Jehovah Nih Mi Ṭhalo Kha Bia A Ceih Cang Hna Lai
“Na Pathian ton awkah i tim tuah.”—AMOS 4:12.
1, 2. Pathian nih ṭhatlonak a donghter cang lai tiah zeicah kan hnabei a sei khawh?
HI vawlei cung i ṭhatlonak le sifah harnak hna hi Jehovah nih a donghter cang lai maw? Kum zabu 21nak aa thawkka ah hin mah biahalnak cu voi dang tawn nakin hal awk a tlak khun. Khua zeika zoh hmanhah, minung nih zangfahnak an ngei lo ti a lang. Zangennak, hrocernak le ziknawh einak a um lomi vawlei kha kan va i ngaih dah!
2 Thawngṭha asimi cu hi ṭhatlonak hi Jehovah nih a donghter hrimhrim cang lai ti kan hna bei a sei khawhmi hi asi. Ṭhatlonak cungah Pathian nih bia a khiah cang lai ti kha a sining hna nih a fehter. Jehovah cu a ding i a dik. Salm 33:5 ah: “Bawipa nih dinnak le ṭhatnak [“diknak,” NW] cu a duh” ti kan theih. Adang salm zong nih “zangennak a duhmi kha a thinlung dihlak in a huat hna” tiah a ti. (Salm 11:5) Dinnak le diknak a duhmi, a ṭhawng bikmi Jehovah Pathian nih a huatmi kha zungzal let loin a um lai lo ti cu a fiang ko.
3. Hmailei kong Amos profet chimchungbia ah zeidah a lang khun?
3 Jehovah nih ṭhatlonak a hrawh hrimhrim lai ti kan zumh khawhnak a ruang dang pakhat kha ruat hmanh. Hlan i mi a rak pehtlaih hna nak ṭialmi nih khakha aamah a khan. Jehovah nih mi ṭhalo pawl a rak pehtlaih hna nak i a lang ngaimi zohchunh awk thil cu Amos Baibal cauk ah hmuh asi. Hmailei kong Amos profet chimchungbia nih Pathian biaceihnak kong pathum kha fakkhun in a langhter. Pakhatnak ah, a biaceihnak cu a zungzal aa tlak. Pahnihnak ah hrial khawh asi lo. Pathumnak ah, mi a thim, zeicahtiah Jehovah nih misual mi hna cu dan a tat ko hna nain aa ngaichihmi le ruahnak ṭha taktak a ngeimi hna cungah cun zangfahnak a ngei.—Rom 9:17-26.
Pathian Biaceihnak Cu A Zungzal Aa Tlak
4. Jehovah nih Amos cu khoika ah dah, zei timhnak caah dah a rak thlah?
4 Amos chan ahcun, Israel mi hna cu pennak pahnih ah an i ṭhen cang. Pakhat cu thlanglei phun-hnih pennak Judah asi. Adang pakhat cu chaklei phun-hra pennak Israel asi. Amos cu amah a chuahkehnak ram Judah khua in Israel ah profet rian va ṭuan awkah Jehovah nih a rak thlah. Cuka ah Amos nih Pathian biaceihnak kong kha a va thanh lai.
5. A profet chimchungnak kha Amos nih zei ram hna in dah a rak i thawk i, Pathian biaceih awk an i tlaknak a ruang pakhat cu zeidah asi?
5 Amos nih Jehovah biaceihnak kong thanh ding a rian kha lam dik a zul duh lomi chaklei Israel pennak ah a rak thawk lo. Mahnak cha cun, a pawngkam ram ramruk in aa thawk i Pathian biaceihnak kong cu a rak thanh. Mah ram ruk cu Siria, Filistin, Tair, Edom, Ammon le Moab ram hna an si. Sihmanhsehlaw annih cu Pathian biaceihnak huah awk aa tlak taktak mi an si maw? An i tlak taktak. A ruang pakhat cu Jehovah miphun an ral hna nak kha an ngol duh lo.
