusa tachi hanga awayile Yehova ni mbunge yeswe. Ha kumona fumbo liacho ngwe chilayi cha zango lia Yehova. Iwuluka ngwe Tata wetu kakuwahisa atu waze alikehesa. (Tanga 1 Petulu 5:6, 7.) Kufumba cha Yehova muchihasa kutukwasa kupwa akwa-kulikehesa.

¹¹ Chamuchitatu, twalilongesa chikuma chilemu ha chize Yehova afumbile Shepena. Chipwe ngwe chize Yehova akuhana fumbo chakusolola ngwo kakuvwila kole shili, nihindu chakusolola nawa ngwo iye kakuzanga mutu yoze walinga shili. Yehova kakufupa upeme hali atu. Nyi uli chisemi hanji mukulwana mu chikungulwila, shina wakwimbulula chize Yehova akuhana fumbo?—Yundase 22, 23.

12-14. (a) Kuchi amwe akwivwa ha chize Yehova akwaafumba? (b) Kuchi Liji lia Zambi liakwashile umwe ndumbu kwalumuna yitanga yenyi nawa yika yalingiwileko?

¹² Chipwe chocho, atu amwe kakwivwa uli muze maafumba nawa kakuwuchika Zambi ni chikungulwila. (A-Hepreu 3:12, 13) Shina chino chinalumbunuka ngwo niumwe mahasa kwaakwasa wakuhi? Ka! Tutalenu chilweza cha Graham, yoze asosolwele mu chikungulwila mba kulutwe yafuna. Muze afunyine, yecha kwambujola ni kuya ku kukunguluka. Umwe mukulwana yasa tachi hanga apwe sepa lia Graham, chocho Graham yeta kuli mukulwana wamu chikungulwila wacho hanga alilongese nenyi Mbimbiliya.

¹³ Mukulwana wacho yamba ngwenyi: “Upi wa Graham te kulizata. Te kakwamba yuma yipi hali mandumbu waze atalile chikuma chenyi chakumusosolola. Alioze muze te twakulilongesa, te twakushimutwina yisoneko yize yakuhanjika hakutwala ku kulizata ni yize yakwizako. Graham yaputuka kupukuna ha Liji lia Zambi ngwe kanalitale ha katalilo, chocho kakazangile kumona chize apwile! Yuma yalingiwile ku mwono wenyi yapwile yikomokeso! Muze anyingikine ngwenyi kapwile ni ‘mukambo’ mu liso lienyi, chekwamba kulizata ni yitanga yenyi ya kuyenga mandumbu, chocho yayalumuna kawashi-washi. Yaputuka kukunguluka mashimbu eswe, kulilongesa Mbimbiliya, ni kulemba matangwa eswe. Kulita ni Mbimbiliya, yatayiza nawa yiteli yenyi ngwe mwata wamu usoko ni kufunga kanawa mukwo-pwo ni ana.”—Luka 6:41, 42; Tiangu 1:23-25.

¹⁴ Mukulwana yawezela nawa ngwenyi: “Limwe tangwa, Graham yangulweza chimwe chuma chize changukwachile ku mbunge. Yamba ngwenyi: ‘Ami hingunanyingika umwenemwene ha miaka yinji alioze kanda nguchilinga kama upionelu. Haliapwila wika munguhasa kwamba ngwami ngunazange Yehova.’” Ha shimbu likehe, Graham yamwaha chiteli cha kupalikisa microfone ha kukunguluka, nawa yawahilila chinji ni chiteli chacho. Mukulwana wacho yamba ngwenyi: “Chilweza chenyi changulongesele ngwo, nyi mutu malikehesa kuli Zambi hakutayiza fumbo, kakuzuka yiwape yinji!”

MUZE UNAHANE FUMBO, IMBULULA ZAMBI NI KRISTU

15. Yika twatamba kulinga mba akwetu atayize fumbo lize mutwaaha?

¹⁵ Nyi mutuzanga kupwa alongeshi apema, twatamba chitangu kupwa alongi apema. (1 Timoteu 4:15, 16) Chizechene nawa, nyi uli umwe yoze Yehova anazachisa hanga ufumbe akwenu, watamba kupwa mukwa-kulikehesa ni kwecha Yehova hanga asongwele mwono we. Muze akwenu makumona ngwo walikehesa, ayo makuvumbika nawa muchipwa chashi kutayiza yiyulo yize mwaaha. Mutuhasa kulilongesa ha chilweza cha Yesu.

