Lamba Lize Jita Yakuneha
Jita yakuneha lamba linji kuli atu waze akupalikamo. Maswalale ni atu waze hi maswalale ko kananyingika kanawa lamba lize jita yakuneha.
MASWALALE
“Kanji-kanji, mu jita twakumona atu waze anaashiha hanji waze analemana. Chino muchihasa kutuvwisa woma.”—Gary, wa ku Gra-Bretanha.
“Kangwashile fundanga hanyima ni mu meso. Namwene nawa atu anji waze afwile, hakachi ko hapwile twanuke ni tushinakaji. Jita yakukalisa mbunge ja atu.”—Wilmar, wa ku Colômbia.
“Chili chikalu kwecha kunyonga yuma yipi, chipi-chipi nyi mashiha mutu kumeso je. Miteto ni kulila cha mutu wacho yakupwa ngwe yinanungu mu manyonga je. Chili chikalu kuvulama yuma yize mutu wacho apalikile.”—Zafirah, wa ku Estados Unidos.
ATU WAZE HI MASWALALE KO
“Nanyongene ngwami, chichi keza kawahilila nawa ku mwono. Nevwile woma wa kutokesa mwono wami, wa asoko jami ni wa masepa jami.”—Oleksandra, wa ku Ucrânia.
“Chili chikalu kumana mu mulongo chize ha mandemba ndo ha muchima ufuku chakuhona kunyingika nyi makwasa fundanga nyi ka.”—Daler, wa ku Tajiquistão.
“Yisemi jami kaashihile ku jita. Chocho, yingupwa mwana-shiwa chakuhona kupwa ni yoze mangufunga.”—Marie, wa ku Ruanda.
Chipwe ngwe atu wano kamwene lamba linji mumu lia jita, nihindu haliapwila kali ni sambukila. Chikwo nawa, kali ni shindakenyo ngwo, kwasala hakehe hanga mbwanja jeswe hamwe ni jita jihwe. Kupalikila mu Mbimbiliya, mukanda uno muulumbununa chize chino muchikalingiwa.