I Cungcang Hlah!
1. Zeiti lam in dah ‘ṭhatnak kha kan kham lo’?
1 Pathian Pennak kong thawngṭha kha lungtho tein kan thanhnak thawngin kan sang ah ‘ṭhatnak kha kan kham lo.’ (Ptb. 3:27) Pathian uknak tang i kan hmuh laimi a nuammi caan he aa tlaimi thawngpang cu mi kan chimhmi hna lakah thawngṭha bik a si. Tonsaphak phungchimnak, cauk pekṭhenhnak thawng in Pennak ruanchannak kong kha lungtho tein na thanh ko lai nain Baibal cawnpiaknak na ngeih rih lo ahcun pakhat in tuah khawh awk tinhnak ngei.
2. Zei nih dah Baibal cawnpiaknak tuah ding kha i cungcang in a umter?
2 Baibal cawnpiaknak tuah khawh lo awk dawntu ngan bik pakhat cu kanmah lungthin hi a si tawn. A cheukhat cu ka tuah thiam lai lo asiloah ka rian a tam an ti caah Baibal cawnpiaknak tuah kha an i cungcang. Baibal cawnpiaknak tuah ding i cungcang lo awkah a tanglei ruahnak cheuhmi hi bawmtu a si kho.—Matt. 28:19; Lam. 20:20.
3. Baibal cawnpiak awkah zeicah tlamtlinhmi kan si?
3 I Zumhlonak: Ca tlawmpal lawng na thiam asiloah a dangdang ruangah Baibal cawnpiaknak tuah awkah naa zumh lo zong a si kho. Kum zabu pa-khatnak i hmualngeimi phung-chimtu hna cu “fimthiamnak zeihmanh a ngei lomi, mi saw-sawh menmen” an si. Zeicah midang kha biatak an cawnpiak khawh hna? Annih cu “Jesuh hawikom an rak si.” (Lam. 4:13) A Liannganmi Saya Jesuh sinah an rak cawng. Jesuh cawnpiaknak le cawnpiak ningcang hna kha kan caah Baibal ah khumh an si. Cucaah ca tlawmpal lawng na thiam hmanh ah zei fimnak hmanh he tahchunh khawh lomi thlarau lei fimnak tampi na hmu.—Isa. 50:4; 2 Kor. 3:5.
4. Amos zohchunh awk in zeidah kan i cawn khawh?
4 Uktu ṭhalo le bawi hna kha mawhchiat awkah a caancaan ah profet kha Jehovah nih a hman hna. Profet cheukhat cu Amos bantukin mi nauta an si. Amos nih, “Kei cu profet ka si lo, profet fa zong ka si lo; saṭil khal le saikamor thing thei a cingmi ka si” tiah a ti. (Amos 7:14) Asinain Amos cu cawfa a biami tlang-bawi Amaziah kha Jehovah dantatnak kong chimh awkah a rak i cungcang lo. (Amos 7:16, 17) Pathian rian a ṭuantu kan si le mah rian caah tlamtlinhmi a kan siter khawh kha i cinken zungzal awk a si.—2 Tim. 3:17.
5. Kan rian a tam hmanh ah Baibal cawnpiaknak pakhat thawk awkah zeicah i zuam awk a si?
5 Rian Tamnak: Na rian a tam hmanh ah phungchimnak ah hmaan tein i tel khawh awkah a caan na pek ko lai. Baibal cawnpiaknak tuah hi phungchimnak rian ah a nuam bikmi pakhat a si kho. Jehovah Bia nih mi pa-khat a nunning a thlenmi hmuh hi tinvo sung a si. (Heb. 4:12) Mi pakhat kha ‘biatak hngalh’ awkah kan i pumpeknak kha Jehovah nih a duhmi a si. (1 Tim. 2:4) Pakhatkhat nih aa ngaihchiah i a nunning hlun a hlawt i Pathian sal in a ṭhancho tikah vancungmi hna hmanh an i lawm.—Luka 15:10.
6. Pathian duhnak tuahnak ah zei tinvo sung dah kan ngeih?
6 Pathian nih “mi vialte nih khamhnak hmu hna seh ti le biatak kha hngal hna seh” ti a duh. (1 Tim. 2:4) I cungcang lo tein Baibal cawnpiaknak tuahnak thawngin Pathian duh ning-in kan tuah hi tinvo sung a va si dah!