16. Yika mutuhasa kulilongesa kuli Yesu hakutwala ku kulongesa ni kuhana fumbo lialita?

¹⁶ Yesu mashimbu eswe te kakwononokena Tato, chipwe muze chapwile chikalu kuchilinga. (Mateu 26:39) Iye yalweza atu ngwenyi malongeso ni mana jenyi te kakwiza kuli Tato. (Yoano 5:19, 30) Yesu kapwile mukwa-kulikehesa ni kwononoka, yino yamukwashile kupwa longeshi wa keke. Atu a mbunge yipema te kakuzanga kupwa hamwe nenyi. (Tanga Luka 4:22.) Maliji apema a Yesu kapwile ni kutakamisa atu waze te alema ku mbunge. (Mateu 12:20) Ni zango lieswe iye yakwasa apostolo jenyi chipwe ngwe te mahasa kweevwila kupiha hamukunda wa kulihamika hanga anyingike yoze te mulemu hakachi ko.—Marku 9:33-37; Luka 22:24-27.

17. Yitanga yika muyikwasa makulwana hanga afunge kanawa chikungulwila?

¹⁷ Hita shimbu makulwana amu chikungulwila mahana fumbo lize linakatuka ha shimbi ja Mbimbiliya, katamba kwimbulula Kristu. Nyi malinga chocho, masolola ngwo kanakaula usongwelo wa Zambi ni Yesu. Postolo Petulu yasoneka ngwenyi: ‘Fungenu mbunga ya mapanga a Zambi, yize yili hakachi kenu. Pwenu tulayi, hi ha kunuzangisa ko, alioze mumu nunachizange: chipwe hi mukufumbuka ko ku upite wa sonyi, alioze mumu ha zango. Kanda nulipwisa ngwe nuli miata hakachi ka waze hananukunjika, alioze lingenu ni kupwa yilweza ku mbunga.’ (1 Petulu 5:2-4) Makulwana waze akuzeyela kuli Zambi ni Kristu makayuka, hamwe ni mbunga yize akufunga.—Izaia 32:1, 2, 17, 18.

18. (a) Yika Yehova anashimbwila hanga yisemi alinge? (b) Kuchi Zambi akukwasa yisemi?

¹⁸ Mba yika mutwamba hakutwala ku kufumba ni kulongesa mu usoko? Yehova kanalweze miata amu usoko ngwenyi: “Kanda nukehia ana jenu ku utenu: alioze nualele ni kufumba ni kukanyamisa cha Mwene.” (A-Efwesu 6:4) Shina kulongesa ni kufumba chinafupiwa lume kuli ana? Ewa, mumu twakutanga mu Yishima 19:18 ngwo: ‘Fumba mwane shimbu kuchili kutalatala, nyi ka, mupwa ni chitela ha kufwa chenyi.’ Yehova hanahane kuli yisemi chiteli cha kufumba ana jo. Nyi ayo kachilingile, kumakapwa ni chitela kumeso ja Zambi! (1 Samuele 3:12-14) Alioze Yehova kakuhana kuli yisemi mana ni tachi jize anafupiwa muze meta ukwaso kuli iye ha kulemba, kufuliela mu Liji lienyi ni ha usongwelo wa spiritu yisandu.—Tanga Tiangu 1:5.

KULILONGESA KUTWAMA NI SAMBUKILA NDO KU MIAKA YESWE

19, 20. (a) Yiwape yika twakuyuka muze mututayiza fumbo lia Zambi? (b) Yika mutulilongesa ha mutwe uze muusulaho?

¹⁹ Nyi mututayiza fumbo lia Zambi ni kwimbulula mutapu uze iye ni Yesu akuhanyinamo fumbo, mutupwa ni yiwape yinji! Usoko ni chikungulwila chetu muyipwa ni sambukila, nawa hita mutu malivwa ngwe kakumuzanga, kakumulemesa ni kumufunga. Chino chili wika chilweza chikehe cha sambukila ni uwahililo uze mutukapwa nawo kulutwe lia matangwa. (Samu 72:7) Fumbo lia Yehova liakutululieka hanga tukatwame hamuwika ku miaka yeswe mu usoko walinunga, hamwe ni Tata yetu, Yehova. (Tanga Izaia 11:9.) Nyi mutwiwuluka yino twalilongesa, mutukamona ngwetu fumbo liapwa: jila yipema yize Zambi akusolwelamo zango lienyi hali yetu.

²⁰ Ha mutwe uze muusulaho, mutulilongesa chinji hakutwala ku fumbo lia mu usoko ni lia mu chikungulwila. Mutushimutwina chize mutuhasa kulifumba yetwene. Nawa mutulilongesa ngwetu shinoho kwehuka yuma yize muyitunehena lamba kuhiana kwehuka fumbo lieswalio mututambula.