6. Zeicahdah Siria, Filistin le Tiar mi hna cungah Pathian nih chiatnak a tlunter?
6 Tahchunhnak ah, Siria mi hna nih “Gilead kha thir ha bunhmi facang cilnak thingtum in an cil” hna caah Jehovah nih sual a phawt hna. (Amos 1:3) Siria mi hna nih Jordan Rili nichuahlei Israel ram chung i hmun khat asimi Gilead kha an lak i cuka ummi Pathian mi hna kha harnak an pek ngaingai hna. Filistin le Tair mi hna nih tah zeidah an tuah? Filistin mi hna nih Israel mi hna kha ramdang ah an ṭhawl hna asilole sal ah an tlaih hna i Edom mi hna sinah an zuar hna, a cheu cu Tair sal chawlettu pawl sinah an phan. (Amos 1:6, 9) Pathian mi hna sal i hei zuar khi ruat tuah hmanh! Cucaah Siria, FIlistin le Tair mi hna cung i Jehovah nih chiatnak a tluntermi cu khuaruahhar asi lo.
7. Edom, Ammon le Moab mi hna cu Israel mi hna he zeitindah an i rualchan, asinain Israel mi hna kha zeitindah an pehtlaih hna?
7 Edom, Ammon, Moab hna cu Israel mi hna he siseh, pakhat le pakhat kar ah siseh aa lomi thil pakhat a um. An ram thum in Israel mi he rualchan cingla an si. Edom mi hna cu Jakob faphir a u Esau in a chuakmi Abraham tefa an si. Cucaah an nih cu Israel mi hna he unau an si. Ammon le Moab mi hna cu Abraham tupa Lot tefa an si. Sihmanhsehlaw, Ammon le Moab nih Israel kha unau bantuk in an pehtlai hna maw? A nai sai lo! Edom nih “an phun hawi” kha zangfahnak ngei loin nam in an dawi hna i Ammon mi hna zong nih sal taangmi Israel mi hna kha puar ngaiin an tuahtau hna. (Amos 1:11, 13) Amos nih Moab mi hna nih Pathian mi hna an hrem hna ti kong dairek in a langhter lo nain, annih nih Israel mi hna an rak doh hna nak cu a sau cang. Cucaah mah sahlawh rualchan ram thum hna cu dantat ing ding an i tlak. Jehovah nih an cungah mei bantuk rawhnak a tlunter lai.
Pathian Biaceihnak cu Hrial Khawh Asi Lo
8. Israel rualchan a simi ram ruk hna cu zeicahdah Pathian biaceihnak an rak hrial khawh lo?
8 Amos profet chimchungbia hmasa deuh i langhtermi mah ram ruk hna cu Pathian biaceihnak ing ding an i tlak ti cu a fiang ko. Cupinah, annih caah cun luatnak lam a um lo. Amos angan 1 ahme 3 in angan 2 ahme 1 tiangah Jehovah nih “dantatnak ka tlunter ding kha ka let lai lo” tiah voi ruk bak a chim. A bia ningin, an cungah dantatnak cu a rak tlunter taktak. Annih nih chiatnak an in ti kha ṭialmi tuanbia nih a hmaan ti a langhter. A donghnak ahcun, a tlawm bik ram li asimi Fillistin, Moab, Ammon le Edom mi hna cu an lo dih hirhiar!
9. Judah ram chungmi hna cu zeidah an i tlak i zeicah an i tlak?
9 Apasarihnak asimi, a chuahkehnak Judah ram kha Amos profet chimchungbia nih a bikin a chim ṭhan. Amos nih Judah pennak biaceihnak kong a thanhmi kha chaklei Israel pennak mi hna nih an rak theih tikah an khuaruah a har len ko lai. Zeicahdah Judah ram chungmi hna cu biaceih awk an rak i tlak? “A [“Jehovah,” NW] nawlbia kha an zul lo” tiah Amos 2:4 nih a ti. Cu bantuk a nawlbia zei an rel lomi kha Jehovah nih i theihter loin a um lo. Amos 2:5 ningin: “Cucaah Judah cungah mei ka thlah lai i cu mei nih cun Jerusalem inn ṭha vialte kha a kangh dih hna lai” tiah a rak chimchung.
10. Zeicahdah Judah nih harnak ton kha a hrial khawh lo?
10 Zumhawktlak lo Judah mi hna cu a ra laimi harnak kha an hrial kho lo. Jehovah nih a voisarihnak tiang, “dantatnak kha ka let lai lo” tiah a rak ti. (Amos 2:4) Judah cu Babilon nih B.C.E. 607 i a rak hrawh tikah khan kha dantatnak chimchungbia kha a rak in. Mi ṭhalo hna caah Pathian biaceihnak hrial khawh asi lo ti kha atu kan hmuh ṭhan.
11-13. Amos nih zei ram kong dah a hleiin profet bia a rak chimchung i, cuka ah zei bantuk hneknak hna dah a um?
