Shina Jita ya Hashi Heswe Mahasa Kuyikinda?

Ha miaka 30 yapalika, atu kapwile ni kunyonga ngwo chiyulo cha hashi heswe chapema. Alioze nyonga liacho linalumuka mumu lia yize yinalingiwa ha matangwa wano.

•  “Israel ni Hezbollah kanaliase jita ku fronteira ni Líbano. Tunevu nawa ngwo mukupwa jita mu Gaza.”—Reuters, 6 Janeiro, 2024.

•  “Amu Irã ali ni yikwashi waze ali ni katalilo wa jita ni mata a tachi, kanazange kuliasa ni akwa Ocidente. Nyi ngwe machilinga ha chisuho chino, iye kali ni ukwaso wa Rússia ni China.”—The New York Times7 Janeiro, 2024.

•  Mbomba jize Rússia anakongo mu Ucrânia mujichinunga ni kupihisa yuma yinji mu Ucrânia yeswe.”11 ‏ Janeiro, 2024.

•  “Upite ni tachi ja jita jize China ali najo, kulinangamisa chize chili kuli akwa Taiwan, ni kulihangujola chize chili hali China ni Estados Unidos yinasolola ngwo mukuhasa kulingiwa jita.”—The Japan Times 9 Janeiro, 2024.

Shina Mbimbiliya yakuhanjika yimwe hakutwala ku jita jize twakumona ha matangwa jetu? Chikwo nawa, shina yino muyitutwala ku jita ya hashi heswe?

Mbimbiliya yaliangile kulu kuhanjika ha yuma yize yinalingiwa ha matangwa jetu

Mbimbiliya kuyishi kuhanjika pundu ha yimwe jita yize te muyilingiwa ku chimwe chihela. Alioze yakuhanjika ha jita yize te muyilingiwa ha matangwa jetu ni kuchiza “sambukila hano hashi”—Usolwelo 6:4.

Mukanda wa Daniele waliangile kwamba ngwo, ‘ha matangwa a kusula,’ mianangana a ndundo ja hashi heswe te malimika ni ‘kulitachika’ hanji kuliasa hanga amone yoze mayula. Kuliasa chacho te muchichinga kukunga mata ni maswalale ni kufika “upite” unji hanji mbongo.—Daniele 11:40, 42, 43.

Jita yize yinakundama

Mbimbiliya yakusolola ngwo yuma hashi muyipiha chinji kuhia chize yili. Yesu kambile ngwenyi: “Kumukukapwa luyinda munene, yoze kanda alingiwa kama chize ku uputukilo wa hano hashi.” (Mateu 24:21) “Luyinda” wacho matutwala ndo ku jita yize akuvuluka ngwo Armagedone, jita yize muyikalingiwa ha tangwa linene lia Zambi Mukwa-Ndundo-Jeswe.”—Usolwelo 16:14, 16.

Chipwe chocho, Armagedone muyikalamwina atu. Kupalikila mu jita yacho, Zambi makanongesa mianangana a hashi waze akukoka jita yize yakupihisa yuma yinji hashi. Mba unyingike chize Armagedone muyikaneha sambukila ya mutolo, tanga yikuma yino:

•  “Jita ya Armagedone Yika?”

•  “Armagedone Yili Lusango Mupema!”