An Nunnak Cu Duhdim A Si—Nang tah Cutin Na Tuah Kho Lai Maw?
Ganada ram i unau pa Marc cu van kong hlathlainak bu nih an hmanmi a hnok ngaimi seh an sernak kampani ah rian a hmu. Cuka ah caan cheu rian a ṭuan pah in caanhmaan hmaikal zong a ṭuan. A hnu ah, rian zohkhenhtu pa nih na rian kan kaiter lai tiah a ti. Caantling in ṭuan ding rian a si i lahkhah a tam deuh. Marc nih zeidah a rak tuah?
Philippine ram i unau nu Amy cu sianginn a kai pah in caanhmaan hmaikal a ṭuan. Degree a lak hnu ah lahkhah tampi pek ding caantling in ṭuanmi rian ah auh a rak si. Amy nih zeidah a rak i thim?
Marc le Amy cu an biakhiahnak aa dang. An i thimmi a phichuak nih hlan lio Korin khua Khrihfa pawl sin pekmi ruahnak cheuhnak cu fim a si kha a langhter. Lamkaltu Paul nih hitin a rak ṭial: “vawlei cung thil a tawngtham mi hna nih khan . . tlamtling in kan tawngtham manh hna lai lo ti bantukin um hna seh.”—1 Kor. 7:29-31.
Vawlei kha An Tawnghtham nain Tlamtling In A Si Lo
Marc le Amy nih zeitindah bia an khiah ti kan i ruah hlan ah Korin khuami hna sin a ca-kuat ah Paul nih a hmanmi “vawlei” (Grik, ko’smos ) timi biafang sullam kha zoh hmasa u sih. Mah Baibal cang a hmanmi ko’smos nih kan nunnak hi vawlei ningcang, minung bu dihlak kha a sawh. Cu ah inn, rawl le thilpuan ti bantuk nifa nunnak i thil zaran hna aa tel. Cu bantuk nifa herhmi thil hna hmuh awkah rian pakhat kan ngeih awk a si. A si ko, kanmah le kan innchungkhar zohkhenh ding timi Baibal fialmi rian ṭuan khawh awkah hi vawlei kha kan tawnghtham lai. (1 Tim. 5:8) Asinain, caan khatte ah ‘vawlei hi a lo cuahmah cang’ ti kha kan hngalh. (1 Johan 2:17) Cucaah, vawlei kha “tlamtling” tein si loin a herh zat vial in kan tawnghtham.—1 Kor. 7:31.
Vawlei kha ri ngei in tawnghtham awkah Baibal nih ruahnak a cheuh hna caah unau nu, unua pa tampi cu an sining kha an ruat ṭhan, rian ṭuan caan an ṭhumh i an nunning kha sawhsawhte an siter. Cu tikah an innchungkhar le Jehovah rian ah caan tam deuh an pek khawh i an nunnak duhdim a si kha an hmuh. Cuhleiah, an nunning sawhsawhte an siternak nih vawlei nakin Jehovah kha a bochanter deuh hna. Nang tah cuticun na tuah kho ve lai maw? Pathian Pennak ṭhanchonak caah caan tam deuh pek khawh awkah na nunning kha sawhsawhte na siter lai maw?—Matt. 6:19-24, 33.
“Hlan Nakin Jehovah he Kan I Naih Deuh”
Hmasa ah kan chim cangmi Marc nih vawlei kha tlamtling in tawngtham hlah u timi Baibal ruahnak cheuhmi kha a rak ngeih. Na rian kan in kaiter lai timi kha a al. Ni tlawmpal hnu ah, rian zohkhenhtu nih lahkhah a tammi rian thar kan pek lai tiah a ti ṭhan. “Mah cu hneksaknak a si, asinain ka al ṭhan” tiah Marc nih a ti. Zeiruangah ti kha Marc nih hitin a rak chim: “Ka nupi Paula he Jehovah rian kha a si khawh chung tling tein ṭuan kan duh. Cucaah, sawhsawh tein nun awkah biakhiahnak kan rak tuah. Kan hmuitinh phanh khawh awkah fimnak kan pe tiah Jehovah sinah thla kan cam. Cun Jehovah rian tlamtling in ṭuan zeitik ah kan thawk lai timi caan kha kan khiah.”
Paula nih hitin a rak chim ve: “Zarhkhat ah ni thum siizung ah secretary ka ṭuan i lahkhah tampi ka hmu. Caanhmaan hmaikal zong ka ṭuan. Asinain, Marc bantukin Pennak kong chim a herh deuhnak hmun ah Jehovah rian ṭuan ka duh. Rian chuahnak ca ka ṭial tikah rian zohkhenhtu nih rian tawlreltu ding secretary ṭuan awkah thiamnak na ngei, na ṭuan lai maw a ka ti. Mah cu siizung i secretary rian vialte lakah lahkhah a sang bikmi a si nain rian chuah ding ka biakhiahnak kha ka thleng hlei lo. Mah rian zeicah ka al ti kha ka chimh tikah rian zohkhenhtu nih ka zumhnak kha a thangṭhat.”