11 Profet Amos nih a pasarihnak ram cungah Jehovah biaceihnak a rak thanh dihka te asi. A profet chimchungbia cu a dih cang tiah mi pakhatkhat nih a ruah asi ahcun a palh lai. Amos cu thanh ding thil tampi a ngei rih! Chaklei Israel pennak cungah a fak ngaimi biaceihnak thawng va thanh ding rian kha pek asi cang. A ziaza lei le a thlaraulei a ṭumchuk i ngaihchiat awk ngai asi ning ruangah Israel cu Pathian biaceihnak ing ding aa tlak.
12 Amos nih a profet chimchungbia ah Israel pennak chung i atu le atu a ummi hneknak kong kha a rak phuan. Mah he aa tlaiin, Amos 2:6, 7 ah hitin kan rel: “Mah hihi Bawipa bia an si: Israel nih ṭhatlonak kha pakhat hnu pakhat in a tuah lengmang caah a cung i ka tlunter dingmi dantatnak kha ka let lai lo. Annih nih a sual lomi kha ngun ah an zorh hna i sifak mi kha kedan tuah khat ah an thlen hna. Annih nih sifak mi kha an lu vawlei ah an lamh chih hna i mi nauta pawl kha lam thlang ah an en hna.”
13 Miding mi hna kha ‘ngun men’ ah an zorh hna ti a sullam cu ziknawh in ngun an lak i biaceihtu hna nih sualnak a ngei lomi hna kha dan an tat hna ti asi kho men. Tangka coihtu pawl nih leiba tlawmte caah mi sifak hna kha “kedan tuahkhat” man ah sal ca in an zuar hna. “Sifak mi” kha lungretheihnak, ngaihchiatnak asilole ningzahternak hmelchuhnak in an lu vawlei ah lamh chihnak ing tiangin zangfahnak an ngei lo. Ziknawh einak a karh tuk caah “nauta pawl” nih zei dinnak hmanh hmuh i ruahchan khawh asi lo.
14. Israel phun-hra pennak ah ahote dah hremnak a ing?
14 Ahote dah hremnak a ing ti kha philhhlah. Annih cu ram chung i a ummi miding hna, sifak le nauta mi an si. Israel mi hna he tuahmi Jehovah nawlbia biakamnak ah a tonchiami le a herhbaumi hna kha zangfahnak langhter ding hal an si. Sihmanhsehlaw, Israel phun-hra pennak chungmi hna umtuning cu a chia tuk lehpek.
“Na Pathian Ton Awkah I Tim Tuah”
15, 16. (a) Zeicah Israel mi hna cu “na Pathian ton awkah i tim tuah” tiah ralrin pek an rak si? (b) Mi ṭhalo nih Pathian biaceihnak an hrial kho lo ti kha Amos 9:1, 2 nih zeitindah a langhter? (c) B.C.E. 740 ah Israel phun-hra pennak cungah zeidah a rak tlung?
15 Israel ram ah ziaza rawhralnak le adang sualnak a karh ruangah profet Amos nih dohtu ram kha hitin ralrin a pek: “Na Pathian ton awkah i tim tuah.” (Amos 4:12) Jehovah nih apariatnak ah “dantatnak kha ka let lai lo” tiah a voi riatnak tiang a thanh ṭhan caah, zumhawktlak lo Israel mi hna cu a ra cang laimi Pathian dantat biaceihnak kha an hrial kho lai lo. (Amos 2:6) Thuh aa zuammi mi ṭhalo pawl he aa tlaiin Pathian nih hitin a rak chim: “Ahohmanh a luatmi an um lai lo, a taangmi himte in a ummi zong an um lai lo; Sheol i an vung kal [“khor an i cawh,” NW] hmanhah, khika hmanh cun ka kut nih a vun hnuh hna lai; vancung i an kai zongah, khika hmanh cun ka va ṭhumh hna lai.”—Amos 9:1, 2.
16 Mi ṭhalo pawl cu “Sheol” tiang khor cawh in a langhtermi a thuk bikmi vawlei i thuh an i zuam len hmanhah Jehovah dantat biaceihnak kha an hrial kho lai lo. ‘Vancung kai’ timi a sangmi tlang cung ah himnak an i kawl sek hmanhah Pathian biaceihnak cu an hrial kho hlei lai lo. Jehovah ralrin peknak cu a fiang: A phanh lonak thuhnak hmun a um lo. Pathian cu a din caah Israel ram i ṭhatlonak tuahnak kha biaceih a hau. Cu caan cu a rak phan. Amos profet chimchungbia a chim hnu kum 60 hrawng a rauh, B.C.E 740 ah Israel ram cu Asiria nih a rak tei.
