Kwoka cha Changa—Yika Mbimbiliya Yakulongesa?

• Chifuchi cha China chatuhwisanga lusango unambe ngwo, “ha mwaka uno, kusasaminya choka chinji kuhiana nawa kwapwa changa chamuchitatu chize hichalingiwa hano hashi.”—The Guardian, 7 Setembro, 2022.

• “Uno uli mwaka wamuchitano uze changa chinanungu ni kulingiwa mu África.”—UN News, 26 Agosto, 2022.

• “Akwa-mana a mu Europa kanamono changa chize chinalingiwamo ngwe yimwe ponde yize yalingiwa ha kupalika cha miaka 500.”—BBC News, 23 Agosto, 2022.

Akwa-mana anji kanambe ngwo, changa chino muchinunga ni kwoka ni kupihisa yuma. Shina tuli ni chimwe kutalatala cha yuma yipema kulutwe? Yika Mbimbiliya Yakulongesa?

Changa ni uprofeto wa mu Mbimbiliya

Mbimbiliya yambile hakutwala ku matangwa jetu ngwo:

• “Kumukukapwa . . . tupunga kweka ni kweka.”—Luka 21:11.

Changa kanji-kanji chakuneha tupunga hanji ngwetu kutepuluka cha yuma ya kulia. Kutepuluka cha kulia, lamba ni kufwa chize chakwizako, yeswe yinamanununa uprofeto wa mu Mbimbiliya.—Usolwelo 6:6, 8.

Mumu liaka changa chinayi ni kwoka chinji?

Mbimbiliya yinasolola chuma chize chinalingisa changa mba choke. Yinambe ngwo:

• “Kuchatwamine muli mukwa kwenda kusongwela mashimbo jenyi.”—Jeremia 10:23.

Maliji wano kanasolola ngwo, atu nyi malisongwela ene hanji ngwetu maliyula ene yuma kuyichi kwenda kanawa. Yiyulo yipi yize o akukwata, kanji-kanji yakuneha changa ni kwomesa ngiji.

• Akwa-ciencia anji kanatayiza ngwo, milimo yize atu akulinga ye yinalingisa mba hashi heswe hasasaminye ni kwokesa changa.

• Mumu lia yitanga ya kuzo ya atu ni akwa-mafwefwe waze akukwata yiyulo chakuhona kunyonga kulutwe, kakwenyeka mishitu, kupihisa hashi ni kufupa chipi upite wa kushi lia mavu. Chino chakulingisa mba tuhone meya.

Alioze, Mbimbiliya yakutwaha kutalatala.

Shina tuli ni chimwe kutalatala cha kulutwe lia matangwa?

Mbimbiliya yinalakenya ngwo Zambi makahwisa changa. Mu mutapu uka?

1. 1. Zambi ‘makwonwona waze akwonwona hashi.’ (Usolwelo 11:18) Iye makachiza yize yakuneha changa; atu api ni waze akwete yitanga ya kuzo yize yakupihisa yuma hano hashi.—2 Timoteu 3:1, 2.

2. 2. “Masekeseke a kahia malumuka chitende.” (Izaia 35:1, 6, 7) Zambi makalulieka yuma yize yakupiha mumu lia changa ni kululieka hano hashi hanga hapwe paraisu muze mumukapwa meya anji.

3. 3. “Wakunangisa hashi nikuhinjilaho meya; wakuwahisaho chikolo.” (Samu 65:9) Ni yiwape ya Zambi, hashi muhakazala too ni kulia chipema ni meya apema kuli atu eswe.