COVID Yashiha Atu Tununu 6 a Tununu—Mba Yika Mbimbiliya Yakwamba?

Kulita ni ululikiso uze wakutala yuma ya uwukiso hashi heswe (OMS), ha 23 ya Maio ya 2022, atu tununu 6.27 kafwile ku musongo wa COVID-19. Alioze, sango jikwo jambile ngwo, ha 5 ya Maio ya 2022 akwa OMS kalwile ngwo, atu waze afwile kapwile anji chinji kuhiana. Lusango wacho yanunga ngwo, ha mwaka wa 2020 ni 2021, “atu waze afwile ku musongo wa COVID-19 kapwile unji wa tununu 14.9 a tununu.” Shina Mbimbiliya hiyinambe kama yimwe hakutwala ku yuma yino yakutunehena lamba?

Mbimbiliya hiyinahanjika hakutwala ku misongo yipi

• Yesu kaprofetezele ngwenyi, te mukupwa yilungo hanji misongo “yipi chinji” ha matangwa “a kusula.”—Luka 21:11, Contemporary English Version; 2 Timoteu 3:1.

Uprofeto uno unamanunuka musono. Mba unyingike yuma yinji ha chikuma chino, tanga mutwe unambe ngwo: “Chilayi Chika cha Matangwa a Kusula,’ hanji ‘Kuhwa cha Matangwa’?”

Mbimbiliya yakutwaha utakamiso

• “Zambi ya kulembejeka cheswe; yoze wakututakamisa mu lamba lietu lieswe.”—2 A-Korindu 1:3, 4.

Atu anji waze afwishile asoko ni masepa jo kawanyine utakamiso ha kutanga sango ja mu Mbimbiliya. Mba unyingike yuma yinji ha chikuma chino, tanga mutwe unambe ngwo: ““Yika Muhasa Kulinga Musono, Mba Ukumbe Kunenganyana” ni chikuma, “Ukwaso Upema Kuli Waze Afwisa.”

Mbimbiliya yinalakenya kuhwisa yuma yeswe yipi

• “Wanangana wenu wize. Upale wenu ulingiwe hashi chizechene ngwe unalingiwa mwilu.”—Mateu 6:10.

Kwasala hakehe “Wanangana wa Zambi” muulinga yuma yipema, hachino “niumwe watungako mamba ngwenyi, Ngunayiji.” (Marku 1:14, 15; Izaia 33:24) Tala chinema, Yika Wanangana wa Zambi Muukalinga? hanga unyingike unguvulu uno wa mu malilu ni yize muukalinga.

Tunakwite ulilongese yize Mbimbiliya yakwamba hanga yena ni asoko je nuhase kuyuka ha yilakenyo yino yipema.