Pathian Biaceihnak Cu Mi A Thim
17, 18. Amos angan 9 nih Pathian zangfahnak kong kha zeitindah a langhter?
17 Amos profet chimchungbia nih Pathian biaceihnak cu a zungzal in aa tlak ti le hrial khawh asi lo ti kha a kan hngalhter. Sihmanhsehlaw Jehovah biaceihnak cu mi a thim ti zong kha Amos cauk nih a langhter. Mi ṭhalo cu khoika i an i thuh hmanhah Pathian nih a hmuh khawh hna i bia a ceih khawh hna. Cun zangfah a duhmi aa ngaichihmi le ding tein a ummi hna zong kha a kawl khawh hna. Mah khakha Amos cauk angan a donghnak ah fakkhun in fianter asi.
18 Amos angan 9 ahme 8 ah “asinain Jakob tefa hna cu an ci an ruang in ka hlo hna lai lo” tiah Jehovah nih a rak ti. Am 9 Ahme 13 le 15 ningin, “ka mi hna cu vanṭhatnak kha ka pek ṭhan hna lai” tiah Jehovah nih bia a rak i kam. Annih cu zangfahnak langhter an si lai i himnak le hlawhtlinnak kha an hmu lai. “Leithuangtu nih rawl ṭuantu a zulh colh [lai]” tiah Jehovah nih bia aa kam. Ṭuanmi rawl a tam tuk caah pumh dih an si hlanah a hnu leithuan caan le cinthlak caan a phak ṭhan lai khi mitthlam ah suai tuah hmanh!
19. A taangmi Israel le Judah mi hna cungah zeidah a rak cang?
19 Jehovah nih Judah le Israel i mi ṭhalo pawl bia a ceih hna tikah aa ngaichihmi le ding tein khua a sami hna cungah zangfahnak a langhter caah mi a thim i bia a ceih tiah chim khawh asi. Amos angan 9 i ṭialmi remh ṭhannak profet chimchungbia a rak tlin tikah aa ngaichihmi a taangmi Israel le Judah mi hna cu Babilon sal tannak in B.C.E. 537 ah an rak kir ṭhan. An chuahkehnak ramte ahkhan an rak kir i, a thiangmi biaknak kha an rak dirh ṭhan. Him tein inn zong an rak i sak ṭhan i mitsur hmun le dum kha an i serh hna.
Jehovah Biaceihnak A Phan Lai
20. Amos thanhmi biaceihnak thawngpang kong kan ruah tikah zeidah fek tein a kan zumhter ding asi?
20 Amos thanhmi Jehovah biaceihnak thawngpang kong ruahnak thawngin hi kan chan ṭhalo hi Jehovah nih a donghnak a phakter hrimhrim lai ti kha a kan zumhter awk asi. Zeicah cutin kan zumh khawh? Pakhatnak ah, Pathian i mi ṭhalo hna a pehtlaihnak hna nih atu kan chan cungah zeidah a tuah hrimhrim ve lai ti a langhter. Pahnihnak ah, zumhnak in a pialmi Israel ram kha Pathian nih bia a rak ceihmi nih vawlei pumpi i a hmaan lomi biaknak “Baibilon khualipi” i mawhchiat awk a tlak bikmi Khrihfaram kha Pathian nih a hrawh cang lai ti a fianter.—Biathlam 18:2.
21. Zeicahdah Khrihfaram cu Pathian biaceihnak in aa tlak?
21 Khrihfa ram cu Pathian biaceihnak a huah awk a tlak ti cu a fiang ko. Ngaihthiam khawh asi lomi biaknak lei le a ziaza a umtuning nih biaceih awk aa tlak kha a fianter. Khrihfaram le adang Satan vawlei cu Jehovah biaceihnak in an i tlak. Hrial khawh zong asi lai lo, zeicahtiah biaceihnak caan a phak tikah Amos angan 9 ahme 1 bia hi a tling lai: “Ahohmanh a luatmi an um lai lo, a taangmi himte in a ummi zong an um lai lo.” Asi, mi ṭhalo pawl cu khuazei i an va i thuh len hmanhah Jehovah nih a hmuh hna lai.