A rauh hlan ah, Marc le Paula cu Canada ram i amah dang tein a ummi Khrihfabu hmete ah caantling hmaikal ṭuan awk rian pek an si. Cuka ah an i ṭialnak thawngin zei ṭhatnak dah a chuak? Marc nih hitin a chim: “Ka nunnak i a cheu tluk hrawng ka rak ṭuanmi lahkhah a tammi rian in ka chuah tikah hmailei caah ka thin a phang nain Jehovah nih kan phungchim rianṭuannak kha thluachuah a pek. Midang kha Pathian biak awkah kan bawmh hna caah kan i lawm tuk hringhran. Caantling rian nih kan innchungkhar kha duhdim a siter. A biapi bik a simi Jehovah rianṭuannak kong kan i ruahceih tawn. A hlan nakin Jehovah he kan i naih deuh ti kha kan hngalh.” (Lam. 20:35) Paula nih hitin a chim ve: “Rian le inn ṭha chuah tak hnu cun Jehovah lawng a dihumnak in i bochan ding a si ko cang. Cuti kan tuah caah Jehovah nih thluachuah a kan pek. Khrihfabu thar i dawtmi unau nu le unau pa hna nih a kan dawt i an caah kan herh tiah a kan ruahter. Hlan i rian ah ka hmanmi ka thazang kha atu cu mi nih Pathian an hngalh nakhnga bawmhnak caah ka hman cang. Hi rian ka ṭuan caah kaa lawm tuk.”
‘Ka Tlam A Tling nain Kaa Nuam Lo’
Hmasa ah langhtermi Amy timi nu nih cun lahkhah tampi hmuh dingmi caantling ṭuan awk rian kha aa thim. Amy nih hitin a chim: “Kum khat chung cu phungchim rian ah biatak tein ka tel kho. Asinain Jehovah rian ṭuan nakin ka rian kai ding kha ka nunnak ah duh-sah in a biapi deuhmi a hung si. Rian kauh chap awk an ka sawm tikah ka cohlan i ka rian kai nakhnga fakpi in kaa zuam. Ka rian a tam chin luaimai i phungchim rian ah caan ka hmanmi a tlawm deuh chin lengmang. A donghnak ah, phungchim rian ah ka tel ti lo.”
Cu lio caan kong kha Amy nih hitin a phuan: “Tangka lei ah ka tlam a tling. Khual ka tlawn a tam i ka rian a san caah upatnak ka hmu. Asinain, kaa nuam lo. Tangka ka ngei ko nain buaibainak tampi ka ton. Zeidah a palh hnga ti ka ruat. A donghnak ah, vawlei rian a hnu in heh tiah ka zulh ruangah ‘zumhnak a kaltak’ dengmang mi ka si kha ka hun hngalh. A phichuak cu Baibal nih a chim bantukin ‘ngaichiatnak a phunphun’ ka ton.”—1 Tim. 6:10.
Amy nih zeidah a rak tuah? Hitin a chim: “Pathian he pehtlaihnak ṭha ka ngeih ṭhan nakhnga ka bawm u tiah Khrihfa upa pawl kha ka chimh hna, cun kaa pum ṭhan. Hla sak lioah ka ṭap. Kum nga chung hmaikal ka rak ṭuan lioah ka si a fak nain kaa nuamh kha ka lung ah a chuak ṭhan. Tangka kawlnak ah ka caan sawksam ti loin Pennak kha hmasa bik ah chiah awk a si kha ka hngalh. Cucaah a niam deuhmi rian ah kaa ṭhial. Ka lahkhah cu hlan ka hmuhmi a cheu lawng a si nain phung-chimnak rian ah kaa tel kho ṭhan. Hlan ah kum tlawmpal hmaikal ka ṭuan caah ka rak i nuam. Atu zong vawlei rian ah caan tampi ka pek lio ah ka hmuh lomi lungsinak kha ka hmuh.”
Nang tah na sining thleng in na nunning kha sawhsawhte na siter kho lai maw? Pennak rian ṭhanchonak caah na caan na hman a si ahcun nang zong na nunnak duhdim a si ve lai.—Ptb. 10:22.
[Cahmai 19nak i hmanthlak]
Na sining thleng in na nunning kha sawhsawhte na siter kho lai maw?
[Cahmai 19nak i rinli kulh]
“Atu Kaa Nuam Tuk Cang!”
American ram i Khrihfa upa David cu a nupi le a fale he caantling rian ah tel a duh. A rianṭuannak ah caan cheu rian ṭuan dingin a timhtuah i caanhman hmaikal a thawk. Cuti thlennak a tuahmi nih a nunnak kha duhdim a siter maw? Thla tlawmpal a rauh hnu ah, a hawikom pakhat sinah David nih hitin ca a rak ṭial: “Jehovah rian ah innchungkhar ningin tling tein i tel tluk in lungtlinnak a pemi zeihmanh a um lo. Hmaikal rian kha i nek awkah caan tam nawn pek a hau lai tiah ka ruah nain atu cu kaa nuam tuk cang! Mah nih hrimhnak a pek taktak.”
[Cahmai 18nak i hmanthlak]
Phungchimnak ah aa telmi marc le Paula