22. Pathian biaceihnak he aa tlaiin zei kha dah 2 Thesalon 1:6-8 nih a fianter?
22 Pathian biaceihnak cu a zungzal aa tlakmi asi, hrial khawh asi lo i mi a thim. Khakha lamkaltu Paul i hi bia ahhin kan hmuh khawh: “Pathian nih a hmaanmi thil kha a tuah lai. Sifahnak nan cungah a tlun tertu hna cungah khan sifahnak a tlunter ve lai i sifah a ingmi nan cung le kanmah cung zongah damnak a tlunter lai. Bawipa Jesuh cu a vancungmi mi ṭhawng hna le meizik he, Pathian a hngal lomi hna le Bawipa Jesuh kong Thawng Ṭha a ngai duh lomi hna dantat awkah, a rung ṭum tikah dingte in a tuah lai.” (2 Thesalon 1:6-8) A chiti thuhmi hna cungah harnak an tlunter ruangah biaceih awk a tlakmi hna cungah “Pathian nih a hmaanmi thil kha a tuah lai.” ‘Bawipa Jesuh cu a vangcungmi hna mi ṭhawng hna le meizik he a rung ṭum tikah’ mi ṭhalo cu an luat khawh lai lo caah, mah biaceihnak cu hrial khawh asi lo. Pathian biaceihnak cu mi zong a thim lai i Jesuh nih “Pathian a hngal lomi hna le Bawipa Jesuh kong Thawng Ṭha a ngai duh lomi hna” kha phu a hlam hna lai. Cun harnak a ingmi Pathian a ṭihmi hna kha cu Pathian biaceihnak ruangah an hna a ngam lai.
Miding Hna Caah Ruahchannak
23. Amos cauk nih zei ruahchannak le hnangamnak dah a kan pek khawh?
23 Amos phrofet chimchungbia ah miding mi hna caah ruahchannak ṭha ngaingai le hnangamtertu thawngpang a um. Amos cauk nih a rak chimchung bangin, Jehovah nih hlanlio a mi hna kha a rak hrawk dih cikcek hna lo. A donghnak ah Israel le Judah saltang hna kha a pumh hna i an chuahkehnak ram ah a kirpi ṭhan hna i himnak le rumnak kha tling tein a pek hna. Mah cu kan chan caah zei sullam dah a ngeih? Mah nih khan Pathian biaceih tikah, mi ṭhalo cu khua zei i an i thuh hmanhah Jehovah nih a hmuh hna lai i a zangfahnak he aa tlakmi hna zong hi vawlei khuazei i an um hmanhah a hngalh hrimhrim hna lai ti kha a kan zumhter.
24. Zei ti lam hna in dah tuchan Jehovah a mi hna cu thluachuah an hmuh?
24 Miṭhalo pawl cung i Jehovah biaceihnak kan hngah lioah zumhfekmi a salle in zeidah kan ton? Jehovah nih thlaraulei duhdim in a kan pek! Khrihfaram i a hmaan lomi cawnpiaknak nih a chuahtermi lih le merhmi in a luatmi biakning ah kan i nuam. Cun Jehovah nih thlarau rawl tampi zong a kan pek fawn. Asinain, Jehovah pekmi mah thluachuah tampi ah rian ngan ngai pakhat zong aa tel ti kha philh hlah. A ra laimi biaceihnak kong kha midang va chimh awkah Pathian nih a kan ruahchan. “Zungzal nunnak hmuh a duhmi hna” hmuh awk kha kan si khawh chung in tuah kan duh. (Lamkaltu 13:48, NW) Asi, atu kan i nuamhmi thlaraulei rumnak kha asi khawh chung tam sinah pek kan duh. Cun a ra cang laimi Pathian biaceihnak ah luat hna seh ti kha kan duh piak fawn hna. A tak ah, mah thluachuah kha mi va peknak ah, thinlung hmaan kan ngeih a hau. A hnu capar i kan hmuh lai bantukin, Amos profet chimchungbia nih mah kong zong kha fiang khun in a langhter lai.
Zeitindah Na Leh Lai?
• Jehovah biaceihnak cu a zungzal aa tlak ti kha Amos profet chimchungbia nih zeitindah a langhter?
• Pathian biaceihnak cu hrial khawh asi lo timi Amos chimmi a hmaannak zei langhternak dah a um?
• Pathian biaceihnak cu mi a thim ti kha Amos cauk nih zeitindah a langhter?
[Cahmai 20nak i Hmanthlak]